1-2. Wapi bamambu ya mpasi Batemwe ya Yehova mingi ke kutaná na yawu?

APOTRE Paul zonzá na Timote na kusala bangolo samu na kusala kisalu ya predikasion. (2 Tim. 4:5) Na yawu, beto ke landá konseye ya Paul mpe ke salá nyonso samu na kusadila Yehova. Kasi bantangu ya nkaka ya ke vandá mpasi. Bampangi ya beto mingi ke vandá na boma ya kupreche. (2 Tim. 4:2) Na kifwani, kanisa na bampangi ya beto yina ke vandá na babwala yina ke na interdiksion. Ba ke precheke ata ba zaba ti ba lendá tula bawu na boloko!

² Bisadi ya Yehova ke kutaná na bamambu mingi ya mpasi, yina lenda manisa bawu kuraje. Na kifwani, ya ke na ba yina ke lutisá ba-heure mingi na kisalu samu na kuzwa mwa kima yina ke sadisa bawu na kudikisa mpe kukipe bafamiye ya bawu. Ba ke vandá na nsatu ya kupreche mingi, kasi ba ke vandá dyaka ve na ngolo ya kusala yawu na nsuka ya semaine. Ba ya nkaka ke lendá ve kusala mingi na kisalu ya Yehova samu ba ke na maladi ya ngolo to ba me nuná, to ba ke lendá ve kubasika na bayinzo ya bawu. Ya ke na ba yina mpe ntangu nyonso ke kanisá ti ba ke ve na valere na meso ya Yehova. Mary, * mpangi mosi ya kento me zonza: “Mu ke salá bangolo samu na kukontrole makanisi ya munu ntangu mu ke vandá ve na kuraje, kasi na manima, ya ke lembisá dyaka munu. Ya ke salá munu vrai mpasi na ntima samu ntangu mpe bangolo yina mu zolá lutisa na predikasion me kwenda kaka faso yina.”

3. Yinki beto ke zonzila na artikle yayi?

³ Mambu ni mambu yina beto ke na yawu, Yehova lenda pesa beto ngolo yina beto ke na yawu nsatu samu na kukontinye kusadila yandi. Avant na kuzonzila faso Yehova lenda sadisa beto, beto zonzila ntete faso yandi pesá Paul na Timote ngolo ya kusala kisalu ya predikasion ata na kati ya bampasi.

4. Wapi bamambu ya mpasi Paul kutaná na yawu?

⁴ Paul kutaná na bamambu mingi ya mpasi. Yandi vandá na nsatu Yehova sadisa yandi ntangu ba-enemi ya yandi vandá bulá yandi, vandá tulá yandi na boloko to vandá sosá kufwa yandi. (2 Ko. 11:23-25) Paul vandá ve na nsoni ya kuzonza ti bantangu ya nkaka yandi vandá nwaná na makanisi ya yimbi. (Rom. 7:18, 19, 24) Ya vandá mpe na mambu yina vandá talisa yandi mpasi faso ‘dinsende na kati ya nzutu,’ mpe yandi vandá na vrai nsatu Nzambi katula yandi yawu.—2 Ko. 12:7, 8.

5. Yinki Paul lendá kusala ata na kati ya bampasi nyonso yina vandá na yandi?

⁵ Yehova pesá Paul ngolo ya kukontinye kupreche ata na kati ya bampasi. Beto zonzila yinki Paul lendá kusala. Na kifwani, ntangu yandi vandá na boloko na yinzo mosi na Rome, yandi precheke na tiya nyonso na bantu mingi, na bachef ya Bajwif mpe ntangu ya nkaka na bantu ya guvernement. (Bis. 28:17; Flp. 4:21, 22) Yandi precheke mpe na basolda mingi yina vandá kwizá bumba yandi, mpe na bantu yina vandá kwizá talak’ yandi na boloko. (Bis. 28:30, 31; Flp. 1:13) Kaka na ntangu yina, Nzambi sadilá Paul samu na kusonika baletre yina sadisá bakristo ya ntangu ya ntama, mpe yina ke na kontinye kusadisa bawu bubu yayi. Ekzample ya Paul pesá kimvuka ya Rome ngolo, ya salá ti bampangi yina kuzwa ‘kuraje ya mingi ya kuzabisa mambu ya Nzambi na ata boma.’ (Flp. 1:14) Ata Paul lendá ve kusala nyonso yina yandi vandá na nsatu ya kusala, kasi yandi salá bangolo ya yandi nyonso samu ‘nsangu ya mbote kwenda na mantwala.’—Flp. 1:12.

