1-2. Samu na yinki Yehova yidikaka beto na makoki ya kuzwa kilengi ntangu beto ke kabulaka?

 YEHOVA yidikaka beto na makoki ya kuzwa kilengi na kukabula kulutila ya kuzwa. (Bis. 20:35) Ya zola kwandi kuzonza ti beto ke vanda ve na kilengi kana ba kabula beto? Ve. Beto nyonso ke vandaka na kilengi ntangu ba ke kabulaka beto. Kasi, kilengi ya beto ke vandaka ya kulutila ntangu ni beto ke kabulaka. Ya tsyeleka, Yehova yidikaka beto na makoki ya kukabula samu na mbote ya beto mosi. Samu na yinki beto ke na zonzaka faso yina?

² Samu Yehova yidikaka beto na makoki ya kukabula, beto ke na bweso ya kukulisa kilengi ya beto, beto mosi. Kusosa bafaso ya kukabula lenda kulisa dyaka kilengi ya beto. Ya ke kitoko mingi mutindu Yehova yidikaka beto.​—Nku. 139:14.

3. Samu na yinki ba ke bokilaka Yehova “Nzambi ya kilengi”?

³ Biblia ke zonzaka na beto ti ba yina ke kabulaka ke vandaka na kilengi. Ni na yawu, ya ke bokilaka Yehova “Nzambi ya kilengi.” (1 Tim. 1:11, NWT) Yandi ke muntu ya ntete yina bandaka kukabula mpe yandi ke kabulaka ya kulutila. Mutindu sonikaka yawu ntumwa Polo, “ni na nzila ya yandi beto ke na luzingu, beto ke ninganaka mpe beto kele.” (Bis. 17:28, NWT) Ya tsyeleka, “makabu nyonso ya kulutila mbote” ke katukaka na Yehova.​—Zaki 1:17.

4. Yinki ke sadisa beto na kuzwa kilengi ya kulutila?

⁴ Ntembe ve, beto nyonso lenda vanda na nsatu ya kuzwa kilengi ya kulutila yina kukabula ke pesaka. Beto lenda sala yawu na kulandaka kifu ya kukabula ya Yehova. (Ef. 5:1) Na disolo yayi, beto ke tala wa’ faso beto lenda landa kifwani ya yandi, mpe yinki lenda sadisa beto kana beto ke na talaka ti bantu yina beto  ke kabulaka ke vutulaka ve beto matondo. Ya ke sadisa beto na kubumba kilengi ya beto ya kukabula, mpe na kukulisa yawu.

LANDA KIFU YA YEHOVA YA KUKABULA

5. Wapi bima Yehova ke pesaka beto?

⁵ Wa’ faso Yehova ke lakisaka kifu ya kukabula? Beto tala mwa bifwani. Yehova ke pesaka beto bima yina beto ke na yawu nsatu. Beto nyonso ve ke na bimvwama. Kasi, beto ke vutulaka matondo na Yehova na yina yandi ke pesaka beto bima yina beto ke na yawu nsatu. Na kifwani, yandi ke pesaka beto madya, bilele mpe kisika ya kulala. (Nku. 4:8; Mat. 6:31-33; 1 Tim. 6:6-8) Yehova ke salaka kwandi yawu samu yandi me fwana kusala yawu? Ata fioti ve! Kasi samu na yinki yandi ke salaka yawu?

6. Yinki Matayi 6:25, 26 ke na longaka beto?

⁶ Yehova ke pesaka beto bima yina beto ke na yawu nsatu samu yandi ke zolaka beto. Kanisa na bamambu yina Yesu zonzaka na Matayi 6:25, 26, NWT. (Tanga.) Kuna yandi sadilaka kifwani ya bandeke. Yandi zonzaka: “Ba ke kundaka ve mpe ke yonzikaka ve bambuma.” Kasi, yandi bwelaka: “Tata ya beno ya mazulu ke dikisaka bawu.” Mpe yandi yufulaka: “Beno ke kwandi ve mfunu kulutila bawu?” Wapi yina ke kileso? Samu na Yehova, bisadi ya yandi me lutila mfunu na bibulu. Kana Yehova ke kipeke bibulu, beto lenda vanda na kundima ti yandi ke kipe mpe beto. Mutindu tata ya luzolo mingi, Yehova ke kipeke mpe dikanda ya yandi na luzolo nyonso.​—Nku. 145:16; Mat. 6:32.

