ARTIKLE YA KULONGOKA 10
Luzolo na kifu ya kutondá Yehova ke nata nge na bateme
“Yinki ke na kangá mu nzila ya kuzwa bateme?”—BIS. 8:36, nwt-MK.
NZIMBU 37 Je veux te servir de toute mon âme
YINA BETO KE LONGOKA *
1-2. Faso me zonza Bisalu 8:27-31, 35-38, yinki natá bakala mosi ya guvernema ya Éthiopie na kuzwa bateme?
NGE ke na nsatu ya kuzwa bateme mpe kukuma kilandi ya Kristo? Luzolo mpe kifu ya kuvutulá matondo na Yehova natá bantu mingi na kukwenda tii na bateme. Beto zonzila muntu mosi yina vandá sala na guvernema ya Éthiopie.
2 Ntangu yandi longoká yina Biblia ke longá, yandi vingilá ve samu na kuzwa bateme. (Tanga Bisalu 8:27-31, 35-38.) Yinki pusek’ yandi na kuzwa bateme? Yandi zolá mingi malongi yina yandi vandá tanga na buku ya Izaya. Mpe ntangu Filipe sololá na yandi, bakala yango vutulá matondo na mambu nyonso ya mbote yina Yesu salá samu na yandi. Kasi yinki yandi kwendá sala na Jeruzalem? Ni luzolo ya yandi samu na Yehova natak’ yandi kuna. Wa’ faso beto me zaba yawu? Samu yandi katuká na lukutakanu ya nene yina salamá na Jeruzalem. Na kutala mbote-mbote, muntu ya Éthiopie yayi biká dibundu ya bankoko ya yandi, samu na kuvukana na dikanda kaka mosi yina vandá sambila Nzambi ya tsyeleka. Na manima, yandi kumá kisadi ya Yehova. Ni luzolo ya yandi samu na Yehova natak’ yandi na kuzwa bateme, samu na kukuma kilandi ya Kristo.—Mat. 28:19.
3. Yinki lendá kanga muntu nzila ya kuzwa bateme? (Tala tablo: “ Wapi mutindu ntima ya nge kele?”)
3 Ni luzolo ya nge samu na Yehova ke nata nge na kuzwa bateme. Kasi luzolo ya nge samu na bima ya nkaka, lenda kanga nge nzila ya kuzwa bateme. Na wa’ faso? Kanisa ntete na bifwani yayi. Samu nge zola dikanda mpe bandiku ya nge, nge lenda vanda na boma ba yiina nge, si nge kuzwa bateme. (Mat. 10:37) To nge ke ntete na zolá bifu yina Nzambi ke yiiná, mpe ya ke na talaná mpasi na nge na kubika yawu. (Nku. 97:10) Ntangu ya nkaka, nge kulá na kisika yina ba ke salá bafeti na bifu yina ke kwelaná na mabundu ya luvunu. Mpe nge lenda kanisa na mambu ya mbote yina vandá luta na bafeti yina. Na yawu, ya lendá vanda mpasi na nge na kubika bafeti na bifu yina Yehova ke yiinaka. (1 Ko. 10:20, 21) Kasi nge zolá sola: “Na yinki to na nani mu ke pesa luzolo ya kulutila?”
NA NANI NGE ZOLÁ PESA LUZOLO YA KULUTILA?
