1-2. Wapi bamambu ya mpasi batemwe ya Yehova mingi ke kutana na yawu, mpe yinki ya lenda sala bawu?

KANISA na bifwani tatu yayi: Doctere me tala na nzutu ya ntwenya mosi ya temwe, maladi mosi ya ngolo yina ke banda kulembisa yandi nzutu fioti-fioti. Ba me katula na kisalu mpangi mosi ya bakala yina lenda vanda na bamvula kuluta 50, yandi me sala bangolo mingi na kuzwa kisalu ya nkaka, kasi bangolo ya yandi nyonso na maza. Mpangi mosi ya kento ya kukula mingi, yina ke zola’a Yehova, ke dyaka ve na ngolo ya kusala mingi na kimvuka.

² Si nge ke na kutana na mosi ya bamambu yayi, nge lenda kanisa ti, nge ke muntu ya pamba. Bamambu ya faso yayi lenda manisa nge kilengi, mpe lenda bebisa kindiku ya nge na bampangi.

3. Wapi faso Satan na ba yina ke landa kifwani ya yandi ke tadila bantu?

³ Yinza yayi ke tala bantu faso Satan ke tala bantu. Ntangu nyonso, Satan ke tala bantu neti bima pamba. Na ntima ya yimbi nyonso yandi zonza na Eve ti, yandi zola kuzwa liberte, si yandi manga kuwa Yehova, ata yandi zaba’a ti ya zola nata Eve na lufwa. Ni Satan muntu ke yalaa na zulu ya mimbungu, bisalu, politike, mpe mabundu nyonso ya luvunu ya yinza yayi. Ni na yawu, beto lenda pamuka ve ntangu bamfumu ya bima nyonso yayi ke landa faso ya kusadila ya Satan ntangu bawu mpe ke pesa ve bantu valere.

4. Yinki beto ke zonzila na artikle yayi?

⁴ Kasi Yehova ke ve faso Satan, yandi zola beto zaba ti beto ke mfunu mingi na meso ya yandi, mpe yandi ke sadisa’a beto ntangu beto ke kutana’a na bamambu yina ke nata’a beto na  kukanisa ti, beto ke ve na valere. (Nku. 136:23; Rom. 12:3) Na artikle yayi beto ke longoka faso Yehova ke sadisa’a beto na bamambu yayi: 1) Ntangu maladi ke kwamisa’a beto, 2) ntangu ya ke vanda mpasi na kuzwa mwa bongo, mpe 3) ntangu ya ke sala’a beto mpasi na ntima samu beto ke lenda’a dyaka ve kusala mingi na kimvuka ya Yehova, samu beto me nuna. Na kubanda beto ke longoka samu na yinki beto lenda ndima ti, mosi na mosi na kati ya beto ke mfunu na meso ya Yehova.

5. Yinki ke na lakisa ti beto ke ve bantu ya pamba na meso ya Yehova?

⁵ Ata yandi yidika beto na ntoto, Yehova ke tala ve beto neti bima ya mpamba. (Kub. 2:7) Beto tala mwa barezon yina ke nata beto na kundima ti, beto ke ve bantu ya mpamba na meso ya Yehova. Yandi yidika bantu na kifwani ya yandi, ni yina ke sala’a ti beto vanda na ngolo ya kulanda bifu ya yandi ya mbote. (Kub. 1:27) Na yina, Yehova yidika bantu na faso ya mbote kuluta bima nyonso yina ke na zulu ya ntoto. Yandi pesa’a beto kisalu ya kukipe ntoto na bibulu.—Nku. 8:4-8.

6. Wapi mambu beto me zaba yina ke na lakisa ti bantu ya masumu ke ntalu na meso ya Yehova?

⁶ Ata na manima ya disumu ya Adam, bantu ke kaka mfunu mingi na meso ya Yehova. Ni na yina Yehova pesa’a nkayulu (sacrifice) ya mwana ya yandi, Yesu, samu na masumu ya beto. (1 Yoa. 4:9, 10) Na nzila ya nkayulu ya Yesu, Yehova ke vumbula na lufwa bantu nyonso yina kufwa samu na disumu ya Adam, “bantu ya mbote na bantu yina sala ve mambu ya mbote.” (Bis. 24:15, nwt-MK) Nyonso yayi ke na lakisa beto ti, beto ke ntalu na meso ya yandi, ata beto ke na bela’a, beto ke povre to beto me nuna.—Bis. 10:34, 35.