7. Wapi yina ke mosi ya bafaso ya kulanda kifu ya Yehova ya kukabula? (Tala mpe kizizi.)

⁷ Mutindu Yehova, beto lenda pesa bampangi yina ba ke na yawu nsatu na luzolo nyonso. Nge me zaba kwandi mpangi yina ke na mpasi ya kuzwa kima ya kudya to bilele ya kulwata? Yehova lenda sadila nge samu na kusadisa yandi. Bisadi ya Yehova ke ya kuzabana mutindu bantu yina ke kabulaka, mingi-mingi ntangu mambu ya kulutila mpasi ke kubwaka. Na kifwani, na ntangu ya COVID-19 bampangi ya kento na ya bakala pesaka madya, bilele mpe bima ya nkaka samu na kusadisa bampangi yina vandaka na yawu nsatu. Mingi pesaka mpe mbongo samu na kutula diboko na kisalu ya beto ya yinza nyonso. Ya sadisaka na kusadisa bampangi mingi na bisika mingi na yinza. Ba sadilaka bamambu yina ke na Baebre 13:16 yina ke zonzaka: “Beno fwana kuzimbana ve na kusala mambu ya mbote, mpe na kusalasana. Ni minkayulu ya mutindu yina Nzambi ke zolaka.”

8. Na wapi bamambu Yehova ke pesaka beto ngolo? (Bafilipi 2:13)

 ⁸ Yehova ke pesaka beto ngolo. Ya ke salaka Yehova kilengi na kupesa bisadi ya yandi ya kukwikama ngolo. (Tanga Bafilipi 2:13.) Ya me kuminaka nge na kusambila Yehova samu na kuzwa ngolo ya kubwa ve na ntontolo, to kukanga ntima na mambu ya mpasi? Ntangu ya nkaka nge sambilaka Yehova samu yandi pesa nge kaka ngolo yina nge ke na yawu nsatu samu na kilumbu. Ntangu nge kuzwaka mvutu na lusambu ya nge, ya lenda vanda ti nge vandaka na makanisi mosi na ntumwa Polo yina sonikaka: “Na mambu nyonso, mu ke na ngolo yina ke katukaka na Nzambi, muntu yina ke pesaka munu ngolo yina mu ke na yawu nsatu.”​—Flp. 4:13, NWT.

9. Wa’ faso beto lenda landa kifu ya Yehova ya kukabula na faso ya kusadila ngolo ya beto? (Tala mpe kizizi.)

⁹ Ata ti beto ke bantu ya masumu, beto lenda landa kifu ya Yehova ya kukabulaka na faso beto ke sadilaka ngolo ya beto. Ya tsyeleka, beto lenda pesa ve bampangi ngolo ya beto. Kasi, beto lenda sadila ngolo ya beto samu na kusadisa bawu. Na kifwani, beto lenda kwenda sadila mpangi yina ke ya kununa to yina ke na binama ya kufwa zandu, to kusadila yandi bisalu ya yinzo. Kana beto ke na ngolo, beto lenda pesa diboko na kusukula to kubongisa Yinzo ya Kimfumu. Kana beto sadila ngolo ya beto na bafaso yayi, ya ke sepelisa bampangi ya beto.

