1. Wa’ faso beto lenda tadila Yehova?

 NA KATI ya dikanda ya bisadi ya Yehova, ya ke na Yesu, “mwana ya ntete na kati ya bantu mpe bima nyonso yina Nzambi [yidiká],” mpe ba-ange mingi. (Kol. 1:15; Nku. 103:20) Ntangu Yesu vandá awa na ntoto, yandi sadisá bantu na kutadila Yehova faso Tata ya bawu. Kilumbu mosi, ntangu Yesu vandá zonzila Yehova na bilandi ya yandi, yandi zonzá: “Tata ya munu yina kele Tata ya beno.” (Yoa. 20:17) Mpe ntangu beto ke pesá luzingu ya beto na Yehova mpe beto ke zwa bateme, beto ke kotá na kati ya dikanda ya bisadi ya Yehova, kote yina luzolo kele.—Mrk. 10:29, 30.

2. Yinki beto ke zonzila na artikle yayi?

² Ya ke mpasi na bantu ya nkaka na kutadila Yehova faso Tata ya luzolo. Mpe ya ke vandá mpasi na ba ya nkaka na kulakisa luzolo na bampangi ya kimvuka. Na artikle yayi beto ke tala mutindu Yesu sadisá beto na kutadila Yehova faso Tata ya luzolo, mpe faso yandi lakisá ti beto lenda vanda pene-pene na Yehova. Beto ke longoka mpe mutindu ya kulanda kifwani ya Yehova na faso ya beto ya kubakila bampangi ya beto.

3. Wa’ faso lusambu yina Yesu longá ke lakisá ti beto zolá vanda pene-pene na Yehova?

³ Yehova ke Tata ya luzolo. Yesu zola ti beto tadila Yehova faso yandi ke talak’ yandi: Tata mosi yina bana ke ve na boma ya kulutisa ntangu na yandi mpe ya kusolola na yandi. Yesu zola ve ti beto tala Yehova faso Tata mosi yina ke na ntima ya ngolo mpe yina ke na nsatu bana sala kaka bima yina yandi ke zolá. Yesu lakisak’ yawu ntangu yandi longá bilandi ya yandi faso ya kusambila. Na kubanda lusambu, yandi zonzá: “Tata ya beto.” (Mat. 6:9) Yesu zabá batitre ya nkaka yina Yehova ke na yawu na Biblia. Yandi  zabá ti Yehova ke na batitre faso: ‘Muntu ya kulutila ngolo,’ ‘Nzambi ya banzambi’ to ‘Mvangi.’ (Kub. 49:25; Kul. 10:17; Iza. 40:28) Kasi yandi zonzá na beto na kubokila Yehova “Tata.”

4. Wa’ faso beto zaba ti Yehova ke na nsatu beto kwiza pene-pene na yandi?

⁴ Ya ke mpasi na nge na kutadila Yehova faso Tata ya luzolo? Ba ya nkaka mpe ke talá bamambu faso nge. Bantu ya nkaka kulá na bapapa yina vandá lakisá ve ntima ya mbote. Na yawu, kutala Yehova faso Tata ya luzolo ke mpasi na bawu. Kasi, beto lenda zwa ngolo na kuzaba ti Yehova zaba yinki ke natá beto na kutala bamambu faso beto ke na talak’ yawu. Yandi zola ti nge vanda pene-pene na yandi. Ni na yawu, Biblia ke zonzá na beto: “Beno kwiza pene-pene na Nzambi, mpe yandi ke kwiza pene-pene na beno.” (Zaki 4:8) Yehova ke zolá beto mpe yandi ke zonzá na beto ti yandi ke vanda Tata ya kulutila mbote yina nabunu beto me kuzwa.

