Na 1 Bakorinto 15:8, Polo zonzaka: “Na manima ya kutalana na bantu nyonso yina, yandi talanaka na munu yina ke mutindu mwana yina me butuka na bangonda ya kulunga ve.” Na ntama, beto vandá zonzá ti, ntangu ya nkaka, Polo vandá zonzila na ntangu yina Yesu talaná na yandi, na nkembo nyonso yina ke na yandi na zulu. Ya vandá mutindu ba pesak’ yandi bweso ya kubutama to kuvumbuka na lufwa na zulu bamvula mingi tekila mvumbukulu yayi salama. Kasi na manima ya kutala dyaka mbote-mbote verse yayi, beto me tala ti beto me bonga kubongisa faso ya beto ya kutadila yawu.

Ya tsyeleka, Polo vandá zonzila bamambu yina salamá ntangu yandi kumá mukristo. Kasi, yinki yandi vandá sosa kuzonza ntangu yandi zonzá ti yandi “[butukaka] na bangonda ya kulunga ve”? Mambu yayi lenda sosa kuzonza bamambu mingi.

Polo kumá mukristo na faso mosi ya ngitukulu mpe na mbala mosi. Bambala mingi, ba ke vingilá ve ti mwana butuka na bangonda ya kulunga ve. Ntangu Saule (yina na manima kuzwá nkumbu ya Polo) kwendá na Damasi samu na kukwamisa bakristo yina vandá kuna, yandi vandá vingila ve ti Yesu talana na yandi. Polo vandá vingila ve ti yandi ke kuma mukristo, mpe ata bakristo yina yandi vandá kwenda kwamisa na Damasi vandá vingila ve yawu. Mpe samu mambu yayi vandá ngitukulu mingi, meso ya yandi kufwaka samu na ntangu fioti.—Bis. 9:1-9, 17-19.

Yandi kumá mukristo na “ntangu yina me lunga ve.” Biblia (La Bible de Jérusalem) ke zonzilá 1 Bakorinto 15:8 mutindu yayi: “Ya vandá mutindu munu butuká na ntangu yina ata muntu vandá vingila yawu.” Na ntangu yina Polo kumá mukristo, Yesu vandá dyaka ve awa na ntoto. Yandi vutuká na zulu. Bantu yina Polo zonzilá na baverse yina ke tekilá verse 8, talá Yesu na manima ya kuvumbuka ya yandi na lufwa, mpe tekila yandi vutuka na zulu. Ya vandá ve mutindu yina samu na Polo. (1 Ko. 15:4-8) Kasi, yandi kuzwá bweso yina ntangu Yesu talaná na yandi, ata ti ya talaná mutindu ya vandá na “ntangu yina me lunga ve.”

Yandi vandá zonzila yandi mosi na mutindu ya kukuluka. Bantu ya nkaka ya mayela ke zonzá ti na mambu yina Polo zonzá, ya lenda talana ti yandi vandá zonzila yimbi ya yandi mosi. Kana ni yawu, Polo vandá sosa kulakisa ti yandi vandá ve ya kulunga samu na kuzwa bweso ya kuvanda ntumwa. Ni na yawu, na manima yandi zonzaka: “Bantumwa nyonso ya nkaka me lutila munu mfunu. Na kutala mbote, mu kele ve na muswa ti ba bokila munu ntumwa, samu ti mu me talisa dibuundu ya Nzambi mpasi mingi. Kasi ni bumbote ya Nzambi salaka ti mu kuma mutindu mu kele ntangu yayi.”—1 Ko. 15:9, 10.

Na yawu, mambu yina Polo zonzá lenda sosa kulakisa mutindu ya ngitukulu mpe ya mbala mosi yina Yesu talaná na yandi. Ya lenda sosa mpe kulakisa ti yandi kumá mukristo na ntangu yina bantu mpe yandi mosi vandá vingila ve, to yandi vandá ve ya kulunga samu Yesu talana na yandi. Mambu ni mambu yina Polo vandá na yawu na yintu ntangu yandi zonzá mambu yayi, Polo lakisá pwelele ti mambu yayi yandi kutaná na yawu vandá mfunu na meso ya yandi. Ya pesak’ yandi kiminu ya ngolo ti Yesu vumbuká na lufwa. Ni yawu salá ti bambala ya nkaka, yandi vandá zonzilá mambu yango ntangu yandi vandá samuná bantu ya nkaka mambu yina me tadila kuvumbuka ya Yesu na lufwa.—Bis. 22:6-11; 26:13-18.