10. Wa’ faso beto lenda sadisa bampangi na bamambu yina beto ke zonzaka?

¹⁰ Kuzimbana mpe ve ti bamambu yina beto ke zonzaka ke na ngolo mingi. Nge me zaba muntu yina ke na nsatu ya bukindi to ya masiika? Nge lenda zonzila yandi bamambu ya mbote yina nge ke kanisaka samu na yandi. Nge lenda kwenda tala yandi, kubokila yandi na telefone, to kusonikila yandi. Nge ke ve na nsatu ya kuzonza mingi. Mwa bamambu fioti, kasi yina me katuka na ntima, lenda vanda yina yandi ke na yawu nsatu samu yandi kangama dyaka kilumbu mosi, to yandi tala bamambu na faso ya mbote.​—Bin. 12:25; Ef. 4:29.

11. Wa’ faso Yehova ke kabulaka ndwenga ya yandi?

¹¹ Yehova ke pesaka beto ndwenga. Zaki sonikaka: “Kana muntu na kati ya beno ke na kukondwa ndwenga, yandi lomba yawu na Nzambi, mpe Nzambi ke pesa yandi yawu, samu ti Nzambi ke pesaka na bantu nyonso na ntima ya mbote mpe ata kupesa masembo.” (Zaki 1:5) Mutindu verse me zonza, Yehova ke bumbaka ve ndwenga ya yandi samu na yandi mosi. Yandi ke pesaka yawu na bantu nyonso na ntima ya mbote. Dyaka, ntangu yandi ke pesaka ndwenga ya yandi, yandi ke pesaka yawu “ata kupesa masembo.” Yandi ke ve na nsatu beto vanda  na boma ntangu beto ke lombaka yandi na kutwadisa beto. Yandi zola ti beto lomba yandi yawu.​—Bin. 2:1-6.

12. Wapi yina ke bafaso bisadi ya Yehova ke kabulaka ndwenga ya bawu?

¹² Wa’ faso mutindu Yehova, beto lenda kabula ndwenga ya beto? (Nku. 32:8) Bisadi ya Yehova ke na bafaso mingi ya kukabula bamambu yina ba me longoka. Na kifwani, beto ke sadisaka bampangi yina me kwiza ntama mingi ve na kisalu ya kusamuna. Bakuluntu ke sadisaka na ntima ya yinda nyonso basadisi mpe bampangi ya bakala yina me kuzwa mbotokolo ntama mingi ve, na kuzaba faso ya kulungisa bisalu na kati ya kimvuka. Mpe bampangi ya kento na ya bakala yina me zaba mbote-mbote kisalu ya kutunga mpe ya kubongisa bayinzo ya Kimfumu ke sadisaka bampangi na kuzaba kisalu.

13. Ntangu beto ke lakisaka bampangi, wa’ faso beto lenda landa mutindu Yehova ke kabulaka ndwenga ya yandi?

¹³ Kana nge ke na lakisaka mpangi faso ya kusala, landa mutindu ya Yehova ya kupesa ndwenga ya yandi. Kuzimbana ve ti Yehova ke pesaka ndwenga ya yandi na ntima ya mbote nyonso. Mutindu mosi mpe, kabula na kilengi nyonso bamambu yina nge zaba na bantu yina nge ke na longaka. Kubumba ve bamambu ya nkaka yina nge zaba na boma ti ba baka kisika ya nge. Kuvanda ve na dikanisi yayi: ‘Ata muntu lakisaka munu! Yandi mpe, yandi longoka yandi mosi.’ Ba ke kanisaka ve mutindu yayi na dibuundu ya Yehova. Kilengi ya beto ke ya kulakisa ba yina beto ke na longaka nyonso yina beto me zaba, “kasi mpe ya kupesa [bawu] luzingu ya beto.” (1 Tes. 2:8, NWT) Beto ke na kivuvu ti “bawu mpe na ntangu ya bawu, ke vanda ya kubongama samu na kulonga bantu ya nkaka.” (2 Tim. 2:1, 2, NWT) Kana beto nyonso vanda na kifu ya kukabula ndwenga ya beto na bampangi, ya ke sala ti beto nyonso vanda na ndwenga mpe kilengi.

