1. Wapi invitasion Jesus pesá na bantu 4 yina vandá sala kisalu ya lapeche, mpe yinki ba salá?

PIERE, Andre, Zaki, na Yoane vandá teká bambisi yina ba vandá pecheke. Kanisa na faso ba pamuká ntangu Yesu zonzá na bawu: “Beno landa munu, mpe mu ke kumisa beno [ba yina ke pecheke] bantu.” * Yinki ba salá? Biblia ke zonzá: “Na mbala mosi ba biká [ba-filet] ya bawu mpe ba landak’ yandi.” (Mat. 4:18-22, nwt-MK) Desizion yina ba baká chanjeke mbala mosi luzingu ya bawu. Na kisika ya kukanga bambisi, ba zola banda “kukanga bantu ya moyo.” (Luke 5:10, nwt-MK) Bubu yayi, Yesu ke na bokilá mpe ba yina ke na ntima ya mbote mpe yina ke zolá malongi ya Biblia na kusala faso bawu. (Mat. 28:19, 20) Nge me ndima kwandi invitasion ya Yesu ya kukuma muntu yina ke pecheke bantu?

2. Samu na yinki nge zolá bakila ve desizion ya kukuma muntu yina ke pecheke bantu faso mambu ya fioti, mpe yinki ke sadisa nge na kubaka desizion yango?

² Ntangu ya nkaka, nge me kuma mwa ntama na kulongoka ya nge ya Biblia, mpe nge me sala deja bachanjema na luzingu ya nge. Awa, nge zolá tala si nge lenda kuma proklamatere ya nsangu ya mbote. Si nge ke ntete na boma ya kundima invitasion ya Yesu, kulemba ve. Ntangu ya nkaka, nge ke na boma samu nge zaba ti ya ke desizion ya nene. Ata Biblia ke zonzá ti Piere na bakamarade ya yandi biká ba-filet ya bawu na “mbala mosi,” kasi ba baká ntangu ya kukanisa  avant na kubaka desizion yina. Avant kilumbu yina, 6 mois lutá deja na manima ya ntangu yina ba zabá mpe ba ndimá Yesu faso Masiya. (Yoa. 1:35-42) Faso mosi mpe, ya lenda vanda ti nge me longoka deja mambu mingi na yina me tadila Yehova na Yesu mpe nge ke na nsatu ya kukontinye na kukula na kimpeve. Kasi avant nge baka desizion ya kukuma proklamatere, nge zolá kanisa mbote-mbote na yawu. Yinki sadisá Piere, Andre mpe bantu ya nkaka na kubaka desizion yayi?

3. Wapi bifu zolá kulisa nsatu ya nge ya kundima invitasion ya Yesu?

³ Badisiple ya ntete ya Yesu zolá kisalu ya bawu, ba zabá bien kusala yawu, ba vandá na kuraje, mpe ba vandá na kifu ya kusalá yina ba vandá kanisá, na ntangu yina ba zolá sala yawu. Ntembe ve, bifu ya mbote yayi sadisá bawu na kuvanda ngolo na kisalu ya predikasion. Artikle yayi ke zonzila wa’ faso beto lenda vanda na bifu yango, samu beto mpe vandá ngolo na kisalu ya predikasion mpe ya kulonga bantu.

4. Samu na yinki Piere vandá zolá kisalu ya lapeche?

⁴ Piere vandá salá lapeche samu na kudikisa famiye ya yandi, kasi ya vandá ve kaka kisalu samu na yandi. Na kutala, Piere vandá zolá mingi kisalu ya lapeche. (Yoa. 21:3, 9-15) Yandi longoká mpe kuvanda muntu yina ke zolá kupeche bantu. Yehova sadisak’ yandi, mpe Piere kumá ngolo na kisalu ya yango.—Bis. 2:14, 41.

5. Faso beto ke na tangak’ yawu na Luke 5:8-11, samu na yinki Piere vandá na boma, mpe yinki lenda sadisa beto na kukatula boma ya faso yina vandá na yandi?

