1. Samu na yinki Yesu lombá na Yehova bumba badisiple ya yandi?

NA MPIPA ya nsuka yina yandi lutisá na ntoto, Yesu kanisá mingi na bamambu ya mpasi yina badisiple ya yandi zolá bwabana. Samu yandi zolá bawu, Yesu lombá na Papa ya yandi na kusadisa badisiple ya yandi samu “mfumu ya yimbi bwisa ve bawu.” (Yoa. 17:14, 15) Yesu zabá ti na mwa ntangu fioti, yandi ke vutuka na zulu. Yandi zabá mpe ti Satan zolá kontinye kunwanisa ba yina nyonso ke vanda na nsatu ya kusadila Yehova. Na yawu, bisadi ya Yehova ke vanda na nsatu ba bumba bawu.

2. Yinki lenda nata beto na kundima ti Yehova ke pesa bareponse na bapriere ya beto?

² Samu yandi ke zolá mwana ya yandi, Yehova pesá reponse na priere ya Yesu. Si beto sala nyonso na kusepelisa Yehova, yandi ke zola mpe beto. Yandi ke pesa bareponse na bapriere ya beto samu na kusadisa beto mpe kubumba beto. Yehova ke Papa ya luzolo, na yawu, yandi ke kontinye kukipe beto bana ya yandi. Yandi zaba ti, ba ke zonzila yimbi na nkumbu ya yandi si yandi kipe ve beto!

3. Samu na yinki beto ke na nsatu Yehova bumba beto bubu yayi?

³ Beto ke na nsatu Yehova bumba beto bubu yayi, kulutila na ntama. Samu ba bingisá yandi na zulu, Satan ke ya “kufuluka na nkele.” (Luz. 12:12) Yandi ke na natá bantu ya nkaka na kukanisa ti, ntangu ba ke kwamisá beto, ba “ke sadilá Nzambi.” (Yoa. 16:2) Ba yina ke ve na kiminu na Nzambi ke kwamisá beto samu beto ke ve faso mosi na bantu ya yinza. Rezon ni rezon yina lendá nata bantu na kukwamisa beto, ke pesa ve beto boma. Samu na yinki? Samu Biblia ke zonzá: ‘Mfumu ke salá mambu yina yandi ke zonzá. Yandi ke pesa beno ngolo mpe ke bumba beno na mantwala ya muntu ya yimbi.’ (2 Tes. 3:3; nwt-MK) Wa’ faso Yehova  ke bumbá beto? Beto zonzila bafaso zole yina yandi ke salak’ yawu.

4. Faso ke na zonza Baefeze 6:13-17, yinki Yehova pesá samu na kubumba beto?

⁴ Yehova me pesa beto bima yina ke sadisá na kunwana, samu na kubumba beto na ba-atake ya Satan. (Tanga Baefeze 6:13-17.) Bima yango yina Nzambi me pesa beto ke ngolo mpe ya ke simbá! Kasi, beto zolá kontinye na kusadila mosi na mosi ya bima yango, si beto ke na nsatu ya bumba beto. Wapi yina ke bima yango? Beto ke zonzila mosi na mosi ya yawu.

5. Yinki ke ceinture ya laverite, mpe samu na yinki beto zolá lwata yawu?

⁵ Ceinture ya laverite ke bamambu nyonso yina ke na kati ya Biblia. Samu na yinki beto me lunga kulwata ceinture yayi? Samu Satan ke “[papa] ya luvunu.” (Yoa. 8:44) Yandi ke vuná depuis bamvula mingi mpe yandi ke “[vuná] ntoto [nyonso]”! (Luz. 12:9, nwt-MK) Kasi, laverite yina ke na kati ya Biblia ke bumbá beto na luvunu ya yandi. Wa’ faso beto lendá lwata ceinture ya laverite? Beto ke salak’ yawu ntangu beto ke longoká laverite samu na Yehova, ntangu beto ke sambilak’ yandi ‘na mpeve mpe na verite,’ mpe ntangu beto ke salá nyonso samu na kusala ve mpe kuzonza ve mambu ya luvunu.—Yoa. 4:24; Ef. 4:25; Ebr. 13:18.

