Ya ntete na Bakorinto 6:1-20
6 Nani na kati ya beno kana yandi ke na wisanaka ve na mpangi ya nkaka, ke meka kukwenda na tribinale na mantwala ya bantu yina ke kwikilaka ve, kasi ve na mantwala ya basantu?
2 Ntembe ve beno zaba ti basantu ke sambisa yinza. Kana beno ke sambisa yinza, beno ke ve na makoki ya kusambisa bamambu ya fioti-fioti?
3 Beno zaba ve ti beto ke sambisa bambazi? Na yawu, samu na yinki beno ke na lendaka ve kuyidika bamambu ya fioti-fioti ya luzingu yayi?
4 Kana beno ke na sosaka kuyidika bamambu ya luzingu yayi, samu na yinki beno ke na nataka yawu na mantwala ya bazuzi yina ke ve bantu ya kimvuka?
5 Mu ke na zonzaka samu na kufwisa beno nsoni. Ya ke ve na muntu na kati ya beno yina ke na ndwenga samu na kusambisa bampangi ya yandi?
6 Kasi mpangi mosi ke na nataka mpangi ya nkaka na tribinale mpe ke na fundaka yandi na mantwala ya bantu yina ke kwikilaka ve.
7 Ya tsyeleka, kana beno ke na nataka bampangi ya nkaka na tribinale, beno me kubwa yimeni. Samu na yinki beno ke na bikaka ve kaka ti ba sala beno yimbi? Samu na yinki beno ke na bikaka ve kaka ti ba laba beno?
8 Kasi, ni beno bantu ke na salaka ba ya nkaka yimbi, mpe ke na labaka bawu. Beno ke na salaka yawu na bampangi ya beno.
9 Beno zaba ve ti ba yina ke salaka mambu ya yimbi ke kota ve na Kimfumu ya Nzambi? Beno vunama ve. Bantu yina ke salaka kinsuza,* bantu yina ke sambilaka biteki, bantu yina ke zingaka na busafu,* babakala yina ke vukisaka nzutu na babakala ya nkaka.*
10 Miyibi, bantu yina ke na lukoso, bantu yina ke kolaka malafu, bantu yina ke fingaka,* mpe bantu yina ke vunaka bampangi, ke kota ve na Kimfumu ya Nzambi.
11 Ni mutindu yina ba ya nkaka na kati ya beno vandaka. Kasi ntangu yayi, ba me sukula beno, ba me kumisa beno santu, ba me ndima beno mutindu bantu ya lunungu* na nkumbu ya Mfumu Yesu Kristo, mpe na mpeve ya Nzambi ya beto.
12 Mu ke na muswa ya kusala mambu nyonso, kasi mambu nyonso ve ke mfunu. Mu ke na muswa ya kusala mambu nyonso, kasi mu ke bika ata kima mosi ve yala* munu.
13 Madya ke samu na kivumu, mpe kivumu ke samu na madya, kasi Nzambi ke kufwa bima zole yayi. Nzutu ke ve samu na kusala kinsuza,* kasi samu na kisalu ya Mfumu, mpe Mfumu ke samu na nzutu.
14 Nzambi vumbulaka Mfumu na lufwa, yandi ke vumbula mpe beto na lufwa na ngolo ya yandi.
15 Beno zaba ve ti banzutu ya beno ke binama ya nzutu ya Kristo? Mu ke katula kwandi binama ya nzutu ya Kristo, mpe kuvukisa yawu na nzutu ya kento yina ke salaka kindumba? Ata fioti ve.
16 Beno zaba ve ti, muntu yina ke vukisa nzutu na kento yina ke salaka kindumba ke kuma nzutu mosi na yandi? Samu Nzambi me zonza: “Bawu zole ke kuma nzutu mosi.”
17 Kasi muntu yina ke na bumosi na Mfumu, ke na bumosi na yandi na mpeve.
18 Beno kima kusala kinsuza.* Konso disumu ya nkaka yina muntu lenda sala ke talisaka ve nzutu ya yandi mpasi. Kasi muntu yina ke salaka kinsuza, ke talisaka nzutu ya yandi mosi mpasi.
19 Beno zaba ve ti nzutu ya beno ke tempelo samu mpeve ya santu zinga na kati ya beno? Mpeve yango me katuka na Nzambi. Beno ke bantu ya Nzambi,
20 samu Nzambi futaka ntalu mingi samu na beno. Na mambu nyonso, beno sadila banzutu ya beno samu na kupesa yandi nkembo.
Banote
^ Na Greke, por·nei′a. Tala Yina ya zola zonza.
^ To: “Salaka kinsuza.” Na Greke, moi·khei′a. Tala Yina ya zola zonza.
^ Na Greke, awa ba ke sadilaka banzonzolo zole. Ya ntete, ba yina ke kumaka neti bakento, mpe ke ndimaka babakala ya nkaka vukisa nzutu na bawu. Ya zole, babakala yina ke soolaka kuvukisa nzutu na babakala na kisika ya kuvukisa nzutu na bakento.
^ To: “Lwalisaka na nzonzolo.”
^ To: “Kudedama.”
^ To: “Twadisa.”
^ Na Greke, por·nei′a. Tala Yina ya zola zonza.
^ Na Greke, por·nei′a. Tala Yina ya zola zonza.
