Mu butuka na 1983. Bamvula ya ntete ya luzingu ya munu, mu vandá na sante ya bien. Kasi ntangu mu kumá na 10 ans, nzutu ya munu banda kusala mpasi. Bamvula zole na manima, kilumbu mosi na suka, mu vandá lenda dyaka ve kutelama. Nyonso yina mu vanda sala samu na kusosa kuningisa makulu ya munu, vandá simba ve. Depuis kilumbu yina, mu ke tambulá dyaka ve. Maladi yina salá mpe ti mu kula dyaka ve. Mu me bikaná na ntela ya bana ya fioti.

Mu kotá yinzo bangonda mingi tii kilumbu yina batemwe ya Yehova kwizá tala beto. Ntangu bantu vandá kwizá na yinzo, mu vandá bumbaná, kasi kilumbu yina, mu baká ntangu ya kuwa bakento yina kwiza tala beto. Ntangu ba bandá kuzonza mambu ya paradis, mu kanisá na mambu yina mu kuwá ntangu mu vandá na 5 ans. Na ntangu yina, misionere mosi na nkumbu ya Jethro, yina vandá vanda na Suriname, vandá kwizá na bwala ya beto mbala mosi na ngonda samu na kulongoka na papa ya munu. Jethro vandá jenti na munu. Mu vandá zolak’ yandi. Mpe, bankoko ya munu vandá natá munu na balukutakanu ya batemwe ya Yehova, yina vandá salamá na bwala ya beto. Na yawu, ntangu Florence, mosi ya bakento yina vandá solola na munu, yufula si mu zola kulongoka Biblia, mu ndimaka.

Florence kwizá na bakala ya yandi, Justus, mpe ba bandá kulongoka Biblia na munu. Ntangu ba talá ti mu zabá ve kutanga, ba lakisá mu kutanga. Mpe na manima ya mwa ntangu, mu zabá kutanga. Kilumbu mosi, ba zonzá na munu ti ba me filisa bawu na kwenda preche na Suriname. Ya vandá kyadi na kutala ti, ata muntu zola kontinye na kulongoka Biblia na munu. Kasi Yehova zimbaná ve munu.

Na manima ya mwa ntangu fioti, pionier mosi na nkumbu ya Floyd kumá na bwala ya beto. Mpe ntangu yandi vandá sala predikasion ya yinzo na yinzo, yandi talá munu. Ntangu yandi yufulá munu si beto lenda longoka Biblia, mu seká. Yandi zonzá na munu: “Yinki ke na sekisá nge?”. Mu zonzá na yandi ti mu longoká brochure, Ce que Dieu attend de nous mpe mu bandá kulongoka livre, La connaissance qui mène à la vie éternelle. * Mu zonzá na yandi samu na yinki mu ke longoká dyaka ve. Floyd manisá na munu livre, Connaissance, kasi na manima, ba filisá yandi na bwala ya nkaka. Mu vandá dyaka ve na muntu yina ke longoka na munu.

 Na 2004, ba filisá Granville mpe Joshua, yina vandá bapionier spesial, na bwala ya beto. Ntangu ba vandá sala predikasion ya yinzo na yinzo, ba talá munu. Ntangu ba yufulá munu si mu ke na nsatu ya kulongoka Biblia, mu seká. Mu lombá bawu, ba bandila kulongoka na munu livre Connaissance. Mu vandá na nsatu ya kutala si ba ke longa munu mambu mosi na yina batemwe ya ntete longá munu. Granville zonzá na munu ti, ba zola banda kusala balukutakanu na bwala ya beto. Ata mu salá 10 ans kubasika ve na yinzo, mu vandá na nsatu ya kuvanda na balukutakanu yina. Na yawu, Granville kwiza na yinzo ya beto, tulá munu na zulu ya velo ya bantu ya makulu ya maladi mpe natá munu na Salle du Royaume.

Na manima, Granville zonzá na munu na kutula nkumbu ya munu na yina ba vandá bokilá École du ministère théocratique. Yandi zonzá na munu: “Nge ke tambulá ve, kasi nge ke zonzá. Kilumbu kele, nge ke sala diskur na mantwala ya bantu mingi. Ya ke salama.” Mambu ya kitoko yayi yandi zonzá, pesá mu konfianse.

Mu bandá kupreche na Granville. Kasi, banzila mingi ya bwala vandá ve mbote samu na velo, samu ya vandá na matadi. Na yawu, mu zonzá na yandi na kutula mu na brouette samu yandi puse munu. Faso ya kusala yayi simbá. Na Avril 2005, mu kuzwá bateme. Kaka na manima ya mwa ntangu fioti, bampangi formeke munu mpe ba pesá mu responsabilite ya kukipe mikanda mpe ba-apareye ya kimvuka.

Na 2007, papa ya munu kufwá na aksidant ya bato. Ya vandá mpasi mingi samu na famiye ya beto. Granville sambilá na beto mpe kabulá na beto baverse ya Biblia yina pesá beto kuraje. Bamvula zole na manima, mambu ya nkaka ya mpasi kuminá beto. Granville kufwá na aksidant ya bato.

Kimvuka ya beto ya fioti, bikaná na ata kuluntu mpe kaka na assistant mosi. Ya salá mu vrai mpasi, kutala kamarade ya munu ya ntima Granville kufwa. Yandi sadisá mu mingi na kutunga kikamarade ya munu na Yehova mpe yandi vandá pesá munu bima yina mu vandá na yawu nsatu. Lukutakanu yina landá semaine yina yandi kufwa, mu zola tanga baparagrafe ya Yinzo ya Kengidi. Mu manisá ve kutanga paragrafe ya zole, mu banda kudila mpe masangasa vandá basika kaka yawu mosi. Mu kontinyeke dyaka ve kutanga.

Mwa kilengi banda kuvutuka ntangu bampangi ya kimvuka ya nkaka, kwizá sadisa beto. Kaka na ntangu yina, filiale filisá pionier spesial mosi na nkumbu ya Kojo. Ya salá mu vrai kilengi ntangu mama ya munu na leki ya munu, bandá kulongoka Biblia mpe ba kuzwá bateme. Dyaka, na Mars 2015, mu kumá assistant. Na manima, mu salá diskur ya munu ya ntete. Kilumbu yango, mu seká mpe mu dilá ntangu mu kanisá na mambu yina Granville zonzá na munu: “Kilumbu kele, nge ke sala diskur na mantwala ya bantu mingi. Ya ke salama.”

Na ba-emision ya JW Télédiffusion, mu ke talá bampangi yina ke na bamaladi faso ya munu. Kasi ata bamaladi ya bawu, ba ke vandá na kilengi, mpe ba ke natá luzingu ya mbote. Mu zaba ti, ata maladi ya munu, ya ke na bima yina mu lenda sala. Mu ke na nsatu ya kupesa Yehova ya kulutila. Na yawu, mu kumá pionier ya ntangu nyonso. Nsangu mosi yina mu kuzwá na Septembre 2019 pamusá munu! Na ngonda yina, mu kumá kuluntu na kimvuka ya beto yina ke na baproklamatere 40.

Mu ke na vutulá matondo mingi na bampangi ya kento na ya bakala yina longoká na munu Biblia mpe sadisá munu na kusadila Yehova. Na nyonso, mu ke na vutula matondo na Yehova samu yandi me zimbana munu ata fioti ve.