Yehova zola ti bantu zole yina ke kwelana vanda na kilengi mpe ba vanda na kikamarade ya ngolo ntangu nyonso. (Mat. 19:4-6) Si nge ke na nsatu ya kukwela, wa’ faso nge lenda kuzwa muntu ya mbote? Samu Yehova yidiká beto, yandi zaba yinki beto me lunga kusala samu na kuvanda na dikwela ya mbote. Na yawu, si nge sadila misiku yina yandi me pesa beto, nge ke kuzwa vrai kilengi. Beto zonzila mwa misiku yango.

Ya ntete, beto zolá zaba yinki Biblia ke zonzá samu na ntima ya beto. Ya ke zonzá: ‘Ntima ke luvunu kulutila bima nyonso ya nkaka mpe ya ke kima mosi ya yimbi.’ (Yer. 17:9) Ntangu bantu zole yina ke na nsatu ya kukwela ke kutaná mpe ke bandá kuzaba bampangi, luzolo ya bawu lenda kula na mbangu. Na yawu, ya lenda kuma mpasi na bawu na kubaka badesizion ya mbote. Si bantu zole ke na sosá kukwelana kaka samu ba ke na landá bantima ya bawu, na manima, ya lenda natina bawu bampasi. (Bin. 28:26) Ni na yawu, ya ke vanda ve mbote na kupesa ntima ya nge na muntu yina nge me zaba ntete ve bien to na kuzonzila yandi luzolo ya nge.

Bingana 22:3 ke zonzá: ‘Muntu ya mayela ke talá kima yina lenda sala yandi yimbi mpe ke bumbaná. Kasi, bantu yina ke ve na mayela ke kwendá kaka na mantwala mpe ba ke kutaná na bampasi.’ Samu na yinki ya lenda vanda yimbi na kusosa muntu yina beto ke kwela na internet? Ya ke na ba yina bandá kubasika na bantu yina ba kutaná na internet, mpe na manima, ba kwizá tala ti bantu yango vandá vuna bawu. Ya ke mambu ya mpasi. Dyaka, na internet, ya ke na bantu yina ke sadilá mambu ya luzolo samu na kudya bantu ya nkaka mbongo. Bantangu ya nkaka, bantu yango ke zonzá ti ba ke Batemwe ya Yehova.

Beto zonzila kima ya nkaka yina ke salá ti faso ya kusala yayi lenda vanda yimbi. Ba-site ya nkaka yina bantu ke kotá samu na kuzwa muntu yina ba lenda kwela ke sadilá bamatematik samu na kulakisa bawu muntu yina me lunga na bawu. Kasi, ata kima ke lakisá ti faso ya kusala yayi ke simbá. Samu kusola muntu yina beto ke kwela ke desizion ya nene, ya ke vanda ve mayela na kusala konfianse na ba-site yina bantu me yidika samu na kubaka yawu. Na mambu ya makwela, ba-site yayi lenda sadisa ve beto faso Biblia ke salak’ yawu.—Bin. 1:7; 3:5-7.

Musiku mosi na Bingana 14:15 ke zonzá: ‘Muntu yina ke ve na mayela ke tulá ntima na bamambu  nyonso yina ba ke zonzá, kasi muntu ya mayela ke salá keba na kote ya kutula dikulu ya yandi.’ Avan na kutula meso na muntu samu na kukwela yandi, nge zolá sosa ntete kuzaba yandi mbote-mbote. Kasi, ya lenda vanda mpasi na kusala yawu na internet. Ata nge ke talá bafoto to bavideo ya yandi mpe nge ke lutisá ntangu na yandi na bamesaje, nge lenda zonza kwandi ti nge zaba bien muntu yango? Bantu ya nkaka yina vandá kanisa ti ba kuzwá muntu ya mbote yina ba ke kwela, pamuká mpe ntima ya bawu lwalá ntangu, na nsuka, ba kwizá tala muntu yango faso yandi kele.

