DISOLO YA KULONGOKA 40
‘Kunata bantu mingi na lunungu’
“Bantu yina ke nata bantu mingi na lunungu [ke ngenga mutindu] bambwetete, mvula na mvula.”—DAN. 12:3.
NZIMBU 151 Jéhovah appellera
YINA BETO KE LONGOKA *
1. Wapi bamambu ya kitoko ke na vingilá beto na kati ya bamvula 1000 ya Kimfumu ya Yesu?
YA KE vanda kitoko mingi ntangu bantu ke banda kuvumbuka na lufwa awa na ntoto na kati ya bamvula 1000 ya Kimfumu ya Yesu. Ba yina nyonso me fwidila bantu yina ba vandá zolá, ke na nsatu kilumbu yina kuma na mbangu. Yehova mpe ke na nsatu ya kwiza na mbangu. (Yobi 14:15) Kanisa na kilengi yina ke vanda na bantu nyonso na yinza na kuvukana dyaka na bantu yina ba vandá zolaka. Mutindu beto me tala yawu na disolo yina me luta, “bantu ya lunungu” yina ke na bankumbu na dibuku ya luzingu ke “vumbuka na lufwa samu na kuzwa luzingu.” (Bis. 24:15; Yoa. 5:29) Ntangu ya nkaka, bantu ya beto ke vutuka na luzingu mwa ntangu fioti na manima ya Armagedoni. * Dyaka, ‘bantu ya kukondwa lunungu,’ mutindu bantu yina kuzwá ve bweso ya kuzaba Yehova to ya kusadila yandi tekila ba kufwa, ke “vumbuka na lufwa samu na lufundusu.”
2-3. a) Mutindu Izaya 11:9, 10 ke na lakisak’ yawu, wapi kisalu ya kulutila nene ya kulonga bantu ke salama? b) Yinki beto ke zonzila na disolo yayi?
2 Bantu nyonso yina ke vumbuka na lufwa ke vanda na nsatu ba longa bawu. (Iza. 26:9; 61:11) Na yawu, Yehova ke tula kisalu ya kulutila nene ya kulonga bantu yina nabunu ya salama. (Tanga Izaya 11:9, 10.) Bantu ya kukondwa lunungu ke vanda na nsatu ya kulongoka bamambu na yina me tadila Yesu Kristo, Kimfumu ya Nzambi, munkayulu ya Yesu, mfunu ya nkumbu ya Yehova mpe samu na yinki kaka Yehova me lunga kuyala. Ata bantu ya lunungu ke vanda na nsatu ya kuzaba bamambu mingi yina Yehova longá na bisadi ya yandi na kati ya bamvula, na yina me tadila dikanisi ya yandi samu na ntoto. Ba ya nkaka na bantu ya lunungu yayi kufwaka bamvula mingi tekila Biblia manisa kusonama. Bantu ya kukondwa lunungu mpe bantu ya lunungu ke vanda na bamambu mingi ya kulongoka.
3 Na disolo yayi, beto ke kuzwa bamvutu na byuvu yayi: Wa’ faso kisalu yayi ya kulonga bantu ke salama? Wa’ faso ya ke sadisa bantu na kusala ti ba sonika bankumbu ya bawu samu na ntangu nyonso na dibuku ya luzingu? Bubu yayi, ya ke mfunu beto kuzwa bamvutu na byuvu yayi. Mutindu beto ke tala yawu, bambikudulu ya nkaka yina ke na buku ya Danyele mpe ya Luzabusu ke sadisa beto na kubongisa faso ya kubakula bamambu yina ke salama ntangu bantu ya kufwa ke vumbuka. Na kubanda, beto tala bamambu ya kitoko yina ke na mbikudulu yina kele na Danyele 12:1, 2.
‘BANTU YINA ME LALAKA NA MFUTUTU KE TELAMA’
4-5. Yinki Danyele 12:1 ke na lakisá samu na ntangu ya nsuka?
