Na zulu Yesu longoká bifu yina kumisak’ yandi ndiku ya mbote ya kisalu. Na manima, ntangu yandi kwizá awa na ntoto, ba yina vandá sala na yandi vandá tala ti yandi zabá kusala na bampangi. Yinki beto lenda longoka na kifwani ya yandi? Kifwani ya Yesu ke na longá beto bifu tatu yina lenda sadisa beto na kuzaba kusala na bampangi, mpe kuwisana na bawu.

Ndiku ya mbote ya kisalu ke ya kukuluka. Yandi ke pesá valere na ba yina ke salá na yandi, mpe ke sosá ve kulakisa ti yandi lutila bawu. Yesu longoká faso ya kusala yayi na sika ya Tata ya yandi. Ata kaka ni Yehova ba me lunga kubokila Muntu-yidiká-bima-nyonso, Yehova ke mpe na nsatu bantu zaba ti yandi salá na mwana ya yandi. Beto lenda tala yawu na yina Nzambi yandi mosi zonzá: “Beto sala muntu na kifwani [ya] beto.” (Kub. 1:26) Kuwa mambu yayi natá Yesu na kundima ti Yehova ke ya kukuluka.—Nku. 18:35.

Ntangu yandi vandá awa na ntoto Yesu mpe lakisá ntima ya kukuluka. Ntangu bantu vandá kumisa yandi samu na yina yandi vandá sala, yandi vandá vutulá nkembo na Nzambi, muntu yina me lunga kuzwa yawu. (Mrk. 10:17, 18; Yoa. 7:15, 16) Yesu salá nyonso samu kizunu vanda na kati ya yandi na bilandi ya yandi. Yandi vandá bakilá bawu faso bandiku ya yandi, kasi bangamba ya yandi ve. (Yoa. 15:15) Yandi kwendá tii na kusukula makulu ya bawu, samu na kulakisa bawu ti ba zolá vanda ya kukuluka. (Yoa. 13:5, 12-14) Beto mpe me lunga kupesa valere na ba yina ke  salá na beto, mpe kutula bansatu ya bawu na mantwala ya bansatu ya beto. Kisalu ke kwenda na mantwala si beto ‘pesa bampangi lukumu,’ mpe beto sosa ve ti ntangu nyonso nkembo kuvutuká kaka na beto.—Rom. 12:10.

Muntu ya kukuluka zaba mpe ti “mambu ke nungaka na nzila ya [milongi] mingi.” (Bin. 15:22) Ata beto ke na mayela, to beto me sala bamvula mingi na kisalu yina beto ke na salá, beto zolá zimbana ve ti ata muntu zaba bamambu nyonso. Yesu yandi mosi ndimá ti ya vandá na bamambu yina yandi zabá ve. (Mat. 24:36) Mpe yandi vandá sosá kuzaba yinki bilandi ya yandi vandá kanisa, ata ba vandá bantu ya masumu. (Mat. 16:13-16) Ni yina salá ti ba yina vandá sala na yandi vanda na kilengi ya kusala na yandi. Faso mosi mpe, na ntima ya kukuluka, beto zolá ndima ti beto zaba ve bamambu nyonso mpe beto lenda sala ve nyonso. Si beto bika bampangi tula mayela ya bawu na kisalu, kizunu ke vanda mpe kintwadi, ‘mambu ke nunga.’

Ya ke mfunu mingi na bakuluntu na kulanda kifwani ya Yesu na mambu yayi ntangu ba ke salá na bampangi bakuluntu. Ba zolá zimbana ve ti mpeve ya santu lendá nata muntu nyonso na kati ya bawu na kupesa dikanisi ya mbote. Na balukutakanu ya bawu, bakuluntu zolá sala nyonso samu ata muntu vanda na boma to nsoni ya kuzonzila mambu yina ke na yandi na ntima. Si ba sala faso yayi, ba ke baka badesizion yina ke vanda mbote samu na kimvuka nyonso.

Ndiku ya mbote ya kisalu ke natá ve bamambu ngolo ntangu yandi ke na salá na bampangi. Yandi ke ndimá makanisi ya bampangi mpe ke sosá ve ba sala bamambu kaka faso yandi zola. Yesu talá bambala mingi Yehova kulakisa kifu yayi. Na kifwani, ata bantu me lunga kufwa samu na yina ba salá, Yehova filisá mwana ya yandi kuvuukisa bawu.—Yoa. 3:16.

Ntangu bamambu vandá lomba ti Yesu soba dikanisi ya yandi, yandi vandá sala yawu. Na kifwani, ata ba filisak’ yandi kaka na bana ya Izraele, Yesu ndimá kusadisa kento mosi ya Phénicie. (Mat. 15:22-28) Dyaka, yandi vandá vingila ve ya kulutila yina bilandi ya yandi lendá sala. Ntangu ndiku ya yandi Piere mangak’ yandi na meso ya bantu, Yesu lemvokilak’ yandi na ntima mosi. Na manima, yandi pesá Piere kisalu mosi ya nene. (Luke 22:32; Yoa. 21:17; Bis. 2:14; 8:14-17; 10:44, 45) Kifwani ya Yesu ke na lakisá pwelele ti beto zolá sala ti ‘bantu nyonso zaba kifu ya beto ya kuvandá ve na mambu ya ngolo’.—Flp. 4:5.

