Ya ntete na Bakorinto 14:1-40
14 Ya kulutila nyonso, beno kulisa luzolo. Kasi beno sala nyonso yina beno lenda sala* samu na kuzwa makabu ya mpeve ya santu, mingi-mingi, dikabu ya kubikula.
2 Muntu yina ke na dikabu ya kuzonza na ndinga ya nkaka ke zonzaka ve na bantu, kasi na Nzambi. Ata muntu lenda bakula mambu yina yandi ke na zonzaka samu ti yandi ke na zonzaka mansweki na nzila ya ngolo ya mpeve.
3 Kasi muntu yina ke bikulaka ke pesaka ngolo, ke kindisaka, mpe ke katulaka bantu mawa na mambu yina yandi ke zonzaka.
4 Muntu yina ke zonzaka na bandinga ya nkaka, ke kindisaka yandi mosi. Kasi muntu yina ke bikulaka, ke kindisaka kimvuka.
5 Mu ke sepela ti beno nyonso, beno vanda na dikabu ya kuzonza na bandinga ya nkaka, kasi mu zola mingi ti beno bikula. Kana muntu yina ke na zonzaka na ndinga ya nkaka bangula ve mambu yina yandi ke na zonzaka samu kimvuka kuzwa bukindi, muntu yina ke na bikulaka me lutila muntu yina ke na zonzaka na bandinga ya nkaka.
6 Bampangi, ya ke sadisa kwandi beno kana mu kwiza zonzila beno na ndinga yina beno me zaba ve? Ya ke sadisa beno kaka kana mu me natina beno luzabusu yina me katuka na Nzambi, to nzayilu, to mbikudulu, to malongi.
7 Ya ke mutindu mosi na bima yina ke ve na luzingu, yina ke salaka makelele, mutindu tuutu* to kisanzi.* Kana banoti ya miziki ke na wakanaka ve mbote-mbote, wapi mutindu muntu lenda bakula kima yina ba ke na bulaka na tuutu to na kisanzi?
8 Kana mpungi* ke na basisaka ve ndinga pwelele, nani ke yidama samu na kunwana?
9 Mutindu mosi mpe, kana beno ke na sadilaka nzonzolo yina ke mpasi na kubakula, wapi mutindu muntu ke zaba mambu yina beno ke na zonzaka? Ya tsyeleka, beno ke na zonzaka ya mpamba.
10 Ya lenda vanda na bandinga mingi na yinza, mpe ya ke ve na ndinga yina ba ke bakulaka ve.
11 Kana mu ke na bakulaka ve mbote-mbote mambu yina ba me zonza, mu ke vanda mutindu nzenza samu na muntu yina ke na zonzaka. Mpe muntu yina ke vanda mutindu nzenza samu na munu.
12 Ya ke mutindu mosi samu na beno, ntangu beno ke sosaka na nsatu ya ngolo makabu ya mpeve ya santu, beno sosa makabu yina ke pesa ngolo na kimvuka.
13 Ni na yawu, muntu yina ke zonzaka na bandinga ya nkaka fwana kusambila samu yandi lenda kubangula mambu yina yandi ke na zonzaka.
14 Kana mu sambila na ndinga ya nkaka, ya ke ni dikabu ya mpeve yina ke na munu muntu ke na sambilaka. Kasi makanisi ya munu ke na salaka ata kima.
15 Yinki mu ke sala dyaka? Mu ke sambila na dikabu ya mpeve, kasi mu ke sambila mpe samu mu bakula mambu yina mu ke na zonzaka. Mu ke yimba samu na kukembila na dikabu ya mpeve, kasi mu ke yimba mpe samu na kukembila na kusadilaka nzonzolo yina mu ke bakulaka.
16 Kana nge ke na kembilaka na dikabu ya mpeve, wapi mutindu muntu yina ke na nge ke zonza “Ameni” na lusambu ya nge ya kuvutula matondo? Yandi zaba ve mambu yina nge ke na zonzaka.
17 Ya tsyeleka, nge lenda vutula matondo na Nzambi na faso mosi ya mbote, kasi ya ke kindisa ve mpangi yina ke na nge.
18 Mu ke na vutulaka Nzambi matondo na yina mu ke na dikabu ya kuzonza na bandinga mingi kulutila beno.
19 Kasi na kati ya kimvuka, ya ke vanda mbote mu zonza bamambu tanu yina mu zaba samu na kulonga bantu ya nkaka, na kisika ya kuzonza bamambu 10 000 yina bantu me zaba ve.
20 Bampangi, beno vanda ve mutindu bana ya fioti na mutindu ya beno ya kukanisa. Kasi na mantwala ya mambu ya yimbi, beno vanda mutindu mwana ya fioti yina zaba ve mambu. Beno vanda bantu ya kuyela na mutindu ya beno ya kukanisa.