7. Wapi barezon ya nkaka ke nata’a beto na kundima ti beto ke ntalu samu na Yehova?

⁷ Barezon ya nkaka mpe ke na nata’a beto na kundima ti, beto ke ntalu samu na Yehova. Samu beto ndima nsangu ya mbote, yandi benda beto na kimvuka ya yandi. (Yoa. 6:44) Ntangu beto banda’a kukulisa kindiku na yandi, Yehovah mpe sala kindiku na beto. (Zaki 4:8) Yehova ke sala bangolo mingi mpe ke lutisa bantangu mingi na kupesa beto formasion. Nyonso yayi ke na lakisa ti beto ke ntalu na meso ya yandi. Yandi zaba mbote-mbote faso mosi na mosi ya beto ke bubu yayi, mpe nani beto ke vanda mbasi. Yandi ke semba’a beto samu yandi zola beto. (Bin. 3:11, 12) Ya tsyeleka, beto ke mfunu na meso ya Yehova!

8. Wapi faso Nkunga 18:27-29 lenda sadisa beto na kubika ve bamambu lembisa beto?

⁸ Bantu ya nkaka vanda’a tala mfumu David neti muntu ya pamba, kasi yandi zaba’a ti, Yehova vanda zola yandi mpe vanda sadisa yandi. Samu yandi zaba’a ti Yehova vanda’a kipe yandi, na kivuvu nyonso yandi kanga ntima ntangu bamambu ya mpasi kuminaka yandi. (2 Sa. 16:5-7) Ntangu bamambu ya mpasi ke lembisa’a beto, Yehova lenda sadisa beto na kuvanda na makanisi ya mbote, mpe na kubwa ve. (Tanga Nkunga 18:27-29.) Kima mosi ve lenda manisa beto kilengi ya kusadila Yehova ntangu beto ke zaba ti yandi ke na beto. (Rom. 8:31) Beto tala bamambu tatu yina ke nata beto na kuzimbana ve ti Yehova zola beto, mpe ti beto ke na valere na meso ya yandi.

9. Wapi faso maladi lenda nata beto na kutala ti beto ke dyaka ve na valere?

⁹ Maladi lenda lembisa beto, mpe kunata beto na kukanisa ti beto ke ve na valere. Beto lenda vanda na nsoni ntangu ya ke talana  pwelele ti, beto ke dyaka ve na ngolo ya kusala bisalu ya nkaka, to ntangu beto ke sosa bampangi sadisa beto ata na bima ya fioti. Ata ntangu bantu ya nkaka ke zaba’a ve ti beto ke na belaa, kasi beto lenda vanda na nsoni samu ti, beto ke dyaka ve na ngolo ya kusala mingi. Na bantangu ya mpasi ya faso yayi, Yehova ke pesaa beto bukindi. Wapi faso?

10. Wapi faso mambu Bingana 12:25 ke zonza lenda sadisa beto ntangu beto ke bela’a?

¹⁰ Ntangu beto ke bela’a, “mambu ya mbote” yina beto ke kuwa lenda pesa beto ngolo. (Tanga Bingana 12:25.) Na kati ya Biblia, Yehova me zonzila beto bamambu mingi yina ke sadisa beto na kuzimbana ve ti, ata maladi, beto ke ntalu mingi na meso ya yandi. (Nku 31:19; 41:3) Si beto ke na kifu ya kutangaka mingi Biblia, Yehova ke sadisa beto na kukatula makanisi ya yimbi yina maladi ke nataka.

