1. Yinki Yesu ke sala na mwa ntangu fioti?

 BETO ke na zingaka na ntangu yina bansobolo ke mingi. Na ntangu fioti Yesu ke sambisa bantu. Samu na kuzonzila ntangu yina ya ke salama, Yesu pesaka bilandi ya yandi “kidimbu” yina ke lakisa ti yandi kele, mpe ti “nsuka ya yinza me kuma.” (Mat. 24:3) Ba ke zonzilaka yawu na buku ya Matayi 24 na 25, na Marke 13 mpe na Luke 21.

2. Yinki beto ke zonzila na disolo yayi mpe wa’ faso ya ke sadisa beto?

² Yesu sadilaka bifwani tatu samu na kukebisa beto. Bifwani yango ke ya mameme na bankombo, bantwenya ya bakento ya bizoba na ya mayela, mpe batalanta. Yandi sadilaka bifwani yayi samu na kukebisa beto. Mosi na mosi ya bifwani yayi ke sadisa beto na kubakula wapi bamambu Yesu ke tala na ndyatulu ya bantu ntangu yandi ke sambisa. Nyonso beto ke na longokaka yawu, beto benda bileso mpe beto tala wa’ faso beto lenda sadila yawu. Beto banda na kifwani ya mameme na bankombo.

MAMEME NA BANKOMBO

3. Na wapi ntangu Yesu ke sambisa bantu?

³ Na kifwani ya mameme na bankombo, Yesu lakisaka ti yandi ke sambisa bantu na mutindu yina ba ke bakila nsangu ya mbote mpe na mutindu yina ba ke pesa diboko na bakristo yina ba tulaka mafuta. (Mat. 25:31-46) Mwa ntangu tekila Armagedoni, yandi ke sambisa bantu na “mpasi ya nene.” (Mat. 24:21) Mutindu muvungi ke kabulaka mameme na bankombo, Yesu ke kabula ba yina ke ya kukwikama na bakristo yina ba tulaka mafuta mpe ba yina ke ve ya kukwikama na bawu.

4. Mutindu Izaya 11:3, 4 ke zonzaka yawu, samu na yinki beto lenda vanda na kundima ti Yesu ke sambisa bantu na faso ya mbote? (Tala mpeya paje ya ntete.)

 ⁴ Biblia ke zonzaka ti samu Yehova muntu tulaka Yesu samu na kusambisa, yandi ke sala yawu na faso ya mbote. Izaya 11:3, 4 (NWT) ke zonzaka: “Mpe yandi ke kuwa kyese na boma ya Yehova. Yandi ke sambisa ve na kutadilaka mambu yina ke talana na meso ya yandi, yandi ke ngala mpe ve na kutadilaka mambu yina makutu ya yandi ke kuwa. Yandi ke sambisa bapovre na mutindu ya mbote mpe yandi ke ngala bantu ya lunungu samu na bambote ya bantu ya kukuluka ya ntoto. Yandi ke bula ntoto na shikoti ya yinwa ya yandi mpe ke kufwa bantu ya yimbi na pema ya bikoba ya yandi.” Yesu ke talaka ndyatulu, nzonzolo, faso ya kutadila bamambu mpe faso ya bantu ya kubakila bakristo yina ba tulaka mafuta. (Mat. 12:36, 37; 25:40) Yandi zaba ba yina ke sadisaka bampangi ya yandi yina ba tulaka mafuta na kisalu a ya bawu. Kisalu ya kusamuna ke mosi ya bafaso ya kulutila mfunu yina mameme ke sadisaka bampangi ya Kristo. Ba ke sambisa ba yina ke pesaka bawu lubakusu mutindu bantu ya “lunungu” mpe ba ke vanda na bweso ya kuzwa “luzingu ya ntangu nyonso” awa na ntoto. (Mat. 25:46, NWT; Luz. 7:16, 17) Ya ke difuta ya kitoko mingi, samu na ba yina ke bikana ya kukangama na kati ya mpasi ya nene. Mpe na manima ya yawu, bankumbu ya bawu ke bikana na “dibuku ya luzingu.”​—Luz. 20:15.

