BANTANGU ya nkaka, bantu yina sonikaka Biblia vutukilaka bamambu mosi. Beto tala bamambu tatu yina, ntangu ya nkaka nataka bawu na kusala yawu:

Ntangu yina ba sonikaka yawu. Na Izraele ya ntama, bantu mingi vandaka ve na ba copies ya Musiku. Ba vanda kuwaka Musiku na tempelo ntangu ba vanda tangilaka bawu yawu. (Kul. 31:10-12) Ya lenda vanda ti makanisi ya bawu vandaka ve ntangu nyonso na bamambu yina ba vanda kuwa, samu ntangulu ya Musiku vanda bakaka ntangu, mpe bantu mingi vanda vukana kisika mosi samu na kuwa yawu mutela. (Neh. 8:2, 3, 7) Na bantangu ya faso yayi, kuvutukila bamambu ya mfunu, zola sadisa bantu na kubumba malongi mpe kusadila yawu. Kuvutukila mwa bamambu yina ba tangilaka bawu zola sadisa bawu na kuzimbana ve bamambu ya fioti-fioti yina vandaka na Musiku yina Yehova pesaka bawu.​—Lev. 18:4-22; Kul. 5:1.

Mutindu ya kusonika. Na kati ya Biblia, ya ke mpe na banzimbu mutindu babuku ya Bankunga, Nzimbu ya Salomo, mpe Bidilu. Bantangu ya nkaka, na kati ya banzimbu, ya vandaka na kitini ya kuvutukila na kati-kati to na nsuka ya nzimbu. Ya vanda sadisaka bawu na kubambuka mambu yina nzimbu vanda zonzila. Na kifwani, tala mambu yina ke na Nkunga 115:9-11: ‘O Izraele, tudila Yehova ntima. Yandi ke lubakusu ya bawu mpe kinwanunu ya bawu yina ke bumbaka nzutu. O yinzo ya Aroni, beno tudila Yehova ntima. Yandi ke lubakusu ya bawu mpe kinwanunu ya bawu yina ke bumbaka nzutu. Beno bantu yina ke kuwaka Yehova boma, beno tudila Yehova ntima. Yandi ke lubakusu ya bawu mpe kinwanunu ya bawu yina ke bumbaka nzutu.’ Ya tsyeleka, kuvutukila bamambu yayi, zola sadisa ba yina vanda yimba na kubumba yawu na yintu mpe na ntima.

Nsatu ya kubasisa mbote-mbote bamambu ya mfunu. Bantangu ya nkaka, bantu yina sonikaka Biblia vutukilaka bamambu ya mfunu. Na kifwani, ntangu Yehova niminaka bantu ya Izraele na kudya menga, yandi zonzaka na Moyize na kuzonzila bambala mingi samu na yinki yandi pesaka musiku yayi. Nzambi zonzaka ti luzingu ya muntu ke na kati ya menga, ya zola zonza ti menga ke luzingu. (Lev. 17:11, 14) Bamvula mingi na manima, ntangu bantumwa mpe bakuluntu na Yeruzalemi zonzilaka bamambu ya mfunu yina Yehova ke mangaka, ba zonzilaka dyaka musiku ya kumanga menga.​—Bis. 15:20, 29.

Ata ti Biblia ke vutukilaka bamambu, ya zola zonza ve ti beto me lunga kuvutukila ntangu nyonso bamambu yina ke na kati. Na kifwani, Yesu zonzaka: “Ntangu beno ke sambilaka, beno vutukilaka ve kaka mambu mosi mbala na mbala.” (Mat. 6:7, nwt) Na manima, yandi zonzaka bamambu yina beto me bonga kusambila samu na yawu, yina ke kwelanaka na luzolo ya Nzambi. (Mat. 6:9-13) Na yawu, ata ti beto lenda vutukila ve kaka mambu mosi mbala na mbala, ya ke ve yimbi na kuvutukila ntangu nyonso bamambu yina ke mfunu samu na beto.​—Mat. 7:7-11.

Ya ke ve ya mpamba Biblia ke vutukilaka kuzonza bamambu. Ya ke mosi ya bafaso yina Yehova ke sadilaka samu na kulonga beto, samu beto kuzwa bambote.​—Iza. 48:17, 18.