Ya ntete na Bakorinto 7:1-40
7 Ntangu yayi, mu ke pesa mvutu na byuvu yina beno yufulaka munu. Ya ke mbote na bakala na kukwela ve, mpe na kuvukisa ve nzutu na kento.
2 Kasi, samu bunsuza* me mwangana mingi. Na yawu konso bakala fwana kuvanda na kento ya yandi, mpe konso kento fwana kuvanda na bakala ya yandi.
3 Bakala fwana kulungisa bansatu ya kuvukisa nzutu ya kento ya yandi, kento fwana kusala mpe mutindu mosi samu na bakala ya yandi.
4 Kento ke ve na lutumu na zulu ya nzutu ya yandi, kasi ni bakala ya yandi ke na yawu. Mutindu mosi mpe, bakala ke ve na lutumu na zulu ya nzutu ya yandi, kasi ni kento ya yandi ke na yawu.
5 Beno fwana kumanga ve kulungisa bansatu ya bampangi ya kuvukisa nzutu. Beno lenda manga kusala yawu kana beno zole me wisana samu na kulutisa mwa ntangu na kusambila, kasi na manima beno vukana dyaka. Na mutindu yina, Satana ke lenda ve kumeka beno samu beno me lenda kukutika nzutu.
6 Mu me zonza mambu nyonso yayi samu beno zaba mambu yina beno lenda sala, kasi ya ke ve musiku.
7 Mu zola ti babakala nyonso vanda ve ya kukwela mutindu munu. Kasi mosi na mosi ke na dikabu yina Nzambi me pesa yandi. Muntu nyonso na kati ya beto ke sadilaka Nzambi na bafaso mingi.
8 Ntangu yayi mu ke na zonzaka na ba yina ke ve ya kukwela mpe na mifwidi: Ya ke mbote ba bikana kaka faso yina, mutindu munu.
9 Kasi kana ba ke na lendaka ve kukutika nzutu, bika ba kwela, samu ya ke mbote na kukwela na kisika ya kuvanda na nsatu ya ngolo ya kuvukisa nzutu.
10 Na ba yina ke ya kukwela, mu me pesa musiku yayi: Kento fwana kukabuka ve na bakala ya yandi. Musiku yayi me katuka na Mfumu.
11 Kasi, kana yandi kabuka na bakala ya yandi, yandi fwana kukwela dyaka ve, to yandi fwana kuvutuka na bakala ya yandi. Bakala mpe fwana kubika ve kento ya yandi.
12 Yayi ni mambu mu ke na zonzaka na ba ya nkaka, munu, kasi Mfumu ve: Kana mpangi mosi ke na kento yina ke ve mundimi, mpe kento yango me zola kuvanda na yandi, yandi fwana kubika ve kento ya yandi.
13 Mpe kana kento mosi ke na bakala yina ke ve mundimi, mpe bakala yango me zola kuvanda na yandi, yandi fwana kubika ve bakala ya yandi.
14 Samu dikwela ya bakala yina ke ve mundimi ke santu samu na kento ya yandi. Dikwela ya kento yina ke ve mundimi ke santu samu na bakala ya yandi yina ke mundimi, kana mutindu yina ve, bana ya beno zola vanda ve santu na meso ya Nzambi, kasi ntangu yayi ba ke santu.
15 Kana muntu yina ke ve mundimi me baka mukanu ya kufwa dikwela, bika yandi kwenda. Mpangi ya bakala to ya kento ke ve na nsatu ya kuvanda kaka na yandi kana ya salama mutindu yina. Nzambi me bokila beno na kuvanda na kizunu.
16 Wapi mutindu nge kento, nge ke zaba kana nge lenda vuukisa bakala ya nge? Nge bakala, wapi mutindu nge ke zaba kana nge lenda vuukisa kento ya nge?
17 Ata faso yina, kaka mutindu Yehova pesaka muntu nyonso dikabu, bika muntu nyonso tatamana na kuzinga na mutindu yina yandi vanda zinga ntangu Nzambi bokilaka yandi. Yayi ni musiku mu ke na pesaka na bimvuka nyonso.
18 Kana Nzambi me bokila* muntu yina ba zengaka kibakala, yandi zola kuma ve mutindu muntu yina ba ke ve ya kuzenga kibakala. Kana ba me bokila muntu yina ke ve ya kuzengisa kibakala, yandi zola kuma ve mutindu muntu yina ba ke ya kuzenga kibakala.
19 Mambu ya mfunu ke ve ni kuvanda ya kuzenga kibakala, to kuvanda ve ya kuzenga kibakala. Kasi mambu ya mfunu ni kutumama na misiku ya Nzambi.
20 Muntu nyonso fwana kuvanda kaka mutindu yandi vandaka ntangu ba bokilaka yandi.
21 Kana nge vandaka kisadi ntangu ba bokilaka nge, kubika ve ya nyongisa nge. Kasi kana nge lenda kuma na kimpwanza, sadila dikabu yina.