5. Wapi kileso beto lenda benda na kifwani ya mameme na bankombo, mpe ba nani me fwana kusadila kileso yango?

⁵ Lakisa kukwikama. Kifwani ya mameme na bankombo ke na zonzilaka ntete ba yina ke na kivuvu ya kuzinga awa na ntoto. Ba ke lakisaka ve kaka kiminu na kusadisaka bakristo yina ba tulaka mafuta na kisalu ya kusamuna. Kasi ba ke landaka mpe na kukwikama nyonso malongi ya kisadi ya kukwikama mpe ya mayela yina Yesu tulaka. (Mat. 24:45) Kasi ba yina ke na kivuvu ya kukwenda na mazulu me fwana mpe kutula dikebi na kifwani yayi. Samu na yinki? Samu na bawu mpe Yesu ke talaka ndyatulu, faso ya kutadila bamambu mpe nzonzolo ya bawu. Bawu mpe me fwana kulakisa kukwikama. Awa beto zonzila bifwani zole yina ke na kebisaka bakristo yina ba tulaka mafuta. Ya ke na Matayi kikapu 25. Beto banda na kifwani ya bantwenya ya bakento ya bizoba na ya mayela.

BANTWENYA YA BAKENTO YA BIZOBA NA YA MAYELA

6. Yinki bantwenya ya bakento 5 salaka yina lakisaka ti ba vandaka na mayela? (Matayi 25:6-10)

⁶ Na kifwani ya bantwenya ya bakento, Yesu vanda zonzila bantwenya ya bakento 10 yina kwendaka bwabana bakala yina vanda kwelana. (Mat. 25:1-4) Bawu nyonso vandaka na kivuvu ya kuvanda na yandi na feti ya makwela. Yesu zonzaka ti 5 na kati ya bawu vandaka “mayela” mpe ba 5 ya nkaka vandaka “bizoba.” Bantwenya ya bakento ya mayela vandaka ya kubongama mpe ekenge. Ba vandaka ya kubongama samu na kuvingila bakala yina vanda kwelana ata tii na kati-kati ya mpimpa. Bamwinda ya bawu vandaka na mafuta yina zola kuma na kati-kati ya mpimpa. Ba vandaka dyaka na mafuta ya kubwela kana yandi zola kwiza ntangu mingi na manima. Na yawu, nyonso vandaka ya kulunga, samu bamwinda ya bawu vanda kaka ya kupela. (Tanga Matayi 25:6-10, NWT.) Ntangu bakala yango kumaka, bantwenya ya bakento ya mayela kotaka na yandi na feti ya makwela. Faso mosi mpe, bakristo yina ba tulaka mafuta yina ke vanda ekenge mpe ya kukwikama tii ntangu Yesu ke kwiza sambisa bantu ke vanda na bakala yina ke kwelana, yina ke  Yesu na Kimfumu ya yandi na mazulu. b (Luz. 7:1-3) Kasi yinki beto lenda zonza samu na bantwenya ya bakento ya bizoba?

7. Yinki kuminaka bantwenya ya bakento 5 ya bizoba, mpe samu na yinki?

⁷ Bantwenya ya bakento ya bizoba vandaka ve ya kubongama mutindu bantwenya ya bakento ya mayela samu na kubwabana bakala yina vanda kwelana. Bamwinda ya bawu vandaka ve na mafuta ya kulunga, mpe ba vandaka ve na mafuta ya kubwela. Ntangu ba kuwaka ti bakala yina vanda kwelana me kuma pene-pene, ba kwendaka sumba mafuta. Ntangu bakala yina vanda kwelana kumaka, ba vandaka ve. Na ntangu yina, “bantwenya ya bakento yina vandaka ya kubongama, kotaka na yandi na kisika ya mukembo ya makwela, mpe ba kangaka mwelo na manima ya bawu.” (Mat. 25:10, NWT) Na manima, ntangu bantwenya ya bakento ya bizoba vutukaka mpe vanda sosa kukota, bakala yina vanda kwelana zonzaka na bawu: “mu zaba ve beno.” (Mat. 25:11, 12, NWT) Bantwenya ya bakento ya bizoba vandaka ve ya kubongama samu na kuvingila bakala yina vanda kwelana na ntangu yina me fwanana. Wapi yina ke kileso samu na bakristo yina ba tulaka mafuta?