6. Faso me zonza 2 Bakorinto 12:9, 10, yinki sadisá Paul na kusala kisalu ya predikasion?

⁶ Paul zabá ti bima nyonso yina yandi salá na kisalu ya Yehova, salamá kaka samu Yehova pesá yandi ngolo, kasi na ngolo ya yandi mosi ve. Yandi zonzá ti ngolo ya Nzambi vandá ‘kuma ya kulunga ntangu yandi vandá ya kulemba.’ (Tanga 2 Bakorinto 12:9, 10.) Yehova sadilá mpeve ya yandi ya santu, samu na kupesa Paul ngolo ya kusala kisalu ya predikasion ata ba vandá kwamisa yandi, kutula yandi na boloko mpe ata bampasi nyonso yina kuminá yandi.

7. Wapi bamambu vandá na Timote yina salá ti ntangu ya nkaka ya vanda mpasi na yandi na kusala bisalu yina ba pesá yandi?

⁷ Timote, jeune yina precheke mingi na Paul, tulá mpe konfianse ya yandi na ngolo ya Nzambi samu na kusala kisalu ya predikasion. Timote vandá salá bavoyaje na Paul samu na kukwenda  preche na babwala ya ntama. Mpe Paul filisak’ yandi na kukwenda vizite mpe kupesa ngolo na bimvuka. (1 Ko. 4:17) Ntangu ya nkaka, Timote vandá tala ti yandi lungá ve kusala kisalu yina Paul vandá pesa yandi. Ya lenda vanda samu na yawu Paul zonzá na yandi: ‘Kubika ve muntu kutala nge muntu ya mpamba samu nge ke ntete jeune.’ (1 Tim. 4:12) Kaka na ntangu yina, Timote vandá mpe na dinsende ya yandi na nzutu. Yandi vandá ‘belá mingi.’ (1 Tim. 5:23) Kasi Timote zabá ti mpeve ya Yehova ke pesa yandi ngolo yina yandi ke na yawu nsatu, samu na kupreche nsangu ya mbote mpe kusadila bampangi ya yandi.—2 Tim. 1:7.

8. Wa’ faso Yehova ke pesá ngolo na bisadi ya yandi bubu yayi?

⁸ Bubu yayi, Yehova ke pesá bisadi ya yandi ‘ngolo yina ke ya kulutila ngolo ya bantu’ samu ba kontinye kusadila yandi na ntima mosi. (2 Ko. 4:7) Beto zonzila bima 4 yina Yehova ke sadilá samu na kupesa beto ngolo mpe samu beto vanda kaka ya kukangama na yandi: priere, Biblia, bampangi ya beto bakristo, mpe kisalu ya predikasion.

9. Wa’ faso priere lendá sadisa beto?

⁹ Priere pesá bawu ngolo. Na Baefeze 6:18, Paul zonzá na beto na kusambila ‘ntangu nyonso.’ Nzambi ke pesa reponse na bapriere ya beto, mpe ke pesa beto ngolo. Jonnie yina ke vandá na Bolivie, talá faso Yehova sadisak’ yandi lere yandi vandá lutisa bantangu ya mpasi. Kento ya yandi, na baparent ya yandi nyonso zole kuzwá maladi ya ngolo na ntangu mosi. Jonnie nwaná samu na kukipe bansatu ya bawu nyonso tatu. Mama ya yandi kufwá, mpe kento ya yandi na papa ya yandi lutisá bantangu mingi avant na kubeluka. Lere yandi ke na kanisá na bantangu ya mpasi yina, Jonnie me zonza: “Ntangu mu vandá na vrai basusi, kusambila Yehova mpe kuzonzila yandi mambu yina vandá na munu na ntima, vandá sadisa munu ntangu nyonso.” Yehova pesá Jonnie ngolo yina yandi vandá na yawu nsatu samu yandi lemba ve. Ronald, kuluntu mosi na Bolivie, kuwá ti mama ya yandi vandá na cancer. Mois yina landá, mama ya yandi kufwá. Yinki sadisá yandi na kati ya bampasi yina? Yandi me zonza: “Ntangu mu vandá sambila Yehova, mu vandá zonzila yandi bamambu nyonso yina vandá na munu na ntima. Mu zabá ti, yandi lenda komprendre munu kulutila bantu nyonso, kulutila ata munu mosi.” Bantangu ya nkaka, beto lenda tala nete beto ke na lendá ve kukanga ntima na kati ya bampasi, mpe beto zaba ve faso ya kusambila samu na yawu. Kasi, Yehova me zonza na beto na kusambila yandi ata beto zaba ve faso ya kuzonzila yandi bamambu yina ke na beto na ntima.—Rom. 8:26, 27.

10. Faso me zonza yawu Baebre 4:12, samu na yinki ya ke important na kutangá Biblia, mpe na kukanisá mbote-mbote na bamambu beto me tanga?

