Ya ntete na Bakorinto 12:1-31
12 Bampangi mu zola beno zaba mbote-mbote mambu yina me tadila makabu yina Nzambi ke pesaka.
2 Beno zaba ti ntangu beno vandaka ntete bantu ya makanda,* ni biteki yina ke zonzaka ve vanda twadisaka beno mpe vanda vunaka beno. Beno vanda landaka mpe bawu bisika nyonso yina ba vanda nataka beno.
3 Ntangu yayi, mu zola beno zaba ti ata muntu yina mpeve ya Nzambi ke na twadisaka lenda zonza: “Yesu ke ya kuloka!” Mpe ata muntu lenda zonza: “Yesu ke Mfumu!” kana mpeve ya santu ke na twadisaka ve yandi.
4 Ya ke na makabu mingi yina ke katukaka na Nzambi. Kasi kaka mpeve mosi ke pesaka makabu yango.
5 Ya ke na bafaso mingi ya kusadila bantu, kasi beto ke sadilaka kaka Mfumu mosi.
6 Ya ke na bisalu mingi, kasi ya ke kaka na Nzambi mosi yina ke pesaka konso muntu ngolo ya kusala bisalu yango.
7 Mpeve ya santu ke talanaka na konso muntu, samu na mbote ya bantu nyonso.
8 Mpeve yayi lenda pesa muntu mosi makoki ya kuzonza na ndwenga, mpe ya lenda pesa muntu ya nkaka makoki ya kuzonza na nzayilu.*
9 Mpeve yango lenda pesa muntu mosi kiminu, mpe muntu ya nkaka makoki ya kubelusa* bantu.
10 Ya lenda pesa dyaka na muntu ya nkaka makoki ya kusala bimangu, na muntu ya nkaka makoki ya kubikula, na muntu ya nkaka makoki ya kubakula nsangu yina me katuka na Nzambi, na muntu ya nkaka makoki ya kuzonza na bandinga ya nkaka, mpe na muntu ya nkaka makoki ya kubangula mambu yina ba me zonza na bandinga ya nkaka.
11 Bisalu nyonso yina ni mpeve mosi kaka ke salaka yawu. Ya ke pesaka na konso muntu mutindu ya me zola.
12 Nzutu ya muntu ke na binama mingi, kasi ya ke kaka nzutu mosi, mpe binama nyonso ke ya nzutu mosi. Ni mutindu yina kele nzutu ya Kristo.
13 Beto nyonso, ba pesaka beto mbotokolo na nzila ya mpeve mosi samu na kukuma nzutu mosi. Ya vanda ti beto ke Bazwife to Bagreke, bangaamba to bantu yina ke na kimpwanza, beto nyonso kuzwaka mpeve mosi.
14 Ya tsyeleka, nzutu ke ve kaka na kinama mosi, kasi binama mingi.
15 Kana dikulu me zonza, “Mu ke ve diboko, na yawu mu ke ve kinama ya nzutu.” Ni yawu ve ke sala ti yandi vanda dyaka ve kinama ya nzutu.
16 Kana dikutu me zonza, “Mu ke ve disu, na yawu mu ke ve kinama ya nzutu.” Ni yawu ve ke sala ti yandi vanda dyaka ve kinama ya nzutu.
17 Kana nzutu ya muvimba vandaka disu, wapi mutindu muntu zolaka kuwa? Kana nzutu ya muvimba vandaka dikutu, muntu zola lenda ata fioti ve kuwa bansunga.
18 Kasi Nzambi tulaka binama ya nzutu kintwadi kaka mutindu yandi zolaka yawu.
19 Kana binama nyonso vandaka mutindu mosi, ya zola vanda kwandi nzutu?
20 Binama ke mingi, kasi nzutu ke kaka mosi.
21 Disu lenda zonza ve na diboko, “Mu ke ve na nsatu ya nge.” Mpe yintu lenda zonza ve na makulu, “Mu ke ve na nsatu ya beno.”
22 Ya tsyeleka, ata binama ya nzutu yina ke na talanaka ti ya ke ya kulemba kele mfunu.
23 Beto ke kipeke na faso ya mbote binama ya nzutu yina beto ke talaka ti ya ke ve mfunu mingi. Mpe binama ya nzutu ya beto yina ke ve kitoto mingi, beto ke bakilaka yawu na luzolo ya kulutila.
24 Kasi binama ya nzutu ya beto yina ke kitoko ke na nsatu ya ata kima. Nzambi salaka nzutu mutindu yayi samu na kupesa binama yina ke ve kitoko lukumu ya kulutila.
25 Yandi salaka mutindu yayi samu kukabuka vanda ve na nzutu. Binama ya nzutu fwana kukanisa na bampangi.
26 Kana kinama mosi ya nzutu ke na talaka mpasi, binama nyonso ya nkaka ke tala mpasi kintwadi na yandi. Kana ba me pesa nkembo na kinama mosi ya nzutu, binama nyonso ya nkaka ke sepela na yandi kintwadi.
27 Ni beno kele nzutu ya Kristo. Mpe konso muntu na kati ya beno ke kinama ya nzutu yayi.
28 Nzambi pesaka kisalu na muntu nyonso na kati ya dibuundu. Ya ntete na bantumwa, ya zole na bambikudi, ya tatu na ba yina ke longaka. Na manima, na ba yina ke salaka bimangu, na ba yina ke na makoki ya kubelusa bantu ya nkaka, na ba yina ke sadisaka bantu ya nkaka, na ba yina ke twadisaka, mpe na ba yina ke na dikabu ya kuzonza na bandinga ya nkaka.
29 Ni bawu nyonso ve ke bantumwa, bambikudi, to ba yina ke longaka, ni faso yina ve? Ni bawu nyonso ve ke salaka bimangu, ni faso yina ve?
30 Ni bawu nyonso ve ke na makoki ya kubelusa bantu ya nkaka, ni faso yina ve? Ni bawu nyonso ve ke na dikabu ya kuzonza na bandinga ya nkaka to kubangula mambu yina ba me zonza na bandinga yina, ni faso yina ve?
31 Ni na yawu, beno sala nyonso yina beno lenda sala* samu na kuzwa makabu ya kulutila nene. Kasi ntangu yayi, mu ke na lakisaka beno nzila ya kulutila banzila nyonso.
Banote
^ Ya zola zonza, vandaka ntete ve mindimi
^ To: “Luzabu.”
^ To: “Kunyakisa.”
^ To: “Beno tatamana kusosa na tiya nyonso.”
