Ba talá luzolo yina kimvuka lakisá bawu

KUWA NA

YOMARA na bampangi ya yandi ya babakala ke vandá na bwala mosi ya fioti yina ke na bwala ya Guatemala. Yomara bandá kulongoka Biblia na Bambangi ya Yehova, mpe na manima bampangi ya yandi mpe bandá kulongoka. Kasi mambu ya kyadi ke ti, bawu nyonso tatu ke na meso ya kufwa, mpe ba zabá ve kutanga braille. Na yawu, mpangi yina vandá longa bawu Biblia zolá tanga kileso mpe baverse samu na bawu.

Ya vandá mpe mpasi na bawu na kukwenda na balukutakanu. Na kukuma na Yinzo ya Kimfumu yina vandá mwa pene-pene na bawu, ba zolá lutisa baminiti 40 na nzila. Bawu mosi vandá ve na makoki ya kukwenda kuna. Kasi bampangi ya kimvuka bongisá bamambu samu na kunata bawu na balukutakanu nyonso. Dyaka, ntangu ba bandá kusala ba devoirs na balukutakanu, bampangi vandá sadisá bawu na kubumba na yintu nyonso yina ba zolá zonza.

Na mai 2019, balukutakanu ya kimvuka bandá kusalama na kisika yina ba kele. Na ntangu yina, ya vandá na bampangi ya kukwela yina vandá ba pionniers, mpe yina kwizá vanda kuna. Ba zabá ve kutanga mpe kusonika braille. Kasi ba vandá na nsatu ya kusadisa Yomara na bampangi ya yandi na kuzaba kutanga mpe kusonika braille. Ba kwendá na biblioteke samu na kusosa mabuku yina ke sadisa bawu na kulongoka braille, mpe faso ya kulongisa yawu na bantu ya nkaka.

Marcelo ke na pesá mvutu na lukutakanu ya kimvuka

Kaka na mwa bangonda, bampangi tatu yayi lendá kutanga braille, mpe ya sadisá bawu na kukula mingi na kimpeve. Bubu yayi, Yomara, Marcelo, na Hiver ke ba pionniers. Marcelo ke kisadisi na kimvuka. Na kati ya lumingu, ba ke na mingi ya kusala na kisalu ya Yehova.

Bampangi tatu yayi ke vutulá matondo mingi na lubakusu yina kimvuka me pesa bawu. Yomara me zonza: “Kubanda kilumbu ya ntete yina beto kutaná na Bambangi ya Yehova, ba lakisá beto luzolo ya tsyeleka ya bakristo.” Marcelo me bwela: “Beto ke na bandiku ya mbote na kimvuka ya beto, mpe beto ke na kati ya dikanda ya nene ya bampangi yina ke na bisika nyonso na yinza mpe yina ke na bumosi. Yomara na bampangi ya yandi zole ke na vingilá na mbangu kilumbu yina ba ke tala na meso ya bawu ntoto kukuma paradiso.—Nku. 37:10, 11; Iza. 35:5.