1-2. Bambala mingi, yinki ke salamá ntangu bantu ke kuzwá mbotokolo, mpe yinki beto ke zonzila na disolo yayi?

 NTANGU ya nkaka, ya me kuminá nge na kutala bantu yina ke na zwá mbotokolo. Nge kuwá ntangu ba pesá na ngolo nyonso bamvutu na byuvu zole yina ba yufulak’ bawu tekila ba kuzwa mbotokolo. Bantu ya makanda ya bawu mpe bandiku ya bawu vandá na kilengi. Ntangu ba basiká na maza, nge talá kilengi yina vandá ngenga na bizizi ya bawu, mpe nge kuwá bantu kubula maboko. Balumingu nyonso, bantu mingi ke pesá luzingu ya bawu na Yehova mpe ke kuzwá mbotokolo samu na kukuma Bambangi ya Yehova.

² Nge me kuzwá mbotokolo, to nge ke na kanisá na kuzwa yawu? Kana nge ke na kanisá na yawu, zaba ti nge ke muntu ya ntalu mingi na yinza yayi, samu ti nge ke ‘sosaka Yehova.’ (Nku. 14:1, 2) Nge vanda ntwenya to ya kukula, disolo yayi ke samu na nge. Kasi ata ba yina kuzwá mbotokolo lenda kumisa dyaka ngolo nsatu ya bawu ya kusadila Yehova samu na ntangu nyonso. Na disolo yayi, beto ke zonzila mwa bamambu tatu yina ke natá beto na kusadila Yehova.

3. Samu na yinki bisadi ya Yehova ke zolá matsyeleka mpe lunungu? (Nkunga 119:128, 163)

³ Yehova zonzá na bisadi ya yandi na ‘kuzola matsyeleka.’ (Zak. 8:19) Yesu zonzá na bilandi ya yandi na kulanda lunungu. (Mat. 5:6) Ya zola zonza ti beto me bonga kuvanda na nsatu ya ngolo ya kusala mambu ya lunungu mpe ya mbote na meso ya Yehova. Nge ke zolá kwandi matsyeleka mpe lunungu? Ntembe ve, nge ke zolak’ yawu. Nge ke yiná luvunu mpe mambu nyonso yina ke ya kutengama mpe ya yimbi. (Tanga Nkunga 119:128, 163.) Muntu yina ke vuná ke landá kifwani ya Satana, mfumu ya yinza yayi.  (Yoa. 8:44; 12:31) Satana ke sosá ntangu nyonso kubebisa nkumbu ya santu ya Yehova. Banda ntangu yina bantu balukilá Yehova na Edeni, Satana ke mwangisá mambu ya luvunu na nkumbu ya Nzambi ya beto. Yandi ke sosá kunata bantu na kutala ti Yehova ke na munimi mpe yandi ke Mfumu ya yimbi, yina ke niminá bantu bima ya mbote. (Kub. 3:1, 4, 5) Bamambu nyonso ya luvunu yina Satana ke zonzá na nkumbu ya Yehova me sala ti bantu tala Yehova mutindu muntu ya yimbi. Ntangu bantu ke soolá ve na ‘kuzola matsyeleka,’ Satana lenda nata bawu na kusala bamambu ya yimbi mpe ya nganzi.​—Rom. 1:25-31.

