Jack na Marie-Line bandá kisalu ya predikasion ya ntangu nyonso na mvula 1988. Ba mesaná kusala bisalu nyonso yina ba vandá pesá bawu, samu na kusadisa bampangi na bwala ya Guadeloupe mpe na Guyane Française. Ni Bethel ya France ke twadisá predikasion na babwala zole yayi. Beto yufulá Jack na Marie-Line byuvu yayi:

Yinki natá beno na kusala kisalu ya kulonga nsangu ya mbote ntangu nyonso?

Marie-Line: Na Guadeloupe, bwala yina mu me kula, mu vandá basiká ntangu nyonso na predikasion na mama ya munu, yina vandá na tiya na kisalu ya predikasion. Samu mu zola bantu, ntangu mu manisá lekole na mvula 1985, mu bandá kisalu ya predikasion ya bantangu mingi (pionnière permanente).

Jack: Ntangu mu vandá ntete mwana ya fioti, mu vandá lutisá ntangu mingi na bapionier yina vandá zolá kisalu ya predikasion. Mu vandá na kifu ya kusalá kisalu ya pionier ya bantangu fioti (pionnier auxiliaire), ntangu ba vandá kangá lekole. Na week-end, na mama ya munu, to na mpangi ya nkaka ya kimvuka, vandá kwenda na bateritware yina bapionier ya nkaka vandá. Beto vandá bandá predikasion na suka tii na nkokila. Na manima, beto vandá kwendá na la plage. Beto vandá lutisa bilumbu ya kitoko kuna.

Na manima ya makwela ya beto na Marie-Line na 1988, mu zonzá na kati ya ntima, ‛Beto ke na ntangu mingi, samu na yinki beto lenda sala ve mingi na kisalu ya predikasion? Munu mpe kumá pionier faso Marie-Line. Kaka mvula mosi lutá, na manima ya kusala lekole ya bapionier, beto kuma bapionier ya ntangu nyonso (Pionniers spéciaux). Beto vandá na kilengi ya kusala na babwala mingi ya Guadeloupe avant beto kwenda na Guyane Française.

Na bamvula yina me luta, beno changeke bisalu bambala mingi na kati ya organizasion. Yinki sadisá beno na kusala yawu?

Marie-Line: Bampangi ya Bethel ya Guyane Française zabá ti beto ke zolá mingi verse ya Izaya 6:8. Samu na kusekisa beto, ba vandá yufula beto na telephone, “Beno ke na zabá ntete yina ke zonzá Izaya 6:8?” Beto vandá vutulaka: “Beto bawu yayi! Filisa beto!”.

 Beto vandá zonzá ve ti, kisalu ya beto ya ntama me lutila kisalu ya beto ya bubu yayi, samu kisalu na kisalu ke natá kilengi ya yawu. Kusala faso yina, zolá katula beto kilengi ya kisalu ya beto ya malu-malu. Beto vandá sosa mpe kusala kindiku na bampangi na kisalu ya beto ya malu-malu.

Jack: Samu beto vanda kaka na bawu, mingi vandá zola ve beto kwenda kisika ya nkaka. Ya vandá makanisi ya mbote. Ntangu beto katuká na Guadeloupe, mpangi mosi ya bakala bambulá beto dikanisi ya Yesu ya Matayi 13:38, yina ke zonzá: “Bilanga ni yinza nyonso”. Na yawu, kisika ni kisika yina beto ke kwendá, beto me zaba ti beto ke kaka na kati ya bilanga yango. Na nyonso, yina me lutila mfunu ni kukutana bantu na teritware!

Na teritware nyonso ya malu-malu, beto ke talá ti, bantu ya kuna ke vandá na kilengi ya kuzinga kuna. Na yawu, beto mpe ke salá nyonso na kuvanda faso bawu. Madya lendá vanda ve faso mosi na ya bwala ya beto, kasi beto ke kudyá yina ba ke dyá, beto ke kunwá mpe yina ba ke nwaka. Beto ke kipeke mpe sante ya beto. Beto ke zonzilá mingi bambote ya teritware ya beto ya malu-malu.

Marie-Line: Beto ke longoká mpe bima mingi na bampangi yina. Mu me zimbana ve mambu yina kuminá beto ntangu beto kumá na Guyane Française. Bamvula ya nene vandá noká kuna. Kilumbu mosi beto vandá vingila mvula manisa samu beto basika na predikasion; mpangi mosi ya kento yufulá munu: “Beto lenda kwendá?” Mu pamuká, mpe mu yufulak’ yandi: “Na yinsi ya mvula?” Yandi vutulá: “Baka parapluie ya nge; beto ke kwenda na bavelo”. Ni kuna mu longoká kusadila parapluie ntangu mu ke na natá velo. Si mu longoká ve yawu, ata kilumbu mosi mu zolá basika na predikasion na yinsi ya mvula!

Bambala 15 ba me change beno bisika ya kusala. Wapi malongi beno lenda pesa na ba yina zola kusala faso beno?

