1. Yinki Yesu zonzá na badisiple ya yandi na kusala na Matayi 28:18-20?

NA MANIMA ya kuvumbuka ya yandi na lufwa, Yesu talaná na badisiple ya yandi yina vukaná na Galile. Yandi vandá na mambu ya important ya kuzonzila bawu. Yinki ya vandá? Mambu yango ke na Matayi 28:18-20.—Tanga.

2. Na wapi bakestion beto ke kuzwa bareponse na artikle yayi?

² Musiku ya Yesu ya kusala badisiple ke responsabilite ya mosi na mosi ya bisadi ya Nzambi bubu yayi. Na yawu, responsabilite yayi Yesu pesá beto, ke na nata beto na kuyufula bakestion tatu. Ya ntete, apart kulonga bantu yina ke longoká na beto mambu ya Nzambi, yinki beto me lunga kusala dyaka? Ya zole, wa’ faso baproklamatere nyonso ya kimvuka lenda tula diboko samu na kusadisa muntu yina ke longoká Biblia na kukula na kimpeve? Ya tatu, wa’ faso beto lenda sadisa bampangi ya beto ya kento na ya bakala yina ke precheke dyaka ve na kubandila dyaka kusala badisiple?

3. Wapi mambu ya important Yesu zonzá na kati ya musiku ya yandi?

³ Misiku ya Yesu ke ve mpasi. Beto me lunga kulonga bantu mambu yina Yesu zonzaka. Kasi, beto zola zimbana ve mambu mosi ya important. Yesu zonzá ve: ‘Beno longa bawu mambu nyonso yina mu longá beno.’ Kasi, yandi zonzá: ‘Beno longa bawu na kusadila mambu nyonso yina mu longá beno.’ Na kulanda musiku ya Yesu yayi, beto zola nsuka ve kaka na kulonga  bantu, kasi beto zola lakisa mpe bawu faso ya kusadila mambu yina ba me longoka. (Bis. 8:31) Samu na yinki ya ke mbote na kusala yawu?

4. Yinki zola zonza kusadila musiku? Pesa ekzample.

⁴ ‘Kusadila’ musiku zola zonza kulanda yawu. Wa’ faso beto lenda sadisa muntu na kulanda mambu yina Yesu zonzá? Ekzample yayi ke sadisa beto na kuzaba yinki ya kusala. Wa’ faso muntu yina ke longá muntu ya nkaka faso ya kunata kamion, lenda sadisa yandi na kusadila code de la route (misiku yina ke sadisá bachofere na kunata na faso ya mbote)? Kima ya ntete yina profesere ya auto-école ke salá, ni kulonga ba yina ke na longoká, code de la route. Kasi, na kusadisa bawu na kusadila misiku yayi, yandi ke sala kima ya nkaka. Yandi ke kwenda na bawu na nzila, mpe ke tala faso ba ke na nata kamion. Mpe na ntangu yina ba ke na nata, yandi ke pesa bawu bakonseye na faso ya kusadila mambu yina ba longoká. Yinki beto lenda longoka na ekzample yayi?

5. a) Faso me zonza Yoane 14:15 mpe 1 Yoane 2:3, yinki beto zola longa na ba yina ke longoká na beto na kusala? b) Pesa ekzample ya bakonseye yina beto lenda pesa na ba yina ke longoká na beto.

⁵ Ntangu beto ke longá Biblia na bantu ya nkaka, beto ke longá bawu mambu yina Nzambi zola ba sala. Kasi beto zola nsuka ve kuna. Beto me lunga kulonga ba yina ke longoká na beto, faso ya kusadila mambu ya Biblia na luzingu ya bawu. (Tanga Yoane 14:15; 1 Yoane 2:3.) Na faso ya beto ya kusala bamambu, beto lenda lakisa bawu faso ya kusadila mambu yina Biblia ke zonzá, na lekole, na kisalu mpe na ntangu yina ba ke sakaná. Nge lenda zonzila bawu disolo ya luzingu ya nge yina ke na lakisá ti, kusadila misiku ya Biblia, bumbá nge na mambu ya yimbi to ya sadisá nge na kubaka badesizion ya mbote. Ntangu nge na sambilá na muntu yina ke longoká na nge, lomba na Yehova pesa yandi mpeve ya santu, samu ya sadisa yandi.—Yoa. 16:13.

