1-2. Wapi kimangu ya nene salama’a na kilumbu ya Pentecote 33 N.B.?

NA MVULA 33 N.B, na bwala ya Jerusalem, na suka ya kilumbu ya lumingu ya fete ya Pentecote, bilandi 120 me vukana kisika mosi na zulu ya terase ya yinzo. (Bis. 1:13-15; 2:1) Na bilumbu yina me luta, Yesu zonza’a na bawu na kuvanda ntete mwa ntangu fioti na Jerusalem, samu na kuvingila dikabu mosi ya kitoko. (Bis. 1:4, 5) Yinki salama’a?

² Makelele faso mupepe ya ngolo, pamusa’a bawu, mpe ya fuluka’a na yinzo nyonso kisika yina ba vanda’a. Na yina, “bandinga faso batiya talana’a na zulu ya bayintu ya bantu nyonso, mpe bawu nyonso fuluka’a na mpeve ya santu.” (Bis. 2:2-4) Na kimangu ya nene yayi, Yehova mwangisa’a mpeve ya yandi ya santu, na bilandi nyonso yina vanda’a kuna. (Bis. 1:8) Na yawu, ba kuma’a bantu ya ntete yina Yehova sola’a na mpeve ya santu *, mpe bantu ya ntete yina kuzwa’a kivuvu ya kuyala na Yesu na zulu.

3. Samu na yinki na kilumbu ya Pentecote, ya vanda’a ve mpasi na bantu na kundima ti Yehova me sola bilandi ya Yesu na mpeve ya santu?

³ Si kilumbu yina, nge vanda’a mosi ya bilandi yina vukana’a na yinzo yina, nge zola’a zimbana ata fioti kilumbu yango.  Kima faso tiya, zola’a kwiza vanda na zulu ya yintu ya nge, mpe nge zola’a banda kuzonza na bandinga ya nkaka! (Bis. 2:5-12) Ya zola vanda ve mpasi na nge na kundima ti Yehova me sola nge na mpeve ya santu. Kasi, bimangu ya faso yina salama’a mpe ntangu mpeve ya santu sola’a bantu ya nkaka, mpe bawu nyonso zwa’a mpeve ya santu ntangu mosi? Ve. Wapi faso beto me zaba yawu?

4. Na siekle ya ntete, bantu nyonso kuzwa’a mpeve ya santu ntangu mosi? Zonzila yawu

⁴ Beto zonzila na wapi ntangu Yehova ke sola’a muntu. Na kilumbu ya Pentecote 33 N.B., mpeve ya santu sola’a ve kaka bakristo 120 yina vukana’a kisika mosi. Samu ti, kaka kilumbu yina, bantu 3 000 ya nkaka mpe kuzwa’a mpeve ya santu yina Yesu zonzila’a na bilandi ya yandi na Bisalu 1:8. Ba sola’a bawu ntangu ba zwa’a bateme. (Bis. 2:37, 38, 41) Kasi na bamvula yina landa’a, Yehova sola’a ve bakristo nyonso na ntangu ya bateme ya bawu. Ba-samaritin kuzwa’a mpeve ya santu na manima ya bateme. (Bis. 8:14-17) Kasi, faso Corneille na bantu ya yinzo ya yandi zwa’a mpeve ya santu, salama’a ntete ve. Ba sola’a bawu na mpeve ya santu avant ba kuzwa bateme.—Bis. 10:44-48.

5. Faso me zonza 2 Bakorinto 1:21, 22, yinki ke salama’a ntangu Nzambi ke sola’a muntu na mpeve ya santu?

⁵ Beto zonzila yinki ke salama’a ntangu Yehova ke sola’a muntu na nzila ya mpeve ya santu. Bantu ya nkaka ke sala’a ntete ntembe ntangu Yehova ke sola’a bawu. Ba lenda yufula: ‘Samu na yinki Nzambi me sola munu?’ Ba ya nkaka ke sala’a ve ntembe. Kasi mambu ke ve kuna. Apotre Paul zonza’a yinki ke salama’a ntangu Yehova ke sola’a muntu: “Ntangu beno kwikila’a, beno kuzwa kidimbu * na nzila ya Yesu na mpeve ya santu yina yandi zonzila’a, ni yawu ke garanti ya bima yina beno ke kuzwa.” (Ef. 1:13, 14.) Na yawu, Yehova ke sadila’a mpeve ya santu samu na kulakisa pwelele na bakristo yango ti yandi me sola bawu. Faso yina, mpeve ya santu ke “garanti” yina ke  nata’a bawu na kuzaba na ntima ya bawu nyonso ti ba ke kuzwa luzingu ya ntangu nyonso na zulu, kasi na ntoto ve.—Tanga 2 Bakorinto 1:21, 22.

