1. Yinki muntu me bonga kusala avant na kubanda kutunga yinzo?

KANISA ntete, muntu ke na sosá kutunga yinzo. Yandi zaba faso ya yinzo yina yandi ke na zolá kutunga. Nge me kanisa ti, na mbala mosi, yandi ke banda kusumba bima yina ke sadisa yandi na kutunga yinzo yango? Ve. Avant yandi banda, ya ke na kima mosi ya mfunu yina yandi zolá sala. Yandi ke sosa ntete kuzaba yikwa yandi ke basisa samu na kutunga yawu, mpe si yandi ke na mbongo ya kulunga samu na kumanisa yinzo yango. Na manima, yandi lenda vanda na ngolo ya kutunga yinzo ya yandi.

2. Faso ke na zonzilá Luke 14:27-30, na yinki nge zola kanisa mbote-mbote avant na kuzwa bateme?

² Nyonso yina Yehova salá samu na nge, mpe luzolo ya nge samu na yandi, ke nata nge na kukanisa na bateme? Si ya ke faso yina, desizion ya nge ke faso mosi na ya muntu yina ke na zolá kutunga yinzo. Samu na yinki? Beto tala mambu yina Yesu zonzá na Luke 14:27-30. (Tanga.) Yesu lakisá yinki zola zonza kuvanda kilandi ya yandi. Si beto zola kuvanda bilandi ya yandi, beto zolá ndima na ntima mosi “bankwamusu” yina ya ke natá, mpe kubika mambu ya nkaka. (Luke 9:23-26; 12:51-53) Na yina, avant na kuzwa bateme, nge zolá kanisa mbote-mbote na nyonso yina ya ke nataka. Ya ke sadisa nge na kuzaba, si nge me yidama samu na kusadila Nzambi faso mukristo ya kukangama.

3. Yinki beto ke zonzila na artikle yayi?

³ Ya ke kwandi mbote na kuzwa bateme, ata beto me zaba ti na yawu, beto ke bwabana bamambu ya mpasi, mpe beto ke bika bima ya nkaka? Ee! Bateme ke fungulá baporte samu na kuzwa bambote bubu yayi, mpe na bilumbu ke kwiza. Beto zonzila mwa byuvu ya mfunu yina me tadila bateme. Kusaka yawu ke  sadisa nge na kupesa mvutu na kyuvu yayi: “Mu me yidama samu na kuzwa bateme?”

4. a) Yinki zola zonza kupesa luzingu na Nzambi? b) Faso me zonza Matayi 16:24, yinki zola zonza “kukanisa dyaka ve kaka” na beto mosi?

⁴ Yinki zola zonza kupesa luzingu na Yehova? Avant na kuzwa bateme, nge me lunga kupesa luzingu ya nge na Yehova. Na kusala yawu, nge zolá sambila yandi na ntima ya nge nyonso, mpe kuzonza na yandi ti, luzingu ya nge nyonso nge ke sambila kaka yandi. Ntangu nge ke sala yawu, nge ke “bika na kukanisa kaka” na nge mosi. (Tanga Matayi 16:24.) Luzingu ya nge ke dyaka ve ya nge, ya me kuma ya Yehova, ya ke bweso ya nene. (Rom. 14:8) Nge me zonza na yandi ti banda bubu yayi, kima ya kulutila mfunu na meso ya nge, ni kusadila yandi, kasi bansatu ya nge mosi ve. Ya ke promese ya nene yina nge me sala na Nzambi. Yehova ke puseke ve beto na kusala promese yayi. Kasi, ntangu beto ke salak’ yawu, yandi ke vingilá beto zitisa yawu.—Nku. 116:12, 14.

5. Wa’ faso kupesa luzingu na Yehova ke kwendá nzila mosi na bateme?

⁵ Wa’ faso kupesa luzingu na Yehova ke kwendá nzila mosi na bateme? Ata muntu zaba ntangu nge ke pesa luzingu ya nge na Yehova. Kasi, bateme ke salamá na meso ya bantu nyonso, mingi-mingi na balukutakanu ya nene. Ntangu nge ke kuzwa bateme, nge ke lakisa na bantu ya nkaka ti, nge me pesa deja luzingu ya nge na Yehova. * Na yawu, bateme ya nge ke lakisa na bantu ti, nge me zola Yehova Nzambi ya nge na ntima ya nge nyonso, na luzingu ya nge nyonso, na makanisi ya nge nyonso, mpe na ngolo ya nge nyonso. Nge me baka desizion ya kusadila kaka yandi luzingu ya nge nyonso.—Mrk 12:30.

6-7. Faso ke na zonzilá 1 Piere 3:18-22, samu na yinki beto me bonga kuzwa bateme?