4. Wapi rezon ya ntete yina zolá nata nge na kuzwa bateme?
4 Nge ke na bima mingi ya mbote yina nge lenda sepela na yawu, mpe yina lenda nata nge na kuvutula matondo. Na kifwani, avant nge banda kulongoka na batemwe ya Yehova, nge vandá pesá buzitu mingi na Biblia. Mpe nge vandá lakisa luzolo mingi samu na Yesu. Yayi nge me zaba batemwe ya Yehova, nge lenda vanda na nsatu ya kulutisa ntangu na bawu. Kusepela na bima nyonso yayi ke mbote, kasi kaka ni yawu ve lenda nata nge na kupesa luzingu ya nge na Yehova mpe kuzwa bateme. Rezon ya ntete yina ke nata nge na kuzwa bateme ni luzolo ya nge samu na Yehova. Si nge me zola Yehova kulutila bima nyonso, nge ke bika ata muntu to ata kima kanga nge nzila ya kusadila yandi. Luzolo ya nge na Yehova ke kuma faso porte yina ke nata nge tii na bateme; luzolo ya nge ke kuma mpe faso bisengo ya bor ya pont yina ke sadisa nge na kubwa ve.
5. Na wapi byuvu beto ke pesa bamvutu?
5 Yesu zonzá ti, beto me lunga kuzola Yehova na ntima ya beto nyonso, na luzingu ya beto nyonso, na mayela ya beto nyonso, mpe na ngolo ya beto nyonso. (Mrk. 12:30) Wa’ faso nge lenda longoka na kuzola Yehova mpe na kupesa yandi buzitu ya kulutila? Kukanisa mbote-mbote na faso yina Yehova ke lakisá beto luzolo ke nata beto na kuzola yandi mingi. (1 Yoa. 4:19) Wapi bima ya nkaka yina ke salama yawu mosi, ntangu nge ke pesa na Yehova luzolo yina me lutila? *
6. Faso me lakisa yawu Baroma 1:20, wapi yina ke mosi ya bafaso yina lenda sadisa beto na kuzaba Yehova?
6 Sadila bima yina Yehova me yidika samu na kulongoka kuzaba yandi. (Tanga Baroma 1:20; Luz. 4:11) Kukanisa mbote-mbote na faso yina yandi yidiká bibulu mpe bayinti, ke lakisa nge ti Yehova ke mayela mingi. Kanisa fioti na faso ya ngitukulu yina yandi yidiká nzutu ya beto. (Nku. 139:14) Kanisa ntete na ngolo yina Yehova sadilá na kuyidika Ntangu, yina ke ya kufuluka na tiya. Mpe Ntangu, ke kaka mosi na bamilion na bamilion ya ba-etwale yina Yehova yidiká. * (Iza. 40:26) Si nge baka ntangu ya kukanisá mingi na bima Yehova yidiká, nge ke pesa yandi buzitu ya kulutila. Kasi, kuzaba ti Yehova ke na mayela mpe na ngolo mingi, ke kaka bima ya fioti yina lenda sadisa nge na kutunga to kubanda kindiku ya nge na Yehova. Ya tsyeleka, na kukulisa kindiku ya nge na Yehova mpe na kukumisa yawu ngolo na yandi, ya ke mfunu na kuzaba ti Yehova ke na mayela mpe ke na ngolo mingi. Nge me bonga dyaka na kusosa kuzaba yandi mbote-mbote.
7. Na kuzola Yehova na ntima nyonso, yinki zolá talana pwelele na luzingu ya beto?
7 Ya zolá talana pwelele na meso ya nge ti Yehova ke kanisá na nge. Ya ke mwa mpasi na nge na kundima ti Yehova, Muntu yina yidiká zulu na ntoto ke talá nge mpe ke kipeke nge? Si ya ke ni faso yina, zaba ti, Nzambi “ke ve ntama na mosi-mosi na beto.” (Bis. 17:26-28) Yandi “ke talá bantima nyonso,” faso David zonzak’ yawu na Salomo, “si nge sosa yandi, yandi ke bika nge [zaba] yandi.” (1 Ns. 28:9) Na yawu, rezon yina ke na salá ti nge longoka Biblia bubu yayi, ya ke samu “[Yehova] me benda nge na sika yandi.” (Yer. 31:3) Nyonso nge ke na longoká na kuzaba Yehova mbote-mbote, luzolo ya nge na yandi mpe ke na kwendá kula.
