Ya ntete na Bakorinto 3:1-23
3 Bampangi, mu lendaka ve kuzonza na beno mutindu na bantu ya kimpeve. Mu zonzaka na beno mutindu na bantu ya kinsuni, mutindu na bana ya fioti na kati ya Kristo.
2 Malongi yina mu pesaka beno vandaka mutindu miliki, kasi ve mutindu madya ya kilo. Beno vandaka ve ya kubongama samu na madya ya kilo, mpe tii bubu yayi, beno ke ve ya kubongama.
3 Beno ke ntete na makanisi ya kimuntu, samu ti na kati ya beno ya ke na kimbanda, mpe kuswana. Ya ke na lakisaka ti beno ke na salaka bamambu mutindu bantu ya yinza yayi.
4 Ntangu mosi ke zonzaka, “Mu ke muntu ya Polo,” kasi ya nkaka ke zonzaka, “Mu ke muntu ya Apolose,” beno ke ve na salaka bamambu mutindu bantu ya yinza yayi?
5 Kasi Apolose ke nani, mpe Polo ke nani? Beto ke kaka bisadi ya mpamba yina me sadisa beno na kukuma bandimi. Beto me sala kaka yina Mfumu ya beto lombaka na beto na kusala.
6 Mu me kunda mbuma, Apolose me losa maza, mpe ni Nzambi vanda kulisa yawu.
7 Muntu yina me kunda mpe muntu yina me losa maza ke ve mfunu. Kasi ni Nzambi yina vanda kulisa yawu ke mfunu.
8 Muntu yina me kunda mpe muntu yina me losa maza, me sala na bumosi. Mpe mosi na mosi na kati ya bawu ke kuzwa difuta samu na kisalu ya yandi.
9 Beto ke bampangi ya Nzambi ya kisalu, beno ke mutindu bilanga yina Nzambi ke na kundaka, mutindu yinzo yina Nzambi ke na tungaka.
10 Mu sadilaka dikabu yina Nzambi pesaka munu samu na kutula fondasio mutindu muntu yina zaba kutunga mbote-mbote,* ntangu yayi muntu ya nkaka ke na tungaka na zulu ya yawu. Konso muntu zola sala keba na mutindu yandi ke na tungaka na zulu ya fondasio yango.
11 Nzambi me tula Yesu Kristo mutindu fondasio. Na yawu, ata muntu lenda tula fondasio ya nkaka.
12 Muntu lenda sadila wolo, mbongo, matadi ya ntalu, mabaya, matiti to nyanga samu na kutunga na zulu ya fondasio.
13 Kasi na nsuka, kisalu ya konso muntu ke talana mutindu ya kele,* samu kilumbu ke lakisa yawu pwelele. Ya ke talana pwelele na nzila ya tiya. Tiya ke lakisa wapi mutindu ya kisalu konso muntu me sala.
14 Kana kima yina muntu me tunga na zulu ya fondasio me kufwa ve, yandi ke kuzwa difuta.
15 Kana kisalu ya muntu me nyenga na tiya, muntu yango ke bikana maboko mpamba, kasi yandi mosi ke vuuka. Ya ke vanda mutindu yandi me vuuka na tiya.
16 Beno zaba ve ti beno ke tempelo ya Nzambi, mpe ti mpeve ya Nzambi ke zingaka na kati ya beno?
17 Kana muntu me mwangisa tempelo ya Nzambi, Nzambi ke kufwa yandi. Tempelo ya Nzambi ke santu, mpe ni beno ke tempelo yango.
18 Muntu yina ke kanisaka ti yandi ke muntu ya ndwenga na yinza* yayi, bika yandi kuma zoba. Ni mutindu yina yandi ke kuma na ndwenga.
19 Samu ndwenga ya yinza yayi ke buzoba samu na Nzambi. Mutindu masonoko ke zonzaka yawu: “Yandi ke kangaka bantu ya ndwenga na nzila ya mayela ya bawu mosi ya yimbi.”
20 Mpe ya ke dyaka ya kusonama: “Yehova zaba ti makanisi ya bantu ya ndwenga ke ya mpamba.”
21 Na yawu, ata muntu na kati ya beno zola bula ntulu na yina bantu lenda sala, samu bima nyonso ke ya beno.
22 Polo, Apolose, Sefase,* yinza, luzingu, lufwa, bima yina kele, to bima yina ke kwiza, bima nyonso ke ya beno.
23 Mpe beno, beno ke bantu ya Kristo, mpe Kristo ke muntu ya Nzambi.
Banote
^ To: “Ntwadisi ya bisalu yina ke na ndwenga.”
^ Na Greke: “Pwelele.”
^ Tala Yina ya zola zonza.
^ Yina ba ke bokilaka mpe Piere.
