1. Faso Matayi 7:13, 14 ke zonzak’ yawu, samu na yinki beto ke na salá bangolo?

BETO nyonso ke salá bangolo na kusadila Yehova samu na kuzinga na yinza ya malu-malu, na yisi ya otorite ya guvernema ya yandi. Bilumbu nyonso, beto ke sosá kulanda nzila yina ke natá na luzingu. Kasi faso Yesu zonzá, nzila yango ke fioti, mpe bantangu ya nkaka ya ke mpasi na kulanda. (Tanga Matayi 7:13, 14.) Samu beto ke bantu ya masumu, ya ke ve mpasi na beto na kubika nzila yango.—Gal. 6:1.

2. Yinki beto ke zonzila na artikle yayi? (Tala mpe tablo “ Kukuluka ke sadisá beto na kubongisa ndyatulu ya beto.”)

² Si beto zola kutambula na nzila ya fioti yina ke natá na luzingu, beto zolá yidika na ntima mosi faso ya beto ya kukanisa, faso ya beto ya kutadila bamambu, mpe ndyatulu ya beto. Apotre Paul zonzá na bakristo yina vandá na bwala ya Corinthe na kukontinye “na kusosa kuvanda ya kulunga.” (2 Ko. 13:11) Konseye yina ke mpe mbote samu na beto bubu yayi. Na artikle yayi, beto ke tala faso Biblia lenda sadisa beto na kubongisa ndyatulu ya beto, mpe faso bampangi ya kukula na kimpeve lenda sadisa beto na kutambula na nzila yina ke natá na luzingu. Beto ke zonzila mpe na wapi ntangu ya lenda talaná mpasi na kulanda misiku yina organizasion ya Yehova ke pesá. Beto ke tala mpe faso kukuluka lenda sadisa beto na kusala bachanjema na faso yina lenda manisa ve beto kilengi ya beto ya kusadila Yehova.

3. Wa’ faso mambu ya Nzambi lenda sadisa nge?

³ Ya ke mpasi na beto na kutadila mbote-mbote makanisi ya beto. Samu na yinki? Ntima ya beto ke na luvunu, mpe na yawu, ya lenda vanda mpasi na beto na kuzaba yinki ya lenda nata beto na kusala. (Yer. 17:9) Ya ke ve mpasi na kuvuna banzutu ya beto na “makanisi ya luvunu.” (Zk. 1:22, nwt-MK) Na yawu, beto zolá  sadila mambu ya Nzambi samu na kutadila mbote-mbote kimuntu ya beto. Mambu ya Nzambi ke lakisá pwelele banani beto kele na kati ya beto, “makanisi mpe bansatu” ya ntima ya beto. (Ebr. 4:12, 13, nwt-MK) Beto zolá vanda ya kukuluka samu na kulenda kusadila bakonseye yina beto ke zwá na Biblia, yina beto ke zwá na bakuluntu, to na bampangi ya nkaka yina ke na yintu ya organizasion ya Yehova.

4. Wa’ faso beto me zaba ti mfumu Saul kumá muntu ya lulendo?

⁴ Ekzample ya mfumu Saul me lakisa yinki lenda kumina beto si beto ke ve ya kukuluka. Saul kumá na lulendo ya kulutila, mpe ya natak’ yandi na kumanga kundima ti yandi zolá bongisa makanisi mpe ndyatulu ya yandi. (Nku. 36:1, 2; Aba. 2:4) Na kifwani, ntangu Yehova zonzá na Saul yina yandi zolá sala na manima ya kununga Ba-amalekite, Saul mangá kuwa Yehova. Mpe ntangu profete Samuele kwendá tala yandi samu na mambu yango, Saul mangá kundima ti yandi salá mambu ya yimbi. Kasi, yandi zonzá ti ya vandá ya yawu ve kwandi mambu ya nene, mpe ti ni bantu ya bwala natak’ yandi na kusala yawu. (1 Sam. 15:13-24) Ntama mingi ve Saul salá mambu ya faso yayi. (1 Sam. 13:10-14) Mambu ya kyadi, yandi biká ntima ya yandi na kukuma na lulendo. Yandi chanjeke ve makanisi ya yandi. Na yawu, Yehova pesak’ yandi disipline mpe losak’ yandi.

5. Yinki beto lenda longoka na ekzample ya Saul?

⁵ Beto ke ve na nsatu ya kuvanda faso Saul, na yawu beto zolá yufula bakestion yayi: ‘Ntangu mu ke tangá bakonseye yina ke na Biblia, mu ke sosá kwandi barezon samu na kusadila ve yawu? Mu ke kanisá ti yina mu ke na salá ke ya yawu kwandi ve yimbi? Mu ke ngalá kwandi bampangi samu na yina mu ke na salá?’ Si reponse ya beto na mosi na mosi ya bakestion ke Ee. Beto zolá bongisa makanisi ya beto mpe faso ya beto ya kutadila bamambu. Samu ti, si beto sala ve faso yina, beto ke kuma na lulendo ya kulutila, mpe ya ke nata Yehova na kumanga beto faso bakamarade ya yandi.—Zaki 4:6.

