Ya ntete na Bakorinto 1:1-31
1 Yayi ke mukanda yina me katuka na Polo, yina ba bokilaka na kuvanda ntumwa ya Kristo Yesu, na nzila ya luzolo ya Nzambi, mpe Sostene mpangi ya beto.
2 Mu ke na sonikaka na kimvuka ya Nzambi yina ke na Korinto, na beno ba yina ba me soola mutindu bilandi ya Kristo Yesu. Ba me bokila beno na kuvanda basantu kintwadi na bantu yina ke bisika nyonso, mpe yina ke bokilaka nkumbu ya Mfumu ya beto Yesu Kristo. Yandi ke Mfumu ya bawu mpe ya beto:
3 Bika ti ntima ya kulutila mbote mpe kizunu ya Nzambi Tata ya beto, mpe ya Mfumu Yesu vanda na beno.
4 Mu ke vutulaka ntangu nyonso matondo na Nzambi ya munu, samu na ntima ya kulutila mbote yina yandi me lakisa beno, beno yina ke bilandi ya Kristo Yesu.
5 Ba me sakumuna beno na faso ya kulutila, samu beno ke na bumosi na yandi. Yandi me pesa beno ngolo ya kulutila samu na kuzonza mambu ya Nzambi, mpe yandi me pesa beno luzabu ya kulutila.
6 Na yawu, nsangu yina me tadila Kristo me kuma ngolo na kati ya beno.
7 Samu na mambu yayi, beno ke na nyonso yina beno ke na yawu nsatu, ntangu beno ke na vingilaka na nsatu ya ngolo, ntangu yina bisalu ya Mfumu ya beto Yesu Kristo ke talana pwelele.
8 Yandi ke kumisa beno ngolo tii na nsuka, samu ata muntu mosi ve kuzwa mambu ya kufunda beno na kilumbu ya Mfumu ya beto Yesu Kristo.
9 Nzambi ke ya kukwikama, mpe ni yandi bokilaka beno samu beno vanda na kindiku na Mwana ya yandi Yesu Kristo, Mfumu ya beto.
10 Bampangi, na nkumbu ya Mfumu ya beto Yesu Kristo, mu ke na lombaka na beno nyonso na kuvanda na bumosi na bamambu yina beno ke zonzaka. Bamambu yina ke kabulaka fwana kuvanda ve na kati ya beno, kasi beno fwana kuvanda na bumosi na mabanza mpe na mutindu ya kukanisa.
11 Bampangi, bantu ya nkaka ya yinzo ya Klowe me zonza na munu ti ya ke na kuswana na kati ya beno.
12 Mambu yina mu ke na sosaka kuzonza ni yayi: Mosi na mosi na kati ya beno ke na zonzaka: “Mu ke muntu ya Polo.” Kasi ya nkaka ke na zonzaka, “Mu ke muntu ya Apolose.” Mosi ke na zonzaka, “Mu ke muntu ya Sefase.”* Kasi ya nkaka ke na zonzaka, “Mu ke muntu ya Kristo.”
13 Kristo ke kwandi ya kukabuka? Ni Polo kufwaka na zulu ya yinti samu na beno? To ni na nkumbu ya Polo beno kuzwaka mbotokolo?
14 Mu ke vutulaka Nzambi matondo na yina mu pesaka ata muntu na kati ya beno mbotokolo, katula kaka Krispuse na Gayuse.
15 Na yawu, ata muntu na kati ya beno lenda zonza ti yandi kuzwaka mbotokolo na nkumbu ya munu.
16 Ee, mu pesaka mpe mbotokolo na bantu ya yinzo ya Stefanase. Katula bawu, mu zaba ve kana mu pesaka dyaka muntu ya nkaka mbotokolo.
17 Samu Kristo filisaka ve munu samu na kupesa bantu mbotokolo, kasi na kumwangisa nsangu ya mbote. Mpe mu me sala ve yawu na mayela ya kuzonza, samu yinti ya mpasi* ya Kristo kuma ve kima yina ke ve mfunu.
18 Nsangu yina me tadila yinti ya mpasi* ke buzoba samu na bantu yina ke na kufwaka, kasi samu na beto ba yina ke na vuukaka, ya ke ngolo ya Nzambi.
19 Masonoko ke zonzaka ti: “Mu ke manisa ndwenga ya bantu ya ndwenga, mpe mu ke losa* mayela ya bantu ya mayela.”
20 Wapi kisika ke muntu ya ndwenga? Wapi kisika ke mulongisi ya musiku?* Wapi kisika ke muntu ya ntembe ya ntangu yayi? Nzambi me kumisa ve kwandi mayela ya yinza* buzoba?
21 Bantu ya yinza yayi ke tulaka ntima na mayela ya bawu mosi, samu ba zaba ve Nzambi. Nsangu yina beto ke samunaka ke kima yina ke ve mfunu samu na bantu ya nkaka, kasi na nzila ya nsangu yango, Nzambi me baka mukanu ya kuvuukisa bantu yina ke kwikilaka na yandi. Na kusalaka mutindu yina, ndwenga ya Nzambi talanaka pwelele.
22 Bazwife ke lombaka bidimbu, mpe Bagreke ke sosaka ndwenga.
23 Kasi beto, beto ke samunaka nsangu ti Kristo kufwaka na zulu ya yinti. Samu na Bazwife ya ke mambu yina ke budisaka dibaku, mpe samu na bantu ya makanda ya ke buzoba.
24 Kasi samu na bantu yina Nzambi bokilaka, ya vanda Bazwife to Bagreke, Kristo ke ngolo ya Nzambi, mpe mayela ya Nzambi.
25 Kima yina ke buzoba na meso ya Nzambi, ke mayela mingi kuluta bantu. Mpe kima yina ke ve ngolo na meso ya Nzambi, ke ngolo mingi kuluta bantu.
26 Bampangi, beno ke na talaka mutindu ya bantu yina Nzambi bokilaka. Na meso ya bantu, mingi ve na kati ya bawu ke na ndwenga, mingi ve na kati ya bawu ke ngolo, mingi ve na kati ya bawu me katuka na makanda ya mfunu.
27 Kasi Nzambi soolaka bima ya buzoba ya yinza, samu na kufwisa bantu ya mayela nsoni. Mpe Nzambi soolaka bima ya kulemba ya yinza, samu na kufwisa bima ya ngolo nsoni.
28 Nzambi soolaka bima ya yinza yina bantu ke talaka ti ya ke ve mfunu, bima yina bantu ke yiinaka, bima yina kele ve, samu na kukumisa bima ya mpamba, bima yina ke talanaka ti ya ke mfunu.
29 Yandi salaka yawu samu ata muntu* bula ntulu samu na yandi mosi na mantwala ya Nzambi.
30 Kasi ya ke ni samu na yandi beto ke na bumosi na Kristo Yesu, yina me natina beto ndwenga yina ke katukaka na Nzambi. Na nzila ya Kristo, Nzambi kumisaka beto bantu ya lunungu,* mpe bantu ya santu, mpe yandi vuukisaka beto na nzila ya ntalu ya kufuta,
31 samu ya vanda mutindu ya ke ya kusonama: “Muntu yina ke na bulaka ntulu, bika yandi bula ntulu samu na Yehova.”
Banote
^ Yina ba vandaka bokila mpe Piere.
^ Tala Yina ya zola zonza.
^ Tala Yina ya zola zonza.
^ To: “Katula.”
^ To: “Scribe.”
^ Tala Yina ya zola zonza.
^ Na Greke: “Musuni.”
^ To: “Kudedama.”
