Ya ntete na Bakorinto 5:1-13
5 Mu me kuwa ti na kati ya beno ya ke na ba yina ke salaka kinsuza.* Kinsuza yango ke na salamaka na mutindu ya kulutila yimbi yina ata makanda lenda sala ve yawu. Ba me zonzila munu ti bakala mosi ke basikaka na kento ya tata ya yandi.
2 Beno ke kwandi na kilengi ya kutala mambu ya faso yayi? Beno me bonga ve kuvanda na mawa mpe kukatula muntu yina me sala yawu na kati-kati ya beno?
3 Ata ti mu ke ve na beno kisika mosi, mu ke na beno na makanisi,* mu me sambisaka yimeni muntu yina me sala yawu, mutindu mu ke kisika mosi na beno.
4 Ntangu beno ke vukanaka na nkumbu ya Mfumu ya beto Yesu, beno zaba ti mu ke vandaka na beno na makanisi,* mpe na ngolo ya Mfumu ya beto Yesu.
5 Beno me fwana kupesa muntu ya mutindu yina na maboko ya Satana, samu na kukatula masumu ya yandi na kati-kati ya beno. Ya ke sala ti kimvuka bumba dikanisi ya mbote na yina me tadila disumu na kilumbu ya Mfumu.*
6 Ya ke ve mbote beno bula ntulu na mambu yayi. Beno zaba ve ti mwa disumu ya fioti ke mutindu levire yina lenda mwangana na kati ya pate nyonso?
7 Beno katula levire ya ntama, na yawu beno ke kuma pate ya malu-malu samu levire ke vanda dyaka ve na kati ya beno. Ya tsyeleka, Kristo pesaka luzingu ya yandi mutindu munkayulu, yandi kumaka mwana ya dimeme ya beto ya pake.
8 Ni na yawu, beto sala ve mukembo ya pake na levire ya ntama to na levire ya masumu to ya mambu ya yimbi. Kasi beto sala yawu na mampa yina ke ve na levire, mampa ya kuvedila mpe ya matsyeleka.
9 Na mukanda ya munu, mu sonikilaka beno na kuvanda ve kintwadi na bantu yina ke salaka kinsuza.*
10 Mu vanda zonzila ve kaka bantu ya yinza yayi, yina ke salaka kinsuza,* ke sosaka kuzwa mingi, ke miyibi, ke sambilaka biteki. Kana ni faso yina, ya zola zonza ti beno zola vanda dyaka ve na yinza yayi.
11 Kasi ntangu yayi, mu ke na sonikilaka beno samu na kuzonza na beno na kuvanda ve kintwadi na muntu yina ba ke bokilaka mpangi, yina ke salaka kinsuza,* yina ke na lukoso, yina ke sambilaka biteki, yina ke fingaka,* yina ke kolaka malafu to yina ke muyibi. Mpe beno fwana kudya ata fioti ve na muntu ya mutindu yayi.
12 Ya ke kwandi ni na munu na kusambisa bantu yina ke na ngaanda ya kimvuka? Ni beno ve zola sambisa bantu yina ke na kati ya kimvuka,
13 ntangu Nzambi ke na sambisaka bantu ya ngaanda? Beno me fwana kukatula muntu ya yimbi na kati ya beno.
Banote
^ Na Greke, por·nei′a. Tala Yina ya zola zonza.
^ Na Greke: “na mpeve”
^ To: “Mu ke na beno na mpeve.”
^ Na Greke: “Ya ke sala ti mpeve ya mbote ya kimvuka lenda kuvuuka na kilumbu ya Mfumu.”
^ Na Greke, por·nei′a. Tala Yina ya zola zonza.
^ Na Greke, por·nei′a. Tala Yina ya zola zonza.
^ Na Greke, por·nei′a. Tala Yina ya zola zonza.
^ To: “Yina ke lwalisaka bampangi na kuzonza.”