4. Wa’ faso Yehova me lakisa ti yandi ke ‘Nzambi ya matsyeleka’? (Tala mpe kizizi.)

⁴ Yehova ke ‘Nzambi ya matsyeleka,’ mpe yandi ke zolá kulonga matsyeleka na bantu yina ke zolak’ yandi. (Nku. 31:5) Na kusalá mutindu yayi, yandi ke sadisá bawu na kubasika na luvunu ya Satana. Yehova ke longá mpe bisadi ya yandi na kuvanda bantu ya kusungama, mpe yina ke zonzá matsyeleka. Ya ke sadisá bawu na kupesa nzutu ya bawu buzitu, mpe na kuvanda na kizunu na ntima. (Bin. 13:5, 6) Ntangu ya nkaka, Yehova salak’ yawu samu na nge ntangu nge vandá longoka Biblia. Nge longoká ti banzila ya Yehova ke kaka mbote samu na bantu nyonso mpe samu na nge. (Nku. 77:13) Na yawu, nge ke na nsatu ya kusala bamambu yina ke mbote na meso ya Nzambi. (Mat. 6:33) Nge zola kusadisa bantu na kuzaba matsyeleka mpe kulakisa ti mambu yina Satana zonzá na nkumbu ya Yehova, Nzambi ya beto, ke kaka luvunu. Wa’ faso nge lenda sala yawu?

5. Wa’ faso nge lenda lakisa ti nge ke zolá matsyeleka mpe lunungu?

⁵ Nge lenda nata luzingu ya nge na mutindu yina ke lakisa na bantu nyonso ti nge me manga luvunu ya Satana, mpe nge me ndima matsyeleka. Nge zola kulakisa ti Yehova ke Mfumu ya nge, mpe nge zola kusala bamambu yina ke mbote na meso ya yandi. Wa’ faso nge lenda sala yawu? Na lusambu, nge lenda sala nsilulu na Yehova ti nge ke sadila yandi ntangu nyonso. Mpe na manima, nge lenda kuzwa mbotokolo. Ntangu muntu ke zolá matsyeleka mpe lunungu, ya ke natak’ yandi na kuzwa mbotokolo.

6. Na Nkunga 45:4, wapi yina ke mwa bamambu yina ke salá ti beto zola Yesu Kristo?

⁶ Samu na yinki nge ke zolá Yesu Kristo? Nkunga 45:4 ke zonzilá mwa bamambu yina ke salá ti beto zola Yesu. (Tanga.) Yesu ke zolá matsyeleka, kukuluka mpe lunungu. Kana nge ke  zolá matsyeleka mpe lunungu, nge ke zola mpe Yesu Kristo. Kanisa na mutindu Yesu nwaniná matsyeleka mpe lunungu, na bukindi nyonso. (Yoa. 18:37) Kasi, wa’ faso yandi ke longá beto kukuluka?

7. Yinki nge ke zolá na yina me tadila kukuluka ya Yesu?

⁷ Yesu ke longá beto kukuluka na nzila ya kifwani ya yandi. Na kifwani, yandi vandá ndimá ve bantu kembila yandi, kasi ba kembila Tata ya yandi. (Mrk. 10:17, 18; Yoa. 5:19) Yinki ya ke salá nge ntangu nge ke talá mutindu yandi lakisá kukuluka? Ntembe ve, ya ke natá nge na kuzola Mwana ya Nzambi mpe na kulanda kifwani ya yandi. Samu na yinki Yesu ke ya kukuluka? Samu yandi ke zolá Tata ya yandi yina ke ya kukuluka, mpe yandi ke landá kifwani ya yandi. (Nku. 18:35; Ebr. 1:3) Yesu ke landá na faso ya kulunga bifu ya Yehova. Ntembe ve, mambu yayi ke natá nge na kuzola Yesu.

8. Samu na yinki beto ke na kilengi na kuvanda na Mfumu mutindu Yesu?

⁸ Yesu ke Mfumu ya kulunga. Ni yawu ke salá ti beto zola yandi vanda Mfumu ya beto. Yehova yandi mosi longá Mwana ya yandi, mpe yandi tulak’ yandi mutindu Mfumu. (Iza. 50:4, 5) Kanisa mpe na luzolo yina Yesu lakisá mpe mutindu yandi tulá bansatu ya bampangi na mantwala ya bansatu ya yandi mosi. (Yoa. 13:1) Samu ti Yesu ke Mfumu ya nge, nge me bonga kuzola yandi mingi. Yandi zonzá ti ba yina ke zolak’ yandi ke bandiku ya yandi, mpe ba ke lakisá luzolo ya bawu na kutumamá na misiku ya yandi. (Yoa. 14:15; 15:14, 15) Ntembe ve, ya ke bweso ya nene na kuvanda ndiku ya Mwana ya Nzambi.