5. Faso ke zonzak’ yawu Luke 10:22, wa’ faso Yesu ke sadisá beto na kukuma dyaka pene-pene na Yehova?

⁵ Beto ke lutila dyaka kuvanda pene-pene na Yehova si beto tala bifu ya mbote ya yandi yina Yesu lakisá. Samu Yesu zabá mbote-mbote bifu ya Yehova mpe lakisak’ yawu na luzingu ya yandi, yandi zonzá: “Muntu yina me tala munu me tala [mpe] Tata.” (Yoa. 14:9) Mutindu yaya mosi lenda sadisa baleki ya yandi, Yesu ke longá na faso ya kupesa buzitu mpe kuwa Yehova. Yandi lakisá beto yinki beto me lunga kusala samu na kunyongisa ve Yehova, mpe bima yina beto zolá sala samu yandi ndima beto. Kasi, kima ya kulutila yina beto lenda longoka na luzingu ya Yesu, ni kuzaba ti Yehova ke na ntima ya mbote mpe yandi ke zolá beto. (Tanga Luke 10:22.) Beto zonzila mwa bifwani.

6. Pesa ekzample yina ke na lakisá ti Yehova vandá kuwa balusambu ya Yesu.

⁶ Yehova ke kuwá bana ya yandi. Ntangu Yesu vandá awa na ntoto, Yehova vandá kuwa balusambu mingi yina yandi vandá sala. (Luke 5:16) Yandi kuwá balusambu ya Yesu ntangu Yesu vandá sosa kubaka badesizion ya nene. Mosi ya yawu vandá ntangu yandi vandá sosa kusola ba yina ke vanda ba-apotre 12 ya yandi. (Luke 6:12, 13) Yehova kuwá mpe Yesu ntangu bamambu mingi vandá kwamisa Yesu. Kaka mwa  ntangu fioti avan Judas teka yandi, Yesu sambilá Tata ya yandi samu na bamambu yina zolá kumina yandi. Yehova suká ve kaka na kuwa lusambu ya Yesu. Yandi filisá mpe ange mosi samu na kupesa ngolo na mwana ya yandi yina yandi vandá zola.—Luke 22:41-44.

7. Yinki ya ke na salá nge na kuzaba ti Yehova ke kuwá balusambu ya beto?

⁷ Bubu yayi, Yehova ke wá mpe balusambu ya beto, mpe yandi zaba ntangu mpe faso ya kulutila mbote ya kupesa beto kima yina beto ke na sosá. (Nku. 116:1, 2) Beto zonzila mpangi mosi ya kento ya bwala ya Inde, yina kwizá tala ti Yehova vandá kuwa balusambu ya yandi. Yandi vandá na bamambu mingi yina vandá kwamisa makanisi ya yandi, mpe yandi sambilá Yehova na ntima mosi samu na yawu. Yandi soniká: “Émission ya Télédiffusion ya Mai 2019 zonzilá faso ya kunwana na basusi ya kulutila mpe bamambu yina ke kwamisá makanisi ya beto. Ya vandá kaka kima yina mu vandá na yawu nsatu. Mu kwizá tala ti Yehova kuwá balusambu ya munu.”

8. Na wapi bafaso Yehova lakisá luzolo na Yesu?

⁸ Yehova ke lakisá beto luzolo kaka faso yandi lakisak’ yawu na Yesu ntangu yandi vandá awa na ntoto. (Yoa. 5:20) Yandi sadisá Yesu na kubumba kiminu ya ngolo, pesak’ yandi ngolo na bantangu ya mpasi, mpe yandi pesá Yesu bima yina yandi vandá na yawu nsatu. Dyaka, Yehova zonzilá pwelele na Yesu ti yandi ke zolak’ yandi mpe ke sepelá na yandi. (Mat. 3:16, 17) Yesu zabá ti Tata ya yandi ya luzolo vandá ntangu nyonso na yandi. Na yawu, ata kilumbu mosi yandi kanisá ti yandi vandá kaka yandi mosi.—Yoa. 8:16.

