1-2. Samu na yinki bamvula nyonso beto ke vandá na kilumbu ya kubambukila moyo lufwa ya Yesu?

 YA ME sala bamvula pene-pene na 2 000 yina Yesu pesá luzingu ya yandi samu na beto, mpe fungulá beto nzila na kuzwa luzingu ya ntangu nyonso. Na mpimpa tekila lufwa ya yandi, Yesu pesá na bilandi ya yandi musiku ya kubambukila moyo munkayulu ya yandi. Ba zolá sala yawu na nzila ya mwa mukembo ya fioti, yina ba zolá sadila dimpa mpe vinu.​—1 Ko. 11:23-26.

² Beto ke tumamá na musiku ya Yesu samu beto ke zolak’ yandi mingi. (Yoa. 14:15) Bamvula nyonso, na ntangu ya kubambukila moyo lufwa ya Yesu, beto ke baká ntangu na kusambilá mpe na kuyindulá na yina lufwa ya yandi zola zonza samu na beto. Beto ke salak’ yawu samu na kulakisa ti beto ke sepelá na yina yandi salaka. Mpe na kilengi nyonso, beto ke salá mingi na kisalu ya kusamuna, mpe beto ke bokilá bantu nyonso samu na kuvanda na beto na kilumbu ya mfunu yayi. Dyaka, beto ke biká ata kima kanga beto nzila na kuvanda na kilumbu ya kubambukila moyo lufwa ya Yesu.

3. Yinki beto ke zonzila na disolo yayi?

³ Na disolo yayi, beto ke zonzila bafaso tatu yina bisadi ya Yehova salá bangolo na kubambukila moyo lufwa ya Yesu: 1) ba vutukilá kusala yawu mutindu Yesu lakisá bilandi ya yandi, 2) ba ke bokilá bantu samu na kubambukila moyo lufwa ya Yesu, mpe 3) ba ke bambukilá moyo lufwa ya Yesu ata bamambu yina lenda sosa kukanga bawu nzila na kusala yawu.

4. Wapi matsyeleka ba ke zonzilá konso mvula na kilumbu ya kubambukila moyo lufwa ya Yesu, mpe samu na yinki ya ke bweso na kuzaba yawu? (Luke 22:19, 20)

⁴ Konso mvula, na kilumbu ya kubambukila moyo lufwa ya Yesu, beto ke kuwá discours yina ke pesá bamvutu ya Biblia na byuvu mingi. Beto ke longoká samu na yinki bantu ke na nsatu ba kuula bawu na nzila ya munkayulu, mpe wa’ faso lufwa ya muntu mosi lenda futa samu na masumu ya bantu mingi. Ba ke bambukilá beto yinki zola zonza dimpa na vinu, mpe banani lendá kudya mpe kunwa yawu. (Tanga Luke 22:19, 20.) Mpe beto ke yindulá na bambote yina ke na vingilá ba yina ke kuzwa luzingu ya ntangu nyonso awa na ntoto. (Iza. 35:5, 6; 65:17, 21-23) Ya ke bweso mingi na beto na kuzaba bamambu yayi. Ba milliards ya bantu zaba ve yawu, ba zaba ve mfunu ya munkayulu ya Yesu, mpe ba ke bambukilá ve lufwa ya yandi mutindu yandi lakisak’ yawu. Samu na yinki?

5. Ntangu bantumwa mingi ya Yesu kufwá, wa’ faso bantu bandá kubambukila moyo lufwa ya Yesu?

⁵ Ntangu bantumwa mingi ya Yesu kufwá, bakristo ya luvunu kotá na kati ya dibuundu. (Mat. 13:24-27, 37-39) Ba zonzá “mambu ya luvunu samu na kukabula dibuundu mpe kunata bilandi na manima ya bawu.” (Bis. 20:29, 30) Mosi ya “mambu ya luvunu” yina ba kwizá longa vandá ti Yesu pesá ve “kaka mbala mosi nzutu ya yandi mutindu munkayulu samu na kukatula masumu ya bantu mingi,” mutindu Biblia ke zonzak’ yawu. Na bawu, Yesu zolá pesa munkayulu ya yandi mbala na mbala. (Ebr. 9:27, 28) Bubu yayi, bantu mingi ke ndimá luvunu yayi. Ba ke vukaná na mabuundu ya bawu bambala mingi samu na kubaka kominyo. b Ba ya nkaka ke salak’ yawu bilumbu nyonso. Mabuundu ya nkaka ke bambukilá ve moyo lufwa ya Yesu bambala mingi, kasi bantu yina ke sambilá kuna zaba ve mbote-mbote yinki munkayulu ya Yesu zola zonza. Ba ya nkaka ke yufulá kana munkayulu ya Yesu lenda sala kwandi ti Nzambi lemvokila masumu ya bawu. Samu na yinki ba ke na ntembe yayi? Ntangu ya nkaka, ya ke na bantu yina natá bawu na kukanisa ti munkayulu ya luzingu ya Yesu lenda sala ve ti Nzambi lemvokila masumu ya bawu. Wa’ faso bilandi ya tsyeleka ya Yesu sadisá bantu na kuzaba yinki zola zonza munkayulu ya yandi, mpe faso ya kulunga ya kubambukila moyo lufwa ya yandi?

