1. Yinki Yesu zonzá na bilandi ya yandi na yina me tadila ntangu ya nsuka, mpe na yinki yandi kebisá bawu?

 MWA bilumbu tekila Yesu kufwa, bilandi ya yandi 4 yufulak’ yandi: ‘Wapi kidimbu ke lakisa nsuka ya yinza?’ (Mat. 24:3) Ntangu ya nkaka, ba vandá sosa kuzaba yinki zolá sadisa bawu na kuzaba ntangu yina Yeruzalemi na tempelo ke mwangana. Na mvutu yina yandi pesá bawu, Yesu zonzilá ve kaka kumwangana ya Yeruzalemi na tempelo, kasi mpe “nsuka ya yinza” yayi. Na yina me tadila ntangu yina nsuka ke kuma, Yesu zonzaka: “Ata muntu zaba kilumbu mpe ngunga yina mambu yayi ke salama. Ata bambazi ya mazulu mpe ata Mwana ya Nzambi zaba yawu. Kaka yandi mosi Tata zaba yawu.” Mpe yandi zonzá na bilandi ya yandi: “Beno sala keba! Beno lala ve pongi.”​—Mrk. 13:32-37.

2. Samu na yinki ya vandá mfunu na bakristo ya siècle ya ntete na kulala ve pongi?

² Samu na kuvuuka na siècle ya ntete, bazwife yina vandá bakristo zolá lala ve pongi. Yesu zonzá na bilandi ya yandi bamambu yina ba zolá tala samu na kuzaba ti na mwa ntangu fioti Yeruzalemi na tempelo ke mwangana. Yandi zonzaka: ‘Ntangu beno ke tala ti bankonga ya basoda me zunga Yeruzalemi, beno ke zaba ti kaka ntangu fioti me bikana, mpe Yeruzalemi ke mwangana.’ Na ntangu yina, ba zolá tumama na mambu yina Yesu zonzá na bawu, mpe “kukima na zulu ya myongo.” (Luke 21:20, 21) Ba yina tulá dikebi na bamambu yina Yesu zonzá vuuká ntangu basoda ya Rome kwizá mwangisa Yeruzalemi.

3. Yinki beto ke zonzila na disolo yayi?

³ Bubu yayi, beto ke na zingá na ntangu ya nsuka ya yinza yayi.  Na yawu, beto mpe me fwana kusala keba mpe kulala ve pongi. Na disolo yayi, beto ke tala wa’ faso beto lenda sadila ndwenga ntangu beto ke talá bamambu yina ke na salamá na yinza, wa’ faso beto lenda sala keba na beto mosi mpe wa’ faso beto lenda sadila na faso ya mbote ntangu yina me bikana.

4. Samu na yinki ya ke mbote beto sosa kuzaba wapi mutindu bamambu yina ke na salamá na yinza ke na lungisá bambikudulu ya Biblia?

⁴ Ya ke mbote na kusosa kutala faso bamambu yina ke na salamá na yinza ke na lungisá bambikudulu ya Biblia. Na kifwani, Yesu zonzilá beto pwelele bamambu yina zolá salama, yina ke sadisa beto na kuzaba ti nsuka ya yinza ya Satana me kuma pene-pene. (Mat. 24:3-14) Ntumwa Piere zonzá na beto na kutula dikebi na kulungana ya bambikudulu samu kiminu ya beto bikana ngolo. (2 Pi. 1:19-21) Luzabusu, buku ya nsuka ya Biblia ke bandá na mambu yayi: ‘Dibuku yayi ke na kuzabisa mambu ya kubumbama yina Nzambi lakisaka na Yesu Kristo, samu ti yandi lakisa na bisadi ya yandi mambu yina ke salama na bilumbu ke na kukwiza.’ (Luz. 1:1) Na yawu, ya ke mbote na beto na kutala bamambu yina ke na salamá na yinza mpe kusosa kuzaba wapi mutindu ya lenda lungisa bambikudulu ya Biblia. Mpe ya ke ve yimbi beto solola na bampangi na bamambu yayi.