8. Yinki nge lenda sala na kulakisa ti nge ke tondá Yehova na nyonso yina yandi ke salá samu na nge?
8 Kima ya nkaka yina lenda sadisa beto na kuvutula matondo na Yehova, ni kifu ya kusololá na yandi na lusambu. Ntangu nge ke zonzá na Nzambi nyonso yina ke na ntima ya nge, luzolo ya nge na yandi ke kula. Kindiku ya nge na Yehova ke kuma ngolo ntangu nge ke tala bamvutu yina yandi ke pesa na balusambu ya nge. (Nku. 116:1) Ni yawu ke nata nge na kundima mpe na kuzaba ti Yehova ke kanisá na nge. Kasi, samu nge kuma pene-pene na Yehova, nge zolá zaba mpe makanisi yina ke natak’ yandi na kusala bima ya nkaka. Mpe nge zolá sosa kuzaba yinki yandi ke vingilá na nge. Kima kaka mosi lenda sadisa na kuzaba mambu nyonso yayi: kulongoka Biblia.
Kima lenda sadisa beto na kuvanda pene-pene na Nzambi mpe na kuzaba yina yandi ke na vingilá na beto ni kulongoka Biblia (Tala paragrafe 9) *
9. Wa’ faso nge lenda lakisa ti Biblia ke kima ya ntalu na meso ya nge ?
9 Longoka na kuzola mambu ya Nzambi. Kaka na kati ya Biblia nge lenda zaba tsyeleka na yina me tadila Yehova mpe dikanisi ya yandi samu na nge. Nge ke lakisa ti Biblia ke kima ya ntalu mingi na meso ya nge, ntangu nge ke sadilak’ yawu na kubongisa kitini yina nge ke longoka na muntu yina ke longoká Biblia na nge. Mpe ntangu yina nge ke sadila mambu yina nge ke na longoka. (Nku. 119:97, 99; Yoa. 17:17) Nge ke na programe ya kutangá Biblia nge mosi? Nge ke landá kwandi programe yango kilumbu na kilumbu?
10. Wapi kima ya nkaka yina ke na salá ti Biblia vanda buku ya kitoko mingi?
10 Kima mosi ya nkaka yina ke salá ti Biblia vanda buku ya kitoko, ya ke samu ya ke zonzilá bantu yina talá Yesu na meso ya bawu. Kaka Biblia lenda zonzila nge matsyeleka mpe mambu ya mbote yina Yesu salá samu na nge. Ntangu nge ke na longoká mambu yina Yesu zonzá mpe salá, ya ke nata nge na kukulisa kindiku ya nge na yandi.
11. Yinki lenda sadisa nge na kuzola Yehova?
11 Kulongoka kuzola Yesu ke kulisa luzolo ya nge na Yehova. Samu na yinki? Samu ti Yesu landá mbote-mbote bifu nyonso ya Tata ya yandi. (Yoa. 14:9) Ntangu nge ke longoka na kuzaba Yesu, nge ke zaba mpe ke pesa Yehova buzitu ya kulutila. Kanisa ntete na kyadi yina yandi vandá tala samu na bantu yina ba vandá nyokola na bampangi ya nkaka: bapovre, bantu ya maladi to ba yina vandá ve na bantu yina lenda sadisa bawu. Kanisa dyaka na faso malongi ya yandi lenda sadisa nge na kubongisa luzingu ya nge, si nge me landa yawu.—Mat. 5:1-11; 7:24-27.
12. Kulongoka kuzaba Yesu ke nata nge na kusala yinki?
12 Luzolo ya nge na Yesu ke kuma ngolo, si nge baka ntangu ya kukanisá na munkayulu yina Yesu pesá samu Nzambi lemvokila masumu ya beto. (Mat. 20:28) Ntangu nge ke zaba ti Yesu ndimá lufwa na ntima mosi samu na nge, nge ke kuzwa nsatu ya kunyonga masumu ya nge mpe ya kusosa mulemvo ya Yehova. (Bis. 3:19, 20; 1 Yoane 1:9) Bangolo yina nge ke salá na kuzaba Yehova na Yesu, ke kumisa nge pene-pene ya bampangi ya nkaka yina ke zolá Yehova.