Marie-Line: Kukwenda ntangu nyonso kisika na kisika, lenda vanda mpasi. Kasi, ya ke mbote na kukumisa bisika yina yinzo ya beto.

Jack: Beto vandá na kifu ya kutulá peinture na yinzo ya beto ya malu-malu. Ntangu bampangi ya Bethel vanda zaba ti, beto mase kwenda na teritware ya nkaka, na kusombola munu, ba vandá zonza: “Jack, kubebisa ve ntangu ya nge na kutula peinture!”

Marie-Line kumá ngolo na kuyidiká ba-sac! Yandi vandá tula kima na kima na sac ya yawu, mpe vandá sonika na zulu ya ba-sac: “bima ya douche”, “ya chambre”, “ya kwizine” . . . Ntangu beto vandá  kuma na yinzo ya beto ya malu-malu, ya vandá ve mpasi na kutula kima na kima na kisika ya yawu. Yandi vandá sonika mpe bankumbu ya bima nyonso yina ke na kati.

Marie-Line: Samu beto longoká faso ya kuyidika bima, ya vandá ve mpasi na beto na kubanda predikasion kaka ntangu beto vandá kuma na teritware.

Wapi yina vandá programe ya beno samu “na kusala mbote-mbote kisalu ya beno”?—2 Tim. 4:5.

Marie-Line: Kilumbu ya lundi vandá kilumbu ya beto ya kupema, mpe ya kubongisa yina beto ke longoka na balukutakanu. Mpe mardi, beto vandá banda predikasion.

Jack: Beto vandá tula ve ntima kaka na kulungisa bantangu yina ba ke lombá na bapionier ngonda na ngonda. Samu na munu na kento ya munu, kisalu ya predikasion ke luzingu ya beto. Banda suka tii ntangu beto ke vutuka na yinzo, beto ke longa nsangu ya mbote na muntu nyonso yina beto ke bwabana.

Marie-Line: Beto ke vandá na batrakte ata ntangu beto ke kwendá na kusakana (pique-nique). Ata beto me zonza ve na bantu ti beto ke batemwe ya Yehova, bawu mingi ke lombá beto mikanda ya kutanga. Na yawu, beto ke salá keba na faso ya beto ya kulwata, samu bantu ke talá bima ya fioti-fioti yina.

Jack: Ndyatulu ya beto mpe ke longá mingi bantu ya kartier. Mu vandá na kifu ya kulokotá matiti na ngaanda. Bampangi ya kartier yina vandá tala yawu, vandá yufula: “Beno lenda pesa beto Biblia?”

Beno me longa nsangu ya mbote na babwala mingi. Beno lenda zonzila mambu mosi ya bambote yina beno kutaná na yawu?

Jack: Na Guyane, bateritware ya nkaka ke ntama mingi. Beto vandá sala bakilometre 600 na banzila ya yimbi. Beto lenda zimbana ve kilumbu yina beto kwendá na bwala ya Saint-Élie, na kati ya brousse ya Amazon. Ya kuzwá beto ntangu mingi na kukuma kuna na kamion mpe na bapirogue. Bantu mingi ya kuna ke kwendá sosa or. Samu na kuvutula matondo na babuku yina beto vandá pesa bawu, mingi vandá pesa beto ndambu ya or, faso dikabu! Na nkokila, beto vandá lakisa bawu bavideo ya organizasion. Mpe bantu mingi vandá sepelá na yawu.

Marie-Line: Ntama mingi ve Jack salá diskur ya kubambukila moyo lufwa ya Yesu (Mémorial) na bwala ya Camopi. Na kukuma na maza ya Oyapock, beto salá 4 heure na pirogue. Ya vandá kitoko mingi!

Jack: Na bisika yina maza vandá luta na mbangu, beto vandá sala keba. Beto vanda na boma ya kutala faso maza vandá kwiza na mantwala ya pirogue. Muntu yina vandá nata yawu, zolá vanda ekenge na faso ya yandi ya kunata. Ya vandá mambu ya ngitukulu. Bwala yango ke kaka na batemwe 6, kasi na memorial bantu 50 na Ba-amerindien vandá kuna.

Marie-Line: Yayi ke kaka mosi ya bambote yina ke kumina batemwe ya Yehova yina ke sosa kusala mingi na kisalu ya Yehova. Ntangu nyonso, nge me bonga na kutula ntima ya nge na Yehova, samu kiminu ya nge kuma ngolo. Beto ke tala diboko ya Yehova ntangu nyonso.

Beno me zaba kuzonza bandinga mingi. Ya vandá ve mpasi na kulongoka yawu?

Jack: Ve! Mu longokak’ yawu, samu na kulonga nsangu ya mbote, mpe na kusadisa bimvuka ya bandinga yina. Mu vandá na bweso ya kutwadisa Yinzo ya Kengidi na ndinga ya Sranan tongo, * avant mu banda kulongoka yawu. Mu yufulá na mpangi mosi ya bakala: “Wa’ faso mu me sala yawu?” Yandi vutulá: “Ntangu ya nkaka beto vandá kuwa ve yina nge vandá zonza, kasi ya me vanda kitoko.” Bana ya fioti sadisá munu mingi. Ntangu mu vandá bebisa, ba vandá zonza na munu faso yina ve! Mu longoka mingi na sika ya bana ya fioti.