¹⁰ Biblia pesá bawu ngolo. Paul vandá tangá Biblia samu na kuzwa ngolo mpe kuraje, beto mpe zolá sala faso yandi. (Rom. 15:4) Si beto tanga Biblia mpe beto kanisa na mambu beto ke na ntangá, Yehova lenda sadisa beto na kuzaba faso mambu ya Biblia lenda sadisa beto. (Tanga Baebre 4:12.) Ronald yina beto me zonzila deja, me zonza: “Mu ke na vrai kilengi, na yina mu salá bangolo na kutanga Biblia bampimpa nyonso. Mu ke kanisá mingi na bifu ya mbote ya Yehova mpe na luzolo yina yandi ke lakisá na bisadi ya yandi. Ya ke sadisá munu na kuvanda dyaka na ngolo.”

11. Wa’ faso Biblia pesá ngolo na mpangi ya kento mosi yina vandá lutisa bantangu ya mpasi?

¹¹ Si beto baka ntangu ya kukanisa mbote-mbote na mambu ya Biblia, ya ke sadisa beto na kutala na faso ya mbote bamambu yina beto ke na yawu. Beto tala faso Biblia sadisá veuve mosi yina vandá na basusi. Kuluntu mosi zonzá na yandi ti, yandi lenda kuzwa baleson mingi yina ke  sadisa yandi na livre ya Job. Lere yandi bandá kutanga, yandi vandá tadila Job na faso ya yimbi, samu job vandá na makanisi ya yimbi na kati ya bampasi. Na yisi ya ntima, yandi vandá ngala Job: “Job! Kulutisa ve ntangu ya nge nyonso na kukanisá kaka na bampasi ya nge!” Kasi na manima, yandi kwizá tala ti makanisi ya yandi vandá kaka faso mosi na ya Job. Ya sadisá yandi na kuyidika makanisi ya yandi mpe na kuzwá ngolo ya kunwana na basusi yina vandá kwizila yandi samu bakala ya yandi kufwá.

12. Wa’ faso Yehova ke sadilá bampangi ya beto bakristo samu na kupesa beto ngolo?

¹² Ba kuzwá ngolo na nzila ya bampangi ya bawu bakristo. Yehova ke sadilá bakristo ya nkaka samu na kupesa bampangi ya bawu ngolo. Paul soniká ti, yandi vandá vingila ti yandi na bampangi ya yandi bakristo, ‘ba pesa bampangi ngolo bawu na bawu.’ (Rom. 1:11, 12) Mary yina beto me zonzila deja, ke zolá kuvanda na bampangi ya yandi Batemwe ya Yehova. Yandi me zonza: “Yehova sadilá bampangi ya kento na ya bakala yina zabá ata fioti ve mambu ya munu, na kupesa munu ngolo. Bamambu yina ba vandá zonzá na munu to bamesaje yina ba vandá filisá munu, vandá pesá munu ngolo mpe ya vandá ni yina mu vandá na yawu nsatu. Ya ke sadisá munu mpe na kusolola na bampangi ya kento yina kutaná na bamambu ya mpasi yina mu ke na kutaná na yawu mpe kuzaba faso ba salá. Bakuluntu mpe, ntangu nyonso ke sadisá munu na kutala ti mu ke na plase ya munu na kati ya kimvuka.”

13. Wa’ faso beto lendá pesa bampangi ngolo na balukutakanu?

¹³ Plase ya kulutila mbote yina bampangi lenda pesa beto ngolo, ke ni balukutakanu ya beto ya kimvuka. Ntangu nge ke vandá na balukutakanu, sosa kupesa bampangi ngolo. Na yawu, zonza na bawu ti nge ke zolá bawu mpe felisite bawu samu na nyonso yina ba ke salá. Na kifwani, avant lukutakanu banda, kuluntu mosi na nkumbu ya Peter zonzá na mpangi mosi ya kento yina bakala ke ve Temwe ya Yehova: “Ya ke salá munu vrai kilengi na kutala nge na balukutakanu. Ntangu nyonso, nge na bana ya nge 6, beno ke prepareke bakomentere mpe beno ke eziteke ve na kupesa yawu.” Meso ya yandi fuluká na mansangasa mpe samu na kulakisa kilengi ya yandi, yandi vutulá na kuluntu yayi: “Mu vandá na vrai nsatu ya kuwa mambu yayi bubu yayi.”

14. Wa’ faso kisalu ya predikasion lenda sadisa beto?

¹⁴ Kisalu ya predikasion pesá bawu ngolo. Ntangu beto ke precheke, beto ke vandá na makanisi ya mbote ata bantu kuwa beto to ba sala ve yawu. (Bin. 11:25) Stacy mpangi mosi ya kento kuzwá ngolo na kisalu ya predikasion. Ntangu ba basisá na kimvuka muntu mosi ya famiye ya yandi, ya salá yandi vrai mpasi, mpe yandi vandá kontinye kuyufula: “Mu salá kwandi mingi samu na kusadisa yandi?” Ya vandá mpasi na yandi na kukanisa ve na mambu yayi. Yinki sadisá yandi na kukatula makanisi ya yimbi yina? Kisalu ya predikasion! Ntangu yandi vandá preche, yandi vandá solola na bantu yina vandá na nsatu yandi sadisa bawu. Yandi me zonza: “Na kati ya bantangu yina, Yehova pesá munu muntu mosi yina ke longoka Biblia na munu. Muntu yango bandá kusadila bamambu ya Biblia na mbangu. Ya pesá munu ngolo ya mingi. Na situation yina, kima yina sadisá munu ya kulutila, vandá ni kisalu ya predikasion.”

