1-2. Yinki ke salaka ti beto vanda na kilengi? (Zaki 1:22-25)

 YEHOVA na Yesu ke na nsatu beto vanda na kilengi na luzingu ya beto. Muntu yina sonikaka Nkunga 119:2 zonzaka: ‘Kyese na bantu yina ke zitisaka bamambu yina Yandi ke bambulaka beto, yina ke sosaka Yandi na ntima ya bawu ya muvimba.’ Yesu mpe zonzaka: “Kyese na bantu yina ke kuwaka mambu ya Nzambi mpe ke tumamaka na yawu.”​—Luke 11:28, NWT.

² Samu beto ke sadilaka Yehova, beto ke na kilengi. Samu na yinki? bamambu ke mingi, kasi ya mfunu ke ti beto ke tangaka Biblia bilumbu nyonso, mpe beto ke salaka bangolo na kusadila yawu. Zaki 1:22-25 ke zonzaka: “Ya me lunga ve na kuwa kaka mambu ya Nzambi, kasi beno fwana kusadila yawu. Kana beno sadila yawu ve, beno ke na kuvuna banzutu ya beno mosi. Muntu yina ke kuwaka mambu ya Nzambi, mpe ke sadilaka yawu ve me fwanana na muntu yina ke na kutala kizizi ya yandi na kitalatala. Na manima ya kutala kizizi ya yandi, yandi ke kwenda mpe ke zaba dyaka ve wapi mutindu yandi kele. Kasi muntu yina ke yindulaka na musiku ya kulunga yina ke pesaka beto kimpwanza, ke vwandaka ya kukwikama na mambu yina. Yandi ke sosaka kaka ve na kuwa yawu, kasi ke sadilaka yawu. Muntu ya mutindu yina ke tala nsayi na bisalu ya yandi.”

3. Wapi bambote beto ke kuzwaka ntangu beto ke sadilaka bamambu yina beto ke tangaka na Biblia?

³ Beto ke kuzwaka bambote mingi ntangu beto ke ‘sadilaka mambu ya Nzambi.’ Na kifwani, beto ke sepelisaka Yehova mpe ya ke pesaka beto kilengi ntangu beto ke sadilaka mambu ya  Nzambi. (Lon. 12:13) Kusadila malongi ya Biblia ke bongisaka kindiku ya beto na bantu ya dikanda ya beto mpe na bampangi ya kimvuka. Ntembe ve, ya lenda vanda ti nge me talaka yawu na luzingu ya nge. Dyaka, ya ke bumbaka beto na bampasi yina ke kuminaka ba yina ke tumamaka ve na Yehova. Beto ke na kabulaka dikanisi mosi na mfumu Davidi, ntangu yandi zonzilaka musiku, bamambu yina Yehova ke zonzaka na kusala mpe balusambusu ya yandi na nkunga mosi. Na kumanisa yandi zonzaka: ‘Kuzitisa yawu ke nataka matabisi mingi.’​—Nku. 19:7-11.

4. Samu na yinki ya ke mpasi na kusadila mambu ya Nzambi?

⁴ Mambu ya tsyeleka ke ti, ya lenda vanda mpasi na kusadila mambu ya Nzambi. Samu na kusadila yawu beto me fwana kuzwa ntangu samu na kutanga mpe kulongoka yawu samu na kubakula yinki Yehova zola beto sala. Kasi beto ke na bamambu mingi ya kusala na luzingu. Na yawu, beto tala mwa bamambu yina lenda sadisa beto na kutanga Biblia bilumbu nyonso. Beto ke tala mpe wa’ faso beto lenda yindula na bamambu yina beto ke na tangaka mpe wa’ faso beto lenda sadila yawu na luzingu ya beto.