13. Yinki Yehova lenda sadisa nge na kuzwa?
13 Longoka na kuzola ba yina ke zolá Yehova. Bantu ya dikanda na bandiku ya nge yina me zaba ve Yehova, lenda pamuka na kutala ti nge ke na sosá kupesa luzingu ya nge na Yehova. Ba lenda dasuka mpe kusosa kukanga nge nzila. Kasi, Yehova ke sadisa nge na kuzwa na kati ya kimvuka ya yandi, dikanda mpe bandiku ya kimpeve. Si nge kangama na dikanda ya nge ya malu-malu, ba ke lakisa nge luzolo mpe ke sadisa nge. (Mrk. 10:29, 30; Ebr. 10:24, 25) Ntangu ya nkaka bantu ya dikanda mpe bandiku ya nge yina ke sadilá ve Yehova, lenda banda kusadila yandi mpe kulanda misiku ya yandi.—1 Pi. 2:12.
14. Faso me zonza 1 Yoane 5:3, yinki me talana na luzingu ya nge ntangu nge me banda kusadila misiku ya Yehova?
14 Longoka na kuzola mpe kusadila misiku ya Yehova. Ntangu nge zabá ntete ve Yehova, ni nge mosi vandá sola yina ke mbote to yimbi na meso ya nge. Kasi bubu yayi nge me kwiza tala mpe me ndima na meso ya nge mosi ti, misiku ya Yehova me lutila ya beto bantu. (Nku. 1:1-3; tanga 1 Yoane 5:3.) Kanisa ntete na malongi yina Biblia ke pesá na babakala mpe bakento ya kukwela, na bibuti mpe na bana. (Ef. 5:22–6:4) Ntangu nge me banda kusadila misiku ya Biblia, nge mpe, me tala ti dikanda to dikwela ya nge me banda kubonga? Ntangu nge me banda kulanda musiku ya Biblia yina ke lombá beto na kukima bandiku ya yimbi, nge me tala faso ya me sadisa nge na kubika bifu mingi ya yimbi? Luzingu ya nge mosi mpe me bonga? (Bin. 13:20; 1 Ko. 15:33) Ee! Ya tsyeleka, beto me kanisa ti mambu ke na lutá faso yayi na luzingu ya nge.
15. Yinki nge me lunga kusala si ya ke mwa mpasi na kuzaba faso ya kusadila misiku ya Biblia yina nge ke na longokaka?
15 Ntangu ya nkaka, ya lenda vanda mwa mpasi na kuzaba faso ya kusadila misiku ya Biblia, yina nge ke na longoká. Samu na yawu, kimvuka ya Yehova me basisa mikanda mingi yina lenda sadisa nge na kuzaba faso ya kusadila misiku ya Biblia, yina me tadila mbote na yimbi. (Ebr. 5:13, 14) Ntangu nge ke tanga mpe ke longoka yawu, nge ke zaba mbote faso ya kulanda misiku yango. Mpe na manima, nge ke vanda na nsayi ya kusadila Yehova na kimvuka ya yandi.