⁶ Ya ke kwandi mfunu na kuzwa bateme? Beto tala mambu yina ke na 1 Piere 3:18-22. (Tanga.) Arche ya Nowe lakisá na bantu ti, Nowe vandá na kiminu na Nzambi. Faso mosi mpe, bateme ya nge ke lakisa na bantu ti, nge me pesa deja luzingu ya nge na Yehova. Kasi, bateme ke kwandi mfunu? Ee. Piere pesá barezon yina ke na lakisak’ yawu. Ya ntete, ya ke “na vuukisá [beto].” Bateme lenda vuukisa beto si beto lakisa na ndyatulu ya beto ti, beto ke na kiminu na Yesu, beto ke ndimá ti yandi kufwá samu na beto, mpe bubu yayi, yandi ke “na diboko ya kibakala ya Nzambi.”

⁷ Ya zole, si beto kuzwa bateme, beto ke vanda na “makanisi mpe ntima ya kuzuna.” Ntangu beto ke pesa luzingu ya beto na Nzambi mpe ke kuzwa bateme, beto ke kota na kindiku mosi ya ngolo na yandi. Samu ti, ntangu beto ke nyongá na ntima mosi masumu ya beto, mpe ntangu beto ke tulá kiminu ya beto na munkayulu ya Yesu, Nzambi ke lemvokilá masumu ya beto. Kaka ni faso yina, beto lenda vanda na makanisi mpe ntima ya kuzuna na mantwala ya yandi.

8. Yinki zolá nata nge na kuzwa bateme?

⁸ Yinki zolá nata nge na kuzwa bateme? Kulongoka Biblia, me sadisa nge na kuzaba mbote-mbote Yehova, mpe faso yina yandi salá bima. Mambu ya Nzambi yina nge longoká simbá ntima ya nge, mpe natá nge na kuzola yandi mingi. Luzolo ya nge samu na Yehova ke kima ya ntete yina ke nata nge na kubaka desizion ya kuzwa bateme.

9. Faso ke na zonzá Matayi 28:19, 20, yinki zola zonza kuzwa bateme na nkumbu ya Tata, ya Mwana mpe ya mpeve ya santu?

⁹ Desizion ya nge ya kuzwa bateme, zolá katuka mpe na matsyeleka ya Biblia yina nge  longoká mpe nge ndimaka. Beto tala mambu yina Yesu zonzá ntangu yandi pesá musiku ya kukumisa bantu bilandi. (Tanga Matayi 28:19, 20.) Faso Yesu zonzá, ba yina ke kuzwa bateme, zolá kuzwa yawu na “nkumbu ya Tata, ya Mwana, mpe ya mpeve ya santu.” Yinki ya zola zonza? Na ntima ya nge nyonso, nge zolá kwikila na mambu yina Biblia ke zonzá samu na Yehova, na Mwana ya yandi, mpe na mpeve ya santu. Matsyeleka yayi ke mfunu mingi, mpe ya lenda simba ntima ya nge. (Ebr. 4:12) Beto tala yawu.

10-11. Wapi matsyeleka yina ke zonzilá Nzambi nge longoká mpe nge ndimaka?

¹⁰ Kanisa ntete na ntangu nge longoká matsyeleka yayi: “Nkumbu ya Nzambi ke Yehova,” yandi ke “Muntu [ya] kulutila kuzangama na ntoto nyonso,” mpe kaka ni yandi ke “Nzambi ya tsyeleka.” (Nku. 83:18; Iza. 37:16) Yandi ke Muntu-yina-yidiká beto, mpe “Muntu yina ke kuulá beto.” (Nku. 3:8; 36:9) Yandi salá nyonso samu na kukuula beto na disumu, na lufwa, mpe yandi pesá beto kivuvu ya kuzinga ntangu nyonso. (Yoa. 17:3) Bateme ya nge ke lakisa ti nge me kuma mosi ya batemwe ya Yehova. (Iza. 43:10-12) Na yawu, nge ke kota na kati ya dikanda ya nene ya bisadi ya Yehova, yina ke na kilengi ba bokila bawu batemwe ya Yehova. Ba ke na kilengi mpe ya kuzonzila nkumbu ya Nzambi na bantu ya nkaka.—Nku. 86:12.

¹¹ Ya ke bweso ya nene na kuzaba yina Biblia ke zonzá na yina me tadila Nzambi! Ntangu nge ke ndima matsyeleka yayi, ntima ya nge ke nata nge na kupesa luzingu ya nge na Yehova mpe na kuzwa bateme.

12-13. Wapi matsyeleka yina ke zonzilá Mwana nge longoká mpe nge ndimaka?