BAKA NTANGU YA KUTANGA MAMBU YA NZAMBI

5. Wapi bamambu ke bakaka beto ntangu?

⁵ Mingi ya bisadi ya Yehova ke na mingi ya kusala na luzingu. Beto ke lutisaka ntangu mingi na kusala bamambu yina Biblia ke lombaka beto. Na kifwani, mingi na kati ya beto ke salaka samu na kulungisa bansatu ya bawu mpe ya bantu ya makanda ya bawu. (1 Tim. 5:8) Mingi ke kipeke bantu ya makanda ya bawu yina ke na beelaka to yina me nuna. Beto nyonso me fwana kukipe mavimpi ya beto. Ya ke bakaka mpe beto ntangu. Na zulu ya nyonso yayi, ke mpe na mikumba yina ke na beto na kati ya kimvuka. Mosi ya mikumba yina ke mfunu, ni kusala bangolo ya beto nyonso samu na kusamuna nsangu ya mbote. Na mikumba nyonso yina ke na beto, wa’ faso beto lenda kuzwa ntangu samu na kutanga Biblia bilumbu nyonso, kuyindula na yina beto ke tangaka mpe kusadila yawu?

6. Yinki nge lenda sala samu kutanga Biblia vanda kima ya ntete na luzingu ya nge? (Tala mpe kizizi.)

 ⁶ Kutanga Biblia ke mosi ya “bamambu ya kulutila mfunu” yina bakristo me fwana kusala ntete na luzingu ya bawu. (Flp. 1:10) Nkunga ya ntete ke zonzaka na yina me tadila muntu yina ke na kilengi: ‘Yandi ke vandaka na kyese na musiku ya Yehova, mpe yandi ke tangaka musiku ya yandi na ndinga ya yisi mpimpa ntangu.’ (Nku. 1:1, 2) Na bunkufi, ya zola zonza ti beto me fwana kubaka ntangu ya kutanga Biblia. Wapi yina ke ntangu ya mbote ya kutanga Biblia? Mvutu na kyuvu yayi lenda vanda ve faso mosi samu na mosi na mosi ya beto. Kasi, ya ke mfunu samu na beto na kusoola ntangu yina ke sadisa beto na kutanga Biblia bilumbu nyonso. Mpangi mosi na nkumbu ya Victor me zonza: “Mu ke zolaka kutanga Biblia na suka. Ata ti ya ke vandaka mpasi na munu na kuvumbuka na suka, kasi na suka, makelele ke vandaka ve mingi. Mabanza ya munu ke vandaka ya kulunga mpe mu lenda tula dikebi na mambu yina mu ke na tangaka.” Ya ke mpe faso yina samu na nge? Nge lenda yufula: ‘Wapi yina ke ntangu ya mbote samu na munu na kutanga Biblia?’

YINDULA NA YINA NGE KE NA TANGAKA

7-8. Yinki lenda sala ti kutanga ya beto ya Biblia natina ve beto bambote? Pesa kifwani.

⁷ Ya tsyeleka, beto lenda tanga bamambu mingi bilumbu nyonso, kasi kuyindula ve na yawu. Ya me kuminaka kwandi nge na kuzimbana bamambu yina nge me tanga? Ya me kuminaka beto nyonso. Ya lenda salama mpe ntangu beto ke tangaka Biblia. Na kifwani, ya lenda vanda ti beto bakaka mukanu ya kutanga bikapu mingi ya Biblia konso kilumbu. Ya ke dikanisi ya mbote. Beto me bonga kuvanda na bamambu ya kusala, mpe kusala bangolo samu na kulungisa yawu. (1 Ko. 9:26) Kasi, kana beto ke na nsatu ya kuzwa bambote ya Biblia, beto me bonga ve kusuka kaka na kutanga yawu.

⁸ Kanisa na kifwani yayi: Maza ya mvula ke mbote mingi samu na luzingu. Kasi, kana mvula ke mingi, ya ke vanda mpasi na ntoto na kumina maza mpe ya ke vanda ve mbote samu na  ntoto. Ntoto ke na nsatu ya ntangu samu na kumina maza ya mvula mpe ni yawu ke sala ti bayinti kula na faso ya mbote. Mutindu mosi mpe, beto zola kima mutambu ya kutanga Biblia na mbangu. Samu ti ya ke sadisa ve beto na kuyindula mpe na kusadila bamambu yina beto ke tanga.​—Zaki 1:24.