8-9. Wapi kileso bakristo yina ba tulaka mafuta lenda benda na kifwani ya bantwenya ya bakento? (Tala mpe kizizi.)

⁸ Bongama mpe vanda ekenge. Yesu vanda sosa ve kuzonza ti ya ke vanda na kinkuku ya bakristo yina ba tulaka mafuta yina ke vanda ya kubongama tii na nsuka na kinkuku ya nkaka ya ba yina ke vanda ve ya kubongama. Kasi, yandi vanda zonzila yina lenda kumina bakristo yina ba tulaka mafuta kana ba vanda ve ya kubongama na kukanga ntima na kukwikama nyonso tii na nsuka. (Yoa. 14:3, 4) Kana ba vanda ve ya kubongama, ba ke kuzwa ve difuta. Ya ke ve mambu ya kusakana! Ya vanda ba yina ke vanda na zulu to ba yina ke vanda awa na ntoto, beto nyonso me fwana kuwa mutindu ba ke na kebisaka beto na kifwani yayi. Mosi na mosi ya beto me fwana kuvanda ekenge mpe ya kubongama tii na nsuka.​—Mat. 24:13.

 ⁹ Na manima ya kuzonzila mfunu ya kuvanda ekenge mpe ya kubongama na kifwani ya bantwenya ya bakento, Yesu zonzilaka mpe kifwani ya batalenta. Kifwani ya batalenta yayi ke na longaka beto mfunu ya kuvanda ve na bubolo na kisalu.

BATALENTA

10. Wa’ faso bisadi zole lakisaka ti ba vandaka ya kukwikama? (Matayi 25:19-23)

¹⁰ Na kifwani ya batalenta, Yesu zonzilaka bisadi zole yina vandaka ya kukwikama, mpe mosi yina vandaka ve ya kukwikama. (Mat. 25:14-18) Bisadi zole lakisaka kukwikama ya bawu na kisalu ya ngolo yina ba salaka samu na kufunisa mbongo ya mfumu ya bawu. Tekila mfumu ya bawu kwenda na bwala ya nkaka, yandi pesaka bawu batalenta, yina ke mbongo ya mingi. Bisadi zole ya kukwikama lakisaka ti ba vandaka ve na bubolo na kisalu mpe sadilaka mbongo ya bawu na mayela nyonso. Ya salaka ti, ntangu mfumu vutukaka, yandi pesaka dyaka bawu ya kulutila. Yandi zonzaka na bawu na kukwiza mpe na ‘kuyangalala na mfumu ya bawu.’ (Tanga Matayi 25:19-23, NWT.) Kasi, yinki kuminaka na kisadi ya tatu? Yinki yandi salaka na mbongo yina mfumu ya yandi pesaka yandi?

11. Yinki kuminaka kisadi ya “bubolo” mpe samu na yinki?

¹¹ Ba pesaka talenta mosi na kisadi ya tatu. Kasi yandi vandaka na “bubolo.” Mfumu vanda kanisa ti yandi zola sadila talenta yango na mayela nyonso. Kasi, yandi kwendaka bumba yawu na yisi ya ntoto. Ntangu mfumu vutukaka, kisadi vutulaka yandi kaka talenta yina yandi bikilaka yandi. Yandi vandaka ve na faso ya mbote ya kutadila bamambu. Na kisika ya kulomba mulemvo samu yandi sadilaka ve mbote-mbote mbongo ya mfumu ya yandi, yandi zonzaka ti mfumu ya yandi kele “muntu yina ke zolaka ve buzoba.” Na yawu, mfumu ya yandi sepelaka ve na yandi. Mambu ya kyadi ke ti mfumu bakaka talenta yina vandaka na yandi, mpe bingisaka yandi.​—Mat. 25:24, 26-30, NWT.