9. Wa’ faso beto zaba ti Yehova ke zolá beto?

⁹ Mutindu yandi salak’ yawu na Yesu, Yehova ke lakisá mpe beto luzolo na bafaso mingi. Kanisa ntete: Yehova me benda beto na yandi mpe me pesa beto bampangi mingi ya kento na ya bakala yina ke zolá beto. Bampangi yango ke pesá beto kilengi na luzingu mpe ke bakisá beto na bantangu ya mpasi. (Yoa. 6:44) Yehova ke pesá mpe beto madya ya kimpeve samu kiminu ya beto vanda kaka ngolo. Mpe yandi ke kipeke bansatu ya beto. (Mat. 6:31, 32) Ntangu beto ke kanisá na luzolo ya Yehova samu na beto, luzolo ya beto samu na yandi ke kulá.

10. Yinki beto lenda longoka na faso Yehova ke bakilá beto nyonso?

¹⁰ Yehova ke zolá beto nyonso. Kasi bantangu ya nkaka, ya lenda vanda mpasi na beto na kuzola bampangi faso Yehova ke zolá bawu. Ya lenda vanda samu ti beto katuká ve kisika mosi mpe beto kulá ve faso mosi. Dyaka, beto nyonso ke bantu ya masumu mpe ke salá bamambu yina ke nyongisá bampangi. Ata faso yina, beto lenda sala ti luzolo vanda na kati ya beto. Wa’ faso? Si beto landa kifwani ya Yehova na faso yandi ke lakisá beto nyonso luzolo. (Ef. 5:1, 2; 1 Yoa. 4:19) Beto zonzila yinki kifwani ya Yehova lendá longa beto.

11. Wa’ faso Yesu lakisá ti Yehova “zaba kutala bantu kyadi”?

¹¹ Yehova “zaba kutala bantu kyadi.” (Luke 1:78) Muntu yina ke talá bampangi kyadi ke vandá na susi ya bawu ntangu ba ke lutisá bantangu ya mpasi. Yandi ke sosá kusadisa bawu mpe kupesa bawu ngolo. Na faso yandi vandá bakila bantu, Yesu lakisá ntima ya kyadi ya Yehova. (Yoa. 5:19) Kilumbu mosi, Yesu talá bantu mingi mpe “[kumá] ya kufuluka na kyadi. Bawu [vandá] ya kulemba mpe ya kukondwa kibakala mutindu mameme yina kele ve na muvungi.” (Mat. 9:36) Yandi suká ve kaka na kutala bawu kyadi. Yandi salá kima samu na kusadisa bawu. Yandi belusá ba yina vandá bela mpe pesá ngolo na ba yina ‘lembá na kunata kilo ya mingi.’—Mat. 11:28-30; 14:14.

12. Wa’ faso beto lendá lakisa ntima ya kyadi na bampangi ya beto?

 ¹² Si nge zola kulakisa ntima ya kyadi na bampangi ya nge, nge me lunga kuzaba ntete bamambu yina ke na kwamisá bawu. Na kifwani, mpangi mosi ya kento lenda vanda na maladi mosi ya ngolo. Ata yandi ke na yawulá ve, bantangu ya nkaka, yandi ke vandá na nsatu ba sadisa yandi. Nge lenda yufula: “Mpangi ya kento yayi na maladi ya yandi, yandi ke na lendá kwandi kusala bisalu ya yinzo? Mu lenda sadisa kwandi yandi na kulamba to na kusukula yinzo?” Si nge me zaba ti ba me katula mpangi mosi na kisalu, nge lenda yufula: “Mu lenda pesa kwandi yandi mwa mbongo?” Kusala yawu lenda sadisa mpangi ya nge tii ntangu yandi ke kuzwa kisalu ya nkaka. Dyaka, nge lenda sala ti yandi zaba ve ti ni nge pesak’ yandi mbongo yina.

13-14. Wa’ faso beto lendá landa kifu ya Yehova ya kukabulá?

