Ya ntete na Bakorinto 16:1-24
16 Ntangu yayi, na yina me tadila mbongo yina beno ke na lokotaka samu na basantu, beno fwana kulanda malongi yina mu pesaka na bimvuka ya Galate.
2 Na kilumbu ya ntete ya konso lumingu, beno me fwana kukatula mwa ndambu ya mbongo na kutadilaka yina beno ke na ngolo ya kupesa. Na mutindu yina, beno ke vanda ve na nsatu ya kulokota mbongo ntangu mu ke kwiza.
3 Ntangu mu ke kwiza, mu ke filisa babakala yina beno soolaka na mukanda ya beno samu na kunata makabu ya beno na Yeruzalemi.
4 Kasi, kana ya talana mbote samu na munu na kukwenda kuna, beto ke kwenda kuna kintwadi.
5 Mu ke kwiza na sika ya beno ntangu mu ke luta na Masedwane, samu mu ke lutila na Masedwane.
6 Mu lenda lutisa mwa ntangu na beno, ntangu ya nkaka tii na nsuka ya ntangu ya madidi. Na manima, beno ke kwenda filisa munu na nzila, konso kisika mu ke kwenda.
7 Mu ke ve na nsatu ya kutala beno kaka ntangu mu ke luta. Kasi mu ke na kivuvu ti mu ke lutisa mwa ntangu na beno, kana Yehova me zola.
8 Mu ke vanda ntete na Efeze tii na mukembo ya Pantekote,
9 samu mwelo ya nene, yina ke na pesaka nzila na kisalu me funguka na mantwala ya munu. Kasi ya ke na bambeni mingi.
10 Kana Timote kwiza, beno yamba yandi na faso ya mbote, mpe beno sala kintwadi na yandi samu yandi vanda ve na boma ntangu yandi ke vanda na beno. Yandi ke salaka kisalu ya Yehova kaka mutindu munu.
11 Beno bika ata muntu tala yandi na mutindu mosi ya yimbi. Beno vutula yandi na kizunu samu yandi kwiza na munu. Mu ke na vingilaka yandi kintwadi na bampangi ya nkaka.
12 Na yina me tadila mpangi ya beto Apolose, mu bondilaka yandi mingi samu yandi kwiza tala beno na bampangi ya nkaka. Yandi vandaka ve na dikanisi ya kukwiza tala beno ntangu yayi, kasi yandi ke kwiza kana yandi kuzwa nzila.
13 Beno kulala ve, beno telama ngolo na kiminu, beno vanda na bukindi* mpe beno vanda ngolo.
14 Beno sala mambu nyonso na luzolo.
15 Bampangi, beno zaba ti ni bantu ya yinzo ya Stefanase vandaka bandimi ya ntete na Akayi, mpe ba kukipesaka samu na kusadila basantu.
16 Mu ke na lombaka na beno na kutatamana na kusala na bantu ya mutindu yayi, mpe ba yina nyonso ke na salaka kisalu ya ngolo kintwadi na bawu.
17 Mu ke na kilengi na yina Stefanase, Fortunatuse mpe Akayikuse ke awa na munu. Ba ke na salaka na kisika ya beno samu beno kele ve awa.
18 Ya tsyeleka, ba kindisaka munu mingi, ba kindisaka mpe beno. Na yawu, beno lakisa ti beno ke zolaka bantu ya mutindu yayi.
19 Bimvuka ya Aziya me filisa beno bambote. Akila na Priska, mpe kimvuka yina ke vukanaka na yinzo ya bawu, me filisa beno bambote na nsayi nyonso na kati ya Mfumu.
20 Bampangi nyonso awa me filisa beno bambote. Beno pesana bambote na bampangi na luzolo nyonso.
21 Munu Polo, mu me filisa beno bambote yayi, yina munu mosi me sonika na maboko ya munu.
22 Kana muntu ke zolaka ve Mfumu, bika ba loka yandi. O Mfumu ya beto, kwiza!
23 Bika ti ntima ya kulutila mbote ya Mfumu Yesu vanda na beno.
24 Bika ti luzolo ya munu vanda na beno nyonso na bumosi na Kristo Yesu.
Banote
^ To: “Kibakala.”