6. Yinki me lunga na kusala mukristo yina Nzambi me sola samu na kukwenda na zulu?

⁶ Si Yehova me sola mukristo, ya zola zonza ti, yimeni, yandi ke kwenda kaka na zulu? Ve. Yandi me zaba ti ba me sola yandi na kukwenda na zulu, kasi, yandi zimbana ve dikebi yayi: “Ni yawu yina, bampangi, beno sala bangolo ya kulutila samu na kubumba kubokila yina Nzambi bokila’a beno, mpe kusola yina yandi sola’a beno, samu ti, si beno nwana na kusala faso yina, beno ke kubwa ata fioti ve.” (2 Pi. 1:10) Na yawu, ata ba me sola yandi, mukristo yayi ke kwenda na zulu, kaka si yandi vanda ya kukangama.—Flp 3:12-14; Ebr. 3:1; Luz. 2:10.

7. Wapi faso mukristo lenda zaba ti Nzambi me sola yandi?

⁷ Kasi, wapi faso muntu lenda zaba ti Nzambi me bokila yandi samu na kukwenda na zulu? Mvutu me talana pwelele na malongi yina Paul pesa’a na bakristo ya Rome “yina ba bokila’a na kuvanda basantu.” Yandi zonza’a na bawu: “Samu beno kuzwa’a ve mpeve ya bangamba yina ke pesa’a dyaka beno boma, kasi beno kuzwa’a mpeve ya santu yina ke sala’a ti beno vanda bana ya Nzambi, mpe yina ke sala’a ti beno bokila Nzambi na ndinga ya ngolo: ‘Abba, tata!’ Mpeve ya Nzambi ke zonza’a yawu mosi na mpeve ya beto ti beto ke bana ya Nzambi.” (Rom. 1:7; 8:15, 16) Ya zola zonza ti, Nzambi ke sadila’a mpeve ya santu samu na kulakisa pwelele na bantu yina yandi me sola ti, yandi me bokila bawu na zulu.—1 Tes. 2:12.

8. Wapi faso 1 Yoane 2:20, 27 me lakisa ti bakristo yina ke kwenda na zulu ke ve na nsatu muntu nata bawu na kundima ti Nzambi me sola bawu?

⁸ Yehova ke sala’a ti ba yina yandi me bokila, ba bika kuvanda na ntembe na kati ya bantima. (Tanga 1 Yoane 2:20, 27.) Ya tsyeleka, Yehova zola ti bakristo yina yandi me sola, kuzwa malongi faso muntu nyonso na kati ya kimvuka. Kasi, ba ke ve na nsatu muntu nata bawu na kundima ti Nzambi me sola bawu. Samu Yehova me sadila kima yina me lutila ngolo na bima nyonso, mpeve ya yandi ya santu, na kulakisa bawu ti, yandi me sola bawu!

9. Faso me lakisa Baefeze 1:18, yinki ke soba’a na bakristo yina Yehova ke solaka?

⁹ Bubu yayi, bisadi mingi ya Nzambi ke zaba’a ve yinki ke salama’a ntangu Yehova ke sola’a muntu. Samu na yinki? Samu ti Nzambi me sola ve bakristo nyonso na kukwenda na zulu. Mpe, Nzambi yidika’a bantu samu ba zinga ntangu nyonso awa na ntoto, kasi na zulu ve. (Kub. 1:28; Nku. 37:29) Yehova me sola kaka ndambu ya bakristo samu ba zinga na zulu. Na yina, ntangu yandi ke sola’a bawu, yandi ke soba’a mpe kivuvu na makanisi ya bawu, samu ba kanisa kaka na bima mpe luzingu ya mazulu.—Tanga Baefeze 1:18.