Mosi ya ba yina soniká bankunga zonzá: ‘Mu ke vandá ve na bantu ya luvunu, mpe mu ke mangá ba yina nyonso yina ke bumbá kimuntu ya bawu.’ (Nku. 26:4) Bantu mingi ke kanisá ti ya ke ve yimbi na kuvuna na internet samu na kutalana muntu ya mbote mpe ya kitoko. Ba lenda bumba bifu ya bawu ya yimbi, to bifu ya bawu ya yimbi lenda talana ve ntangu ba ke na sololá na bantu ya nkaka na internet. Ba yina ke zonzá na internet ti ba ke Batemwe ya Yehova, ba ke kwandi na bateme? Ba ke kwandi na kimpeve ya ngolo? Ba ke pesá bawu kwandi buzitu na kati ya bimvuka ya bawu? Ba ke kwandi ba-ekzample ya mbote to ba ke ‘bakamarade ya yimbi’? (1 Ko. 15:33; 2 Tim. 2:20, 21) Kesion ya nkaka ni yayi: si yandi vandá ya kukwela na ntama, rezon yina natak’ yandi na kufwa makwela, Biblia ke ndimá kwandi yawu? Nge me lunga kuzaba bamambu nyonso yayi. Kasi, ya lenda vanda mpasi na nge na kuzaba yawu si nge me solola ve na Batemwe ya Yehova ya nkaka yina zaba muntu yina. (Bin. 15:22) Mpe, kisadi ya Yehova lendá kanisa ata fioti ve ‘kuvukana’ na muntu yina ke sadilá ve Yehova.—2 Ko. 6:14; 1 Ko. 7:39.

Samu ba-site yayi lenda vanda yimbi, beto me lunga kusadila bafaso ya nkaka ya mbote samu na kusosa mpe kuzaba muntu yina beto ke kwela. Wapi kote beto lendá kutana na muntu ya mbote yina beto lenda kwela? Beto lenda zaba bampangi ya nkaka na balukutakanu ya kimvuka, balukutakanu ya nene mpe ba-okazion ya nkaka yina beto ke vukaná.

Ntangu kima ke salá ti beto vukana dyaka ve na bampangi, faso na kati ya maladi ya coronavirus, beto ke sadilá vidéoconférence samu na kusala balukutakanu ya beto. Kuna, beto lenda zaba Batemwe ya Yehova ya nkaka yina ke ve ya kukwela. Na balukutakanu, beto lenda kuwa ntangu ba ke na zonzilá kiminu ya bawu na badiskur, na badevwar mpe na bakomantere. (1 Tim. 6:11, 12) Mpe, nge lenda solola na mpangi yina nge ke na sosá kukwela na manima ya balukutakanu, na ba-salle ya fioti yina ba ke salá na vidéoconférence. Bantangu ya nkaka, Batemwe ya Yehova ya nkaka ke yidiká ba-okazion ya kusolola na bampangi na vidéoconférence. Si yandi ke kuna, nge lenda tala faso yandi ke na bakilá bampangi. Na yawu, nge ke zaba bifu ya mbote yina ke na yandi mpe yina yandi ke ve na yawu. (1 Pi. 3:4) Fioti-fioti, lere nge ke zaba bien yandi, nge lenda tala si beno na yandi ke na sosá kunata luzingu faso mosi mpe si yandi lenda vanda muntu ya mbote ya kukwela.

Ntangu ba yina ke ve ya kukwela ke landá bamambu ya Biblia samu na kuzwa muntu yina ba ke kwela, ya ke vanda ve mpasi na bawu na kuvanda na kilengi na dikwela ya bawu. Kaka faso Bingana ke zonzá: ‘Muntu yina me kuzwa kento [to bakala] ya mbote, yandi me kuzwa kima mosi ya mbote mpe Yehova ke ndima yandi.’—Bin. 18:22.