¹² Yinki ya salá nge na ntima ntangu nge longoká matsyeleka yayi ke zonzilá Yesu? Yesu ke muntu ya zole ya kulutila mfunu na yinza nyonso. Na ntima mosi, yandi pesá luzingu ya yandi faso munkayulu samu na beto. Ntangu beto ke lakisá na ndyatulu ya beto ti beto ke na kiminu na munkayulu ya Yesu, Nzambi lenda lemvokila masumu ya beto, beto lenda kulisa kindiku ya beto na yandi, mpe kuzwa luzingu ya ntangu nyonso. (Yoa. 3:16) Yesu ke Pretre ya beto ya nene. Yandi zola kusadisa beto na kuzwa bambote yina munkayulu ya yandi ke nata, mpe na kuvanda na kindiku ya ngolo na Nzambi. (Ebr. 4:15; 7:24, 25) Samu Yesu ke Mfumu ya Kimfumu ya Nzambi, Yehova ke sadila yandi samu na kusukula nkumbu ya yandi, na kukatula mambu ya yimbi, mpe na kunata bambote na ntoto yina ke kuma Paradis. (Mat. 6:9, 10; Luz. 11:15) Yesu ke kifwani yina beto me bonga kulanda. (1 Pi. 2:21) Yandi salá luzolo ya Yehova luzingu ya yandi nyonso. Na yawu, yandi ke kifwani ya mbote samu na beto.—Yoa. 4:34.

¹³ Ntangu nge ke ndima mambu yina Biblia ke zonzá samu na Yesu, nge ke banda kuzola yandi. Luzolo yina ke nata nge na kusadila Nzambi luzingu ya nge nyonso, faso Yesu salak’ yawu. Ni yina ke nata nge na kupesa luzingu ya nge na Yehova mpe na kuzwa bateme.

14-15. Wapi matsyeleka yina ke zonzilá mpeve ya santu nge longoká mpe nge ndimaka?

¹⁴ Yinki nge kanisá ntangu nge longoká matsyeleka yayi: mpeve ya santu ke ve muntu, kasi ngolo yina Nzambi ke sadilaka. Yandi sadilak’ yawu samu na kusadisa bantu na kusonika Biblia. Ya ke sadisá beto na kuzaba mpe na kusadila mambu yina beto ke tangá na Biblia. (Yoa. 14:26; 2 Pi. 1:21) Na nzila ya mpeve ya santu, Yehova ke pesá beto “ngolo yina me lutila ngolo ya bantu.” (2 Ko. 4:7) Mpeve ya santu ke pesá beto ngolo ya kulonga nsangu ya mbote, ya kubwa ve ntangu mambu ya yimbi ke meká beto, mpe ya kulemba ve ntangu mambu ya mpasi ke kuminá beto. Ya ke sadisá beto na kuvanda na ndyatulu yina “mbuma ya mpeve ya  santu” ke nataka. (Gal. 5:22) Nzambi ke pesá mpeve ya yandi ya santu na ba yina ke tulak’ yandi ntima, mpe ke lombak’ yandi yawu.—Luke 11:13.

¹⁵ Ya ke pesá ngolo mingi na kuzaba ti, samu na kusadila Yehova, bisadi ya yandi lenda tula ntima na mpeve ya yandi ya santu! Ntangu nge ke ndima matsyeleka yina Biblia ke zonzá samu na mpeve ya santu, ya ke nata nge na kupesa luzingu ya nge na Yehova mpe na kuzwa bateme.

16. Yinki beto me longoka na baparagrafe me luta?

¹⁶ Desizion ya kupesa luzingu ya nge na Yehova ke mfunu mingi. Faso beto me longok’ yawu, nge zolá ndima na ntima mosi bamambu yina desizion yayi ke nataka. Kasi, bambote yina nge ke kuzwa, ke lutila mingi na bangolo yina nge ke sala. Bateme lenda vuukisa beto, ya ke sadisá beto na kuvanda na makanisi mpe ntima ya kuzuna na mantwala ya Nzambi. Kima ya ntete yina zolá nata nge na kuzwa bateme, ni luzolo ya nge na Yehova. Nge zolá ndima mpe na ntima ya nge nyonso malongi yina ke zonzilá Tata, Mwana, mpe mpeve ya santu. Na manima ya nyonso yina beto me longoka na baparagrafe yina me luta, wapi mvutu nge ke pesa na kyuvu yayi: “Mu me yidama samu na kuzwa bateme?”