10. Yinki zola zonza “kubutuka dyaka”? (Tala note ya yisi ya paje.)

¹⁰ Ntangu Nzambi ke sola’a bakristo na mpeve ya santu, ba ke “butuka’a dyaka,” to ba ke “butuka’a na zulu.” * Yesu mpe lakisa’a ti, ya ke mpasi na kunata muntu yina ba me sola ve na kuzaba mbote-mbote, yinki ya ke sala’a ntangu muntu ke “butuka dyaka,” to ke “butuka na mpeve.”—Yoa. 3:3-8.

11. Zonzila yinki ke soba’a na faso ya kukanisa ya bakristo yina Nzambi me sola?

 ¹¹ Ntangu Nzambi ke sola’a bakristo, wapi faso makanisi ya bawu ke sobaka? Avant Yehova sola bawu, ba vanda’a ntete na kivuvu ya kuzinga ntangu nyonso, awa na ntoto. Ba vanda’a vingila ntangu yina Yehova ke katula mambu nyonso ya yimbi, mpe ke kumisa ntoto nyonso paradis. Ntangu ya nkaka, ba vanda’a kanisa na kilumbu yina ba ke yamba bandiku to bampangi ya dikanda ya bawu yina ke vumbuka na lufwa. Kasi ntangu ba sola’a bawu, faso ya bawu ya kukanisi soba’a mbala mosi. Samu na yinki? Ya ke ve samu ba banda’a na kukanisa ti luzingu ya ntangu nyonso na zulu ya ntoto ke vanda ve kitoko to kilengi. Ya ke mpe ve bampasi ya luzingu to kima ya nkaka nata’a bawu na kusoba. Kasi, ni Yehova muntu me sadila mpeve ya santu, samu na kusoba faso ya bawu ya kukanisa, mpe ni yandi ke pesa’a bawu kivuvu ya nkaka.

12. Faso me zonza 1 Piere 1:3, 4, wapi faso bakristo yina ba me sola, ke kanisa’a na kivuvu ya bawu?

¹² Muntu yina ba me sola lenda kanisa ti yandi me bonga ve na kuzwa bweso yayi. Kasi yandi ke sala’a ve ntembe ti Yehova me sola yandi. Ntima ya yandi ke fuluka’a na kilengi mpe nsayi ntangu yandi ke kanisa’a na kivuvu ya kuzinga na zulu.—Tanga 1 Piere 1:3, 4.

13. Wapi faso ba yina ba me sola ke tadila’a luzingu yayi?

¹³ Ya zola zonza ti ba ke sosa’a kufwa? Paul pesa’a mvutu na kyuvu yayi. Yandi zonza’a ti nzutu ya kinsuni ke faso yinzo ya ntoto: “Ya tsyeleka, beto bantu yina ke na yinzo ya ntoto yayi, beto ke na basusi, mpe beto ke dila’a mingi, samu beto ke zola’a ve kukatula yinzo yayi, kasi beto ke zola’a mpe kulwata yinzo ya nkaka yina, samu ti luzingu dyamisa nzutu yina ke fwaka.” (2 Ko. 5:4, nwt-MK) Bakristo yayi ke sosa’a ve kufwa na mbangu, samu ba kwenda na zulu. Kasi ba me zola luzingu yayi, mpe ba ke na kilengi ya kusadila Yehova bilumbu nyonso, kintwadi na bandiku mpe bantu ya dikanda ya bawu. Mpe na nyonso yina ba ke sala’a, ba ke zimbana’a ve kivuvu ya nene yina ba ke zwa na bilumbu ya mantwala—1 Ko. 15:53; 2 Pi. 1:4; 1 Yoa. 3:2, 3; Luz 20:6.

