Balevite ya nkaka yina vandá ve bapretre, vandá basoda ya temple. Muntu yina vandá twadisá bawu ni Kapitaine ya temple. Philo, Jwif mosi yina ke soniká babuku zonzá wapi yina vandá kisalu ya basoda yango: “Ndambu ya Balevite yango vandá bumbá porte yina bantu vandá kotilá samu na kukwenda kisika yina temple vandaka. Ndambu ya nkaka vandá bumbá yinzo ya santu (Sanctuaire). Ba vandá sala nyonso samu na kukanga nzila na muntu nyonso yina vandá ve na bweso ya kukota na yinzo ya santu, ata ba yina vandá ve na makanisi ya kukota kuna na nko. Basoda ya nkaka vandá tambulá bisika nyonso ya temple samu na kusala sécurité. Na yawu, ba ya nkaka vandá kengidilá na ntangu, ba ya nkaka na mpimpa.”

Misiku ya ba-policier ya vandá katuká na Sanhedrin (Tribunal ya bajwif). Kaka ni na kimvuka ya Bajwif yayi, Guvernema ya Rome pesá nzila ya kuvanda na ba-épée (mbele ya yinda).

Joachim Jeremias, muntu mosi yina ke salá bakomentere na mambu ya Biblia zonzá ti, “ntangu basoda kwizá kanga Yesu, yandi yufulá bawu samu na yinki ba kangá ve yandi ntangu yandi vandá longa na kati ya temple. (Mat. 26:55) Yesu zola yufula ve kyuvu yayi si basoda yina vandá ve ba-policier ya temple.” Samu na Jeremias, basoda yina kwiza kanga Yesu vandá bapolicier ya temple. (Yoa. 7:32, 45, 46) Na manima, Sanhedrin filisá Kapitaine ya temple na ndambu ya basoda na kukanga ba-apotre. Ya lendá vanda mpe ti, ni ba-policier yango basisá apotre Paul na ngolo nyonso na nganda ya temple.—Bis. 4:1-3; 5:17-27; 21:27-30.