Beto lenda zonza ve ti samu ba vandaka ve na madya ya nkokila ya Mfumu, bilandi 70 yina Yesu fidisaka vandaka ve ya kundimama na yandi to ti ba bikaka yandi. Yesu vandaka kaka na nsatu ya kuvanda na bantumwa ya yandi.

Ntembe ve, ya vanda ba 12 to ba 70, bawu nyonso vandaka ya kundimama na Yesu. Yesu soolaka babakala 12 na kati ya bilandi ya yandi samu na kuvanda bantumwa. (Luke 6:12-16) Yandi vandaka na Galile ntangu “yandi vukisaka bantumwa 12” mpe “filisaka bawu samu na kukwenda samuna nsangu ya Kimfumu ya Nzambi mpe kubelusa bantu.” (Luke 9:1-6, NWT) Na manima, ntangu yandi vandaka na Zude, yandi “soolaka bilandi 70 ya nkaka. Yandi filisaka bawu zole-zole.” (Luke 9:51; 10:1, NWT) Na yawu, Yesu vandaka na bilandi bisika mingi yina vanda samuna nsangu na yina me tadila yandi.

Bazwife yina kumaka bilandi ya Yesu vanda landa kudya Pake konso mvula, mpe ya lenda vanda ti ba vanda salaka yawu na makanda ya bawu. (Bas. 12:6-11, 17-20) Ntangu lufwa ya yandi kumaka pene-pene, Yesu na bantumwa ya yandi kwendaka na Yeruzalemi. Kasi Yesu bokilaka ve bilandi ya yandi nyonso, yina vandaka na Zude, na Galile, mpe na Pere samu na kusala Pake ya nene. Yesu vandaka kaka na nsatu ya kuvanda na bantumwa ya yandi nkokila yina. Yandi zonzaka na bawu: “Mu vandaka na nsatu mingi ya kudya Pake yayi kintwadi na beno tekila mu tala mpasi.”​—Luke 22:15, NWT.

Ya vandaka ve ya mpamba. Yesu “Mwana ya Dimeme ya Nzambi yina ke na katulaka disumu ya yinza” zola kufwa na mwa ntangu fioti. (Yoa. 1:29, NWT) Lufwa ya yandi zola salama na Yeruzalemi, kisika yina ba vanda pesaka minkayulu na Nzambi. Lufwa ya Yesu zola nata kimpwanza ya kulutila nene na yina Pake yina bantu ya Izraele vanda sala na makanda ya bawu vanda bambula bawu: kubasika ya bawu na Ezypte. (1 Ko. 5:7, 8) Lufwa ya Yesu pesaka bantumwa bweso ya kukuma fondasio ya kimvuka ya bakristo. (Ef. 2:20-22) Yeruzalemi mbanza ya santu ke na “balufulu kumi na zole.” Na zulu ya yawu “ba sonikaka bankumbu ya bantumwa kumi na zole ya Dimeme.” (Luz. 21:10-14) Ya tsyeleka, bantumwa ya kukwikama vandaka na kisalu ya mfunu na kulungana ya dikanisi ya Nzambi. Ya ke na sadisaka beto na kubakula samu na yinki Yesu vandaka na nsatu ba vanda na yandi na Pake ya yandi ya nsuka, mpe na yina zola landa: Madya ya nkokila ya Mfumu.

Bilandi 70 mpe ba ya nkaka vandaka ve na yandi na nkokila ya madya ya Mfumu yina. Kasi bawu nyonso kana ba bikanaka ya kukwika zola kuzwa bambote yina zola nata madya ya nkokila ya Mfumu. Bakristo nyonso ya ntangu yina kumaka bakristo yina ba tulaka mafuta mpe kotaka na luwawanu samu na Kimfumu yina Yesu zonzilaka na bantumwa ya yandi nkokila yina.​—Luke 22:29, 30.