21 Ya ke ya kusonama na Musiku ti: “‘Mu ke zonza na dikanda yayi na ndinga ya banzenza, mpe na yinwa* ya banzenza. Mpe ata mutindu yina, ba ke manga kuwa munu,’ me zonza Yehova.”
22 Dikabu ya kuzonza na bandinga ya nkaka ke kidimbu samu na ba yina ke kwikilaka ve, kasi ve samu na ba yina ke kwikilaka. Kasi mbikudulu ke samu na ba yina ke kwikilaka, kasi ve samu na ba yina ke kwikilaka ve.
23 Kana kimvuka nyonso me vukana kintwadi, mpe bantu nyonso ke na zonzaka na bandinga ya nkaka, ntangu bantu ya mpamba to ba yina ke kwikilaka ve ke kota, ba ke zonza ti beno me lawuka.
24 Kasi kana beno nyonso ke na bikulaka, mpe muntu yina ke kwikilaka ve to muntu ya mpamba me kota, mambu yina yandi ke na kuwaka ke semba yandi, mpe ke sadisa yandi na kufyongonina mbote-mbote kimuntu ya yandi mosi.
25 Mansweki ya ntima ya yandi ke talana pwelele, ya ke sala ti yandi fukama, yandi kembila Nzambi, mpe yandi zonza: “Nzambi ke ya tsyeleka na kati-kati ya beno.”
26 Bampangi, yinki beto me lunga kusala? Ntangu beno ke vukanaka kintwadi, mosi ke kabula nkunga, ya nkaka ke longa, ya nkaka ke pesa luzabusu, ya nkaka ke zonza na bandinga ya nkaka, mpe ya nkaka ke bangula mambu yina ba me zonza. Beno sala nyonso yayi samu na kukindisa bampangi.
27 Kana ya ke na bantu yina ke na zonzaka na bandinga ya nkaka, ya zola vanda muntu mosi to zole. Bawu nyonso zola zonza ve mbala mosi. Mpe muntu ya nkaka zola bangula yina ba me zonza.
28 Kana ya ke ve na muntu yina ke bangula, muntu yina ke na zonzaka na ndinga ya nkaka me lunga kuvanda swi na kati ya kimvuka, mpe kuzonza kaka na yandi mosi na Nzambi.
29 Bambikudi zole to tatu lenda zonza, mpe ba ya nkaka zola sala bangolo ya kubakula yina ba ke na zonzaka.
30 Kana Nzambi me lakisa muntu mosi bamambu, ntangu yandi ke ya kuvanda na kati ya kimvuka, muntu ya ntete yina ke na zonzaka zola vanda swi.
31 Beno lenda bikula mosi na mosi, samu muntu nyonso longoka mpe kuzwa ngolo.
32 Ntangu bambikudi ke sadilaka makabu ya mpeve, ba me fwana kusala yawu na mutindu yina me lunga.
33 Samu Nzambi ke Nzambi ya kizunu, kasi ya muvusu ve.
Mutindu na bimvuka nyonso ya basantu,
34 bakento fwana kuvanda swi na kati ya bimvuka, ba me pesa ve bawu muswa ya kuzonza. Ba fwana kuvanda ya kutumama mutindu Musiku ke zonzaka yawu.
35 Kana ba ke na nsatu ya kulongoka mambu, ba fwana kuyufula babakala ya bawu na yinzo. Ya ke mambu ya nsoni samu na kento na kuzonza na kati ya kimvuka.
36 Ni na nzila ya beno kwandi mambu ya Nzambi kwizaka na kubanda? To kaka ni beno kuzwaka yawu?
37 Kana muntu kanisa ti yandi ke mbikudi, to yandi me kuzwa dikabu ya mpeve ya santu, yandi me fwana kundima ti mambu yayi mu ke na sonikilaka beno ke musiku ya Mfumu.
38 Kana muntu ke na ndimaka ve mambu yayi, ba ke ndima ve yandi.*
39 Na yawu, bampangi ya munu, beno vanda na nsatu ya ngolo ya kubikula, kasi beno nimina ve na kuzonza na bandinga ya nkaka.
40 Mambu nyonso me fwana kusalama na mutindu ya mbote mpe na mutindu yina ke ya kulunga.*
Banote
^ To: “Beno tatamana na kusosa na tiya nyonso.”
^ To: “Flûte.”
^ To: “Harpe.”
^ To: “Trompette.”
^ Na Greke: “Bikoba.”
^ To ya lenda vanda: “Kana muntu ke na kati ya kidiba, bika yandi vanda na kati ya kidiba.”
^ To: “Muvusu ve.”