6. Na 1872, yinki kimvuka mosi ya balongoki ya Biblia kwizá zaba?

⁶ Na nsuka ya bamvula 1800, Charles Taze Russell na kimvuka ya balongoki ya Biblia bandá kufyongonina mambu ya Nzambi. Ba sosá kuzaba yinki ya tsyeleka zola zonza munkayulu ya Yesu, mpe wa’ faso ba me bonga kubambukila moyo lufwa ya yandi. Na 1872, ba kwizá zaba ti Biblia ke longá ti tsyeleka Yesu pesá luzingu ya yandi mutindu munkayulu samu na bantu nyonso. Mambu yina ba kwizá zaba, ba bumbá ve yawu samu na bawu mosi. Ba mwangisak’ yawu na nzila ya babuku, ba journal mpe mikanda ya nkaka. Ntangu fioti na manima, ba bandá kuvukana mbala mosi na mvula samu na kubambukila moyo lufwa ya Yesu, kaka mutindu bakristo ya ntete vandá salak’ yawu.

7. Wapi bambote beto ke kuzwá na kisalu ya kusosa yina balongoki ya Biblia ya ntete salaka?

⁷ Bubu yayi, beto ke kuzwá bambote na kisalu ya kusosa yina balongoki yayi salaka bamvula mingi na manima. Wapi yina ke bambote yango? Yehova me fungula beto meso samu na kuzaba butsyeleka na yina me tadila munkayulu ya Yesu, mpe wapi bambote ya ke natiná beto mpe bantu nyonso. (1 Yoa. 2:1, 2) Beto me longoka mpe ti Biblia ke zonzá ti bantu yina ke sepelisá Nzambi ke na kivuvu ya kitoko: ya ke na ba yina ke kwenda na zulu mpe kuna ba lenda kufwa dyaka ve,  mpe ya ke na ba millions ya bantu ya nkaka yina ke kuzwa luzingu ya ntangu nyonso awa na ntoto. Beto ke kumá dyaka pene-pene na Yehova ntangu beto ke kanisá na luzolo nyonso yina yandi ke na yawu samu na beto, mpe na bambote yina mosi na mosi ya beto ke kuzwaka na manima ya munkayulu ya Yesu. (1 Pi. 3:18; 1 Yoa. 4:9) Ni na yawu, kaka mutindu bampangi ya beto, balongoki ya Biblia, beto ke bokilá bantu ya nkaka na kuvukana na beto samu na kubambukila moyo lufwa ya Yesu. Mpe beto ke salak’ yawu mutindu Yesu lakisá bilandi ya yandi.

8. Yinki bisadi ya Yehova salá samu na kubokila bantu na kubambukila moyo lufwa ya Yesu? (Tala kizizi.)

⁸ Banda ntama, bisadi ya Yehova ke bokilá bantu na kubambukila moyo lufwa ya Yesu. Na 1881, na Yinzo ya Kengidi (na anglais), ya vandá na nsangu yina vandá bokila bampangi ya kento na ya bakala na États-Unis na kuvukana na yinzo ya mpangi mosi na Allegheny, na Pennsylvanie, samu na kubambukila lufwa ya Yesu. Na manima, bampangi bandá kubambukila lufwa ya Yesu konso muntu na kimvuka ya yandi. Na ngonda ya mars 1940, ba zonzá na bampangi na kubokila muntu nyonso yina vandá zola kuwa mambu ya Nzambi kisika yina ba kele. Na 1960, ya vandá mbala ya ntete na Béthel na kupesa bampangi ya bimvuka mikanda samu na kubokila bantu. Banda ntangu yina, beto me kabula ba milliards ya mikanda samu na kubokila bantu na kubambukila moyo lufwa ya Yesu. Samu na yinki beto ke pesá ntangu mpe bangolo nyonso yayi na kubokila bantu?