⁵ Beto ke precheke samu beto ke zolá Yehova, ya ke rezon ya ntete yina ke natá beto na kusala kisalu yayi. Luzolo ya beto samu na Yehova lenda sadisa beto na kuzonzila mambu ya Biblia na bantu ya nkaka, ata beto ke na kanisá ti beto ke ve na ngolo ya kusala yawu. Ntangu Yesu bokilá Piere na kukuma muntu yina ke pecheke bantu, yandi zonzá na yandi: “Kuvanda dyaka ve na  boma.” (Tanga Luke 5:8-11.) Piere vandá na boma ya mambu yina lenda kumina yandi si yandi kuma disiple ya Yesu. Kasi, yandi pamuká na kutala nombre ya bambisi yina Yesu sadisá bawu na kukanga. Yandi zabá ti Yesu salá mirakle, mpe yandi talá ti yandi me lunga ve kusala na Yesu. Faso Piere, nge mpe lenda vanda na boma. Ya lenda vanda boma ya bima nyonso yina nge ke sala samu na kukuma disiple ya Yesu. Si ya ke faso yina, kukulisa luzolo ya nge samu na Yehova, Yesu mpe samu na bantu ya nkaka, ke nata nge na kundima invitasion ya Yesu ya kukuma muntu yina ke pecheke bantu.—Mat. 22:37, 39; Yoa. 14:15.

6. Wapi barezon ya nkaka yina ke natá beto na kupreche?

⁶ Beto tala mwa barezon ya nkaka yina ke natá beto na kupreche. Beto ke zolá kulanda musiku ya Yesu yayi: “Beno kwenda, mpe beno kumisa bantu bilandi ya munu.” (Mat. 28:19, 20) Beto ke precheke mpe bantu samu ba ke ‘nyokolá bawu mpe ba ke kipeke ve bawu’, mpe ba ke na nsatu ya kuzaba mambu yina Biblia ke zonzá samu na Kimfumu ya Nzambi. (Mat. 9:36, nwt-MK) Yehova zola ti bantu nyonso zaba mbote-mbote mambu ya Biblia mpe ba vuuka.—1 Tim. 2:4.

7. Wa’ faso Baroma 10:13-15 ke na lakisá ti predikasion ke kisalu ya nene?

⁷ Ntangu beto ke kanisá na faso kisalu ya predikasion lenda vuukisa luzingu ya bantu, ya ke pesa beto nsatu ya kupreche. Muntu yina ke salá lapeche ke teká to ke kudyá bambisi yina yandi ke kangá, kasi beto, beto ke kangá bantu, ya zola zonza ti beto ke kumisá bawu badisiple ya Yesu samu na kuvuukisa luzingu ya bawu.—Tanga Baroma 10:13-15; 1 Tim. 4:16.

8-9. Yinki muntu yina ke salá kisalu ya lapeche zolá zaba, mpe samu na yinki?

⁸ Na ntangu ya Yesu, Izraelite yina vandá salá lapeche zolá zaba wa’ faso ya bambisi yandi zolá kanga. (Lev. 11:9-12) Yandi zola zaba mpe na wapi kote ya maza yandi ke kuzwa bambisi. Bambisi ke na kifu ya kuvandá kote yina maza ke sepelisá bawu mpe kote yina madya ke mingi. Muntu yina ke pecheke bambisi zola tala mpe ntangu yina yandi ke kwenda sala lapeche. Misionere mosi yina zingá na ile ya Pacifique, longoká ti ya ke na ntangu ya mbote ya kwenda kanga bambisi. Temwe mosi ya bwala yina, bokilak’ yandi na kwenda sala lapeche. Mpangi ya misionere zonzá na yandi: “Beto kutana mbasi na 9 heures ya suka.” Mpangi yango vutulá: “Nge zaba ve. Beto ke kwendá na ntangu yina bambisi ke basiká, kasi beto ke kwendá ve na ntangu yina ya ke bien samu na beto.”