4 Tanga Danyele 12:1. Buku ya Danyele ke na lakisá bamambu ya kitoko yina ke salama na kati ya ntangu ya nsuka. Na kifwani, Danyele 12:1 ke na lakisá ti Mikayele to Yesu, ke ‘ya kutelama samu na mambote ya bantu ya Nzambi.’ Kitini yayi ya mbikudulu bandá kulungana na 1914, ntangu Yesu kumá mfumu ya Kimfumu ya Nzambi na mazulu.
5 Kasi ba zonzá mpe na Danyele ti Yesu ke “telama” na “ntangu mosi ya mpasi [. . .] na mutindu yina me salamaka ntete ve katuka dikanda mosi me basikaka tii na ntangu yina.” “Ntangu mosi ya mpasi” kele “mpasi ya nene” yina ba ke zonzilá na Matayi 24:21. (nwt-MK) Yesu ke telama samu na kunwanina bisadi ya Nzambi na Armagedoni, na nsuka ya ntangu ya mpasi. Buku ya Luzabusu ke bokilá bantu yayi “kimvuka mosi ya nene yina me katuka na mpasi ya nene.”—Luz. 7:9, 14; nwt-MK.
6. Ntangu kimvuka ya nene ke vuuka na ntangu ya mpasi, yinki ke salama? Zonzila yawu. (Tala mpe na mukanda yayi “Byuvu ya ba yina ke tangá mikanda ya beto” yina ke zonzilá kuvumbuka na lufwa awa na ntoto.)
6 Tanga Danyele 12:2. Ntangu kimvuka ya nene ya bantu yayi ke vuuka na ntangu ya mpasi, yinki ke salama? Mbikudulu yayi ke na zonzilá ve kuvumbuka ya kimpeve, to na ntangu yina bisadi ya Nzambi zolá vutukila bisalu ya kimpeve na kati ya bilumbu ya nsuka, mutindu beto vandá kanisak’ yawu na ntama. * Kasi, mbikudulu yayi ke na zonzilaka kuvumbuka ya bantu yina ke salama na yinza ya malu-malu. Samu na yinki beto ke na zonzak’ yawu? “Mfututu” yina ba ke zonzilá na Danyele 12:2, ba ke zonzilá mpe yawu na Yobi 17:16. Mpe kuna, ba ke zonzilaka yawu mutindu ‘Ndyamu.’ Ya zola zonza ti Danyele 12:2 ke zonzilá na kuvumbuka yina ke salama na manima ya bilumbu ya nsuka mpe na manima ya Armagedoni.
7. a) Wapi mutindu ba ya nkaka ke vumbuka samu na “luzingu ya mvula na mvula”? b) Samu na yinki mvumbukulu yayi ke ‘lutila mbote’?
7 Kana ni yawu, yinki zola zonza Danyele 12:2 ntangu ya ke zonzilá ba yina ke vumbuka samu na “luzingu ya mvula na mvula”? Ya zola zonza ti ba yina ke vumbuka mpe ke longoka, to ke tatamana na kulongoka kuzaba mpe kutumama na Yehova mpe Yesu na kati ya bamvula 1000, ke kuzwa luzingu ya ntangu nyonso. (Yoa. 17:3) Ya ke vanda ‘mvumbukulu ya kulutila mbote’ na yina salamá na ntama. (Ebr. 11:35) Samu na yinki? Samu ba yina vumbukaka na lufwa na ntama, ba kufwá dyaka.
8. Wa’ faso ba ya nkaka ke vumbuka ‘samu na nsoni mpe samu na kuvweza ya mvula na mvula’?
8 Kasi, bantu nyonso ve yina ke vumbuka ke ndima ti Yehova longa bawu. Mbikudulu ya Danyele ke zonzá ti ba ya nkaka ke vumbuka ‘samu na nsoni mpe samu na kuvweza ya mvula na mvula.’ Samu ba ke lakisa yintu ngolo, ba ke sonika ve bankumbu ya bawu na buku ya luzingu, mpe ba ke kuzwa ve luzingu ya ntangu nyonso. Ba ke kuzwa “kuvweza ya mvula na mvula,” to lufwa ya ntangu nyonso. Na yawu, Danyele 12:2 ke zonzilá mambu yina ke kumina bantu na kutadila bamambu yina ba ke sala na manima ya kuvumbuka na lufwa. * (Luz. 20:12) Ba ya nkaka ke kuzwa luzingu ya ntangu nyonso, ba ya nkaka ve.