9-10. Banani ke kuzwá bambote ntangu beto ke salá bangolo na kubokila bantu na kubambukila moyo lufwa ya Yesu? (Yoane 3:16)

⁹ Mosi ya bamambu yina ke natá beto na kubokila bantu na kubambukila moyo lufwa ya Yesu ke ti beto zola ba yina ke kwiza mbala ya ntete longoka  yinki Yehova mpe Yesu me sala samu na beto. (Tanga Yoane 3:16.) Beto ke na kivuvu ti bamambu yina ba ke kuwa mpe ke tala kilumbu yina ke nata bawu na kusosa kuzaba mingi, mpe na kukuma bisadi ya Yehova. Kasi, ya ke mpe na bantu ya nkaka yina ke kuzwá bambote na kuvanda kilumbu yina

¹⁰ Beto ke bokilá mpe bantu yina biká kusadila Yehova. Beto ke salak’ yawu samu na kubambukila bawu ti Yehova ke zolá kaka bawu. Mingi ke kwizaka, mpe ya ke fulusá beto na kilengi ntangu beto ke talá bawu. Ntangu ba ke kwizá na lukutakanu samu na kubambukila moyo lufwa ya Yesu, ya ke sadisá bawu na kukanisa dyaka na kilengi yina ba vandá na yawu na ntama, na kisalu ya Yehova. Beto zonzila kifwani ya Monica. c Yandi kotá madidi na ntama, mpe yandi bandá dyaka kusamuna na kati ya kimbevo ya COVID-19. Na manima ya kilumbu ya kubambukila moyo lufwa ya Yesu ya 2021, yandi zonzaka: “Kubambukila moyo lufwa ya Yesu ya mvula yayi me vanda mfunu mingi samu na munu. Me samuna na bantu mpe mu me bokila bawu samu na kilumbu yina. Mu salá ve yawu bamvula 20 yina me luta. Mu tulá ntima ya munu nyonso na kubokila bantu na lukutakanu yayi samu mu ke na nsatu ya mingi na kuvutula Yehova mpe Yesu matondo na nyonso yina ba salá samu na munu.” (Nku. 103:1-4) Ata bantu kwiza to ve, beto ke salá nyonso samu na kubokila bawu na kilumbu ya kubambukila moyo lufwa ya Yesu. Beto zaba ti Yehova ke sepelá na bangolo ya beto.

11. Wa’ faso Yehova sakumuná bangolo ya beto na kubokila bantu na kubambukila moyo lufwa ya Yesu? (Agayi 2:7)

¹¹ Yehova sakumuná ya kulutila bangolo yina beto me sala na kubokila bantu na kubambukila moyo lufwa ya Yesu. Na 2021, ata misiku yina ba tulá samu na kukanga nzila na kimbevo ya COVID-19, bantu 21 367 603 vandá na lukutakanu ya kubambukila moyo lufwa ya Yesu. Ya ke mbala ya ntete beto lungisa lutangu yayi. Lutangu yayi ke bambala zole na ndambu lutangu ya Bambangi ya Yehova na yinza nyonso. Ntembe ve, Yehova ke talá ve kaka lutangu ya bantu. Kasi ya kulutila, yandi ke talá mosi na mosi ya bantu yina me vanda na lukutakanu yina. (Luke 15:7; 1 Tim. 2:3, 4) Beto lenda vanda ya kundima ti ntangu beto ke kabulá mikanda samu na kubokila bantu, Yehova ke sadisá beto na kuzwa bantu ya ntima ya mbote.​—Tanga Agayi 2:7.

12. Yinki lenda sala ti ya vanda mpasi samu na beto na kubambukila moyo lufwa ya Yesu? (Tala kizizi.)

¹² Yesu zonzá ti na kati ya bilumbu ya nsuka, beto ke kutana na bamambu mingi ya mpasi mutindu bankwamusu ya dikanda mpe ya bambeni ya beto, bamvita, mpe bimbevo ya nene. (Mat. 10:36; Mrk. 13:9; Luke 21:10, 11) Bantangu ya nkaka, bamambu yayi lenda sala ti ya vanda mpasi na beto na kubambukila moyo lufwa ya Yesu. Yinki bampangi ya beto me sala samu ya kanga ve bawu nzila ya kubambukila moyo lufwa ya Yesu, mpe wa’ faso Yehova me sadisa bawu?

13. Wa’ faso Yehova sakumuná bukindi ya Artem, mpe bangolo nyonso yina yandi salá samu na kubambukila moyo lufwa ya Yesu ntangu yandi vandá na boloko?

¹³ Boloko. Bampangi ya beto yina ke na boloko samu na kiminu ya bawu ke salá nyonso na kubambukila moyo lufwa ya Yesu. Beto zonzila kifwani ya Artem. Na mvula 2020, na kati ya bantangu ya kubambukila moyo lufwa ya Yesu, ba tulak’ yandi na kisika mosi ya fioti na boloko. Bantu ya nkaka 4 vandá na yandi kuna. Ata mpili yina, yandi lendá kuzwa mwa bima yina yandi lendá sadila mutindu dimpa na vinu samu na kubambukila moyo lufwa ya Yesu. Mpe yandi kanisá kusala discours samu na yandi mosi. Kasi bantu yina vandá na yandi na kati ya boloko yango vandá kunwa cigarette, mpe ba vandá zonzá mingi bamambu ya mvindu. Yinki Artem salaka? Yandi lombá na bawu kana ba lenda bika kunwa  cigarette mpe kuzonza bamambu ya mvindu kaka samu na heure mosi, samu yandi lenda kubambukila moyo lufwa ya Yesu. Artem pamuká ntangu ba ndimaka. Yandi me zonza: “Mu sosá kuzonzila bawu na yina me tadila kubambukila moyo lufwa ya Yesu.” Ba mangá kuwa yandi. Kasi, na manima ya kutala mpe kuwa Artem ntangu yandi vandá bambukila moyo lufwa ya Yesu, ba yufulak’ yandi byuvu na yina me tadila yawu.