17. Yinki muntu zola sala avant na kuzwa bateme?

¹⁷ Si nge ke na kanisá ti nge me yidama samu na kuzwa bateme, ntembe ve, nge me sala deja mambu mingi samu na kutunga kindiku ya mbote na Yehova. * Samu nge me lenda deja kuzaba mambu mingi yina me tadila Yehova na Yesu, samu nge ke longoká ntangu nyonso Biblia. Ya me kulisa kiminu ya nge. (Ebr. 11:6) Nge ke tulá ntima ya nge nyonso na bapromese ya Yehova yina ke na Biblia, mpe nge ke ndimá ti, munkayulu ya Yesu lenda vuukisa nge na disumu mpe na lufwa. Nge sobá ndyatulu ya nge, mpe nge lombá mulemvo na Yehova. Nge me bika ndyatulu ya yimbi yina nge vandá na yawu, mpe nge me banda kuzinga na faso yina ke sepelisá Yehova. (Bis. 3:19) Nge ke na nsatu ya kuzonzila bampangi mambu yina nge ke na longokaka. Ba me ndima nge kuma proklamatere, mpe nge me banda kusala kisalu ya predikasion na bampangi ya kimvuka. (Mat. 24:14) Yehova ke na kilengi samu na desizion ya mbote yina nge me baka. Nge me sepelisa yandi.—Bin. 27:11.

18. Wapi kima ya nkaka nge zola sala avant na kuzwa bateme?

¹⁸ Avant nge kuzwa bateme, ya ke na bima yina nge zola sosa ntete kusala. Faso beto me zonzila yawu, nge zola pesa luzingu ya nge na Yehova. Sambila yandi na ntima ya nge nyonso ntangu nge ke nge mosi, mpe zonza na yandi ti, nge ke sadila kaka yandi luzingu ya nge nyonso. (1 Pi. 4:2) Zonza na ntwadisi ya kimvuka ya bakuluntu (coordinateur du collège des anciens) ti, nge ke na nsatu ya kuzwa bateme. Yandi ke lomba na bakuluntu ya nkaka na kusolola na nge.  Kuvanda ve na boma ntangu ba ke solola na nge. Kuzimbana ve ti, bakuluntu yayi zaba nge, mpe ba ke zolá nge mingi. Ba ke solola na nge na malongi ya ntete ya Biblia yina nge longokaka. Ba ke sosa kuzaba si nge me simba malongi yango, si nge me zaba mfunu ya kupesa luzingu ya nge na Yehova mpe ya kuzwa bateme. Si ba me tala ti nge me yidama, ba ke zonza na nge na kuzwa bateme na lukutakanu ya nene yina ke kwiza.

19-20. Yinki nge zola sala na manima ya bateme ya nge, mpe wa’ faso nge lenda sala yawu?

¹⁹ Yinki nge zola sala na manima ya bateme ya nge? * Kuzimbana ve ti kupesa luzingu ya nge na Yehova ke promese, mpe yandi ke vingilá nge lungisa yawu. Na manima ya bateme ya nge, nge zola lemba ve na kulungisa promese yango. Wa’ faso nge lenda sala yawu?

²⁰ Vanda ya kukangama na kimvuka ya nge. Na manima ya kuzwa bateme, nge ke kuma muntu ya “kimvuka ya bampangi ya yinza nyonso.” (1 Pi. 2:17) Bampangi ya kimvuka, ke dikanda ya nge ya kimpeve. Na kuvandá ntangu nyonso na balukutakanu, nge ke kumisa kindiku ya nge na bawu ngolo. Tanga Biblia mpe kanisa bilumbu nyonso na malongi ya yawu. (Nku. 1:1, 2) Na manima ya kutanga mwa baverse ya Biblia, baka ntangu ya kukanisa mbote-mbote na yina nge me tanga. Faso yina, mambu ya Nzambi ke simba ntima ya nge. “Sambila ntangu nyonso.” (Mat. 26:41) Balusambu ya nge ke sala ti nge kuma pene-pene na Yehova. “Beno . . . sosa ntete kimfumu ya Nzambi.” (Mat. 6:33) Nge lenda sala yawu na kutulá kisalu ya predikasion na kisika ya ntete na luzingu ya nge. Ntangu nge ke sala mingi na kisalu ya predikasion, kiminu ya nge ke kula, mpe nge lenda sadisa bantu ya nkaka na kuzwa kivuvu ya kuzinga ntangu nyonso.—1 Tim. 4:16.

21. Na wapi bambote bateme ya nge ke fungula nge nzila?

²¹ Desizion ya kupesa luzingu ya nge na Yehova, ke desizion yina me lutila badesizion nyonso yina nge lenda baka. Ya ke lomba kwandi bangolo na kuzitisa yawu? Ee! Kasi, bampasi nyonso yina nge lenda kutana na yawu bubu yayi, ke na ‘kilumbu yina ya ke manisa, mpe ya ke ve kilo.’ (2 Ko. 4:17) Kasi, bateme ya nge ke fungula nge nzila ya kuzwa luzingu ya mbote bubu yayi, mpe “luzingu ya tsyeleka” na bilumbu ke kwiza. (1 Tim. 6:19) Sambila mpe kanisa mbote-mbote na mvutu ya nge na kyuvu yayi: “Mu me yidama samu na kuzwa bateme?”