Marie-Line: Na teritware mosi, mu vandá longoka Biblia na bantu ke zonzá Français, Portugais na Sranan tongo. Mpangi mosi ya kento zonzá na munu ti, ya ke mbote na kulongá ntete na ndinga ya mpasi yina mu ke na longoká, mpe na kumanisa na yina mu me zaba kuzonza. Na bilumbu lutá, mu tala ti yandi vandá na rezon.

Kilumbu mosi, mu longoká Biblia na muntu ke zonzá Sranan tongo mpe na manima, na muntu yina ke zonzá Portugais. Ntangu beto kumá na muntu ya zole, mpangi yina vandá na munu  zonzá: “Marie-Line, ya ke na kima mosi ke na simbá ve!” Mu zolá zonza Portugais na kento mosi ya Bresilienne, kasi mu bandá kuzonzila yandi na Sranan tongo.

Ba yina nyonso me sala na beno me zola beno mingi. Yinki sadisá beno na kutunga kindiku ya ngolo na bawu?

Jack: Bingana 11:25 ke zonzá: “Muntu yina ke kabulá ke vwama.” Beto vandá zola kulutisa ntangu ya mbote na bampangi mpe kusadisa bawu. Na ntangu ya kusala bisalu ya Salle du Royaume, bampangi ya bakala vandá zonza na munu : “Bika baproklamatere ya nkaka sala yawu.” Kasi mu vandá vutula: “Munu mpe ke proklamatere. Na yawu, munu mpe ke vanda kisika yina ke na kisalu ya kusala”. Beto nyonso ke vandá na nsatu ya kupema to kukanisa na beto mosi, kasi ya zolá kanga ve beto nzila ya kusadisa bampangi.

Marie-Line: Beto ke salá nyonso na kulakisa luzolo na bampangi ya nkaka. Beto zabá ntangu yina ba vandá na nsatu ya muntu yina ke bikana na bana ya bawu, to muntu yina ke kwenda baka bawu na lekole. Ni kuna, beto yidiká programe ya beto samu na kusadisa bawu. Na yawu, kindiku ya beto na bampangi kumá dyaka ngolo, samu beto vandá sadisa bawu.

Wa’ bambote yina beno me kuzwa na bisika yina kisalu vandá mingi?

Jack: Kisalu ya kusamuna ntangu nyonso me natina beto bambote mingi, mpe ya me bongisa luzingu ya beto. Beto vandá tala ntangu nyonso bima yina Yehova yidiká: bayinti, bibulu, bafololo... Ya vandá mwa mpasi, kasi beto vandá na kizunu na ntima, samu beto zabá ti dikanda ya Nzambi ke sadisa beto kisika ni kisika yina beto ke kwenda.

Na buntwenya, mu kotá boloko samu mu mangá kusala Politike na bwala ya Guyane Française. Mu vandá kanisa ata fioti ve ti mu zolá vutuka dyaka na bwala yina faso misionere, mpe ba ndima mu kwenda longa na baboloko. Ya tsyeleka, Yehova ke sakumuná na kilengi nyonso bisadi ya yandi!

Marie-Line: Kima ke salá munu kilengi ya kulutila, ni kupesa luzingu ya munu samu na kusadisa bampangi. Beto ke na kilengi ya kusadila Yehova. Ya sadisá mpe dikwela ya beto na kuvanda ngolo. Kilumbu mosi, Jack yufulá munu si beto lenda lutisa ntangu ya mbote mpe kudya na bampangi ya kukwela, yina vandá lutisa bantangu ya mpasi. Mu vutulá: “Munu mpe vandá kanisa na yawu!” Ya ke mbote na kutala ti, ntangu ya nkaka, beto ke vandá na makanisi mosi.

Jack: Ntama mingi ve, ba me tala munu na cancer ya prostate. Marie-Line zola ve kuwa yawu, kasi mu zonzá na yandi: “Kento ya munu, si mu me kufwa mbasi, zaba ti mu me nuna ve mingi, kasi ‘mu me lutisa luzingu’ ya kitoko na kisalu ya Yehova, yina ke ntalu mingi. Kusadila Yehova me fulusa luzingu ya munu na nsayi!”—Kub. 25:8.

Marie-Line: Yehova fungulá beto banzila, na bisalu yina beto vandá vingila ve na kimvuka ya yandi, mpe yandi sadisá beto na kusala bima yina beto zolá lenda ve kusala. Ya tsyeleka, luzingu ya beto me fuluka na mambu ya kitoko. Beto ke ndima kukwenda kisika ni kisika yina Kimvuka ya Yehova ke filisa beto, samu beto zaba na ntima nyonso ti, Yehova ke sadisa beto mpe ke vanda kaka na beto!