11. Wapi faso Yehova sadisaa mpangi mosi ya bakala?

¹¹ Beto tala mambu yina kumina George. Ntangu yandi vanda’a ntwenya, yandi kuzwa’a maladi mosi ya ngolo yina vanda lembisa yandi fioti-fioti, mpe ya nataka yandi na kukanisa ti, yandi ke ve na valere. Yandi zonza’a: “Mu vanda kanisa ve ti, maladi yango zola nata munu na kuvanda na nsoni. Ntangu maladi ya munu kuma dyaka ngolo ya kulutila, mu vanda kanisa na faso luzingu ya munu ke beba. Mu vanda na mawa mingi mpe nsatu ya luzingu manisaka. Mu dilila’a Yehova na lusambu, yandi sadisa munu.” Wapi faso Yehova sadisaka yandi? “Samu mu vanda dyaka ve na ngolo ya kutanga mingi, mu vanda tanga’a mwa baverse ya Bankunga yina ke lakisa’a ti, Yehova ke kipeke bisadi ya yandi. Mu vanda vutukila’a kutanga baverse yango bilumbu nyonso, mpe ya zunisa’a ntima ya munu. Fioti-fioti, bantu vanda tala ti, mu banda dyaka  kuseka mingi. Ba zonza ti, kilengi ya munu vanda pesa bawu ngolo. Ni kuna mu zaba ti, Yehova pesa’a mvutu na lusambu ya munu! Yandi sadisa’a munu na kusoba makanisi yina vanda’a na munu. Mu banda kukanisa mingi na baverse yina ke zonzila faso Yehova ke tadila munu ata maladi ya munu.”

12. Si maladi ke na kwamisa nge, yinki nge lenda sala samu Yehova sadisa nge?

¹² Si maladi ke na kwamisa nge, zaba ti Yehova zaba bampasi ya nge. Na lusambu, lomba yandi na kusadisa nge samu nge vanda na makanisi ya mbote na maladi ya nge. Sosa na Biblia mambu ya mbote yina Yehova tula’a na kati samu na nge. Baka ntangu ya kukanisa na baverse yina ke lakisa ti Yehova ke pesa bisadi ya yandi valere. Si nge sala yawu, nge ke tala ti, Yehova ke lakisa’a ntima ya yandi ya mbote na ba yina nyonso ke vanda’a ya kukangama na yandi.—Nku. 84:11.

13. Ntangu ba ke katula mfumu ya dikanda na kisalu, wapi makanisi lenda kumina yandi?

¹³ Bamfumu ya makanda, ke sosa kudikisa na faso ya mbote makanda ya bawu. Kanisa ntete, mpangi mosi ya bakala me sala ata kima, kasi ba me katula yandi na kisalu. Yandi me sala nyonso na kuzwa kisalu ya nkaka, kasi ya ke na talana ve. Bamambu ya faso yayi lenda nata yandi na kukanisa ti, yandi ke ve na valere. Wapi faso kutula ntima na bapromese ya Yehova, lenda sadisa beto?

14. Samu na wapi barezon Yehova ke lungisa bapromese ya yandi?

¹⁴ Yehova ke lungisa’a kaka bapromese ya yandi. (Yos. 21:45; 23:14) Barezon mingi ke nataka yandi na kusala yawu. Ya ntete, yandi zola ve kutalana muntu ya luvunu. Yehova pesa’a promese ya kukipe ba yina ke vanda ya kukangama na yandi, mpe yandi ke sala  nyonso samu na kulungisa yawu. (Nku. 31:1-3) Dyaka, Yehova zaba ti beto ke vanda na mawa mpe manyongi si yandi kipe ve beto, bantu ya dikanda ya yandi. Yandi zonza ti, yandi ke pesa beto nyonso yina beto ke na yawu nsatu samu na kulwata, na kudya mpe samu na kusadila yandi, mpe ata kima ke kanga yandi nzila samu na kulungisa promese yayi!—Mat. 6:30-33; 24:45.

15. a) Wapi mambu ya mpasi bakristo ya siekle ya ntete kutana na yawu? b) Na yinki Nkunga 37:18, 19 ke nata’a beto na kundima?

¹⁵ Ntangu beto ke kanisa’a na barezon yina ke nata’a Yehova na kulungisa bapromese ya yandi, beto lenda ndima ti, yandi ke sadisa beto ntangu ya ke vanda mpasi na beto na kuzwa mwa mbongo. Beto tala kifwani ya bakristo ya siekle ya ntete. Ntangu luyalu banda kunyokola mingi kimvuka ya Jeruzalem, “katula ba-apotre, bilandi nyonso mwangana.” (Bis. 8:1) Kanisa na yina ya zola’a zonza: mpasi na kuzwa mwa kima ya kudya, ya kulwata to mwa mbongo. Ya lenda vanda ti, bakristo yina vanda dyaka ve na bayinzo mpe bisalu. Yehova bika ve bawu. Ata kima katula bawu nsayi yina vanda na bawu. (Bis. 8:4; Ebr. 13:5, 6; Zk. 1:2, 3) Yehova sadisa bakristo yina, mpe yandi ke sadisa beto.—Tanga Nkunga 37:18, 19.