12. Ba nani ke bisadi zole ya kukwikama?

¹² Bisadi ya kukwikama zole ke kifwani ya bakristo yina ba tulaka mafuta ya kukwikama. Mfumu ni Yesu, yina ke bokila bawu na “kwiza yangalala na [yandi].” Ba ke kuzwa difuta  ya bawu na mazulu, mvumbukulu ya ntete ya bantu na lufwa. (Mat. 25:21, 23, NWT; Luz. 20:5b) Dyaka, kifwani ya yimbi ya kisadi ya bubolo ke na kebisaka bakristo yina ba tulaka mafuta. Na wa’ faso?

13-14. Wapi kileso bakristo yina ba tulaka mafuta lenda benda na kifwani ya batalenta? (Tala mpe kizizi.)

¹³ Kuvanda ve na bubolo, kasi vanda na tiya. Na kifwani ya batalenta mpe ya bantwenya ya bakento, Yesu bikulaka ve ti bakristo yina ba tulaka mafuta ke kuma na bubolo. Kasi, yandi vanda lakisa bawu yinki zola kumina bawu kana ba vanda dyaka ve na tiya. Ba ke vanda ve ya kulunga samu na “mbokolo [kubokila] ya Nzambi mpe na nsololo [kusoola] yina Nzambi salaka samu na [bawu],” mpe ba ke kota ve na Kimfumu ya mazulu.​—2 Pi. 1:10.

¹⁴ Na bifwani ya bantwenya ya bakento na ya batalenta, Yesu lakisaka pwelele na bakristo yina ba tulaka mafuta ti ba me fwana kuvanda ya kubongama, ekenge, mpe kuvanda ve na bubolo. Kasi ya ke kwandi na mambu ya nkaka yina Yesu kebisaka bawu? Ee. Ya ke yina yandi zonzaka na Matayi 24:40, 41 na yina me tadila lusambusu ya bawu ya nsuka.

NANI “BA KE BAKA”?

15-16. Wa’ faso Matayi 24:40, 41 ke na lakisaka ti bakristo yina ba tulaka mafuta me fwana kuvanda ekenge?

¹⁵ Na manima ya bifwani tatu yayi beto me zonzila, Yesu zonzilaka lusambusu ya nsuka ya bakristo yina ba tulaka mafuta yina ke lakisa nani ke vanda ya kundimama. Yandi zonzilaka babakala zole yina vanda sala na bilanga, mpe bakento zole yina vanda nika bambuma. Ya lenda vanda ti na bifwani zole yayi, babakala nyonso zole ke na salaka kisalu mosi ya bilanga, mpe bakento nyonso zole ke na salaka mpe kisalu mosi ya kunika bambuma. Kasi Yesu zonzaka ti, na mosi na mosi ya bantu ya konso kifwani yayi, “ba ke baka mosi mpe ba ke bika ya nkaka.” (Tanga Matayi 24:40, 41, NWT.) Yesu zonzaka na bilandi ya yandi: “Ni na yawu, beno vanda ekenge, samu beno zaba ve kilumbu yina Mfumu ya beno ke kwiza.” (Mat. 24:42, NWT) Yandi zonzaka mambu ya mutindu mosi na manima ya kuzonzila kifwani ya bantwenya ya bakento. (Mat. 25:13) Bamambu zole yayi ke kwandi na kwelanaka? Ya lenda vanda. Ya tsyeleka, yandi ke “baka” kaka ni bakristo yina ba tulaka mafuta ya kukwikama na Kimfumu ya yandi ya mazulu.​—Yoa. 14:3.

¹⁶ Vanda ekenge. Bakristo yina ba tulaka mafuta yina ke vanda ve ekenge ke vanda ve na kati ya ba yina ba ke ‘soola.’ (Mat. 24:31, NWT) Kasi, bisadi nyonso ya Nzambi, ata ba yina ke na kivuvu ya kuvanda ntangu nyonso awa na ntoto, me fwana kuteka dikebi na mambu yayi yina Yesu zonzilaka: kuvanda ekenge mpe ya kukwikama.