15. Yinki beto lenda longoka na bamambu yina zonzá Mary?

¹⁵ Samu na barezon mingi, ba ya nkaka ke tala ti, ba ke lenda ve kusala mingi na kisalu ya predikasion. Si ni faso yayi mpe nge ke talá bamambu, kuzimbana ve ti Yehova ke sepelá na nyonso yina nge ke lendá kusala. Beto zonzila dyaka ekzample ya Mary. Ntangu yandi kwenda na teritware yina bantu vandá zonza ndinga ya nkaka, yandi vandá tala ti, yandi vandá sala ata kima ya malonga kuna. Yandi me zonza: “Na kati ya mwa bantangu, nyonso yina mu vandá lendá kusala,  kaka ni kupesa mwa bakomentere, kutanga verse ya Biblia to kupesa mwa trakt.” Yandi vandá tala ti yandi vandá sala ve mingi, ntangu yandi vandá kompare kisalu ya yandi na yina vandá sala bampangi yina zaba bien kuzonza ndinga yina. Kasi, yandi chanjeke makanisi. Yandi kwizá tala ti Yehova lenda sadila yandi samu na kusadisa bantu ya teritware, ata yandi zaba ve bien kuzonza ndinga yina. Yandi me zonza: “Baverite ya Biblia ke kitoko, simple mpe ya lenda chanje luzingu ya muntu.”

16. Yinki lenda sala ba yina ke lendá ve kubasika na bayinzo ya bawu samu na kupreche?

¹⁶ Yehova zaba ti ba ya nkaka na kati ya beto ke na nsatu ya kupreche mingi, kasi ba lenda basika ve na bayinzo ya bawu. Na yawu, yandi lenda sadisa beto na kupreche na bantu yina ke kwizá kipeke beto, na badoktere mpe na bantu ya nkaka. Ngolo ya beto lenda manisa si beto banda kukompare kisalu yina beto ke na salá bubu yayi, na yina beto vandá salá na ntama. Kasi si beto ndima faso Yehova ke na sadisá beto bubu yayi, beto ke kuzwa ngolo ya kubumba kilengi ya beto ata na kati ya bampasi.

17. Faso me zonza Longi 11:6, samu na yinki beto zolá kontinye kupreche ata bantu ke na mangá kuwa beto?

¹⁷ Beto zaba ve kote mbuma ya laverite yina beto me kunda ke basisa barasine, ke kula, mpe ke buta. (Tanga Longi 11:6.) Na kifwani, Barbara mpangi mosi ya kento yina ke na 80 ans, ke precheke ntangu nyonso na telefone mpe na baletre. Na letre mosi yina yandi filisá, yandi tulá Yinzo ya Kengidi (na Français) ya 1 Mars 2014, yina vandá na artikle mosi yina vandá na teme “ Ce que Dieu a fait pour vous. ” Yandi zabá ve ti, yandi filisá letre yango na kuple mosi yina vandá Batemwe ya Yehova na ntama. Ba tangá Yinzo ya Kengidi yango bambala mingi. Lere yandi vandá tanga yawu, bakala vandá tala nete Yehova vandá zonza na yandi. Na manima ya bamvula kuluta 27, kuple yayi bandá dyaka kukwiza na balukutakanu mpe kusadila Yehova. Kanisa na kilengi yina vandá na Barbara mpe ngolo yina yandi kuzwá, ntangu yandi talá barezulta ya mbote yina letre ya yandi kaka mosi pesá!

18. Yinki beto lendá sala samu na kuzwa ngolo yina ke katuká na Yehova?

¹⁸ Yehova me pesa beto okazion ya nene ya kuzwa ngolo yina me katuka na yandi. Ntangu beto ke sadilá bima yina Yehova me pesa beto, faso priere, Biblia, bampangi ya beto bakristo, mpe kisalu ya predikasion, beto ke lakisá ti beto ke na konfianse na ngolo mpe nsatu ya yandi ya kusadisa beto. Na yawu, beto zolá sala ntangu nyonso konfianse na Papa ya beto ya zulu yina ke zolá ‘kulakisa ngolo ya yandi na ba yina nyonso ke na ntima ya kulunga na mantwala ya yandi.’—2 Ns. 16:9.