9. Na wapi mutindu mbotokolo ya Bakristo ke faso mosi na ya Yesu?

⁹ Mosi ya misiku yina Yesu pesá ke ti bilandi ya yandi me fwana kuzwa mbotokolo. (Mat. 28:19, 20) Yandi mosi mpe kuzwá mbotokolo. Ya ke na bamambu yina ke salá ti mbotokolo ya Yesu vanda ve faso mosi na mbotokolo ya bilandi ya yandi. (Tala encadré “ Bamambu yina ke salá ti mbotokolo ya Yesu vanda ve faso mosi na mbotokolo ya bilandi ya yandi.”) Kasi na bamambu ya nkaka, ya ke faso mosi. Ntangu Yesu kuzwá mbotokolo, yandi kwizá na mantwala ya Tata ya yandi samu na kusala luzolo ya yandi. (Ebr. 10:7) Mutindu mosi mpe, bilandi ya Yesu ke kuzwá mbotokolo samu na kulakisa ti ba me pesa luzingu ya bawu na Nzambi. Banda ntangu yina, ba ke salá dyaka ve luzolo ya bawu mosi. Ni luzolo ya Yehova ke kumá kima ya kulutila mfunu na luzingu ya bawu. Na kusalak’ yawu, ba ke landá kifwani ya Mfumu ya bawu, Yesu.

10. Samu na yinki luzolo samu na Yesu zolá nata nge na kuzwa mbotokolo?

¹⁰ Ntembe ve, nge ke ndimá ti Yesu ke Mwana ya Nzambi kaka mosi, mpe nge ke na kilengi na yina Yehova me tula yandi mutindu Mfumu ya beto. Nge zaba ti Yesu ke ya kukuluka mpe yandi ke landá na faso ya kulunga bifu ya Tata ya yandi. Nge me longoka ti yandi dikisá ba yina vandá na nsatu, yandi kindisá ba yina vandá ya kulemba, mpe yandi belusá ba yina vandá beela. (Mat. 14:14-21) Nge me tala mutindu yandi ke na twadisá kimvuka ya bakristo bubu yayi. (Mat. 23:10) Mpe nge zaba ti Kimfumu ya yandi ke sala dyaka bamambu ya kulutila mbote na bilumbu yina ke kwiza. Wa’ faso nge lenda lakisa ti nge ke zolá Yesu? Nge lenda landa kifwani ya yandi. (Yoa. 14:21) Na kubanda, nge lenda kukipesa na Yehova mpe kuzwa mbotokolo.

11. Wapi yina ke mambu ya kulutila mfunu yina zolá nata nge na kuzwa mbotokolo, mpe samu na yinki?

¹¹ Wapi yina ke kima ya ntete yina fwana kunata nge na kuzwa mbotokolo? Yesu lakisá wapi yina ke musiku ya kulutila mfunu ntangu yandi zonzaka: ‘Nge fwana kuzola Mfumu Nzambi ya nge na ntima ya nge nyonso, na mwela ya nge nyonso, na mayela ya nge nyonso, mpe na ngolo ya nge nyonso.’ (Mrk. 12:30) Luzolo ya nge samu na Yehova ke kwandi faso verse yayi ke zonzaka?

12. Samu na yinki nge ke zolá Yehova? (Tala mpe kizizi.)

 ¹² Ya ke na bamambu mingi yina ke salá ti beto zola Yehova. Na kifwani, nge me kwiza zaba ti yandi ke ‘mukelo ya luzingu’ mpe “makabu nyonso ya kulutila mbote” ke katuká na yandi. (Nku. 36:9; Zaki 1:17) Bima nyonso ya mbote yina nge ke na yawu ke katuká na Nzambi ya beto ya luzolo.