6. Yinki ke kinkuti ya kisengo ya mambu ya mbote, mpe samu na yinki beto zolá lwata yawu?

⁶ Kinkuti ya kisengo ya mambu ya mbote ke misiku ya Yehova. Samu na yinki beto zolá lwata kinkuti ya kisengo? Kaka faso kinkuti ya kisengo ke bumbá ntima ya solda, kinkuti ya kisengo ya mambu ya mbote ke bumbá beto na mambu ya yimbi ya yinza yayi, samu ya bebisa ve kimuntu ya beto. (Bin. 4:23) Yehova ke vingilá ti, beto zola yandi mpe beto sadila yandi na ntima ya beto nyonso. (Mat. 22:36, 37) Na yawu, samu na kunata beto na kusadila dyaka ve Yehova na ntima ya beto nyonso, Satan ke puseke beto na kuzola bima ya yinza mpe bima yina Yehova ke yiiná. (Zaki 4:4; 1 Yoa. 2:15, 16) Si faso ya kusala yayi beto me zonzila me simba ve, Satan ke sosa kukwamisa beto samu na kunata beto na kusala mambu yina ke sepelisa ve Yehova.

7. Wa’ faso beto ke lwata kinkuti ya kisengo ya mambu ya mbote yina ke bumbá ntulu?

⁷ Beto ke lwatá kinkuti ya kisengo yayi, ntangu beto ke landá misiku ya Yehova yina ke lakisá beto yinki ke mbote mpe yinki ke yimbi, mpe ntangu beto ke sadilak’ yawu na luzingu ya beto. (Nku. 97:10) Bantu ya nkaka lendá kanisa ti misiku ya Yehova ke kangá liberte ya beto. Kasi, si beto bika kusadila misiku ya Biblia na luzingu ya beto, beto ke kuma faso solda yina me katula kinkuti ya yandi ya kisengo yina ke bumbá ntulu ya yandi na kati ya guerre, samu yandi ke na talá ti ya ke vrai kilo. Ya ke vanda vrai buzoba samu na yandi! Samu na ba yina ke zolá Yehova, misiku ya yandi “[ke] ve kilo,” kasi ya ke bumbá luzingu.—1 Yoa. 5:3; nwt-Mk.

8. Yinki zola zonza kulwata na makulu ya beto luzolo ya kuzabisa nsangu ya mbote?

⁸ Paul zonzá mpe na kulwata na makulu ya beto luzolo ya kuzabisá nsangu ya mbote ya kizunu. Ya zola zonza mpe ti ntangu nyonso yina okazion ke talaná, beto zolá preche nsangu ya mbote ya Kimfumu ya Nzambi. Ntangu beto ke zonzilá na bantu ya nkaka mambu ya Biblia, kiminu ya beto mosi ke kumá ngolo. Ya ke pesá beto kuraje na kutala faso bisadi ya Yehova ya ntoto nyonso, ke sadilá ba-okazion yina ba ke na yawu ya kupreche kote ni kote yina ba kele. Na kifwani, ba ke precheke na kisalu to na lekole, ntangu ba ke salá predikasion ya yinzo na yinzo, to na bateritware yina ke na bazandu mpe baboutik, ntangu ba ke salá bakurse, ntangu ba ke vandá na bampangi ya bawu yina ke ve batemwe to ntangu ba ke sololá na bantu yina ba zaba. Si nge bika boma nata nge na kupreche dyaka ve, nge ke vanda faso militere yina na kati  ya guerre me katula mapapa ya yandi. Ya ke vanda ve mpasi na yandi na kulwala na makulu. Ya ke vanda mpe mpasi na yandi na kubumba nzutu ya yandi, si ba kwiza nwanisa yandi. Dyaka, yandi ke lenda ve kulanda misiku yina chef ya yandi me pesa yandi.

9. Samu na yinki beto zolá lwata bukliye ya nene ya kiminu?

⁹ Bukliye ya nene ya kiminu, ke kiminu yina beto ke na yawu na Yehova. Beto zaba ti yandi ke lungisa bapromese ya yandi nyonso. Kiminu yayi ke sadisa beto na ‘kufwa bafleche nyonso ya tiya ya mfumu ya yimbi.’ Samu na yinki beto zolá lwata bukliye ya nene? Samu ya ke bumbá beto na mambu ya luvunu yina ke zonzá ba-aposta, mpe ya ke salá ti beto lemba ve ntangu bantu ke seká malongi ya beto. Si beto ke ve na kiminu, beto ke vanda ve na ngolo ya kulanda misiku ya Yehova, ntangu bantu ke puseke beto na kubika kusala yawu. Kasi ntangu nyonso yina beto ke landá misiku ya Yehova na kisalu to na lekole, kiminu ya beto ke bumbá beto. (1 Pi. 3:15) Ya ke bumbá mpe beto, ntangu nyonso yina beto ke mangá kusala kisalu yina lenda futa beto mbongo mingi, kasi yina lenda bika ve beto ntangu ya kulunga samu na kusala mingi na kisalu ya Yehova. (Ebr. 13:5, 6) Mpe kiminu ya beto ke bumbá beto ntangu nyonso yina beto ke sadilá Yehova ata ba ke na kwamisá beto.—1 Tes. 2:2.