⁹ Faso mosi mpe, badisiple ya Yesu yina kumá ba yina ke pecheke bantu, vandá kwendá kisika yina bantu vandá mpe na ntangu yina bantu vandá kuna. Na kifwani, badisiple ya Yesu precheke na temple, na basinagog, na yinzo na yinzo mpe na bazandu. (Bis. 5:42; 17:17; 18:4) Beto mpe zolá zabidila mbote-mbote bantu yina ke vandá na teritware yina ba me pesa beto. Na ntima mosi, beto ke ndimá kuchanje programe ya beto samu na kwenda preche na kisika mpe na ntangu yina beto lenda kuzwa bantu.—1 Ko. 9:9-23.

10. Wapi bima organizasion ya Yehova me pesa beto?

¹⁰ Muntu yina ke salá lapeche ke na nsatu ya bima yina ke sadisa yandi na kusala kisalu ya yandi na faso ya mbote, mpe yandi zolá zaba faso ya kusadila bima yango. Beto mpe ke na nsatu ya kuvanda na bima ya kulunga, samu na kisalu ya beto mpe beto ke na nsatu ya kuzaba faso ya kusadila yawu. Yesu lakisá na badisiple ya yandi faso ya kusala kisalu ya predikasion. Yandi zonzá na bawu yinki ba ke nata, kisika ba ke preche, mpe yinki ba ke zonza. (Mat. 10:5-7; Luke 10:1-11) Bubu yayi, organizasion ya Yehova ke pesá beto bima yina ke sadisá beto na kulonga, mpe bima yango me pesá deja beto bambuma ya mbote. * Mpe ba lakisá beto faso ya kusadila bima yango.  Formasion yayi ke sadisá beto na kuvanda dyaka na konfianse ntangu beto ke precheke mpe na kulongoka kuvanda baproklamatere ya mbote.—2 Tim. 2:15.

11. Samu na yinki ba yina ke pecheke bantu zolá vanda na kuraje?

¹¹ Ba yina ke salá lapeche ya bambisi zola vanda na kuraje, samu ba zaba ve si mvula ke noka mpe si mupepe ke vanda ngolo. Ba ke salá mingi na mpimpa na kati ya titombi. Ba yina ke pecheke bantu mpe zolá vanda na kuraje. Ntangu beto ke bandá kupreche mpe ke zonzá na bantu ti beto ke batemwe ya Yehova, famiye ya beto lenda sosa kukwamisa beto, bampangi ya beto lenda sombola beto, mpe bantu ya nkaka lenda manga kuwa mambu yina beto me natina bawu. Kasi ya ke salá ve beto boma. Yesu zonzá ti, yandi ke filisa badisiple ya yandi na kwenda preche bantu yina ke kwamisa bawu.—Mat. 10:16.

12. Faso beto ke na tangak’ yawu na Yosua 1:7-9, yinki lenda sadisa beto na kuvanda na kuraje?

¹² Wa’ faso nge lenda vanda na kuraje? Ya ntete, nge zolá vanda na kiminu ti Yesu ke na kontinye kutwadisa kisalu ya predikasion depuis na zulu. (Yoa. 16:33; Luz. 14:14-16) Ya zole, kumisa kiminu ya nge ngolo na promese yina Yehova pesa ya kukipe nge. (Mat. 6:32-34) Yina kiminu ya nge ke na kumá ngolo, nge ke vanda dyaka na kuraje ya kulutila. Piere na bampangi ya yandi, lakisá kiminu ya nene ntangu ba biká kisalu ya bawu ya lapeche samu na kulanda Yesu. Faso mosi mpe, nge lakisá kiminu ya nene ntangu nge zonzá na ba yina zaba nge mpe na bantu ya famiye ya nge ti, nge me banda kulongoka na  batemwe ya Yehova, mpe nge me banda kukwenda na balukutakanu ya bawu! Ntembe ve, nge me sala deja bachanjema mingi na luzingu ya nge mpe na ndyatulu ya nge samu na kulanda misiku ya Yehova. Ya lombá na nge kiminu na kuraje. Si nge kontinye na kuvanda na kuraje, nge lenda ndima na ntima ya nge nyonso ti, “Yehova Nzambi ya nge ke vanda na nge kisika nyonso yina nge ke kwenda.”—Tanga Yosua 1:7-9.