16. Wa’ faso Yehova ke na twadisá kimvuka ya yandi?
16 Longoka na kuzola mpe na kusadisa kimvuka ya Yehova. Yehova me vukisa bisadi ya yandi ya ntoto nyonso na kati ya bimvuka ya fioti (assemblées locales), yina Yesu, mwana ya yandi ke na yalá. (Ef. 1:22; 5:23) Yesu solá bantu kaka fioti samu na kutwadisa kisalu ya predikasion, yina ke na salamá na ntangu ya beto. Yesu bokilá kimvuka ya bantu fioti yayi “muumbu ya mayele mpe ya kukwikama (Esclave fidèle et avisé).” Mpe Yesu me pesa bawu kisalu ya kupesa nge madya ya kimpeve, samu na kutunga kindiku ya nge na Nzambi. (Mat. 24:45-47) Mosi ya kisalu yina muumbu ya mayele ke na yawu, ni kutula bakuluntu na bimvuka. Ba me lakisa bawu faso ya kusadisa nge, ya kubumba kiminu ya nge, mpe ya kutwadisa nge. (Iza. 32:1, 2; Ebr. 13:17; 1 Pi. 5:2, 3) Na luzolo nyonso, bakuluntu me ndima kusadisa nge na kuvanda dyaka pene-pene na Yehova. Kasi kisalu ya nkaka yina ke na bawu, ni kusadisa nge na kuzaba faso nge mpe lenda sadisa bantu ya nkaka na kuzaba Yehova.—Ef. 4:11-13.
17. Faso me lakisa yawu Baroma 10:10, 13, 14, samu na yinki beto ke sadisá bantu ya nkaka na kuzaba Yehova?
17 Longa bantu ya nkaka na kuzola Yehova. Yesu longá bilandi ya yandi na kusadisa bantu ya nkaka na kuzaba Yehova. (Mat. 28:19, 20) Beto ke landá musiku yayi samu beto zaba ti ya ke mbote na kusadila yawu. Ntangu luzolo ya nge na Yehova ke kula, nge mpe ke kuzwa nsatu ya kuzonza faso ba-apotre Piere na Yoane, yina zonzá: “Kasi beto, beto lenda [bika] ve na kuzonzila mambu yina beto [mosi] talá mpe kuwá.” (Bis. 4:20) Kusadisa muntu na kuzaba Yehova ke kima mosi ke pesá kilengi mingi. Kanisa fioti na kilengi yina Filipe talá ntangu yandi sadisá muntu yina na kuzaba matsyeleka, mpe si nge landa musiku ya Yesu ya kulonga bantu ya nkaka, nge mpe ke lakisa ti nge ke na nsatu ya kukuma Temwe ya Yehova. (Tanga Baroma 10:10, 13, 14.) Ni kuna nge mpe ke yufula kyuvu yina muntu ya Ethiopie yufulá: Yinki ke na kangá munu nzila ya kuzwa bateme?”—Bis. 8:36.
18. Yinki beto ke zonzila na artikle yina ke landa?
18 Nge ke kuzwa desizion yina me lutila mfunu na luzingu ya nge, ntangu nge ke kuzwa bateme. Samu bateme ke desizion mosi ya nene,nge zolá sosa na kuzaba mbote-mbote, yinki ya zola zonza. Na yawu, yinki nge me lunga na kuzaba na yina me tadila bateme? Yinki nge me bonga na kusala avant mpe na manima ya bateme? Artikle yina ke landa ke pesa bamvutu na byuvu yayi.
NZIMBU 2 Ton nom est Jéhovah
^ par. 5 Bantu mingi yina ke zolá Yehova, ke ntete na boma ya kuzwa bateme samu na kukuma temwe ya Yehova. Si nge mpe ke kanisá faso yina, artikle yayi ke pesa nge malongi ya mbote mpe ke lakisa nge bima yina nge lenda sala, samu na kuzwa bateme.
^ par. 5 Samu bantu nyonso ke ve faso mosi, nge lenda banda kusadila makanisi yina ba me longa na artikle yayi, faso ya me bonga na nge.
^ par. 6 Na kuzwa bifwani ya mingi, tala mukanda La vie a-t-elle été créée? Mpe Cinq questions à se poser sur l’origine de la vie.
^ par. 61 YINA FOTO KE NA ZONZILAKA: Na kati ya zandu, mpangi mosi ya kento ke na pesá trakte na mwana ya kento yina ke na tekisá.