9. Yinki beto lenda sala kana beto ke na kifu ya kutanga Biblia na mbangu?

⁹ Ya me kuminaka kwandi nge na kutanga Biblia na mbangu? Kana ni yawu, yinki nge lenda sala? Tanga malembe. Kusala yawu ke sadisa nge na kuyindula to kukanisa mbote-mbote na yina nge ke na tangaka. Ya pesa ve nge boma. Nge lenda bwela mwa ntangu na kulongoka ya nge samu nge yindula na yina nge me tanga. To, nge lenda soola kutanga ve baverse mingi mpe kusadila ntangu yina me bikana samu na kukanisa na mwa baverse yina nge me tanga. Victor yina beto me zonzila me zonza: “Mu ke tangaka kaka bitini ya fioti ya Biblia. Ya lenda vanda kikapu mosi. Samu mu ke salaka yawu na suka, mu lenda yindula na yawu kilumbu nyonso.” Faso ni faso nge ke sala yawu, kima ya mfunu ke ti nge me fwana kusala yawu na mutindu yina ke sadisa nge na kuyindula na yina nge ke na tangaka.​—Nku. 119:97; tala encadré “ Byuvu yina nge lenda yufula.”

10. Wa’ faso beto lenda sadila bamambu yina beto ke na longokaka? Pesa kifwani (1 Batesalonika 5:17, 18)

¹⁰ Ya ke mbote na kukanisa na ntangu nge ke lutisa na kutanga Biblia, kasi ya ke vanda mpe mbote na kukanisa na mutindu nge ke sadila yawu. Na manima ya kutanga mwa kitini ya Biblia, nge lenda yufula: ‘Wa’ faso mu lenda sadila bamambu yayi bubu yayi mpe na bilumbu yina ke kwiza?’ Na kifwani, kanisa ti nge ke na tangaka 1 Batesalonika 5:17, 18. (Tanga.) Na manima ya kutanga baverse zole yayi, nge lenda yufula: Mu ke sambilaka kwandi ntangu nyonso mpe na ntima mosi? Nge lenda kanisa mpe na bamambu yina nge lenda vutula Yehova matondo. Ya lenda vanda ti nge lenda baka mukanu ya kuvutula yandi matondo kaka samu na bamambu tatu yina yandi me sala. Ata ti nge baka kaka baminiti fioti samu na kutanga mwa baverse mpe kuyufula byuvu na baverse yango, malembe-malembe nge ke kuma muntu yina ke sadilaka mambu ya Nzambi. Mpe kana nge sala yawu bilumbu nyonso, ya ke sadisa nge na kusadila Yehova na faso ya mbote. Kasi, yinki nge lenda sala kana nge me kwiza tala ti nge me kuma na bamambu mingi ya kusadila?

SALA BAMAMBU YINA NGE LENDA LUNGISA

11. Yinki lenda sala ti bantangu ya nkaka nge vanda ya kulemba? Pesa kifwani.

¹¹ Ntangu nge ke tangaka Biblia mpe ke sosaka kusadila malongi yina ke na kati, ntangu ya nkaka, ya lenda lembisa nge. Na kifwani, kanisa: Bubu yayi nge me tanga kitini mosi ya  Biblia yina ke na niminaka kifu ya kusoolaka bizizi. (Zaki 2:1-8) Nge me kwiza tala ti nge me lunga kubongisa faso ya nge ya kubakila bampangi, mpe nge me baka mukanu ya kusala bansobolo. Ya ke mbote! Mbasi, nge me tanga kitini yina ke na lakisaka mfunu ya kukutika ludimi. (Zaki. 3:1-12) Nge me kwiza tala ti bantangu ya nkaka, faso ya nge ya kuzonza ke vandaka ve mbote. Nge me baka mukanu ya kusala bansobolo samu na yawu. Mbasi-mbasi nge me tanga kitini ya Biblia yina ke na kebisaka nge na bamambu ya mpasi yina ke kumina ba yina ke bandiku ya yinza. (Zaki 4:4-12) Nge me kwiza tala ti nge me fwana kusoola bansaka na faso ya mbote. Kilumbu ya yiya nge me kwiza tala ti nge ke na bamambu mingi ya kusala bansobolo. Ya lenda lembisa nge.

12. Kana lutangu ya nge ya Biblia ke na lakisaka nge ti nge ke na nsatu ya kusala bansobolo mingi, samu na yinki nge me bonga ve kulemba? (Tala mpe noti ya yisi ya paje.)