13. Wa’ faso kukanisa mbote-mbote na mambu yina nge me longoka ke sadisa nge na kuvanda na kuraje?

¹³ Yinki nge lenda sala dyaka samu na kuvanda na kuraje? Sambila samu na kuvanda na kuraje. (Bis. 4:29, 31) Yehova ke pesa bareponse na balusambu ya nge mpe ke bika nge ata fioti ve. Yandi ke ntangu nyonso kuna samu na kusadisa nge. Dyaka, nge lenda kanisa mbote-mbote na faso Yehova vuukisá bantu ya nkaka na ntama. Kanisa mpe na faso Yehova sadisá nge na ntangu ya mpasi, mpe pesá nge ngolo ya kusala bachanjema na luzingu ya nge. Ntembe ve, muntu yina lutisá bisadi ya yandi na kati-kati ya lamer rouge, lenda sadisa nge na kuvanda disiple ya Yesu. (Bas. 14:13) Nge lenda vanda na kiminu faso mosi ya ba yina soniká Bankunga, yandi zonzá: “Yehova ke na munu; mu ke vanda ve na boma. Yinki muntu lenda sala munu?”—Nku. 118:6.

14. Yinki ke na longá beto disolo ya Masae mpe Tomoyo?

¹⁴ Faso ya nkaka ya kuvanda na kuraje, ni ya kulongoka faso Yehova sadisá bisadi ya yandi yina vandá bantu ya nsoni na kukuma na kuraje. Beto tala disolo ya mpangi ya kento Masae. Yandi vandá muntu ya nsoni, mpe yandi vandá kanisa ata fioti ve ti yandi lenda sala kisalu ya predikasion. Ya vandá mpasi na yandi na kuzonza na bantu yina yandi zabá ve, ya vandá nete kusosa kumonte mur ya yinda, mpe yandi vandá kanisa ata fioti ve ti yandi zolá lenda kusala yawu. Na yawu, yandi salá bangolo samu na kukulisa luzolo ya yandi samu na Nzambi mpe samu na bantu ya nkaka. Yandi kanisá mingi na valere ya kisalu ya predikasion bubu yayi, mpe sambilá mingi na kukulisa nsatu ya yandi ya kupreche. Yandi katulá boma ya yandi mpe kumá pionier ya ntangu nyonso (permanente). Yehova lenda sadisa mpe ba yina me banda kupreche ntama mingi ve na “kuvanda na kuraje.” Beto tala disolo ya mpangi Tomoyo. Ntangu yandi bandá kisalu ya predikasion ya yinzo na yinzo, muntu ya ntete yina ba kutaná, gangilá bawu: “Mu ke ve na nsatu ya kuzonza na batemwe ya Yehova!” mpe yandi kangá porte. Na kuraje nyonso Tomoyo zonzá na mpangi yina vandá na yandi: “Nge me wa yawu? Mu me zonza ata kima, kasi yandi me zaba ti mu ke Temwe ya Yehova. Mu ke na vrai kilengi!” Bubu yayi, Tomoyo ke na sadilá Yehova faso pionier ya ntangu nyonso.

15. Yinki zola zonza kusala bamambu na ntangu ya yawu, mpe samu na yinki ya ke mbote samu na bakristo?

¹⁵ Muntu yina zaba mbote kisalu ya lapeche ke sala bamambu na ntangu ya yawu. Kusala bamambu na ntangu ya yawu zola zonza: “kuvanda na ngolo to mayela ya kunata nzutu ya nge na kusala bamambu na faso ya zolá salama, mpe na ntangu yina ya zolá salama.” Na kifwani, ba zolá vumbuka na suka, kuvanda kuna tii kisalu ke manisa mpe kukontinye kupeche ata mupepe to mvula. Beto mpe ke na nsatu ya kusala bamambu na ntangu yawu, si beto zola ve kulembana na kumanisa kisalu ya beto.—Mat. 10:22.