5. Yinki beto me bonga ve kusala mpe yinki beto me bonga kusala? (Tala mpe bizizi.)

⁵ Kasi ntangu beto ke sololá na bampangi na bambikudulu, beto me bonga ve kuzonza makanisi ya beto na yina me tadila kulungana ya yawu. Samu na yinki? Samu ti beto zola ve kuzonza ata mambu mosi yina lenda bebisa bumosi na kati ya kimvuka. Na kifwani, beto lenda kuwa bamfumu ya yinza kuzonza mutindu ba ke sala ti mvita manisa na kisika mosi, to mutindu ba ke tula kizunu mpe lukengolo. Beto me bonga ve kutula makanisi ya beto na kusosa wapi mutindu mambu yina ba ke na zonzá ke na lungisá 1 Batesalonika 5:3. Mambu ya mbote ya kusala, ni kusosa kuzaba mambu yina me basika ntama mingi ve na mikanda ya beto na yina me tadila mbikudulu yayi. Ntangu bamambu yina beto ke zonzá ke vandá bamambu yina ke katuká na dibuundu ya Yehova, beto ke sadisá kimvuka na kuvanda kaka na “mabanza mosi.”​—1 Ko. 1:10; 4:6.

6. Wapi bileso beto lenda benda na mambu yina ke na 2 Piere 3:11-13?

⁶ Tanga 2 Piere 3:11-13. Mambu yina ntumwa Piere zonzá ke sadisá beto na kuzaba yinki zolá nata beto na kusosa kuzaba kulungana ya bambikudulu ya Biblia. Yandi me zonza na beto na ‘kubambuka moyo ntangu nyonso kilumbu ya Yehova.’ Samu na yinki? Ya kele ve samu na kusosa kuzaba “kilumbu mpe ngunga” yina Yehova ke nata Armagedoni. Kasi ya ke samu beto zola kusadila na faso ya mbote ntangu yina me bikana na ‘kuvandaka na bankadulu yina Nzambi ke zolaka, mpe ya kukwikama na yandi.’ (Mat. 24:36; Luke 12:40) Ya zola zonza kuvanda na ndyatulu ya mbote mpe kubika luzolo twadisa nyonso yina beto ke salá samu na Yehova. Na kusala yawu, beto me bonga kusala keba na beto mosi.

7. Wa’ faso beto ke lakisá ti beto ke salá keba na beto mosi? (Luke 21:34)

⁷ Yesu zonzá ve na bilandi ya yandi kaka na kutula dikebi na bamambu yina ke na salamá na yinza, kasi mpe na kusala keba na bawu mosi. Ni yawu ke na talaná na bamambu yina yandi zonzá na Luke 21:34. (Tanga.) Na verse yayi, Yesu vandá sosa kuzonza: “Beno sala keba na beno mosi.” Muntu yina ke salá keba na yandi mosi ke vandá ekenge na bamambu nyonso  yina lenda bebisa kindiku ya yandi na Yehova, mpe yandi ke salá nyonso samu ya bwisa ve yandi. Samu yandi ke salá mutindu yayi, yandi ke bikaná na kati ya luzolo ya Nzambi.​—Bin. 22:3; Yude 20, 21.

8. Yinki ntumwa Polo zonzá na bakristo?

⁸ Ntumwa Polo zonzá na bakristo na kusala keba na bawu mosi. Na kifwani, yandi zonzá na bakristo ya Efeze: “Beno sala keba na mutindu ya beno ya kuzinga. Beno zinga ve mutindu bantu yina kele ve na ndwenga. Kasi beno zinga mutindu bantu ya ndwenga.” (Ef. 5:15, 16) Ntangu nyonso, Satana ke sosá kubebisa kindiku ya beto na Yehova. Ni na yina Biblia ke zonzá na beto na kusosa “kubakula mambu yina Mfumu ke zolaka” samu beto kubwa ve na mitambu ya Satana.​—Ef. 5:17.