¹² Kulemba ve kana nge me tala ti nge ke na nsatu ya kusala bansobolo mingi. Ya ke na lakisaka ti nge ke muntu ya kukuluka. Ntangu beto ke tangaka Biblia, kuvanda ya kukuluka ke nataka beto na kusala bansobolo. a Kuzimbana mpe ve ti kulwata “kimuntu ya malu-malu” ke bakaka ntangu mingi. (Kol. 3:10) Yinki lenda sadisa nge na kutatamana na kuvanda muntu yina ke sadilaka mambu ya Nzambi?

13. Wapi yina ke faso ya mbote ya kusadila bamambu yina beto ke na longokaka? (Tala mpe kizizi.)

¹³ Kusosa ve kusadila bamambu nyonso yina nge ke na tangaka na Biblia na mbala mosi. (Bin. 11:2) Nge lenda meka kusala mambu yayi: Nge lenda sonika na mukanda bamambu nyonso yina nge ke na nsatu ya kusala bansobolo. Nge lenda banda na mosi to zole, mpe ya ba nkaka, nge lenda sala yawu bilumbu ya nkaka. Kasi, na wapi yina nge lenda banda?

14. Na bamambu yina nge me kanisa kusala, na wapi yina nge lenda banda?

 ¹⁴ Nge lenda banda na yina ke pete samu na nge to na yina nge me bonga kusoba na mbangu na kimuntu ya nge. Na manima ya kusoola, sosa kuzaba dyaka mingi na mambu nge ke sala na mikanda ya beto mutindu Index des publications des Témoins de Jéhovah to Buku ya kusosa samu na Bambangi ya Yehova. Sambila Yehova samu na bamambu yina nge ke na nsatu ya kulungisa, mpe lomba yandi na kupesa nge “nsatu mpe ngolo ya kusala bamambu.” (Flp. 2:13, NWT) Sadila bamambu yina nge me longoka. Kana nge me lenda kulungisa mambu ya ntete, ya ke pesa nge nsatu ya kulungisa mambu ya zole. Na yawu, kana nge me kulisa kifu mosi ya kimpeve to nge me lenda kusala bansobolo na kimuntu ya nge, ya ke sala ti bantangu ya nkaka ya vanda ve mpasi na nge na kusala bansobolo ya nkaka.

BIKA TI MAMBU YA NZAMBI “SALA NA KATI YA NGE”

15. Wapi yina ke luswaswanu na bisadi ya Yehova na bantu mingi yina ke tangaka Biblia? (1 Batesalonika 2:13)

¹⁵ Bantu ya nkaka ke salaka matalana samu ti ba tangaka Biblia bambala mingi. Kasi ba ke kwikilaka kwandi na bamambu ya Biblia? Mpe, ba ke salaka kwandi bangolo samu na kusadila yawu na luzingu ya bawu? Mambu ya kyadi ke ti mingi ke salaka ve yawu. Kasi ya ke ve faso mosi na yina me tadila dikanda ya Yehova. Mutindu bakristo ya siècle ya ntete, beto mpe ke ndimaka Biblia “mutindu ya kele ya tsyeleka, mambu ya Nzambi.” Ya kulutila mfunu, beto ke bikaka ya sala na kati ya beto, mpe ya twadisa luzingu ya beto.​—Tanga 1 Batesalonika 2:13.

16. Yinki lenda sadisa beto na kusadila mambu ya Nzambi?

¹⁶ Ya ke lombaka bangolo mingi na kutanga mpe kusadila mambu ya Nzambi. Ya lenda vanda ti ya ke mpasi na beto na kuzwa ntangu samu na kutanga yawu. To beto ke na kifu ya kutangaka yawu mbangu-mbangu mpe ya ke salaka ti beto kuzwa ve ntangu ya kuyindula na yawu. To ya lenda lembisa beto na kutala bansobolo nyonso yina beto me lunga kusala. Ata mpila yina, beto lenda nunga. Na lubakusu ya Yehova, beto ke lenda. Na yawu, beto me lunga kundima lubakusu ya Yehova. Ya ke sadisa beto na kuwa ve kaka mambu ya Nzambi, kasi mpe na kusadila yawu. Ntangu nyonso yina beto ke na sadilaka bamambu yina beto ke na longokaka, beto ke vanda na kilengi.​—Zaki 1:25.