14. Wapi bangolo bisadi ya Yehova salá samu na kubambukila moyo lufwa ya Yesu ata kimbevo ya COVID-19?

¹⁴ Kimbevo ya COVID-19. Samu na kimbevo yayi, Bambangi ya Yehova lendá ve kuvukana samu na kubambukila moyo lufwa ya Yesu. Kasi ya kangá ve bawu nzila na kusala yawu. d Bimvuka yina ke na luve ya kusadila internet landak’ yawu na nzila ya vidéoconférence. Kasi, wa’ faso ba millions ya bampangi ya nkaka yina ke ve na internet salá samu na kubambukila moyo lufwa ya Yesu? Na babwala ya nkaka, ba bongisá bamambu samu discours ya kubambukila moyo luta na télé to na radio. Dyaka, bafiliale ya nkaka salá ba enregistrements ya discours yango na bandinga kuluta 500, samu ata ba yina ke vandá na kati-kati ya babwala lenda kubambukila moyo lufwa ya Yesu. Mpe  bampangi salá nyonso samu na kukabula ba enregistrements yango na ba yina vandá na nsatu ya yawu.

15. Yinki beto ke na longoká na kifwani ya muntu mosi yina ke longoká Biblia?

¹⁵ Bankwamusu ya bantu ya dikanda. Samu na bantu ya nkaka, mambu ya kulutila mpasi yina ke sosá kukanga bawu nzila na kubambukila moyo lufwa ya Yesu ke ni bankwamusu ya bantu ya dikanda ya bawu. Beto zonzila kifwani ya Sue, yina ke longoká Biblia. Na 2021, na kilumbu yina tekilá kilumbu ya kubambukila moyo lufwa ya Yesu, Sue zonzá na mpangi ya kento yina ke longoká Biblia na yandi ti yandi ke lenda ve kuvanda samu na kubambukila moyo lufwa ya Yesu samu ti dikanda ya yandi ke kwamisak’ yandi. Mpangi ya kento tangá Luke 22:44. Mpe yandi zonzá na Sue ti, ntangu beto ke kutaná na bamambu ya mpasi, beto me bonga kulanda kifwani ya Yesu na kusambilá mpe kutulá bamambu nyonso na maboko ya Yehova. Na kilumbu ya kubambukila moyo, Sue bongisá dimpa mpe vinu. Yandi landá mpe dikanisi ya suka ya kubambukila moyo lufwa ya Yesu na jw.org. Na nkokila, yandi vandá yandi mosi na kati ya chambre mpe yandi landá lukutakanu ya kubambukila moyo lufwa ya Yesu na nzila ya téléphone. Na manima, yandi sonikilá mpangi ya kento yina ke longoká Biblia na yandi. Yandi zonzaka: “Nge kindisá munu mingi mazono. Mu salá nyonso samu na kulanda lukutakanu ya kubambukila moyo lufwa ya Yesu, mpe Yehova sadisá munu. Mu zaba ve wa’ faso mu lenda zonzila kilengi yina ke na munu na ntima, mpe kuvutula Yehova matondo!” Nge me kanisa kwandi ti Yehova lenda sadisa nge kana nge ke na kutaná na bamambu ya mpasi ya mutindu yayi?

16. Samu na yinki beto lenda vanda ya kundima ti Yehova ke sakumuna bangolo ya beto ya kuvanda na kilumbu ya kubambukila moyo lufwa ya Yesu? (Baroma 8:31, 32)

¹⁶ Yehova ke sepelá mingi na bangolo yina beto ke salá na kubambukila moyo lufwa ya Yesu. Beto lenda vanda ya kundima ti yandi ke sakumuna beto ntangu beto ke lakisa ti beto ke sepelá na yina yandi salá samu na beto. (Tanga Baroma 8:31, 32.) Na yawu, beto bika ata kima kanga beto nzila na kuvanda na lukutakanu ya kubambukila moyo lufwa ya Yesu ya mvula yayi. Mpe beto sala nyonso yina beto lenda sala na kusala dyaka mingi samu na Yehova na kati ya bantangu yina.