Biblia ke lakisaka pwelele ti Yehova ke na makoki ya kuzonza bamambu yina ke salama na mantwala. (Iza. 45:21) Ya ke zonzilaka ve bamambu nyonso na yina me tadila ntangu to mutindu yandi ke salaka yawu, to bamambu yina yandi ke soolaka na kuzaba. Na yawu, beto lenda zaba ve nyonso na yina me tadila makoki ya Yehova ya kuzonza bamambu yina ke salama na mantwala. Kasi, beto zonzila mwa bamambu yina beto me zaba.

Yehova lenda sala nyonso yina yandi me zola, kasi ya ke na bamambu yina yandi ke soolaka na kusala ve. Samu ti mayela ya yandi ke ve nsuka, yandi lenda zonza mambu ni mambu yina ke salama na mantwala. (Rom. 11:33) Dyaka, samu ti yandi ke na ngolo ya kukanga nzutu, yandi lenda soola kuzaba ve bamambu yina ke salama na mantwala.​—Fwanisa Izaya 42:14.

Yehova ke salaka bamambu samu luzolo ya yandi lungana. Wa’ faso mambu yayi ke na bakisaka beto na kubakula makoki ya Yehova ya kuzonza bamambu yina ke salama na mantwala? Izaya 46:10 ke zonzaka: ‘Katuka kubanda mu ke tubaka na mantwala mambu yina ke salama, mpe katuka ntama mambu yina me salama ntete ve. Mu ke tubaka ti, “Lukanu ya munu ke lungana, mpe mu ke sala konso kima yina mu me zola.”’

Ni yawu yina, mosi ya bamambu yina ke salaka ti Yehova lenda kuzonza bamambu yina ke salama na mantwala, ke ti yandi ke na ngolo ya kulungisa yawu. Yandi ke ve na nsatu ya kutala mambu yina ke kwiza na mantwala, mutindu bamambu yango salamaka yimeni, mpe Yehova me kwiza kaka samu na kuzonzila mambu yina yandi me tala. Ya ke ve mutindu yina, samu ti Yehova yandi mosi lenda soola ntangu yina mambu ke salama, mpe ntangu ngunga yango ke kuma, yandi lenda sala ti, mambu yango salama.​—Bas. 9:5, 6; Mat. 24:36; Bis. 17:31.

Ni na yawu, Biblia ke sadilaka banzonzolo mutindu “yidikaka,” “bongisaka,” ‘bakaka lukanu’ samu na kuzonza mambu yina Yehova ke salaka na yina me tadila bamambu ke kwiza na mantwala. (2 Mf. 19:25, nyp; Iza. 46:11) Na ndinga ya Ebre, banzonzolo tatu yayi ke mutindu mosi na nzonzolo yina ba ke sadilaka samu na kuzonzila ‘muntu yina ke sadilaka ntoto samu na kuyidika bima.’ (Yer. 18:4) Kaka mutindu muntu yina zaba mbote-mbote kusadila ntoto samu na kuyidika bandonga ya kitoko, Yehova lenda yidika bamambu samu na kulungisa luzolo ya yandi.​—Ef. 1:11.

Yehova ke bikaka beto soola yina beto zola kusala. Yehova ke sonikaka ve bamambu yina ke kumina konso muntu. Yandi ke nataka ve bantu ya mbote na kusala bamambu yina lenda nata bawu na lufwa. Yandi ke bikaka bantu soola nzila ya bawu mpe ke sadisaka bawu na kusoola nzila ya mbote.

Beto baka bifwani zole. Na kifwani ya ntete, beto zonzila bantu ya Ninive. Samu ti bantu ya bwala ya Ninive kumaka na ntima ya yimbi, Yehova zonzaka ti yandi ke mwangisa bwala ya bawu. Kasi ntangu bantu ya Ninive balulaka ntima, ‘mpasi yina yandi tubaka ti yandi ke natina bawu, yandi nataka yawu ve.’ (Yona 3:1-10) Yehova salaka dyaka ve mambu yina yandi zonzaka samu na bantu ya Ninive, samu ti ntangu ba kuwaka bamambu yina Yehova zonzaka, ba soolaka kubalula ntima.

Kifwani ya zole ke ni mbikudulu na yina me tadila mfumu mosi na nkumbu ya Sirusi, yina zola sadisa Bazwife na kubasika na bwala ya bunzenza, mpe kutumisa ti ba tunga dyaka tempelo ya Yehova. (Iza. 44:26–45:4) Sirusi lungisaka mbikudulu yayi. (Esd. 1:1-4) Kasi, Sirusi vanda sambilaka ve Yehova. Yehova sadilaka Sirusi samu na kulungisa mbikudulu yayi, kasi yandi bikaka Sirusi na kusoola nani yandi ke sambila.​—Bin. 21:1.

Yayi ke kaka mwa bamambu yina Yehova ke tadilaka ntangu yandi ke sadilaka makoki ya yandi ya kuzonza mambu yina ke kwiza na mantwala. Kasi ata muntu lenda bakula bamambu nyonso ya Yehova. (Iza. 55:8, 9) Kasi, ndambu yina beto me zaba ke kumisaka ngolo kiminu ya beto ti, yandi ke salaka ntangu nyonso bamambu na faso ya kulunga, ata ntangu yandi ke zonzilaka bamambu yina ke lungana na mantwala.