10. Yinki ke chapo ya kisengo yina ke vuukisá?

 ¹⁰ Chapo ya kisengo yina ke vuukisá ke kivuvu yina Yehova me pesa beto. Ya ke kivuvu ya kuzaba ti yandi ke pesa bima ya mbote na ba yina nyonso ke salá volonte ya yandi. Mpe ata beto kufwa, yandi ke vumbula beto na lufwa. (1 Tes. 5:8; 1 Tim. 4: 10; Tite 1:1, 2) Kaka faso chapo ya kisengo ke bumbá yintu ya solda, kivuvu ya beto ke bumbá makanisi ya beto. Na wa’ faso? Kivuvu yayi ke sadisá beto na kutala kaka bapromese ya Nzambi mpe na kubika ve bamambu ya mpasi yina beto ke na yawu kumanisa beto kilengi. Wa’ faso beto ke lwatá chapo yayi? Beto ke salá yawu ntangu beto ke kontinye kusala ti makanisi ya beto vanda faso mosi na makanisi ya Nzambi. Na kifwani, beto ke tulá konfianse ya beto, ve na mbongo to bivwama yina lenda manisa, kasi na Nzambi.—Nku. 26:2; 104:34; 1 Tim. 6:17.

11. Yinki ke épée ya kimpeve mpe samu na yinki beto ke na nsatu ya kusadila yawu?

¹¹ Épée ya kimpeve ke mambu ya Nzambi yina ke na kati ya Biblia. Épée yayi ke na ngolo ya kuzenga bamambu ya luvunu ya faso ni faso, mpe kupesa liberte na ba yina me kumá esklave ya malongi ya luvunu mpe ya bifu nyonso ya yimbi. (2 Ko. 10:4, 5; 2 Tim. 3:16, 17; Ebr. 4:12) Beto ke longoká kusadila épée ya beto Biblia na faso ya bien, lere beto ke baká ntangu ya kulongoka yawu mpe na fomasion yina beto ke zwá na organizasion ya Yehova. (2 Tim. 2:15) Na zulu ya bima yina ke sadisá beto na kunwana, Yehova ke pesá mpe beto kima ya nkaka ya ngolo yina ke bumbá beto. Wapi yina ke kima yango?

12. Yinki beto ke mpe na yawu nsatu, mpe samu na yinki?

¹² Solda yina me nwaná ba-guerre mingi me zaba ti, yandi lenda nwana ve na grupe ya basolda kaka yandi mosi mpe kuganye bawu. Yandi ke na nsatu bampangi ya yandi basolda sadisa yandi. Faso mosi mpe, beto lenda ganye ve guerre ya beto na Satan mpe ba yina ke landak’ yandi, kaka na bangolo ya beto mosi. Beto ke na nsatu bampangi ya beto sadisa beto. Yehova me pesa beto bamillion ya basolda ya nkaka yina lenda sadisa beto. Ba ke “kimvuka ya bampangi ya beto” ya ntoto nyonso.—1 Pi. 2:17.

13. Faso me zonza Baebre 10:24, 25, wa’ faso balukutakanu ke sadisá beto?

¹³ Mosi ya bafaso ya kuzwa ngolo yina beto ke na yawu nsatu, ni ya kuvandá na balukutakanu. (Tanga Baebre 10:24, 25.) Beto nyonso ke vandá ntangu ya nkaka ya kulemba. Na ntangu yina, balukutakanu lenda pesa beto ngolo. Beto ke zwá ngolo na bakomentere ya kitoko yina bampangi ke salá na ntima mosi. Badiskur na badevoir yina beto ke landá, ke salá ti beto kontinye kusadila Yehova. Mpe beto ke zwá kuraje, na masolo yina beto ke salá na bampangi ya beto avant mpe na manima ya balukutakanu. (1 Tes. 5:14) Dyaka, balukutakanu ya beto ke pesá beto ba-okazion ya kusadisa bampangi. Ya ke pesá mpe beto kilengi. (Bis. 20:35; Rom. 1:11, 12) Balukutakanu ke sadisá mpe beto na kubongisa faso ya beto ya kupreche mpe ya kulonga mambu ya Nzambi. Na kifwani, beto ke longoká faso ya bien ya kusadila mikanda, bavideo mpe bima ya nkaka yina beto ke sadilá na predikasion. Na yawu, baka ntangu ya kuprepareke na faso ya bien balukutakanu ya kimvuka. Ntangu lukutakanu ke na lutá, kuwa bien mambu ba ke na zonzá. Ntangu lukutakanu ke manisá, sadila mambu yina nge me kuwa. Si nge sala mambu nyonso yayi, nge ke kuma ‘solda ya mbote ya Kristo Yesu.’—2 Tim. 2:3.