KANA BETO KE NA TALAKA TI BANTU KE NA VUTULAKA VE BETO MATONDO NA YINA BETO KE NA SALAKA SAMU NA BAWU

14. Yinki bantu mingi ke salaka ntangu ba ke kabulaka bawu?

¹⁴ Ntangu beto ke kabulaka bantu, mingi-mingi bampangi ya beto ya kimvuka, bambala mingi ba ke vutulaka beto matondo. Ntangu ya nkaka ba lenda sonikila beto samu na kupesa beto matondo, to ba lenda zonzila beto yawu na mutindu ya nkaka. (Kol. 3:15) Kutala yawu ke salaka beto kilengi.

15. Yinki beto me bonga kuzimbana ve ntangu bantu ya nkaka ke vutulaka ve beto matondo na yina beto me sala?

¹⁵ Kasi mambu ya tsyeleka ke ti bantu nyonso ve ke zonza na beto matondo, to ke lakisa beto ti ba me sepela na yina beto me sala na bawu. Ya lenda vanda ti beto me pesa ntangu ya beto, ngolo ya beto mpe mbongo ya beto samu na kusadisa muntu mpe kutala mutindu ya ke na salaka yandi ata kima na ntima. Kana ya me kumina beto, yinki beto lenda sala samu na kubumba kilengi ya beto mpe kukuma ve ndudi? Beto zimbana ve bamambu yina ke na Bisalu 20:35 yina ke verse ya yintu dyambu ya disolo ya beto. Ni kukabula ke salaka beto kilengi, kasi ve yina muntu ke salaka ntangu beto ke kabulaka yandi. Beto lenda baka mukanu ya kupesa na kilengi nyonso ata ti ya ba nkaka lenda vutula ve beto matondo samu na yawu. Beto tala mwa bamambu yina lenda sadisa beto.

16. Yinki ke sadisa beto na kubumba kilengi ya beto ntangu beto ke kabulaka?

¹⁶ Sosa kulanda kaka kifwani ya Yehova. Yehova ke pesaka bima ya kitoko na bantu nyonso ata ba yina ke vutulaka ve yandi matondo. (Mat. 5:43-48) Yandi me pesa beto nsilulu ti kana beto mpe, beto pesa ‘ata kuvingila ti ba vutula beto, difuta ya beto ke vanda nene.’ (Luke 6:35, NWT) “Ata kuvingila” zola mpe  kuzonza kuvingila ve ba vutula beto matondo. Kana ba vutula beto matondo to ve, Yehova ke pesa beto difuta samu na mambu ya mbote yina beto ke salaka na bampangi, samu beto ‘ke pesaka na kilengi.’​—Bin. 19:17; 2 Ko. 9:7, NWT.

17. Yinki lenda sadisa beto na kutatamana na kukabula na makanisi ya mbote? (Luke 14:12-14)

¹⁷ Kima ya nkaka yina lenda sadisa beto na kutatamana na kukabula na makanisi ya mbote, ni kulanda malongi yina ke na Luke 14:12-14. (Tanga.) Ya ke ve yimbi na kukabulaka to na kuyambaka bantu yina lenda sala yawu samu na beto. Kasi, kana beto me tala ti bantangu ya nkaka beto ke vingilaka ti ba yina beto me kabula, kabula mpe beto, yinki beto lenda sala? Beto lenda landa mambu yina Yesu zonzaka. Beto sosa kuyamba muntu yina beto zaba ti yandi lenda sala ve yawu samu na beto. Beto ke vanda na kilengi samu ti beto ke na landaka kifwani ya Yehova. Ya lenda sadisa mpe beto na kubumba kilengi ntangu bantu ke vutulaka ve beto matondo na yina beto me sala samu na bawu.