6. Yinki beto lenda sala dyaka ntangu beto ke longá bantu na kusadila misiku ya Yesu?

⁶ Yinki beto lenda sala ntangu beto ke longá bantu na kusadila misiku ya Yesu? Beto zola sadisa bawu na kukulisa nsatu ya kulonga mambu ya Nzambi na bantu ya nkaka, samu ti ba lenda vanda na boma ya kusala yawu. Na yawu, beto me lunga kuvanda na ntima ya yinda ntangu beto ke na longá bawu mambu ya Biblia yina ke sadisa bawu na kuvanda na kiminu ya ngolo. Si beto sala yawu, beto ke simba bantima ya bawu, mpe beto ke nata bawu na kupreche. Wapi bametode ya nkaka beto lenda sadila samu na kukulisa nsatu ya bawu ya kupreche?

7. Wapi bametode beto lenda sadila samu na kukulisa nsatu ya muntu yina ke longoká na beto ya kupreche?

⁷ Beto lenda yufula na muntu yina ke longoká na beto bakestion yayi: “Wa’ faso mambu ya Biblia me bongisa luzingu ya nge? Nge me kanisa ti bantu ya nkaka mpe ke na nsatu ya kuzaba mambu ya Nzambi? Yinki nge lenda sala samu na kusadisa bawu?” (Bin. 3:27; Mat. 9:37, 38) Lakisa yandi batrakte yina beto ke sadilá na predikasion. Mpe bika yandi sola trakte yina yandi ke na tala ti, ya lenda sadisa bakamarade ya yandi, bampangi ya yandi ya kisalu to bantu ya famiye ya yandi. * Nge lenda pesa yandi mwa mingi. Sala mwa ekzersise na yandi samu yandi zaba faso ya mbote ya kupesa yawu. Ya vrai, ntangu yandi ke kuma proklamatere, nge ke vanda na kilengi ya kupreche na yandi mpe ya kulakisa yandi faso ya kusala.—Lon. 4:9, 10; Luke 6:40.

8. Samu na yinki ya ke mbote na bantu yina ke longoká Biblia na kukulisa luzolo ya bawu samu na Nzambi mpe samu na bantu ya nkaka? (Tala mpe tablo “ Faso ya kukulisa luzolo samu na Nzambi na bantima ya bawu.”)

⁸ Kuzimbana ve ti, Yesu pesa beto musiku ya kulonga bantu ‘na kusadila mambu nyonso’ yina yandi zonzá. Misiku zola ya nene ke ya kukangama na musiku yayi: Kuzola Nzambi mpe kuzola bantu ya nkaka. Na kusala na faso ya bien kisalu ya Predikasion mpe ya kulonga bantu, beto me lunga kuvanda na luzolo samu na Nzambi mpe samu na bantu ya nkaka. (Mat. 22:37-39) Yinki me lakisa yawu? Rezon ya ntete yina ke natá muntu na kupreche ni luzolo: Luzolo samu na Nzambi mpe samu na bantu ya nkaka. Dikanisi ya kupreche, lenda pesa boma na ba yina ke longoká Biblia. Kasi beto zola zonza na bawu ti, Yehova ke sadisa bawu na kukatula fioti-fioti boma ya bantu. (Nku. 18:1-3; Bin. 29:25) Tablo ya artikle yayi, ke na lakisá faso beto lenda sadisa muntu yina ke longoká na beto na kukulisa luzolo ya yandi samu na Nzambi. Dyaka, wa’ faso kimvuka lenda sadisa muntu yina ke longoká Biblia na kukula na kimpeve?