‘KUNATA BANTU MINGI NA LUNUNGU’
9-10. Yinki ke salama dyaka na manima ya mpasi ya nene, mpe banani ‘ke ngenga ngolo mutindu lufumba ya nene ya zulu’?
9 Tanga Danyele 12:3. Yinki dyaka ke salama na manima ya “ntangu ya mpasi”? Danyele 12:3 ke zonzilá kima ya nkaka yina ke salama na manima ya ntangu ya mpasi.
10 Banani ‘ke ngenga ngolo mutindu lufumba ya nene ya zulu’? Matayi 13:43 ke sadisá beto na kuzaba banani ba kele. Ya ke zonzaka: ‘Bantu ya lunungu ke ngenga ngolo ya tsyeleka mutindu ntangu na Kimfumu ya Tata ya bawu.’ Na disolo yayi, Yesu vandá zonzila “bana ya Kimfumu,” bampangi ya yandi yina ba tulá mafuta, yina ke sala kintwadi na yandi na Kimfumu ya mazulu. (Mat. 13:38, nwt-MK) Ya ke na lakisá ti Danyele 12:3 ke zonzilá na bakristo yina ba me tula mafuta, mpe na kisalu yina ba ke sala na kati ya bamvula 1000 yina Kimfumu ya Nzambi ke yala.
Bakristo 144 000 ke sala kintwadi na Yesu samu na kutwadisa kisalu ya kulonga bantu yina ke salama na kati ya bamvula 1000 (Tala paragrafe 11)
11-12. Wapi kisalu bakristo 144000 ke sala na kati ya bamvula 1000?
11 Wa’ faso ba yina ba tulá mafuta ke nata “bantu mingi na lunungu”? Bakristo yina ba tulá mafuta ke sala kintwadi na Yesu samu na kutwadisa kisalu ya kulonga bantu yina ke salama na ntoto na kati ya bamvula 1000. Bakristo 144000 yina, ke vanda ve kaka bamfumu, kasi ba ke vanda mpe banganga-nzambi. (Luz. 1:6; 5:10; 20:6) Na yawu, ba ke tula diboko samu na “kubelusa bantu ya bayinsi nyonso,” mpe ba ke sadisa bantu malembe-malembe na kukuma bantu ya kulunga. (Luz. 22:1, 2; Ezk. 47:12) Ya tsyeleka, bakristo yina ba tulá mafuta ke vanda na kilengi mingi na kutula diboko na kisalu yayi.
12 Banani ke vanda na kati ya “bantu mingi” yina ba ke nata na lunungu? Ya ke vanda ba yina ke vumbuka na lufwa, ba yina ke vuuka na Armagedoni mpe bana yina lenda butuka na yinza ya malu-malu. Na nsuka ya bamvula 1000, bantu nyonso na ntoto ke kuma bantu ya kulunga. Na wapi ntangu ba ke sonika bankumbu ya bawu na ‘bike’ na kati ya dibuku ya luzingu?
KUMEKA YA NSUKA
13-14. Yinki bantu nyonso ya kulunga yina ke vanda awa na ntoto me fwana kulakisa tekila ba kuzwa luzingu ya ntangu nyonso?
13 Beto zolá zimbana ve ti kuvanda muntu ya kulunga, zola zonza ve ti beto ke kuzwa luzingu ya ntangu nyonso. Kanisa na Adam na Eve. Ba vandá bantu ya kulunga, kasi ba zolá lakisa kutumama ya bawu na Yehova tekila yandi pesa bawu luzingu ya ntangu nyonso. Mambu ya kyadi, ba tumamá ve na Yehova.—Rom. 5:12.