17. Samu na yinki beto me lunga ve kuvanda na boma kana Yehova me soola kutula muntu mafuta na ntangu ya beto?

¹⁷ Samu beto zaba mbote-mbote Yehova, beto ke na kundima ti yandi ke sambisaka ntangu nyonso na faso ya mbote. Na yawu, kana Yehova tula bantu ya malu-malu mafuta na ntangu ya beto, ya zola kwamisa ve beto. c Beto ke na zabaka dyaka kifwani ya Yesu ya bantu yina kwizaka sala na bilanga ya vinu pene-pene na ngunga ya 11. (Mat. 20:1-16) Ba yina bandaka ntete kisalu kuzwaka difuta mosi na ba yina kwizaka sala na manima. Mutindu mosi mpe, ba yina ba me tula mafuta, ke kuzwa mpe difuta ya kukwenda vanda na zulu, kana ba vanda ya kukwikama ata ntangu ni ntangu yina ba tulaka bawu mafuta.

KUWA NTANGU BA KE KEBISAKA NGE

18-19. Wapi bileso beto me longoka na bifwani ya Yesu?

¹⁸ Yinki beto me longoka? Na kifwani ya mameme na ya bankombo, ba yina nyonso ke na kivuvu  ya kuzinga ntangu nyonso awa na ntoto me fwana kuvanda ya kukwikama na Yehova bubu yayi, mpe na kati ya mpasi ya nene. Mpe na mantwala, ntangu Yesu ke sambisa bawu, yandi ke tala bawu mutindu bantu ya kulunga yina lenda kuzwa “luzingu ya ntangu nyonso.”​—Mat. 25:46, NWT.

¹⁹ Beto me tala mpe bifwani zole yina ke na kebisaka bakristo yina ba tulaka mafuta. Na kifwani ya bantwenya ya kento ya mayela mpe ya bizoba, 5 na kati ya bawu vandaka mayela. Ba vandaka ekenge mpe ya kubongama na kuvingila bakala yina vanda kwelana tii ntangu yandi ke kwiza. Kasi, ya bazoba vandaka ve ya kubongama. Na yawu, bakala yina vanda kwelana mangaka kukotisa bawu na feti ya yandi ya makwela. Beto mpe me fwana kuvanda ya kubongama samu na kuvingila tii ntangu Yesu ke kwiza samu na kusukisa yinza yayi. Dyaka, na kifwani ya batalenta, beto me tala ti bisadi zole ya kukwikama vandaka ve na bubolo, kasi ba vandaka na tiya. Ba salaka kisalu ya ngolo samu na mfumu ya bawu, mpe na nsuka, ba vandaka ya kundimama. Kasi, kisadi ya bubolo, ba mangaka yandi. Wapi yina ke kileso? Beto me fwana ve kuvanda na bubolo, kasi kusala na tiya nyonso kisalu ya Yehova tii na nsuka. Na nsuka beto me tala ti bakristo yina ba tulaka mafuta ke “baka” difuta ya bawu yina Yesu ke pesa bawu na mazulu kaka kana ba bikana ekenge. Ba ke kaka na vingilaka ntangu ya “kuvukana ya [bawu]” na Yesu na mazulu. Na manima ya mvita ya Armagedoni, ba ke sala makwela ya bawu na dimeme.​—2 Tes. 2:1, NWT; Luz. 19:9.

20. Yinki Yehova ke sala samu na ba yina ke kuwa mbote-mbote bamambu yina Yesu kebisaka beto?

²⁰ Ya tsyeleka, ntangu yina Yesu ke sambisa yinza me kuma pene-pene. Kasi, beto ke ve na nsatu ya kuvanda na boma. Kana beto bikana ya kukwikama, Tata ya beto ya luzolo ke pesa beto “ngolo yina me lutila ngolo yina beto lenda bakula ve.” Na yawu, beto ke “lenda kuvuuka . . . kutelama na mantwala ya Mwana ya muntu.” (2 Ko. 4:7, NWT; Luke 21:36) Beto vanda na kivuvu ya kuzinga na zulu to na ntoto, beto ke sepelisa Tata ya beto kana beto kuwa mbote-mbote bamambu yina Yesu kebisaka beto na bifwani ya yandi. Mpe, na luzolo ya Yehova, bankumbu ya beto ke vanda ya kusonama na “kati ya dibuku ya luzingu.”​—Dan. 12:1; Luz. 3:5.