22 Muntu nyonso yina vandaka kisadi ntangu ba bokilaka yandi, me kuma kisadi yina ke na kimpwanza, kisadi ya Mfumu. Mutindu mosi muntu yina ba bokilaka ntangu yandi vandaka na kimpwanza, me kuma kisadi ya Kristo.
23 Ba sumbaka beno ntalu mingi, na yawu beno bika kukuma bisadi ya bantu.
24 Bampangi, beno fwana kuvanda na mantwala ya Nzambi, kaka mutindu beno vandaka ntangu yandi bokilaka beno.
25 Na yina me tadila ba yina zaba ntete ve babakala to zaba ntete ve bakento, mu ke ve na musiku yina me katuka na Mfumu. Kasi mu ke na pesaka dikanisi ya munu mutindu muntu ya kukwikama, muntu yina Mfumu lakisaka ntima ya mawa.
26 Na bantangu ya mpasi yayi, mu kanisa ti ya ke vanda mbote na bakala na kuvanda kaka faso yandi kele.
27 Nge ke na kento, kusosa ve kukabuka na yandi. Nge ke ve na kento, kusosa ve kuzwa kento.
28 Kasi kana nge me kwela, nge me sala ve disumu. Kana muntu yina zaba ntete ve babakala me soola kukwela, muntu yango me sala ve disumu. Kasi ba yina ke kwela ke kutana na bankwamusu na luzingu ya bawu. Munu, mu ke na sosaka kusadisa beno na kukutana ve na bamambu ya mpasi yina.
29 Bampangi, mambu mu ke na zonzaka ni yayi: Ntangu yina me bikana ke kaka fioti. Katuka ntangu yayi, bika ti ba yina ke na bakento zinga mutindu ba ke ve na bakento.
30 Ba yina ke na dilaka, fwana kuvanda mutindu ba yina ke ve na dilaka. Ba yina ke na nsayi, fwana kuvanda mutindu ba yina ke ve na nsayi. Ba yina ke na sumbaka, fwana kuvanda mutindu ba yina ke na ata kima.
31 Ba yina ke na sadilaka mpe bima ya yinza yayi, fwana kuvanda mutindu ba ke ve na sadilaka yawu na mambu nyonso, samu bamambu ya yinza yayi ke na sobaka.
32 Ya tsyeleka, mu zola ti beno vanda ve na manyongi. Bakala yina ke ve ya kukwela ke sosaka bamambu ya Mfumu, mpe faso yandi lenda sepelisa Mfumu.
33 Kasi bakala yina ke ya kukwela ke sosaka bamambu ya yinza mpe faso yandi lenda sepelisa kento ya yandi,
34 mpe yandi kele ya kukabuka. Mutindu mosi mpe, kento yina ke ve ya kukwela, mpe yina zaba ntete ve babakala, ke sosaka bamambu ya Mfumu samu yandi vanda santu na nzutu mpe na makanisi. Kasi kento yina ke ya kukwela ke sosaka bamambu ya yinza mpe faso yandi lenda sepelisa bakala ya yandi.
35 Mu ke na zonzaka yawu samu na mbote ya beno mosi, kasi ve samu na kutula beno singa na laka.* Mu zola beno sala mambu yina ke ya kulunga samu beno lenda kusadila Mfumu ntangu nyonso, kukondwa kutula makanisi na mambu ya nkaka.
36 Kana muntu me yela na nzutu mpe na faso ya kukanisa, mpe kana yandi ke na talaka ti yandi ke na salaka mambu ya yimbi na kuvanda ve ya kukwela, yandi lenda sala yina yandi me zola kusala, yandi ke sala ve disumu, bika yandi kwela.
37 Kasi, kana muntu ke na kundima ti yandi ke ve na nsatu ya kukwela, kana yandi ke na lendaka kukanga bansatu ya nzutu ya yandi, mpe me baka mukanu na ntima ya yandi ya kukwela ve, yandi ke sala mambu ya mbote.
38 Na yawu, muntu yina me kwela me sala mbote, kasi muntu yina me kwela ve me sala mbote ya kulutila.
39 Kento me fwana kuvanda kaka na bakala ya yandi ntangu nyonso yina bakala ya yandi ke moyo. Kasi kana bakala ya yandi me kufwa, yandi lenda soola kukwelana na muntu ni muntu yina yandi me zola, kasi kaka na kisadi ya Mfumu.
40 Samu na munu, yandi ke vanda na kilengi mingi kana yandi me vanda kaka faso yina. Ya tsyeleka, mu kanisa ti munu mpe, mu ke na mpeve ya Nzambi.
Banote
^ Na ndinga ya Greke, pornéïa. Tala Yina ya zola zonza.
^ To: “Soola.”
^ To: “Kutudila beno mutambu.”