9. Wa’ faso muntu yina ke longoká kunata ke zwá baleson yina lenda sadisa yandi?

⁹ Beto kanisa dyaka na ekzample ya muntu yina ke na longoká kunata. Ntangu yandi ke na nata, profesere ke na kote ya yandi. Wapi malongi yandi ke na zwá? Yandi ke na wá bakonseye ya profesere ya yandi mpe ke na talá faso bachofere ya nkaka ke na nataka. Na kifwani, yandi lenda tala profesere ya yandi na ntima ya mbote nyonso, kubika chofere ya nkaka kuluta na mantwala ya bawu, samu yandi kota na mulonga ya bakamion. To na mpimpa, profesere lenda lakisa yandi chofere yina me diminye ba-lumiere ya yandi, samu bachofere yina ke na kwizá na mantwala ya yandi bika kutala meso mpasi. Ba-ekzample nyonso yayi ke sadisa muntu yina ke na longoká kunata, ntangu yandi ke zaba kunata.

10. Yinki ke sadisa muntu yina ke longoká Biblia na kukula na kimpeve?

¹⁰ Faso mosi mpe, muntu yina ke longoká Biblia, yina me banda kusadila Yehova, lenda longoka kaka ve na kisika ya muntu yina ke longá yandi Biblia. Kasi, yandi lenda longoka mpe na kisika ya bisadi ya nkaka ya Yehova. Na yawu, wapi kima ya mbote lenda sadisa yandi na kukula na kimpeve? Ya ke balukutakanu. Samu na yinki? Mambu yina yandi ke kuwa na balukutakanu, ke sadisa yandi na kuzaba dyaka mambu mingi ya Biblia, ke kumisa kiminu yandi ngolo, mpe ke sadisa yandi na kuzolo dyaka ya kulutila Nzambi. (Bis. 15:30-32) Dyaka, na balukutakanu, proklamatere yina ke longoká na yandi, lenda lakisa yandi na bampangi ya kento na ya bakala, yina ke na bwabana na bamambu mosi na yandi. Yandi ke tala ekzample ya mbote ya bampangi yina ke na lakisá luzolo na kati ya kimvuka. Beto zonzila ba-ekzample ya nkaka.

11. Wapi ba-ekzample ya mbote muntu yina ke longoká Biblia lenda tala na kati ya kimvuka, mpe wa’ faso ya lenda sadisa yandi?

¹¹ Na balukutakanu, muntu yina ke longoká Biblia yina ke selibatere na babana, lenda tala mpangi mosi ya kento yina ke na situasion mosi na yandi. Kutala faso mpangi ya kento yayi ke na salá bangolo na kunata bana ya yandi na balukutakanu, lenda simbá ntima ya muntu yina ke longoká Biblia. Muntu ya nkaka yina ke longoká Biblia yina ke na nwaná na kubika sigarete, lenda kuzwa ngolo na kuwa ekzample ya mpangi yina vandá na kifu yayi mpe biká yawu. Mpangi yina lenda zonza na muntu yayi, faso luzolo ya yandi samu na Yehova, natak’ yandi na kubika sigarete. (2 Ko. 7:1; Flp. 4:13) Na manima ya kuzonzila na muntu yina ke longoká Biblia faso yandi biká sigarete, mpangi yayi lenda zonza na yandi:  “Nge mpe, nge lenda bika yawu.” Ya ke pesa yandi ngolo. Mwana ya kento mosi yina ke longoká Biblia, ke na talá na balukutakanu, mpangi ya kento ya jeune faso yandi, ke na sepela na kusadila Yehova. Kilengi yina mpangi ya kento yayi ke na lakisá, lenda nata muntu yina ke longoká Biblia na kusosa kuvanda faso yandi.

12. Samu na yinki beto lenda zonza ti mosi na mosi ya beto na kati ya kimvuka me lunga kusadisa muntu yina ke longoká Biblia?