13. Samu na yinki munkayulu ya Yesu ke dikabu ya kitoko mingi?

¹³ Yehova pesá beto dikabu ya kitoko mingi, munkayulu ya Mwana ya yandi Yesu. Samu na yinki dikabu yayi ke kitoko mingi? Kanisa na kindiku ya ngolo yina Yehova na Yesu ke na yawu. Yesu zonzaka: “Tata ke zolaka munu.” Yandi zonzá mpe: “Mu ke zolaka Tata.” (Yoa. 10:17; 14:31) Na kati ya ba milliards ya bamvula yina ba lutisá kintwadi, kindiku ya bawu kumá dyaka ngolo ya kulutila. (Bin. 8:22, 23, 30) Kanisa na mpasi yina ya salá Yehova ntangu yandi biká Mwana ya yandi tala mpasi mpe kufwa. Yehova ke zolá mingi bantu, nge mpe na kati. Ni na yawu yandi ndimá kupesa Mwana ya yandi yina yandi ke zolá mingi, mutindu munkayulu samu nge mpe bantu ya nkaka kuzwa luzingu ya ntangu nyonso. (Yoa. 3:16; Gal. 2:20) Yayi ke mambu ya kulutila mfunu yina ke natá beto na kuzola Yehova.

14. Wapi yina ke mambu ya kulutila mfunu yina nge lenda soola kusala na luzingu ya nge?

¹⁴ Luzolo ya nge samu na Yehova me kula samu nge me longoka bamambu mingi na yina me  tadila yandi. Ntembe ve, nge zola kukulisa kindiku ya nge na yandi. Nge lenda sala yawu. Na luzolo nyonso, Yehova ke zonzá na nge na kusepelisa ntima ya yandi. (Bin. 23:15, 16) Nge lenda sala yawu na bamambu yina nge ke zonzá, kasi mpe na yina nge ke salaka. Mutindu ya kunata luzingu ya nge ke lakisa ti ya tsyeleka nge ke zolá Yehova. (1 Yoa. 5:3) Mambu ya kulutila mfunu yina nge lenda sala, ni kusoola kunata luzingu ya nge na mutindu yina ke sepelisa Yehova.

15. Wa’ faso nge lenda lakisa ti nge ke zolá Yehova?

¹⁵ Wa’ faso nge lenda lakisa ti nge ke zolá Yehova? Nge lenda sala lusambu samu na kukipesa na yandi. Lusambu yayi ke ve faso balusambu ya nkaka. (Nku. 40:8) Na manima, nge lenda kuzwa mbotokolo samu na kulakisa na mantwala ya bantu ti nge me pesa luzingu ya nge na Yehova. Mutindu beto me zonzila yawu, mbotokolo ke mambu ya kilengi mpe ya mfunu mingi na luzingu ya nge. Ya ke lakisa ti nge me banda luzingu ya malu-malu. Nge ke zinga dyaka ve samu na nge mosi, kasi samu na Yehova. (Rom. 14:8; 1 Pi. 4:1, 2) Ya ke ve mukanu ya pete, kasi ya ke fungula nge nzila ya luzingu ya kulutila kitoko. Wa’ faso?

16. Mutindu Nkunga 41:12 ke lakisak’ yawu, yinki Yehova ke sala na ba yina ke pesa luzingu ya bawu samu na kusadila yandi?

¹⁶ Ya ke ve na muntu yina ke kabulá kulutila Yehova. Kima ni kima yina nge lenda pesa yandi, yandi ke vutula nge yawu ya kulutila. (Mrk. 10:29, 30) Kana nge sadila luzingu ya nge na kisalu ya Yehova, yandi ke pesa nge luzingu ya kulutila mbote mpe kitoko yina muntu lenda kuzwa na yinza yayi. Mpe yayi ke vanda kaka kubanda ya luzingu yayi. Nzila yina nge ke banda kulanda ntangu nge ke kuzwa mbotokolo ke ve na nsuka. Nge lenda sadila Tata ya nge ya luzolo samu na ntangu nyonso. Luzolo yina ke na kati ya beno ke bika ve kukula. Mpe mutindu yandi, nge ke zinga ntangu nyonso.​—Tanga Nkunga 41:12.