18. Yinki lenda sadisa beto na kutatamana kusadisa bampangi ya beto?

¹⁸ Kukanisa ve yimbi ya bampangi. (1 Ko. 13:7) Kana bampangi me vutula ve beto matondo, beto lenda yufula: ‘Ba me sala ve yawu samu ba zola ve to kaka samu ba me zimbana?’ Ya lenda vanda na bamambu ya nkaka yina me sala ti ba vutula ve beto matondo na mutindu yina beto vanda vingila. Ba ya nkaka lenda sepela na ntima ya bawu, kasi lenda tala mpasi na kuzonza yawu. Ba ya nkaka ke talaka nsoni ba sadisa bawu, mingi-mingi kana na ntama ni bawu vanda sadisaka bampangi. Kasi luzolo ya beto samu na bampangi ke sadisa beto na kutatamana kukabula bawu na kilengi nyonso.​—Ef. 4:2.

19-20. Samu na yinki ya ke mbote na kuvanda na ntima ya yinda ntangu beto ke sadisaka bampangi? (Tala mpe kizizi.)

¹⁹ Vanda na ntima ya yinda. Na yina me tadila kifu ya kukabula, mfumu Salomoni sonikaka: ‘Losa dimpa ya nge na maza, samu na manima ya bilumbu mingi nge ke tala dyaka yawu.’ (Lon. 11:1) Mutindu yandi me zonza yawu, ba ya nkaka lenda vutula beto matondo “na manima  ya bilumbu mingi.” Beto tala kifwani yina ke na lakisaka yawu.

²⁰ Bamvula mingi me luta, kento ya ntwadisi mosi ya circonscription sonikilaka mpangi ya kento mosi yina katukaka kuzwa mbotokolo, samu na kukindisa yandi na kuvanda kaka ya kukwikama. Bamvula pene-pene na 8 na manima, mpangi ya kento yango sonikilaka yandi: “Ya vandaka mfunu mu zonzila nge wa’ faso bamambu yina nge sonikilaka munu sadisaka munu mingi na kati ya bamvula.” Yandi bwelaka: “[Bamambu yina nge sonikaka] vandaka kitoko mingi, kasi ni verse yina nge tulaka simbaka munu ya kulutila. Mu lenda zimbana yawu ata fioti ve.” a Na manima ya kuzonzila mwa bampasi yina yandi kutanaka na yawu, yandi bwelaka dyaka: “Bantangu ya nkaka mu vandaka dyaka ve na nsatu ya kuvanda mbangi ya Yehova. Mu vandaka kaka na nsatu ya kubika. Kasi verse yina nge sonikilaka munu vanda vutukilaka kaka munu na yintu . . . Mpe ya vanda vutulaka munu ntima manima.” Na nsuka, yandi sonikaka: “Na kati ya bamvula, ya ke ve na kima yina me sadisa munu mutindu mukanda ya nge.” Beto lenda kanisa na kilengi yina ya salaka na kento ya ntwadisi ya circonscription yayi ntangu yandi kuzwaka mukanda yayi “na manima ya bilumbu mingi.” Ya lenda salama mpe ti muntu kwiza vutula beto matondo bamvula mingi na manima ya kusadisa yandi.

21. Samu na yinki beto ke na nsatu ya kutatamana kulanda kifu ya kukabula ya Tata ya beto ya mazulu?

²¹ Mutindu beto me tala yawu, Yehova yidikaka beto na makoki ya kusepela ntangu beto ke kabulaka. Ntembe ve, ya ke salaka beto kilengi ntangu ba ke kabulaka beto, kasi beto ke vandaka na kilengi ya kulutila ntangu beto ke kabulaka bampangi. Kusadisa bampangi ya beto ke pesaka beto kilengi. Mpe ya ke salaka beto kilengi ntangu ba ke vutulaka beto matondo. Kasi, ata ba sala yawu to ve, beto ke vanda kaka na kilengi na yina beto me sala mambu ya mbote. Kuzimbana ve ti nyonso nge ke pesaka, ‘Yehova lenda pesa nge bima mingi ya kulutila.’ (2 Ns. 25:9) Ya ke ve na kima yina lenda pesa beto kilengi ya kulutila yina Yehova lenda pesa beto! Bika ti beto tatamana na kulanda kifu ya kukabula ya Tata ya beto ya mazulu