¹² Ntangu muntu yina ke longoká Biblia ke zaba ekzample ya mbote ya bampangi ya nkaka, yandi ke longoka faso ya kusadila musiku ya Yesu ya kuzolo Nzambi mpe bantu ya nkaka. (Yoa. 13:35; 1 Tim. 4:12) Faso beto me zonza yawu, yandi lenda longoka na baproklamatere yina bwabaná na bamambu faso yandi, faso ya kunwana na bamambu yango. Na yawu, ya ke vanda ve mpasi na yandi na kusala bachanjema samu na kukuma disiple ya Yesu. (Kul. 30:11) Mosi na mosi ya beto na kati ya kimvuka, lenda tula diboko samu na kusadisa muntu yina ke longoká Biblia na kukula na kimpeve. (Mat. 5:16) Yinki nge lenda sala na kupesa bawu ngolo ntangu ba ke kwizá na balukutakanu?

13-14. Wa’ faso Yesu bakilá ba-apotre ya yandi ntangu ba vandá ya kulemba?

¹³ Beto ke na nsatu ya kusadisa bampangi ya beto ya kento na bakala yina me kotá madidi, na kuvutukila kisalu ya predikasion. Faso Yesu bakilá ba-apotre ya yandi ntangu ba vandá ya kulemba, ke na lakisá beto faso ya kusala.

¹⁴ Na mpimpa ntangu ba kwizá kanga Yesu samu na kwenda kufwa yandi, ba-apotre ya yandi ‘kimak’ yandi.’ (Mrk. 14:50; Yoa. 16:32) Wa’ faso Yesu bakilá ba-apotre ya yandi ntangu ba vandá ya kulemba na kimpeve? Mwa ntangu fioti ntangu ba vumbulá yandi na lufwa, Yesu zonzá na ndambu ya bawu: “Beno vanda ve na boma! Beno kwenda [zonza] na bampangi ya munu [ti mu me vumbuka na lufwa].” (Mat. 28:10a) Yesu mangá ve ba-apotre ya yandi. Ata ba kimak’ yandi, yandi kontinyeke na kubokila bawu “bampangi ya munu.” Faso Yehova, Yesu vandá na ntima ya mbote mpe yina ke lemvokilá bampangi.—2 Mf. 13:23.

15. Yinki nge ke kanisá samu na ba yina me biká kisalu ya predikasion?

¹⁵ Faso mosi mpe, beto ke na kyadi ya bampangi ya beto nyonso yina ke salá dyaka ve kisalu ya predikasion. Ba ke kaka bampangi ya beto, mpe beto ke zolá bawu! Ata bubu yayi ba me kotá madidi, beto lenda zimbana ve kisalu nyonso ya mbote yina ba salá samu na Yehova. (Ebr. 6:10) Beto zola ba vutukila beto! (Luke 15:4-7) Faso Yesu, wa’ faso beto lenda lakisa ti beto ke kipeke bawu?

16. Wa’ faso beto lenda lakisa ti beto ke talá kyadi ya bampangi ya beto yina me kotá madidi?

¹⁶ Bokila bawu na balukutakanu. Mosi ya bafaso yina Yesu sadilá samu na kupesa ba-apotre ya yandi yina vandá ya kulemba ngolo, ni ya kubokila bawu na lukutakanu. (Mat. 28:10b; 1 Ko. 15:6) Faso mosi mpe bubu yayi, beto lenda bokila ba yina me kotá madidi na balukutakanu, si ba ke salá dyaka ve yawu. Beto zaba ti, ntangu ya nkaka samu ba ndima invitasion ya beto, beto me lunga kubokila bawu bambala mingi. Yesu zabá na ntima ya yandi ti, badisiple ya yandi ke ndima invitasion ya yandi.—Tala Matayi 28:16 na Luke 15:6.