9. Wa’ faso beto lenda bakula mambu yina Yehova zola?

⁹ Biblia ke zonzilá ve beto bamambu nyonso yina lenda bebisa kindiku ya beto na Yehova. Bantangu ya nkaka, beto lenda vanda na nsatu ya kubaka mikanu na bamambu yina Biblia ke zonzilá ve pwelele. Samu na kubaka mikanu ya mbote, beto me bonga kubakula to kuzaba mbote-mbote “mambu yina Mfumu ke zolaka.” Beto lenda sala yawu na kutangaka mambu ya Nzambi bilumbu nyonso mpe kuyindulaka na yawu. Ntangu beto ke bakulá mambu yina Yehova me zola, mpe beto ke sosá kuvanda na ‘mabanza ya Kristo,’ ya ke sadisá beto na kutambula mutindu “bantu ya ndwenga,” ata na ntangu yina beto ke ve na musiku yina ke zonzilá pwelele yinki ya kusala. (1 Ko. 2:14-16) Ntangu ya nkaka, ya ke ve mpasi na kutala mitambu yina ke na mantwala ya beto. Kasi mitambu ya nkaka ke vandá ya kubumbama.

10. Wapi yina ke mwa mitambu beto me bonga kukima?

¹⁰ Na kati ya bamambu yina beto me bonga kukima, ya kele na kusakana na ntima ya muntu ata beto zaba ti beto ke kwela ve yandi, kukola malafu, kudya mingi, kuzonza bamambu yina ke lwalisá bampangi, kutala ba films yina bantu ke salá bamambu ya ngolo, kutala bizizi ya bantu yiná ke ve na bilele to yina ke na vukisá nzutu, to bima ya nkaka ya mutindu yina. (Nku. 101:3) Mbeni ya beto Satana ke sosá ntangu nyonso kunata beto na kusala bamambu yina ke bebisa kindiku ya beto na Yehova. (1 Pi. 5:8) Kana beto sala ve keba, Satana lenda kunda na mabanza mpe na bantima ya beto bambuma ya musoki, luvunu, nsatu ya kuzwa mingi, kuyina bampangi mpe kukangila bampangi nkele. (Gal. 5:19-21) Na kubanda, nge lenda tala ti mambu yayi ke ya yawu ve yimbi. Kasi si beto sala ve nyonso samu na kutimuna yawu na bantima ya beto, malembe-malembe ya ke kula mutindu yinti ya poison mpe ya ke nata bampasi.​—Zaki 1:14, 15.

11. Wapi yina ke mosi ya mitambu ya kubumbama yina beto me fwana kukima, mpe samu na yinki?

¹¹ Mosi ya mitambu ya kubumbama yina beto me bonga kukima ke ni bandiku ya yimbi. Mambu yayi lenda salama: nge ke salá na muntu yina ke ve mbangi ya Yehova. Nge ke na nsatu ti mpangi ya nge ya kisalu tala ti Bambangi ya Yehova ke bantu ya mbote. Na yawu, nge ke lakisak’ yandi ntima ya mbote mpe nge ke sadisak’ yandi. Bambala ya nkaka, nge ke kudyá kintwadi na yandi. Malembe-malembe, beno me banda kusala yawu ntangu nyonso. Bambala ya nkaka, yandi ke zonzá bamambu ya nsoni. Na kubanda, nge ke kipeke ve bamambu yina yandi ke zonzaka. Kasi na manima, samu nge me kuwa yawu mingi, ya ke dyaka ve na salá nge kima. Mpe kilumbu mosi, yandi me zonza na nge na kukwenda kunwa mwa mosi na manima ya kisalu mpe nge me ndima. Fioti-fioti, nge me banda kutadila bamambu mutindu yandi. Bilumbu yikwa me bikana samu nge banda kusala bamambu mutindu yandi? Ntembe ve, beto me bonga kulakisa na bantu nyonso buzitu mpe ntima ya mbote. Kasi beto me bonga kuzimbana ve ti kana beto lutisa ntangu mingi  na muntu, beto ke banda kusala bamambu yina yandi ke salaka. (1 Ko. 15:33) Kana beto sala keba na beto mosi mutindu Yesu zonzilá beto yawu, beto ke sosa ve kulutisa ntangu na bantu yina ke landá ve misiku ya Yehova. (2 Ko. 6:15) Beto ke tala mutambu mpe beto ke kima yawu.