6. Zonzila samu na yinki mfumu David vandá ve faso mfumu Saul.

⁶ Tala yina vandá ve faso mosi na kati ya mfumu Saul na mfumu David, bakala yina vandá zolá “musiku ya Yehova.” (Nku. 1:1-3) David zabá ti Yehova ke vuukisá ba yina ke vandá ya kukuluka, kasi ke teleminá bantu ya lulendo. (2 Sam. 22:28) David biká musiku ya Nzambi bongisa makanisi ya yandi. Yandi soniká: “Mu ke kumisa Yehova, yina me pesa munu [konseye]. Ata na mpimpa, makanisi ya munu ya kati ke pesá munu disipline.”—Nku. 16:7.

7. Yinki beto ke sala si beto ke ya kukuluka?

⁷ Si beto ke ya kukuluka, beto ke bika mambu ya Nzambi chanje makanisi ya beto ya yimbi, avant ya nata beto na kusala mambu ya yimbi. Mambu ya Nzambi ke vanda faso ndinga yina ke zonza na beto: “Nzila yawu yayi. Beno landa yawu.” Ya ke kebisa beto si beto banda kusala mambu ya yimbi. (Iza. 30:21) Ya ke mbote na beto na kuwa Yehova. (Iza. 48:17) Na kifwani, beto ke vanda ve na nsoni samu muntu ya nkaka me pesa beto konseye. Mpe beto ke kuma dyaka na kikamarade ya ngolo na Yehova samu beto me zaba ti yandi ke kipeke beto faso Tata ya luzolo.—Ebr. 12:7.

8. Faso Zaki 1:22-25 ke zonzak’ yawu, wa’ faso beto lenda sadila mambu ya Nzambi faso miroir?

⁸ Mambu ya Nzambi lenda vanda faso miroir samu na beto. (Tanga Zaki 1:22-25.) Mingi na kati ya beto ke talá miroir bilumbu nyonso na nsuka avant na kubasika na yinzo. Na faso yina, beto ke talá si beto ke na nsatu ya kubongisa kima avant bantu ya nkaka tala beto. Faso mosi mpe, ntangu beto ke tangá Biblia bilumbu nyonso, beto ke tala faso beto lenda bongisa makanisi ya beto, mpe faso ya beto ya kutadila bamambu. Mingi ke talá ti, ya ke mbote na kutangá texte du jour bilumbu nyonso na suka, avant na kubasika na yinzo. Ba ke biká bamambu yina ba me tanga simba makanisi ya bawu. Na kati ya kilumbu, ba ke sosá bafaso ya kusadila konseye yina me katuka na mambu ya Nzambi. Beto zolá longoka, mpe kukanisa mbote-mbote na mambu ya Nzambi bilumbu  nyonso. Ya lenda talana pete na kusala, kasi ya ke mosi ya bamambu ya kulutila important yina beto lenda sala samu na kutambula na nzila ya fioti yina ke natá na luzingu.

9. Na wapi ntangu mpangi lenda pesa nge konseye?

⁹ Nge me bandá deja kusala mambu yina vandá bebisa kikamarade ya nge na Yehova? (Nku. 73:2, 3) Si mpangi yina ke ya kukula na kimpeve me zwa kuraje ya kupesa nge konseye, nge ke wa kwandi yandi mpe ke sadila konseye ya yandi? Si ya ke faso yina, nge me sala mambu ya mbote, mpe nge ke vutula matondo mingi yina mpangi ya nge me kebisa nge.—Bin. 1:5.

10. Yinki nge zolá sala si mpangi me pesa nge konseye?

¹⁰ Biblia ke zonzá na beto ti: “Bamputa yina [kamarade] me lwalisa nge ke vandá ya kukwikama.” (Bin. 27:6) Yinki ya zola zonza? Beto baka kifwani: Kanisa ti nge ke na sosá kuzenga gudron ya nene yina ke na bakaminion mingi, mpe nge me bika telefone ya nge vuna nge. Nge me banda kuzenga gudron meso kaka na telefone. Mpe na mbala mosi, kamarade ya nge me simba nge na diboko mpe me katula nge na zulu ya gudron. Diboko ya nge me sala mpasi ntangu yandi vandá me simba nge, kasi faso ya yandi ya kusala me sala ti kaminion dyata nge ve. Ata ti diboko ya nge kontinye kusala mpasi samu yandi simbá nge ngolo, nge ke dasukila yandi samu yandi me talisa diboko ya nge mpasi? Beto kanisa ve! Kasi nge ke vutula matondo samu yandi me sadisa nge. Faso mosi mpe, na kubanda nge lenda dasuka si mpangi zonza na nge ti nzonzolo to ndyatulu ya nge ke na landá dyaka ve misiku ya Nzambi. Kasi kunyonga ve to kudasuka ve samu yandi me pesa nge konseye. Ya ke vanda buzoba. (Lon. 7:9) Kasi, vutula matondo samu mpangi ya nge me kuzwa kuraje ya kuzonzila nge yawu.