14. Wapi bima yina ke lakisa’a ve ti Nzambi me sola muntu na mpeve ya santu?

¹⁴ Ntangu ya nkaka, nge mpe ke na kanisa’a ti Nzambi sola’a nge na mpeve ya santu. Si ya ke faso yina, kanisa ntete na byuvu ya nene yayi: Nge ke na nsatu mingi ya kusala luzolo ya Yehova? Nge ke sala’a na tiya nyonso kisalu ya predikasion? Nge ke zola’a kulongoka Biblia mpe kuzaba “mambu ya yinda ya Nzambi”? (1 Ko. 2:10) Nge ke kuzwa’a bambuma mingi ya mbote na kisalu ya predikasion? Nge ke vanda’a na susi to nsatu ya ngolo ya kusadisa bampangi samu ba kula na kimpeve? Na luzingu ya nge, Yehova ke sadisa’a nge na bafaso mosi ya ngitukulu? Si bima nyonso yayi ke salama’a na luzingu ya nge, ya ke na lakisa ti Nzambi me bokila nge na zulu? Ve. Ya ke faso yina ve. Samu na yinki? Samu ti, bima nyonso yayi lenda kumina bisadi nyonso ya Nzambi, ya vanda ba yina ba me sola na mpeve ya santu to ve. Yehova lenda sadila mpeve ya santu na kupesa na bisadi ya yandi ngolo ya kusala bima yayi, ba vanda na kivuvu ya kukwenda na zulu to ve. Na yawu, si na kati ya ntima, nge ke na yufula’a si mpeve ya santu me sola nge to ve, ntembe yina, yawu mosi, ke na lakisa’a ti ba me sola ve nge na mpeve ya santu samu na kukwenda na zulu. Ba yina Yehova me sola ke sosa’a dyaka ve kuzaba si Yehova sola’a bawu to ve! Samu ti ba me zaba yawu na kati ya bantima ya bawu!

15. Wapi faso beto me zaba ti ya ke ve bantu nyonso yina kuzwa mpeve ya santu ke kwenda na zulu?

 ¹⁵ Na Biblia, ya ke na bifwani ya bantu mingi yina kuzwa’a mpeve ya santu; kasi, ba vanda’a ve na kivuvu ya kukwenda zinga na zulu. Na kifwani, mpeve ya santu vanda’a twadisa David. (1 Sam. 16:13) Mpeve ya santu sadisaka yandi na kuzaba mbote-mbote mambu ya yinda ya Yehova, mpe ya sadisaka yandi na kusonika babuku ya Biblia. (Marke 12:36) Ata faso yina, Apotre Piere zonza’a ti “David kwenda’a ve na zulu.” (Bis. 2:34) Yoane, yina pesa’a bateme na Yesu, “vanda’a ya kufuluka na mpeve ya santu.” (Luka 1:13-16) Yesu zonza’a ti, ya ke ve na muntu na yinza yina lutila’a Yoane. Kasi yandi zonza’a dyaka ti, muntu yina me lutila fioti na kimfumu ya mazulu me lutila Yoane. (Mat. 11:10, 11) Yehova sadila’a mpeve ya santu na kusadisa babakala yayi na kusala bima mingi ya ngitukulu, kasi yandi sadila’a ve yawu na kusola bawu samu ba kwenda zinga na zulu. Ya zola zonza ti, kiminu ya bawu lutila’a fioti na kiminu ya ba yina ba sola’a samu na kukwenda yala na zulu? Ve. Ya ke na lakisa’a kaka pwelele ti, Yehova ke vutula bawu na luzingu awa na zulu ya ntoto, ntangu ya ke kuma Paradis.—Yoa. 5:28, 29; Bis. 24:15.

16. Na wapi kisika mingi ya bisadi ya Nzambi ke zinga?

¹⁶ Bubu yayi, bisadi ya Nzambi yina ke ve na kivuvu ya kukwenda zinga na zulu, me lutila mingi. Faso Abraham, Sara, David, mpe Yoane, bampangi mingi ya kento na ya bakala ya bantangu yina, ke zinga na zulu ya ntoto, ntangu Kimfumu ya Nzambi ke banda kuyala ntoto.—Ebr. 11:10.

17. Na wapi byuvu beto ke kuzwa bamvutu na article ke landa?

¹⁷ Samu bakristo ya nkaka yina ba sola’a ke ntete awa na ntoto, byuvu mingi lenda kwizila beto na ntima. (Luz. 12:17) Na kifwani, wapi makanisi bampangi yina Yehova me sola zola vanda na yawu? Si kilumbu ya Memoriale, muntu ya kimvuka ya beno me baka dimpa mpe vinu, wapi faso beto zola’a bakila yandi? Mpe wapi makanisi zola vanda na nge, si nombre ya bantu yina ke zonza’a ti ba me sola bawu ke na kuma’a kaka mingi? Ya zola’a sala nge mpasi na ntima? Beto ke kuzwa bamvutu ya byuvu yayi na artikle ke landa.