16. Yinki lenda sadisa beto na kusala bima yina ke talaná mpasi na kusala?

¹⁶ Mingi-mingi, beto ke zolá kusala bima yina ke lombá ve bangolo. Kasi, bantangu ya nkaka bima ya kulutila valere, ke vandá mpasi na kusala. Na yawu, beto zolá longoka faso ya kunata banzutu ya beto na kusala bamambu na ntangu yina me lunga mpe kumesana na kusala bima yina ke vandá mpasi na beto na kusala. Yehova ke sadisá beto na nzila ya mpeve ya yandi.—Gal. 5:22, 23.

17. Na 1 Bakorinto 9:25-27, wa’ faso apotre Paul zonzilá bangolo yina yandi salá samu na kuvanda na kifu ya kusalá bamambu na ntangu yina me lunga?

 ¹⁷ Apotre Paul vandá na kifu ya kusalá bamambu na ntangu yina me lunga. Kasi, yandi ndimá ti yandi vandá “bulá” nzutu ya yandi samu na kusala mambu yina ke mbote. (Tanga 1 Bakorinto 9:25-27.) Yandi pesá bampangi konseye ya kuvanda na kifu ya kusalá bima yina ba zolá sala, na ntangu yina me lunga. Mpe ba zolá sala bima nyonso “na faso ya mbote mpe na muvusu ve.” (1 Ko. 14:40) Beto zolá sala bangolo samu na kusambila Yehova, ya zola zonza kusala ntangu nyonso kisalu ya predikasion mpe kulonga bantu nsangu ya mbote.—Bis. 2:46.

18. Yinki beto zolá sala si beto zola Yehova tala ti beto ke na salá kisalu ya predikasion na faso ya kulunga?

¹⁸ Lapeche ke simbá ntangu muntu yina ke sala kisalu yango ke kangá bambisi mingi. Kasi ya ke ve faso yina na kisalu ya predikasion. Beto lenda zonzá ve ti kisalu ya beto me simba, kaka samu beto me kumisa bantu mingi batemwe ya Yehova. (Luke 8:11-15) Si beto lemba ve na kupreche nsangu ya mbote mpe na kulonga bantu ya nkaka, Yehova ke tala ti kisalu ya beto me simba. Samu na yinki? Samu beto ke na kontinye kusala yina Yehova na Mwana ya yandi zola beto sala.—Mrk. 13:10; Bis. 5:28, 29.

19-20. Wapi rezon ya nkaka beto ke na yawu ya kupreche bubu yayi?

¹⁹ Na babwala ya nkaka, ya ke na bangonda yina ba ke niminá kusala lapeche. Na babwala yina, muntu yina ke salá lapeche lenda tala ti ya ke mbote na kukanga bambisi mingi avant ngonda yina ba ke niminá kisalu ya lapeche kuma. Samu beto ke ba yina ke pecheke bantu, yayi ke rezon ya nkaka yina ke na puseke beto na kupreche mingi bubu yayi: Nsuka ya yinza yayi me kuma pene-pene! Ntangu me bikana kaka fioti ya kupreche nsangu ya mbote yina lenda vuukisa luzingu ya bantu mingi. Kuvingila ve bima nyonso simba na luzingu ya nge samu nge baka desizion ya kusala kisalu ya nene yayi.—Lon. 11:4.

²⁰ Bubu yayi deja, kulisa nsatu ya nge ya kusala kisalu ya predikasion, longoka mambu mingi ya Biblia, vanda na kuraje mpe kifu ya kusalá bamambu na ntangu ya yawu. Kota na kati ya kimvuka ya bantu kuluta 8 milion yina ke pecheke bantu, mpe nge ke zwá kilengi yina ke katuká na Yehova. (Neh. 8:10) Kulemba ve na kusala nyonso yina nge lenda sala na kisalu ya predikasion, mpe kontinye na kusala yawu tii ntangu Yehova ke zonza ti, ya me lunga. Artikle yina ke landa, ke zonzila bima tatu yina ke sadisa beto na kuvanda na ngolo ya kukontinye kusala kisalu ya predikasion faso ba yina ke pecheke bantu.