11. Yinki lenda nata muntu na kulosa konseye ya mbote yina me katuka na kamarade?

¹¹ Yinki lenda nata muntu na kulosa konseye ya mbote yina me katuka na kamarade ya luzolo? Ni lulendo. Bantu ya lulendo ke zolá “bazonza na bawu mambu yina ba zola kuwa.” Ba ke “kangá makutu samu na kuwa ve butsyeleka.” (2 Tim. 4:3, 4) Ba ke talá ti ba ke ve na nsatu ya bakonseye samu ba ke kanisá ti, ba ke na mayela ya kulutila to ba ke important kuluta bampangi. Kasi, Paul soniká ti: “[Si] muntu ke na [kanisá] ti yandi ke muntu ya mfunu, kasi yandi kele kaka muntu ya mpamba, yandi ke na vunama.” (Gal. 6:3) Mfumu Salomon lakisá yinki ya zola zonza. Yandi soniká: “Mwana yina ke [povre] kasi mayela, ke mbote kuluta mfumu yina [me nuna] kasi zoba, yina ke dyaka ve na mayela ya kutula dikebi na [mambu yina ke kebisá].”—Lon. 4:13.

12. Faso Bagalate 2:11-14 ke lakisak’ yawu, yinki beto lenda longoka na ekzample ya Piere?

¹² Kanisa na yina Piere salá ntangu Paul vutulak’ yandi na nzila na meso ya bantu ya nkaka. (Tanga Bagalate 2:11-14.) Piere zolá dasuka na yina Paul zonzá, surtout na faso yandi zonzilak’ yawu mpe samu yandi zonzak’ yawu na meso ya bantu ya nkaka. Kasi Piere vandá mayela. Yandi ndimá konseye mpe yandi dasukilá ve Paul, kasi yandi kontinyeke kukanisa na konseye yango. Mpe na manima, yandi zonzilá Paul faso “mpangi [ya luzolo].”—2 Pi. 3:15.

13. Na wapi mambu nge zolá kanisa avant na kupesa muntu konseye?

¹³ Wapi mambu nge zolá bumba na yintu si nge me tala ti nge zolá pesa kamarade konseye? Avant na kwenda tala yandi, nge lenda yufula, ‘Mu ke kwandi muntu ya “lunungu kuluta ndilu”?’ (Lon. 7:16) Muntu ya lunungu yina ke lutá balimite ke jujeke bampangi na misiku ya Yehova ve, kasi na misiku ya yandi mosi, mpe ya lenda vanda ti yandi ke talá ve kyadi ya bampangi. Si na manima ya kutadila kimuntu ya nge, nge me kanisa ti nge zolá zonza na kamarade ya nge, zonzila pwelele mambu yina yandi me sala, mpe sadila bakestion samu na kusadisa yandi na kuzaba mambu ya yimbi yina yandi me sala. Sala nyonso samu mambu yina nge ke zonza katuka na Biblia, mpe  kuzimbana ve ti, responsabilite ya nge ke ve ni ya kujuje kamarade ya nge, kasi ni ya kusadisa yandi na kuzaba yina Yehova ke na kanisá na mambu yina yandi ke na salaka. (Rom. 14:10) Tula ntima na mambu yina Biblia ke zonzá, mpe ntangu nge ke na pesá muntu konseye, landa ekzample ya Yesu na faso yina yandi lakisá ntima ya kyadi. (Bin. 3:5; Mat. 12:20) Samu na yinki? Samu ti Yehova ke bakila beto faso beto ke bakilá bantu ya nkaka.—Zaki 2:13.

14. Yinki organizasion ya Yehova ke pesá beto?

¹⁴ Yehova ke twadisá beto na nzila yina ke natá na luzingu, na nzila ya kitini ya organizasion ya yandi yina ke na zulu ya ntoto, yina ke pesá beto bavideo, mikanda, mpe balukutakanu yina ke sadisá beto na kusadila bakonseye yina ke katuká na Biblia. Malongi yayi nyonso ke katuká na Biblia. Bampangi ya Kimvuka ya Bantwadisi ke tulá ntima na mpeve ya santu, ntangu ba ke baká badesizion na yina me tadila faso ya mbote ya kusala kisalu ya predikasion. Ata faso yina, ba ke vutukilá dyaka badesizion yango samu na kutala si ba ke na nsatu ya kusala bachanjema. Samu na yinki? Samu ti “yinza yayi ke [na sobá],” mpe organizasion ya Yehova me bonga kulanda bachanjema yango.—1 Ko. 7:31.

