Ya ntete na Bakorinto 13:1-13
-
Bunene ya luzolo (1-13)
13 Kana mu ke na sadilaka nzonzolo ya bantu mpe ya bambazi, kasi mu ke ve na luzolo, mu ke mutindu kisengo yina ke na salaka makelele.*
2 Mu lenda vanda na dikabu ya kubikula mpe ya kubakula mansweki nyonso yina me katuka na Nzambi. Mu lenda vanda mpe na dikabu ya kuzaba mambu nyonso yina muntu me fwana kuzaba, mpe kuvanda na kiminu ya kukatula bamongo mpe kutula yawu kisika ya nkaka, kasi kana mu ke ve na luzolo, mu ke muntu ya mpamba.*
3 Mu lenda pesa bima nyonso yina ke na munu samu na kudikisa bantu ya nkaka, to mu lenda bula ntulu samu mu me pesa luzingu ya munu mutindu munkayulu. Kasi kana mu ke ve na luzolo, mu me sala kisalu ya mpamba.
4 Muntu yina ke na luzolo ke na ntima ya yinda mpe ntima ya mbote. Muntu yina ke na luzolo ke ve na kimbanda, ke pesaka ve nkembo na yandi mosi, ke ve na lulendo.
5 Yandi ke salaka ve mambu ya nsoni,* ke sosaka ve mbote ya yandi mosi, ke dasukaka ve kidi-kidi, ke bumbaka ve yimbi yina ba me sala yandi.
6 Muntu yina ke na luzolo ke talaka ve kilengi na mambu ya yimbi, kasi ke sepelaka na matsyeleka.
7 Muntu yina ke na luzolo ke lembaka ve, ke kwikilaka na mambu nyonso, ke tulaka ntima na mambu nyonso, ke kangaka ntima na mambu nyonso.
8 Luzolo ke manisa ata fioti ve. Kasi dikabu ya kubikula mpe ya kuzonza na bandinga ya nkaka ke suka. Ata dikabu ya luzabu* mpe ke suka.
9 Ntangu yayi beto ke kaka na luzabu ndambu, mpe kubikula yina beto ke bikulaka ke kaka ya ndambu.
10 Kasi kima yina ke ndambu ke suka, ntangu kima yina ke ya kulunga ke kwiza.
11 Ntangu mu vandaka mwana ya fioti, mu vanda zonzaka mutindu mwana ya fioti, mu vanda kanisaka mutindu mwana ya fioti, mpe mu vanda yindulaka mutindu mwana ya fioti. Kasi ntangu yayi yina mu me kuma bakala ya kukula, mu ke na salaka dyaka ve bamambu mutindu mwana ya fioti.
12 Bubu yayi, beto ke na talaka na nzila ya kitalatala ya kisengo yina ke lakisaka ve bizizi pwelele. Kasi kilumbu kele, yina beto ke tala pwelele. Ntangu yayi mu me zaba ndambu, kasi kilumbu kele, yina mu ke zaba mbote-mbote mutindu Nzambi zaba munu mbote-mbote.
13 Kasi ntangu yayi, bima tatu yayi ke vanda kaka: kiminu, kivuvu, mpe luzolo. Kasi yina me lutila na kati ya bawu tatu, ni luzolo.
Banote
^ To: “Cymbal.”
^ To: “Mu kele ve mfunu.”
^ To: “Ke zonzaka ve mambu ya kukondwa buzitu.”
^ To: “Nzayilu.”