14 Na nsuka ya bamvula 1000, wa’ faso bantu ke vanda awa na ntoto? Bawu nyonso ke vanda bantu ya kulunga. Bantu nyonso ya kulunga yayi ke ndima kwandi na ntima ya bawu nyonso ti Yehova vanda Mfumu ya bawu samu na ntangu nyonso? To ba ke sala mutindu Adam na Eve, yina vandá bantu ya kulunga, kasi ba kangamá ve na Yehova? Byuvu yayi me fwana kuzwa bamvutu. Kasi, wapi mutindu?
15-16. a) Na wapi ntangu bantu nyonso ke kuzwa bweso ya kulakisa kukangama ya bawu na Yehova? b) Yinki ke salama na manima ya kumeka ya nsuka?
15 Ba ke tula Satana na boloko samu na bamvula 1000. Na kati ya bantangu yina, yandi ke lenda kuvuna ata muntu. Kasi na nsuka ya bamvula 1000, ba ke basisa yandi. Yandi ke sosa kuvuna bantu ya kulunga. Na kati ya ntangu yina, bantu nyonso yina ke vanda awa na ntoto ke vanda na bweso ya kulakisa pwelele kana ba ke zitisá nkumbu ya Yehova, mpe ba ke ndimá lutumu ya yandi. (Luz. 20:7-10) Mambu yina mosi na mosi ya bawu ke sala na ntangu yina, ke lakisa kana Yehova lenda sonika nkumbu ya yandi samu na ntangu nyonso na dibuku ya luzingu.
16 Biblia ke lakisá beto ti, bantu ya nkaka ke sala mutindu Adam na Eve. Ba ke manga lutumu ya Yehova. Yinki ke kumina bawu? Luzabusu 20:15 ke zonzá na beto: “Ba losaka mpe na kati ya dyanga ya tiya konso muntu yina nkumbu [vandaka] ve ya kusonama na dibuku ya luzingu.” Ee, ba yina nyonso ke sala yintu ngolo, ba ke kufwa bawu samu na ntangu nyonso. Kasi, bantu ya kulunga yina ke nunga mambu yayi, ke vanda mingi, kulutila ba yina ke sala yintu ngolo. Ba ke sonika bankumbu ya bawu samu na ntangu nyonso na dibuku ya luzingu.
NA KATI YA “NTANGU YA NSUKA”
17. Yinki mbazi zonzá na Danyele na yina me tadila ntangu ya beto? (Danyele 12:4, 8-10)
17 Ya ke salá kilengi na kukanisa na bamambu yina ke kwiza na mantwala! Kasi mbazi mosi zonzilá mpe na Danyele bamambu ya mfunu yina ke na salamá na ntangu ya beto, “ntangu ya nsuka.” (Tanga Danyele 12:4, 8-10; 2 Tim. 3:1-5) Mbazi zonzá na Danyele: ‘Nzayilu ya tsyeleka ke kuma mingi.’ Ntembe ve, bisadi ya Nzambi zolá bakula na faso ya kulutila mbikudulu yina ke na buku ya Danyele. Mbazi bwelá ti na kati ya ntangu yina, ‘bantu ya yimbi zolaka sala mambu ya yimbi, mpe muntu mosi ve ya yimbi zolaka bakula.’
18. Na mwa ntangu fioti, yinki ke kumina bantu ya yimbi?
18 Bubu yayi, ya lenda talana ti ba yina ke salá bamambu ya yimbi kele ya bawu pepele. (Mal. 3:14, 15) Kasi na mwa ntangu fioti, Yesu ke sambisa bantu yina ke mutindu bankombo, mpe ke kabula bawu na bantu yina ke mutindu mameme. (Mat. 25:31-33) Bantu ya yimbi yayi ke vuuka ve na mpasi ya nene, mpe ba ke vumbuka ve na lufwa samu na kuzinga na yinza ya malu-malu. Bankumbu ya bawu ke vanda ve ya kusonama na kati ya ‘mukanda ya kubambukila moyo,’ yina ba ke zonzilá na Malaki 3:16.