¹³ Yehova ke na kifu ya kukabulá. (Mat. 5:45) Beto zolá vingila ve bampangi lomba ntete samu beto lakisa bawu ntima ya kyadi. Faso Yehova, nge lenda sala kima samu na bawu ata ba me lomba ve nge. Ata beto ke lombá ve yandi yawu, bilumbu nyonso Yehova ke pesá beto Ntangu. Lumière ya Ntangu ke mbote samu na bantu nyonso, ata na ba yina ke mangá Nzambi. Samu yandi ke pesá beto bima yina beto ke na yawu nsatu, Yehova ke lakisá ti yandi ke zolá beto. Ntima ya mbote ya Yehova mpe kifu ya yandi ya kukabulá ke salá ti beto mpe zola yandi.

¹⁴ Mingi na kati ya bampangi ya beto ke landá kifu ya Yehova ya kukabulá. Na kifwani, na mvula 2013, mupepe ya ngolo yina bantu bokilá Haiyan, mwangisá bwala ya Philippines. Bayinzo mpe bima mingi ya bampangi ya beto bebá. Kasi, bampangi ya yinza nyonso vingilá ve samu na kusadisa bawu. Mingi pesá mbongo, ba ya nkaka kwizá sadisa na kutunga bayinzo. Na kati ya mvula kaka mosi, ba lendá kutunga mpe kuyidika bayinzo 750. Na kati ya ntangu ya coronavirus mpe, Batemwe ya Yehova salá bangolo samu na kusadisa bampangi ya bawu. Ntangu na mbangu nyonso beto ke kwizá sadisa bampangi ya beto, beto ke lakisá ti beto ke zolá bawu.

15-16. Yinki Luke 6:36 ke zonzá na beto na kusala samu na kulanda kifwani ya Tata ya beto?

¹⁵ Yehova ke talá beto mawa mpe ke lemvokilá  beto. (Tanga Luke 6:36.) Tata ya beto ya zulu ke lakisá beto bifu yayi bilumbu nyonso. (Nku. 103:10-14) Bilandi ya Yesu vandá bantu ya masumu. Kasi, yandi talá bawu mawa mpe lemvokilá bawu. Yesu ndimá ata lufwa samu Yehova lemvokila masumu ya beto. (1 Yoa. 2:1, 2) Samu Yehova na Yesu ke talá beto mawa mpe ke lemvokilá beto, ya ke ve mpasi na kuvanda pene-pene na bawu.

¹⁶ Beto lendá kulisa luzolo na kati ya beto si beto ke ‘lemvokilá na ntima nyonso.’ (Ef. 4:32) Beto zaba ti, kulemvokila bampangi, ntangu ya nkaka ke vandá mpasi. Kasi, beto zolá sala bangolo samu na kusala yawu. Mpangi mosi ya kento zonzá ti artikle “ Pardonnons-nous volontiers les uns aux autres, ” sadisak’ yandi na kukulisa kifu ya kulemvokilá. * Yandi soniká: “Kulongoka artikle yayi sadisá munu na kutala samu na yinki ya ke mbote na kulemvokilá. Ya vandá lakisa ti kulemvokila na ntima mosi zola zonza ve ti beto ke na ndimá mambu ya yimbi yina me salama to beto ke na talá ti ya ke kaka fioti. Kasi, kulemvokila zola zonza kubumba ve nkele mpe kuvutala kizunu ya beto ya ntima.” Ntangu beto ke lemvokilá bampangi ya beto na ntima nyonso, beto ke lakisá ti beto ke zolá bawu mpe beto ke landá kifwani ya Tata ya beto Yehova.

17. Faso ke zonzak’ yawu Matayi 5:16, wa’ faso beto lenda pesa nkembo na Tata ya beto ya zulu?

¹⁷ Ya ke bweso ya nene ya kuvanda na kati ya dikanda ya Yehova ya yinza nyonso. Beto ke na nsatu bantu kulutila dyaka mingi kwiza sambila Yehova na beto. Na yawu, beto zolá sala keba na kusala ata kima yina lendá nata bantu na kuzonzila yimbi ya Tata ya beto ya zulu to ya bisadi ya yandi. Ndyatula ya beto zolá benda bantu na Yehova.—Tanga Matayi 5:16.