14. Wapi bima ya nkaka yina beto ke na yawu yina ke sadisá beto?

¹⁴ Bamillion ya ba- ange mpe ke na kote ya beto samu na kusadisa beto. Kanisa kaka na yina mosi ya bawu ke na ngolo ya kusala! (Iza. 37:36) Kanisa ntangu yayi na yina grupe ya bamillion ya ba-ange lenda vanda na ngolo ya kusala. Ata muntu to ata demon lenda telama na mantwala ya kimvuka ya ba-ange ya Yehova.  Yehova ke Muntu-ya-Kulutila-Ngolo, na yawu, si yandi ke na kote ya beto, beto ke vandá ntangu nyonso na ngolo ya kulutila ba-enemi ya beto, ata ba vanda mingi. (Baz. 6:16) Ya ke vrai! Kanisa na mambu nyonso yayi ntangu nge ke vanda na boma samu na mambu yina me zonza to me sala muntu na kisalu to na lekole, ya vanda kamarade ya nge to muntu ya famiye. Kuzimbana ve, nge ke nwaná ve nge mosi. Nge ke na landá nzila ya Yehova.

15. Faso me zonza Izaya 54:15, 17, samu na yinki ata muntu lenda sala ti kisalu ya predikasion salama dyaka ve?

¹⁵ Yinza ya Satan yayi ke na barezon mingi ya kuyiina beto. Beto ke kotá ata fioti ve mambu ya politike mpe ke nwaná ve ba-guerre. Beto ke zonzilá nkumbu ya Nzambi, ke precheke ti kaka Kimfumu ya Nzambi lenda nata kizunu na ntoto mpe beto ke landá misiku ya Yehova. Beto ke lakisá na bantu ti, chef ya yinza yayi ke muntu ya luvunu mpe yandi ke fwá bantu. (Yoa. 8:44) Beto ke zonzilá mpe na bantu ti, na mwa ntangu fioti yinza yayi ya Satan ke kufwa. Satan na bantu ya yandi lenda sala ata fioti ve ti, kisalu ya predikasion salama dyaka ve. Beto ke kontinye kupesa nkembo na Yehova, na bafaso nyonso yina beto lenda sala yawu! Ata Satan ke na ngolo ya mingi, yandi me lenda ve kukanga nzila samu kisalu ya predikasion salama ve na ntoto. Mambu yayi me salama kaka samu Yehova ke bumbá beto.—Tanga Izaya 54:15, 17.

16. Wa’ faso Yehova ke bumba bisadi ya yandi na ntangu ya bampasi ya nene?

¹⁶ Yinki ke salama na bilumbu yina ke kwiza? Na ntangu ya bampasi ya nene, Yehova ke bumba beto na bafaso zole ya mbote. Ya ntete, yandi ke bumba bisadi ya yandi yina ke ya kukangama na yandi na lere yina yandi ke nata bamfumu ya yinza yayi, na kufwa Babylone ya nene yina ke mabuundu nyonso ya luvunu. (Luz. 17:16-18; 18:2, 4) Na manima, yandi ke bumba dyaka bisadi ya yandi ntangu yandi ke kufwa yinza yayi ya Satan na guerre ya Armagedon.—Luz. 7:9, 10; 16:14, 16.

17. Yinki beto ke kuzwa si beto vanda kaka ya kukangama na Yehova?

¹⁷ Si beto ke ya kukangama na Yehova, kima ni kima yina Satan ke sala beto, ke talisa beto mpasi kaka samu na ntangu fioti. Kasi, ni yandi ke kuzwa lufwa ya ntangu nyonso. (Rom. 16:20) Na yawu, lwata bima yina ke sadisá beto na kunwana, mpe kontinye kusadila yawu! Kunwana ve kaka nge mosi. Sadisa bampangi ya nge. Landa nzila yina Yehova ke na lakisá nge. Si nge sala yawu, nge lenda ndima ti Papa ya nge ya zulu Yehova, ke pesa nge ngolo mpe ke bumba nge.—Iza. 41:10.