12. Yinki bilandi ya Yesu zolá sala ntangu ba vandá vingila nsuka ya Yeruzalemi mpe ya tempelo?

¹² Yesu vandá ve na nsatu bilandi ya yandi vanda kaka, mpe kusala ve kima tii nsuka ya yinza ke kwiza. Na yawu, yandi pesá bawu kisalu. Yandi zonzá na bawu na kusamuna nsangu ya mbote ‘na Yeruzalemi, na kizunga nyonso ya Zude, ya Samaria, mpe tii na bansuka ya ntoto.’ (Bis. 1:6-8) Ntembe ve, kisalu yina Yesu pesá bilandi ya yandi vandá nene. Kasi, samu ba pesá ntima ya bawu nyonso na kisalu yayi, ba sadilá ntangu ya bawu na faso ya mbote.

13. Samu na yinki beto me bonga kusadila ntangu ya beto na faso ya mbote? (Bakolose 4:5)

¹³ Tanga Bakolose 4:5. Samu na kusala keba na beto mosi, beto me bonga kutala faso beto ke na sadilá ntangu ya beto. ‘Mambu ya kukondwa kukana’ lenda kumina beto nyonso. (Lon. 9:11) Beto lenda kufwa na ntangu yina beto vandá vingila ve.

14-15. Wa’ faso beto lenda sadila ntangu ya beto na mutindu ya mbote? (Baebre 6:11, 12) (Tala mpe kizizi.)

¹⁴ Beto lenda sadila ntangu ya beto na mutindu ya mbote na kusalá luzolo ya Yehova mpe  na kukumisá ngolo kindiku ya beto na yandi. (Yoa. 14:21) Beto me bonga ‘kuvanda na ngolo mpe kuvutuka ve manima. Beto tatamana na kusala na ntima mosi kisalu ya Mfumu.’ (1 Ko. 15:58) Ya ke sala ti beto vanda ve na manyongi ntangu nsuka ke kuma, ya vanda nsuka ya luzingu ya beto to nsuka ya yinza yayi.​—Mat. 24:13; Rom. 14:8.

¹⁵ Bubu yayi, Yesu ke kaka na twadisá bilandi ya yandi ntangu ba ke samuná Kimfumu ya Nzambi na yinza nyonso. Yandi me lungisa mambu yina yandi zonzaka. Na nzila ya dibuundu ya Yehova, Yesu ke sadisá beto na kuzaba kusala kisalu ya kusamuna, mpe yandi ke pesá beto bima yina beto ke sadilá samu na kumwangisa nsangu ya mbote. (Mat. 28:18-20) Ntangu beto ke pesá ntima ya beto nyonso na kisalu ya kusamuna mpe ya kulonga bantu, mpe meso ya beto ke vandá kaka ya kufunguka samu na kuvingila nsuka ya yinza, beto ke na salá mambu yina Yesu ke na vingilá beto sala. Kana beto sadila dilongi yina ke na Baebre 6:11, 12, beto ke kangama ngolo na kivuvu ya beto “tii na nsuka.”​—Tanga.

16. Yinki beto ke sala?

¹⁶ Yehova soolá kilumbu mpe ngunga yina yandi ke mwangisa yinza yayi. Ntangu kilumbu yina ke kwiza, Yehova ke lungisa bambikudulu nyonso yina ke na kati ya mambu ya yandi. Tekila ya kwiza, bantangu ya nkaka beto lenda tala ti nsuka ya yinza yayi ke ve na kwizá na mbangu. Kasi kilumbu ya Yehova ‘ke kwiza ve na manima.’ (Aba. 2:3) Beto sala nyonso samu na ‘kubika ve kutala Yehova, mpe kulakisa kifu ya kuvingilaka Nzambi ya luvuukusu ya beto.’​—Mika 7:7.