18. Yinki lenda sadisa beto ya kuvanda ve na boma ya kuzonzila kiminu ya beto na bantu ya nkaka?

¹⁸ Bantu ya nkaka lendá vunina beto bamambu to kwamisa beto samu beto ke landá bamambu yina ke zonzá Tata ya beto ya zulu. Yinki beto lenda sala si beto ke na boma ya kuzonzila kiminu ya beto na bantu? Beto zaba ti Yehova na mwana ya yandi lenda sadisa beto. Yesu zonzá  na bilandi ya yandi ti ba zolá vanda ve na susi na yina ba ke zonza to na faso ya kuzonzila yawu. Samu na yinki? Yesu zonzá: “Kaka na ntangu yina, Nzambi ke pesa beno mambu yina beno ke [zonza]. Mambu yina beno ke [zonza] ke katuka ve na beno mosi. Kasi, ni [mpeve] ya Tata ya beno ke zonza na kati ya beno.”—Mat. 10:19, 20.

19. Pesa kifwani ya mpangi mosi yina zonzilá mambu ya Nzambi na ata boma.

¹⁹ Beto zonzila mambu yina kuminá mpangi ya beto Robert. Ntangu yandi bandá kulongoka Biblia mpe zabá ntete ve mambu mingi, ba natak’ yandi na tribunale mosi na Afrique du Sud samu yandi mangá kukuma militere. Na ata boma, yandi zonzá na tribunale ti yandi ke kuma ve militere samu yandi ke zolá bampangi ya yandi bakristo. Yandi vandá sepela na kuvanda na kati ya dikanda ya Yehova. Na mbala mosi ba yufulak’ yandi: “Nani ke bampangi ya nge?” Robert zabá ve yinki ya kuzonza. Kasi, kaka na ntangu yina verse ya dikanisi ya kilumbu (texte du jour) kwizilak’ yandi na yintu. Ya vandá Matayi 12:50 yina ke zonzá: “Konso muntu yina ke salá mambu yina ke [zolá] Tata ya munu yina kele na mazulu, ni yandi kele mpangi [ya munu ya bakala, mpangi ya munu ya kento], mpe mama ya munu.” Ata Robert bandá kulongoka Biblia ntama mingi ve, mpeve ya Yehova sadisak’ yandi na kuzaba yinki ya kuvutula na kyuvu yina mpe na byuvu mingi ya nkaka yina yandi vandá vingila ve. Ntembe ve, Yehova vandá na kilengi na yina Robert salá. Yehova ke mpe na kilengi ntangu beto ke tulak’ yandi konfyanse samu na kuzonzila mambu ya yandi na tiya nyonzo ata na kati ya bampasi.

20. Yinki beto me lunga kusala? (Yoane 17:11, 15)

²⁰ Beto ke na kilengi ya kuvanda na kati ya dikanda ya Yehova yina ke na luzolo ya mingi. Beto ke na Tata ya kulutila mbote mpe bampangi mingi ya kento na ya bakala yina ke zolá beto. Bima nyonso yayi zolá kuma ve mpamba na meso ya beto. Satan na ba yina ke landá nzila ya yandi ke sosá ti beto sala ntembe na luzolo ya Tata ya beto. Mpe, ba ke sosá kukabula beto. Yesu sambilá samu na bamambu yango. Yandi lombá na Tata ya beto na kusala ti bumosi vanda na kati ya beto. (Tanga Yoane 17:11, 15.) Yehova kuwá lusambu ya yandi. Faso Yesu, beto zolá sala ve ntembe ti Tata ya beto ya zulu ke zolá beto mpe ke na nsatu ya kusadisa beto. Beto sala nyonso samu na kuvanda kaka pene-pene na dikanda ya Yehova.