 Si beto ke ve na mambu ya ngolo, beto ke lenda kusala na kizunu na bantu ya faso ni faso. Samu Yesu vandá zaba kubakila ba yina vandá pene-pene na yandi, ba-enemi ya yandi zonzá ti yandi vandá “ndiku ya bilokoti-mpaku mpe misumuki,” yina vandá kuwá malongi ya yandi. (Mat. 11:19) Beto mpe lenda kuzaba kwandi kusala na bampangi faso Yesu? Louis, mpangi mosi ya bakala yina salá na bampangi ya mutindu na mutindu na kisalu ya sirkonskripsion, mpe na Béthel, me zonza: “Kusala na bampangi yina ke bantu ya masumu faso beto, ke mutindu kutunga mur na matadi yina ke ve faso mosi. Samu matadi nyonso ke ve faso mosi, ya ke lombá bangolo samu na kuzwa mur ya mbote. Mu ke salá bangolo na kusoba makanisi ya munu samu na kusala na kizunu na bampangi. Na yawu, kisalu ke kwendá na mantwala.” Ya ke faso ya mbote ya kutadila bamambu.

Na wapi ntangu beto lenda lakisa ti beto ke natá ve bamambu ngolo na bampangi ya beto ya kimvuka? Beto lenda sala yawu ntangu beto ke kwendá preche na bampangi ya grupe ya beto ya predikasion. Ba lenda lomba na beto na kupreche na bampangi yina ke na bana, to na ba yina ke ya kununa. Beto lenda sala bamambu na mbangu yina me lunga na bawu, mpe kundima kusadila ba metode yina ba ke zola. Ya ke sala ti ba vanda na kilengi ya kupreche.

Ndiku ya mbote ya kisalu ke “[kabulá] na bampangi.” (1 Tim. 6:18) Ntangu Yesu vandá sala na Tata ya yandi, yandi kwizá tala ti Yehova ke bumbá ve yina yandi zaba. Ntangu Yehova vandá ‘yidika zulu,’ Yesu ‘vandá kuna’ mpe lendá kulongoka na sika ya yandi. (Bin. 8:27) Na manima, yandi vandá na kilengi ya kukabula na bilandi ya yandi “mambu nyonso yina [yandi] kuwaka” na Tata ya yandi. (Yoa. 15:15) Beto ke landa kifwani ya Yehova, si na ntima mosi beto ke kabulá yina beto zaba na ba yina ke salá na beto. Ndiku ya mbote ya kisalu ke bumbá ve bamambu yina bampangi zolá zaba samu yandi vanda na zulu ya bawu. Yandi ke na kilengi ya kukabula na bampangi bamambu yina yandi longoká.

Faso ya nkaka ya kuvanda ndiku ya mbote ya kisalu ni ya kuzonzila na ba yina ke salá na beto bamambu yina ke pesa bawu ngolo. Ntangu mpangi mosi ke talá bangolo yina beto ke salá mpe me felisite beto, ntima ya beto ke ninganá. Yesu vandá baká ntangu ya kuzonzila na ba yina vandá sala na yandi bamambu ya mbote yina yandi talá na bawu. (Tala Matayi 25:19-23; Luke 10:17-20.) Yandi kwendá tii na kuzonza ti ba ke sala “bisalu ya kulutila nene” na yina yandi salá. (Yoa. 14:12) Na mpimpa avan lufwa ya yandi, yandi felisiteke ba-apotre mpe zonzá: “Beno kele bayina me tatamana kintwadi na munu na bampasi nyonso yina mu talaka.” (Luke 22:28) Bamambu yina yandi zonzá simbá bantima ya bawu mpe natá bawu na kusala dyaka ya kulutila. Si beto mpe baka ntangu ya kufelisite ba yina ke salá na beto, ba ke vanda na kilengi mpe ba ke sala dyaka ya kulutila.

Kayode, mpangi mosi ya bakala me zonza “Ata beto ke bantu ya masumu, beto lenda vanda bandiku ya mbote ya kisalu. Muntu yina zaba kusala na bampangi ke salá ti ba vanda na kilengi, mpe kisalu vanda ve mpasi samu na bawu.” Ni ndiku ya kisalu ya faso yayi mpe nge kele? Na kuzaba yawu, nge lenda lomba na bampangi ya kento na ya bakala yina ke salá na nge na kuzonza yinki ba ke kanisá na nge. Si kusala na nge ke pesá bawu kilengi, faso bilandi ya Yesu vandá na kilengi ya kusala na yandi, nge lenda zonza faso apotre Paul zonzá: ‘Beto ke bandiku ya kisalu samu na kilengi ya beno.’—2 Ko. 1:24.