17. Yinki beto me lunga kusala ntangu mpangi yina me kotá madidi me kwiza na balukutakanu?

¹⁷ Yamba bawu na maboko ya kufunguka. Yesu yambá badisiple ya yandi ntangu yandi talaná na bawu. Ni yandi bandá kuzonzisa bawu. (Mat. 28:18) Yinki beto me lunga kusala ntangu mpangi yina me kotá madidi me kwiza na balukutakanu? Beto me lunga kuyamba yandi mpe kuzonzisa yandi. Ntangu ya nkaka, beto lenda zaba ve yinki ya kuzonza na yandi. Kasi  samu na kutula yandi aleze, beto lenda zabisa yandi ti beto ke na kilengi ya kutala yandi.

18. Wa’ faso beto lenda pesa ngolo na proklamatere yina me kotá madidi?

¹⁸ Pesa bawu ngolo. Ntangu ya nkaka, badisiple ya Yesu vandá tala ti, ya ke vanda mpasi na bawu na kupreche na yinza nyonso. Yesu pesá bawu ngolo ntangu yandi zonzá: “Mu ke vanda na beno bilumbu nyonso.” (Mat. 28:20) Mambu yayi Yesu zonzá pesá kwandi bawu ngolo? Ee, ya pesá. Samu ti ba bandá kulutisa ntangu ya bawu nyonso “na [kulonga] mpe kumwangisa nsangu ya mbote.” (Bis. 5:42) Bampangi ya beto yina me kotá madidi, bawu mpe ke na nsatu beto pesa bawu ngolo. Ba lenda vanda na boma ya kubandila dyaka kupreche. Beto lenda zonza na bawu ti, ba ke preche ve kaka bawu mosi. Ntangu ba ke kuma na nsatu ya kubasika na predikasion, beto lenda kwenda na bawu. Ba ke sepela beto sadisa bawu. Si beto tala ba yina me kotá madidi faso bampangi ya beto, ya ke natina bambote mingi na kimvuka ya beto.

19. Wapi mambu beto ke na nsatu ya kusala, mpe samu na yinki?

¹⁹ Beto ke kontinye kusala kisalu ya beto ya kulonga bantu tii wapi ntangu? Tii ntangu yinza yayi ke kufwa. (Mat. 28:20) Beto ke lenda kwandi kupreche mpe kulonga bantu tii ntangu yina? Desizion ya beto ke ya kusala yawu! Na kilengi nyonso, beto ke pesá ntangu ya beto, ngolo ya beto mpe mbongo ya beto samu na kusosa ‘ba yina ke na ntima ya mbote samu na kuzwa luzingu ya ntangu nyonso.’ (Bis. 13:48) Ntangu beto ke salak’ yawu, beto ke landá ekzample ya Yesu. Yandi zonzá: “Madya ya munu ni kusala luzolo ya [muntu] yina [filisá] munu mpe [kumanisa] kisalu ya yandi.” (Yoa. 4:34; 17:4) Ni mambu yayi mpe beto zola sala. Beto ke na nsatu ya kumanisa kisalu yina Yesu pesá beto. (Yoa. 20:21) Beto zola mpe ti ba ya nkaka, na ba yina me kotá madidi, kontinye kusala kisalu yayi faso beto.—Mat. 24:13.

20. Faso Bafilipi 4:13 me zonza yawu, samu na yinki beto ke lenda kusala kisalu Yesu pesá beto?

²⁰ Kisalu Yesu pesá beto, ke ve kisalu ya fioti. Kasi, beto ke ve kaka beto mosi na kisalu yayi. Samu Yesu zonzá ti yandi ke vanda na beto. Na kisalu ya predikasion, beto ke ‘bakamarade ya kisalu ya Nzambi’ mpe ‘Yesu ke na beto’. (1 Ko. 3:9; 2 Ko. 2:17) Na yawu, beto ke lenda kusala kisalu yayi. Ya ke kilengi samu na beto na kusala kisalu yina ba pesá beto mpe na kusadisa bampangi na kusala yawu!—Tanga Bafilipi 4:13.