Ya ntete na Bakorinto 10:1-33
10 Bampangi mu zola beno zaba ti, bankooko ya beto vandaka bawu nyonso na yisi ya dituti, mpe lutaka na kati-kati ya nzadi ya mungwa.*
2 Bawu nyonso kuzwaka mbotokolo ntangu ba vanda landa Moyize na yisi ya dituti mpe na kati-kati ya nzadi ya mungwa.*
3 Bawu nyonso kudyaka madya ya kimpeve ya mutindu mosi,
4 mpe bawu nyonso kunwaka maza ya kimpeve ya mutindu mosi. Ya tsyeleka, ba vanda kunwa maza yina Nzambi vanda pesa bawu na nzila ya ditadi ya nene. Ditadi ya nene yina vanda fwanisa Kristo.
5 Kasi Nzambi vanda sepela ve na bantu mingi na kati ya bawu. Na yawu yandi kufwaka bawu na ntoto ya kuyuma.
6 Beto lenda benda bileso na bamambu yina kuminaka bawu. Beto me fwana ve kuvanda na nsatu ya bima ya yimbi, mutindu ba vandaka na yawu.
7 Beto me fwana kusambila ve biteki mutindu ba ya nkaka na kati ya bawu salaka yawu. Kaka mutindu masonoko ke zonzaka yawu: “Bantu vandaka samu na kudya mpe na kunwa. Na manima ba telamaka samu na kusakana.”
8 Beto me fwana kusala ve kinsuza* kaka mutindu ba ya nkaka na kati ya bawu salaka yawu. Ya salaka ti bantu 23 000 na kati ya bawu kufwa na kilumbu mosi.
9 Beto me fwana kumeka ve Yehova, faso ba ya nkaka na kati ya bawu salaka yawu, mpe ba kufwaka bawu na banyoka.
10 Beto fwana kunyonguta ve, faso ba ya nkaka na kati ya bawu salaka yawu. Ya salaka ti mbazi ya Nzambi kufwa bawu.
11 Beto lenda benda bileso na mambu yina kuminaka bawu. Ba sonikaka yawu samu na kukebisa beto, beto ba yina ke na zingaka na bantangu ya nsuka ya yinza yayi.
12 Ni na yawu, muntu yina ke na kanisaka ti yandi ke ya kutelama ngolo, yandi fwana kusala keba samu yandi kubwa ve.
13 Ata ntontolo mosi ve me kuminaka beno, yina bantu ya nkaka me kutanaka ve na yawu. Kasi Nzambi ke ya kukwikama, yandi ke bika ve ti beno kutana na bantontolo kuluta yina beno lenda kanga ntima. Kasi ntangu ntontolo ke kwiza, yandi ke yidikila beno nzila ya kubasika na ntontolo yina samu beno lenda kukanga ntima na yawu.
14 Ni na yawu, bampangi ya munu yina mu ke zolaka mingi, beno kima lusambu ya biteki.
15 Mu ke na zonzaka na beno mutindu na bantu yina zaba kusala luswaswanu na bamambu. Beno tala beno mosi kana mambu yina mu ke na zonzaka ke ya tsyeleka to ve.
16 Kopo ya lusakumunu yina beto ke sakumunaka ke ve ya kuvukana na menga ya Yesu? Dimpa yina beto ke zengaka, ke ve ya kuvukana na nzutu ya Kristo?
17 Ya ke kaka na dimpa mosi. Na yawu, ata ti beto ke mingi, beto ke nzutu mosi, samu beto nyonso ke kabulaka dimpa mosi yina.
18 Beto zonzila yina bana ya Izraele vanda sala. Ntangu ba vanda kudya minkayulu, ba vanda kabula ve bima yina ba vanda pesa na kisika ba vanda yokaka minkayulu?
19 Mu ke na zonzaka kwandi ti kiteki to kima yina ba me pesa na kiteki, ke kima ya mfunu?
20 Ve, ni yawu ve. Mambu yina mu ke na zonzaka ke ti, bantu ya makanda ya nkaka ke pesaka minkayulu na bambazi ya yimbi, kasi na Nzambi ve. Mpe mu zola ve beno vukana na bambazi ya yimbi.
21 Beno lenda kunwa ve na kopo ya Yehova mpe na kopo ya bambazi ya yimbi. Beno lenda kudya ve na mesa ya Yehova mpe na mesa ya bambazi ya yimbi.
22 To, ‘beto ke na sosaka kwandi kunata Yehova na kuvanda na kimbanda?’ Beto me lutila ve yandi na ngolo, ni mutindu yina ve?
23 Beto lenda sala mambu nyonso, kasi ni mambu nyonso ve ke nataka bamambu ya mbote. Beto lenda sala mambu nyonso, kasi ni mambu nyonso ve ke kindisaka bampangi.
24 Beno kusosa ve kaka kusala bamambu yina ke mbote samu na beno mosi, kasi beno tatamana na kusala mpe bamambu yina ke mbote samu na bampangi.
25 Beno kudya musuni ni musuni yina ba ke tekisaka na zandu ya misuni. Kana beno soola kudya misuni, ndinga yina ke zonzaka na kati ya beno ke kwamisa ve beno.
26 Samu masonoko ke zonzaka: “ntoto mpe bima nyonso yina ke na zulu ya yawu kele ya Yehova.”
27 Kana muntu yina ke ve mundimi me bokila beno samu na kudya, mpe beno me baka mukanu ya kukwenda, beno kudya kima ni kima yina ba ke tula na mantwala ya beno. Beno bika ve ndinga yina ke zonzaka na kati ya beno nata beno na kuyufula byuvu.
28 Kasi kana muntu me zonza na beno: “Musuni yayi ba pesaka yawu na munkayulu na kiteki.” Beno kudya ve yawu samu na mbote ya yandi, mpe samu na kulwalisa ve kimuntu ya kati ya ata muntu.
29 Mu ke na zonzilaka ve kimuntu ya beno ya kati, kasi kimuntu ya kati ya muntu ya nkaka. Mu ke ve na nsatu ya kusadila kimpwanza ya munu, samu na manima, kimuntu ya kati ya muntu ya nkaka sambisa munu.
30 Na yawu, kana mu vutula Nzambi matondo samu na madya, mpe kana mu ke na muswa ya kudya yawu, samu na yinki mu zola sala yawu kana ya ke na nataka bantu ya nkaka na kuzonzila yimbi ya munu?
31 Ni na yawu, ya vanda beno kudya, ya vanda beno kunwa, to ya vanda beno sala kima ni kima ya nkaka, beno sala mambu nyonso samu na nkembo ya Nzambi.
32 Beno kukuma ve kima yina ke budisaka dibaku samu na bampangi, ya vanda ti beno ke Bazwife, Bagreke to bantu ya dibuundu ya Nzambi.
33 Ni yawu mu ke na sosaka kusala. Mu ke na sosaka kusepelisa bantu nyonso na mambu nyonso yina mu ke salaka. Mu ke na sosaka ve yina ke mbote samu na munu mosi, kasi yina ke mbote samu na bantu mingi, samu ba vuuka.