15. Wapi mambu ya mpasi baproklamatere ya nkaka ke kutaná na yawu?

¹⁵ Ntangu organizasion ya Yehova ke zonzá na beto faso ya malu-malu ya kutadila malongi ya nkaka ya Biblia, to ke pesá beto misiku na yina me tadila faso ya kutambwisa luzingu ya beto, beto ke ndimá mpe ke sadilak’ yawu. Kasi yinki beto ke sala si organizasion ya Yehova sala bachanjema yina ke nata mpe beto na kusala bachanjema na luzingu ya beto? Na kifwani, na bamvula yayi me luta, mbongo mingi me basika samu na kutunga, mpe kubumba propre ba-salle du Royaume, ba-salle ya assemblée mpe bayinzo ya nkaka yina organizasion ya Yehova ke sadilaka. Na yawu, Kimvuka ya Bantwadisi kwizá tala ti ya ke mbote bimvuka mingi sadila salle du Royaume mosi. Ni na yawu ba vukisá bimvuka mingi, mpe ba teká mapangu ya nkaka, bisika yina ba-salle du Royaume vandá. Ba sadilá mbongo samu na kutunga ba-salle du Royaume na babwala yina nsatu ya ba-salle du Royaume vandá ya kulutila. Si nge ke vandá na bisika yina ba me vukisa bimvuka mpe ba me teka mapangu yina vandá ba-salle du Royaume, ya lenda vanda mpasi samu na nge na kundima chanjema yina. Baproklamatere mingi bubu yayi, mase tambula badistanse ya yinda samu na kukwenda na balukutakanu. Bampangi yina ke salá bangolo samu na kutunga mpe kubumba propre ba-salle  du Royaume, lenda sosa kuzaba samu na yinki ba ke na tekak’ yawu. Ba lenda kanisa ti bantangu mpe bangolo yina ba me sala me kwenda na maza. Kasi ba ke ndimá bachanjema yayi, mpe ya me bonga beto felisite bawu.

16. Wa’ faso kusadila konseye yina ke na Bakolose 3:23, 24 ke sadisa beto na kubumba kilengi ya beto?

¹⁶ Beto ke bumba kilengi ya beto si beto zimbana ve ti beto ke na salá samu na Yehova, mpe ni yandi muntu ke twadisá organizasion ya yandi. (Tanga Bakolose 3:23, 24.) Mfumu David pesá ekzample ya mbote ntangu yandi pesá dikabu ya mbongo samu na kutunga temple, yandi zonzá: “Mu ke nani mpe bantu ya munu ke banani samu beto pesa nge makabu ya luzolo ya mbote ya faso yayi? Samu bima nyonso me katuka na nge mpe beto me pesa nge bima yina me katuka na diboko ya nge mosi.” (1 Ns. 29:14) Ntangu beto ke pesá makabu, beto ke vutulá na Yehova yina me katuka na diboko ya yandi mosi, kasi ya ke salá Yehova kilengi mingi ntangu beto ke pesá ntangu ya beto, bangolo ya beto, mpe mbongo ya beto samu na kusala kisalu ya yandi.—2 Ko. 9:7.

17. Samu na yinki nge zolá vanda ve ya kulemba si nge me bonga kusala bachanjema?

¹⁷ Samu na kubikana na nzila yina ke natá na luzingu, beto nyonso zolá landa ekzample ya Yesu. (1 Pi. 2:21) Kuvanda ve ya kulemba si ya talana ti, nge ke na nsatu ya kusala bachanjema. Kundima ti nge ke na nsatu ya kusala bachanjema, ke lakisa ti nge ke na nsatu ya kulanda misiku ya Yehova. Kuzimbana ve ti Yehova zaba ti beto ke bantu ya masumu, na yawu yandi ke ve na nsatu beto landa ekzample ya Yesu faso bantu ya kulunga.

18. Yinki beto me bonga kusala samu na kulungisa bansatu ya beto?

¹⁸ Bika beto nyonso kangama nkaka na kutala na mantwala mpe na kundima na ntima mosi na kubongisa makanisi ya beto, faso ya beto ya kutadila bamambu, mpe ndyatulu ya beto. (Bin. 4:25; Luke 9:62) Bika beto vanda ya kukuluka, “beto kontinye kuzinga na kati ya kilengi, mpe beto sosa kuvanda ya kulunga.” (2 Ko. 13:11) Si beto sala yawu, Nzambi ya luzolo mpe ya kizunu ke vanda na beto. Yandi ke sadisa beto na kuvanda na kilengi bubu yayi, mpe ke pesa beto luzingu na yinza ya malu-malu.