16. Yinki lenda nata beto na kuyufula si Yehova ke pesa’a valere na yina beto ke sala’a samu na yandi?

¹⁶ Ntangu beto ke nuna’a, beto lenda banda kukanisa ti beto ke ve na mingi ya kupesa na Yehova. Mfumu David kuma mpe na makanisi ya faso yayi ntangu yandi nunaka. (Nku. 71:9) Wapi faso Yehova lenda sadisa beto?

17. Yinki kifwani ya Jerry lenda longa beto?

¹⁷ Beto tala mambu yina kumina’a mpangi ya kento Jerry. Ba lomba na yandi na kuvanda  na formation ya maintenance yina zola salama na Salle du Royaume, kasi yandi manga’a. Yandi zonza’a: “Mu me nuna, mu fwidila’a bakala, mpe mu zaba ata kima na kisalu ya maintenance. Mu ke sala ata kima kuna.” Na mpimpa ya avant formasion, yandi zonza’a na Yehova mambu nyonso yina vanda na yandi na ntima. Mbasi na Salle du Royaume, yandi vanda yufula’a dyaka si yandi zola vanda na formasion yango. Na kati ya formasion, mosi ya ba yina sala’a diskur, lakisa’a pwelele ti, kima yina me lutila mfunu ni nsatu ya beto ya kusala samu na Yehova. Jerry zonza’a na yinsi ya ntima: “Mu lenda sala kisalu yayi!” Yandi bwela’a: “Mu banda kudila samu mu zaba’a ti Yehova vanda pesa mvutu na lusambu ya munu. Yehova lakisa’a munu ti mu ke na kima ya ntalu ya kupesa yandi mpe yandi vanda na nsatu ya kulonga munu!” Na manima, yandi zonza’a: “Mu kwiza’a na formation na boma, mpe ya kulemba. Kasi mu vutuka’a na kilengi, bunkidi mpe na valere!”

18. Wapi faso Biblia ke lakisa’a ti Yehova ke pesa’a valere na yina beto ke sala’a samu na yandi ata beto me nuna?

¹⁸ Ata beto me nuna’a, beto lenda ndima ti Yehovah ke zola’a kaka yina beto ke sala’a samu na yandi. (Nku. 92:12-15) Yesu longa’a beto ti ata beto ke dyaka ve na ngolo ya kusala mingi, Yehova ke pesa’a valere na fioti yina beto ke sala’a. (Luke 21:2-4) Sala yina nge ke na ngolo ya kusala. Na kifwani, nge lenda zonza mambu ya Yehova, nge lenda sambila samu na bampangi mpe nge lenda pesa bawu bukindi samu ba vanda kaka ya kukangama na Yehova. Yehova ke tala’a nge neti mpangi ya yandi ya kisalu, samu nge ke sadila’a misiku ya yandi, kasi ve samu na bima yina nge ke sala’a samu na yandi.—1 Ko. 3:5-9.

19. Yinki Baroma 8:38, 39 ke nata’a beto na kundima?

¹⁹ Beto ke na kilengi mingi ya kusadila Yehova, Nzambi yina ke pesa’a valere na ba yina ke sadilaka yandi! Yandi yidika’a beto samu na kusala luzolo ya yandi, mpe ni dibundu ya tsyeleka ke pesa’a beto nsayi na luzingu. (Luz. 4:11) Ata yinza ke pesa’a ve beto valere, Yehova yandi, ke tala’a ve beto faso yina. (Ebr. 11:16, 38) Ntangu beto ke vanda’a ya kulemba samu na maladi, samu na mambu ya bongo to samu beto me nuna, beto zimbana ve ti ata kima lenda kabula beto na luzola ya Tata ya beto ya mazulu.—Tanga Baroma 8:38, 39.