19. Yinki beto me bonga kusala bubu yayi, mpe samu na yinki? (Malaki 3:16-18)
19 Bubu yayi, ya ke ntangu ya kulakisa ti beto ke ve na kati ya bantu yina ke salá mambu ya yimbi. (Tanga Malaki 3:16-18.) Yehova ke na vukisá bantu yina yandi ke talá mutindu “kima ya mfunu,” ya zola zonza bantu yina ke ntalu na meso ya yandi. Ntembe ve, beto ke na nsatu ya kuvanda na kati ya bantu yina.
Ya ke vanda kilengi mingi na kutala Danyele, bantu yina beto vandá zolá mpe bantu mingi ya nkaka ‘kutelama’ samu na kuzwa dikabu ya bawu na yinza ya malu-malu! (Tala paragrafe 20)
20. Wapi nsilulu ya nsuka ba pesá na Danyele, mpe samu na yinki nge ke na vingilá na mbangu nyonso kilumbu yina nsilulu yango ke lungana?
20 Ya tsyeleka, beto ke na zingá na ntangu mosi ya kitoko. Kasi bamambu ya kulutila kitoko ke kwiza na mwa ntangu fioti. Na mwa ntangu fioti, beto ke tala faso ba ke kufwa bantu nyonso ya yimbi. Na manima, beto ke tala faso Yehova ke lungisa nsilulu yayi yandi pesá na Danyele: ‘Nge ke telama samu na kubaka dikabu ya nge na nsuka ya bilumbu.’ (Dan. 12:13) Nge ke na vingilá kwandi na mbangu kilumbu yina Danyele, mpe bantu yina nge vandá zolá ke “telama” dyaka? Kana ni yawu, sala nyonso na kukangama na Yehova, mpe nge lenda vanda ya kundima ti, nkumbu ya nge ke vanda kaka na dibuku ya luzingu ya Yehova.
NZIMBU 80 “ Goûtez et voyez que Jéhovah est bon ”
^ Disolo yayi ke zonzila faso ya malu-malu ya kubakula mambu yina ke na Danyele 12:2, 3, na yina me tadila kisalu ya nene ya kulonga bantu. Beto ke tala na wapi ntangu ya ke salama, mpe banani ke vanda na kati. Beto ke tala mpe wapi mutindu kisalu yayi ya kulonga bantu ke sadisa ba yina ke vanda na ntoto na kuyidama samu na kumeka ya nsuka yina ke salama na nsuka ya bamvula 1000 ya Kimfumu ya Yesu.
^ Ntangu ya nkaka, ba ke vumbula ntete bisadi ya Yehova yina kufwá na kati ya bilumbu ya nsuka. Na manima, ba lenda vumbula ba yina kufwá tekila bawu, mpe malembe-malembe bantu nyonso ke vumbuka tii ba yina kufwá bamvula mingi na manima. Kana bamambu salama mutindu yayi, ya zola zonza ti bantu nyonso ke yamba ba yina ba vandá zaba. Ya vanda mutindu yayi to ve, kuvumbuka ya bantu awa na ntoto ke salama ve na muvusu. Beto zaba yawu samu Biblia ke lakisá ti ba yina ke zinga na zulu ke vumbuka na lufwa “na ndandanu.”—1 Ko. 14:33; 15:23.
^ Mambu yayi me soba yina beto zonzá na buku Prêtons attention á la prophétie de Daniel ! kikapu 17, mpe na Yinzo ya Kengidi ya 1er juillet 1987 (na Français), pp. 21-25.
^ Mambu yayi ke ve faso mosi na yina ke na Bisalu 24:15 mpe na Yoane 5:29. Na baverse yayi, “bantu ya lunungu” na ‘bantu ya kukondwa lunungu,’ to bantu yina salá bamambu ya mbote mpe bantu yina salá bamambu ya yimbi, ke na lakisá bamambu yina bantu salá tekila ba kufwa.