17. Wapi kima nge lenda pesa na Yehova yina yandi ke ntete ve na yawu?

¹⁷ Kana nge pesa luzingu ya nge na Yehova mpe nge kuzwa mbotokolo, nge ke vanda na bweso ya kupesa na Tata ya nge kima yina ke mfunu mingi na meso ya yandi. Yandi me pesa nge bima nyonso ya mbote, mpe bantangu nyonso ya kilengi yina nge me kuzwa na luzingu ya nge. Yehova ke  muntu ya kuzwa zulu mpe ntoto. Kasi nge lenda pesa yandi kima yina yandi ke ntete ve na yawu: luzingu ya nge nyonso na kisalu ya yandi. (Yobi 1:8; 41:11; Bin. 27:11) Yayi ke mutindu ya kulutila mbote yina nge lenda sadila luzingu ya nge. Ntembe ve, luzolo yina nge ke na yawu samu na Yehova ke mambu ya kulutila mfunu yina lenda nata nge na kuzwa mbotokolo.

18. Wapi byuvu nge lenda yufula?

¹⁸ Na manima ya kuwa mambu nyonso yayi, nge me kanisa yinki: nge ke zwa mbotokolo? Kaka ni nge lenda pesa mvutu na kyuvu yayi. Kasi ya ke mbote nge kanisa kana nge ke kwandi ya kubongama na kuzwa mbotokolo. (Bis. 8:36) Kanisa dyaka na bamambu tatu yina beto me zonzila. Ya ntete, nge ke zolá matsyeleka mpe lunungu. Nge lenda yufula: ‘Mu ke kwandi na nsatu ya kuvanda ntangu yina bantu nyonso ke zonza matsyeleka mpe ke zola lunungu?’ Ya zole, nge ke zolá Yesu Kristo. Nge lenda yufula: ‘Mu zola kwandi ti Mwana ya Nzambi vanda Mfumu ya munu, mpe mu zola kwandi kulanda kifwani ya yandi?’ Ya tatu, yina me lutila mfunu, nge ke zolá Yehova. Nge lenda yufula: ‘Mu zola kwandi kusepelisa ntima ya Yehova mpe kusadila yandi mutindu Nzambi ya munu?’ Kana bamvutu ya nge na byuvu yayi kele ee, nge me kanisa yinki na kuzwa mbotokolo?​—Bis. 16:33.

19. Samu na yinki nge me bonga ve kuvanda na boma ya kuzwa mbotokolo? Pesa kifwani. (Yoane 4:34)

¹⁹ Kana ya ke na kima yina ke na kangá nge nzila na kuzwa mbotokolo, tala kifwani yina Yesu pesaka. (Tanga Yoane 4:34.) Samu na Yesu, kusadila Tata ya yandi vandá mutindu madya. Samu na yinki? Madya ke mbote samu na beto. Yesu zabá ti bamambu nyonso yina Yehova ke lombá na beto na kusala ke mbote samu na beto. Yehova lenda lomba ve na beto na kusala mambu yina lenda talisa beto mpasi. Yehova zola kwandi ti nge kuzwa mbotokolo? Ee. (Bis. 2:38) Nge lenda vanda na kundima ti kutumama na musiku ya kuzwa mbotokolo ke natina nge bambote. Kana nge ke ve na boma ya kudya madya ya kulutila kitoko, samu na yinki nge ke vanda na boma ya kuzwa mbotokolo?

20. Yinki beto ke zonzila na disolo yina ke landa?

²⁰ Samu na yinki bantu ya nkaka ke vingilá na kuzwa mbotokolo? Mingi ke zonzá ti ba ke ntete ve ya kubongama. Ntembe ve, mukanu ya kukipesa na Yehova mpe kuzwa mbotokolo, ke mukanu ya kulutila mfunu yina nge lenda baka. Ya ke lombá ntangu na kukanisa na yawu, mpe bangolo na kubongama samu na kuzwa yawu. Kana nge ke na nsatu mingi ya kuzwa mbotokolo, yinki nge lenda sala samu na kubongama? Beto ke kuzwa mvutu na kyuvu yayi na disolo yina ke landa.