Ya ntete na Bakorinto 11:1-34
11 Beno landa kifwani ya munu kaka mutindu mu ke na landaka kifwani ya Kristo.
2 Mu ke na budilaka beno maboko samu ntangu nyonso beno ke bambukaka munu moyo, mpe beno ke na landaka mbote-mbote malongi yina mu pesaka beno.
3 Mu zola beno zaba ti Kristo ke mfumu ya konso bakala, mpe bakala ke mfumu ya kento, mpe mfumu ya Kristo ni Nzambi.
4 Kana bakala me kanga yintu ya yandi ntangu yandi ke na sambilaka to ke na bikulaka, yandi ke na fwisaka mfumu ya yandi nsoni.
5 Kasi kana kento me kanga ve yintu ya yandi ntangu yandi ke na sambilaka to ke na bikulaka, yandi ke na fwisaka mfumu ya yandi nsoni. Yandi ke kuma mutindu kento yina ba me sala digovo.
6 Ni na yawu, kana kento zipa ve yintu ya yandi, yandi fwana kuzenga bansuki. Samu ti ya ke nsoni samu na kento na kuvanda na bansuki ya kuzengana to kusala digovo. Na yawu, yandi fwana kukanga yintu ya yandi.
7 Bakala me fwana ve kukanga yintu ya yandi samu ti yandi ke kifwani mpe nkembo ya Nzambi, kasi kento ke nkembo ya bakala.
8 Samu bakala kwizaka ve na manima ya kento, kasi ni kento kwizaka na manima ya bakala.
9 Ba yidikaka ve bakala samu na kento, kasi ni kento ba yidikaka samu na bakala.
10 Ni samu na mambu yayi mpe samu na bambazi, kento fwana kuzipa yintu ya yandi, samu na kulakisa ti yandi ke na yisi ya lutumu.
11 Na kati ya bilandi ya Mfumu, kento ke ve ya kukabuka na bakala, mpe bakala ke ve ya kukabuka na kento.
12 Kaka mutindu kento kwizaka na manima ya bakala, bakala mpe kwizaka na manima ya kento. Kasi bima nyonso katukaka na Nzambi.
13 Beno tala na beno mosi: Ya ke kwandi ya kulunga samu na kento na kuvanda yintu mwasi ntangu yandi ke na sambilaka Nzambi na mantwala ya bantu ya nkaka?
14 Bima yina Nzambi yidikaka ke longaka beno ti ya ke nsoni na bakala na kuvanda na bansuki ya yinda.
15 Kasi, kana kento ke na bansuki ya yinda, ya ke nkembo samu na yandi. Ya tsyeleka, ba pesaka yandi bansuki samu ya kuma mutindu kima yina ke kangaka yintu ya yandi.
16 Kasi kana muntu zola kusala ntembe samu na kunwanina mutindu ya nkaka ya kusala bamambu, beto ke ve na mutindu ya nkaka ya kusala bamambu. Dibuundu ya Nzambi mpe ke ve na yawu.
17 Kasi ntangu mu ke na pesaka beno malongi yayi, ya ke ve ti mu ke na budilaka beno maboko. Samu ntangu beno ke na vukanaka, ya kele ve samu na mambu ya mbote, kasi samu na mambu ya yimbi.
18 Ya ntete, mu me kuwa ti, ya ke na kukabuka na kati ya beno ntangu beno ke na vukanaka na kati ya kimvuka. Kasi mu zaba ti mambu yayi ke mwa ndambu ya tsyeleka.
19 Ya tsyeleka ya ke vanda na binkuku ya fioti-fioti na kati-kati ya beno. Kasi ba yina Nzambi ke ndimaka ke talana pwelele.
20 Ntangu beno ke vukanaka samu na kudya madya ya nkokila ya Mfumu, beno ke salaka ve yawu na mutindu ya mbote,
21 samu na ntangu ya kudya yawu, muntu nyonso na kati ya beno ke kudyaka ntete madya ya yandi ya nkokila. Ni na yawu, muntu mosi ke na nsatu, kasi ya nkaka ke ya kukola malafu.
22 Beno ke ve na bayinzo kisika beno lenda kudya mpe kunwa? Beno ke na talaka kwandi kimvuka ya Nzambi mutindu kima ya mpamba? Mpe beno ke na pesaka kwandi nsoni na ba yina ke na ata kima? Yinki mu lenda zonza na beno? Mu fwana kubudila kwandi beno maboko na mambu yayi? Mu ke budila beno maboko ata fioti.
23 Mambu yina mu me longa beno, ni mambu yina mu longokaka na Mfumu. Na mpimpa yina ba zola teka yandi, Mfumu Yesu bakaka dimpa.
24 Na manima ya kuvutula matondo na Nzambi, yandi zengaka yawu mpe zonzaka: “Dimpa yayi ke kifwani ya nzutu ya munu yina mu ke pesa samu na beno. Beno tatamana na kusala yawu samu na kubambuka munu moyo.”
25 Yandi salaka mutindu mosi na kopo ya vinu ntangu ba manisaka kudya madya ya nkokila, yandi zonzaka: “Kopo yayi ke kifwani ya luwawanu ya malu-malu yina me salama na nzila ya menga ya munu. Beno tatamana kusala yawu na kubambuka munu moyo ntangu nyonso yina beno ke kunwa yawu.”
26 Ntangu nyonso beno ke kudya dimpa mpe ke kunwa kopo ya vinu yayi, beno ke na tatamanaka kuzonzila lufwa ya Mfumu tii ntangu yandi ke kwiza.
27 Ni na yawu, muntu yina ke kudya dimpa to ke kunwa kopo ya vinu ya Mfumu na mutindu yina ke ve ya mbote, ke sala disumu na nzutu mpe na menga ya Mfumu.
28 Muntu nyonso fwana kufyongonina ntete yandi mosi mbote-mbote, mpe kaka ni na manima yandi lenda kudya dimpa mpe kunwa kopo ya vinu.
29 Ya tsyeleka, muntu yina ke bakula ve mbote-mbote ti dimpa na vinu ke na fwanisaka nzutu, yandi ke nata lusambusu na zulu ya yandi mosi kana yandi kudya mpe kunwa.
30 Ni na yawu, mingi na kati ya beno ke ya kulemba mpe ke na bimbevo, mpe mingi ya nkaka ke na kufwaka.*
31 Kasi kana beto fyongonina mbote-mbote beto mosi, ba ke sambisa ve beto.
32 Kasi ntangu ba ke sambisaka beto, ya ke mutindu Yehova ke na sembaka beto, samu ba bika kusambisa beto kintwadi na yinza.
33 Ni na yawu bampangi ya munu, ntangu beno ke vukanaka kintwadi samu na kudya madya ya Mfumu, beno vingila bampangi.
34 Kana muntu ke na nsatu, yandi fwana kudya na yinzo ya yandi. Samu ntangu beno ke vukana kintwadi, ya vanda ve samu na kuzwa kitumbu. Mu ke yidika bamambu ya nkaka yina me bikana ntangu mu ke kwiza kuna.
Banote
^ Ya lenda vanda, lufwa ya kimpeve.
