Ya ntete na Bakorinto 8:1-13
8 Ntangu yayi, mu ke zonzila mambu yina me tadila madya yina ba ke pesaka na biteki. Beto nyonso zaba mambu yayi. Muntu yina ke kanisaka ti yandi zaba mingi ke kumaka na lulendo, kasi muntu yina ke na luzolo ke kindisaka bampangi.
2 Kana muntu me kanisa ti yandi ke na bamvutu na mambu nyonso, yandi zaba ve yawu mbote-mbote mutindu yandi me lunga kuzaba yawu.
3 Kana muntu ke zolaka Nzambi, Nzambi zaba yandi.
4 Na yina me tadila kudya madya yina ba ke pesaka na biteki, ya tsyeleka beto zaba ti kiteki ke ve nzambi, mpe ti ya ke kaka na Nzambi mosi.
5 Ya ke na ba yina ba ke bokilaka banzambi, ya vanda na zulu to na ntoto. Ya ke mpe na bantu mingi yina bantu ke bakilaka mutindu “banzambi” mpe “bamfumu.”
6 Kasi samu na beto, ya ke kaka na Nzambi mosi, Tata. Ni yandi yidikaka bima nyonso, mpe beto ke zingaka samu na yandi. Samu na beto ya ke kaka na Mfumu mosi, Yesu Kristo. Ni na nzila ya yandi bima nyonso salamaka, mpe beto ke na luzingu na nzila ya yandi.
7 Kasi, bantu nyonso ve ke bakulaka mambu yayi. Bantu ya nkaka, samu ba vanda sambilaka biteki, ba ke kudyaka madya yayi mutindu bima yina ba pesaka na munkayulu na biteki. Mpe ndinga yina ke zonzaka na bantima ya bawu samu ya ke ve ngolo, ke kwamisaka bawu.
8 Kasi ni madya ve ke salaka ti beto kuma pene-pene na Nzambi. Kana beto kudya ve, beto ke kondwa ata kima, mpe kana beto kudya, beto ke kuzwa ata kima.
9 Beno sala keba samu luve ya beno ya kusoola kuma ve mutindu kima yina ke budisaka dibaku, samu na ba yina ke ve ngolo.
10 Kana muntu me tala nge, nge yina me zaba ti biteki ke bima ya mpamba, nge ke ya kuvanda na kati ya tempelo ya kiteki mpe nge ke na kudyaka, kimuntu ya kati ya muntu yango yina ke ve ngolo lenda nata yandi na kudya mpe madya yina ba me pesa na biteki.
11 Ata nge zaba ti ya ke ve yimbi na kudya madya yayi, nge ke na kufwaka kiminu ya muntu yina ke ve ngolo. Kuzimbana ve, yandi ke mpangi ya nge, Kristo kufwaka mpe samu na yandi.
12 Ntangu beno ke salaka disumu ya mutindu yayi na bampangi ya beno mpe ke lwalisaka kimuntu ya bawu ya kati yina ke ve ngolo, beno ke salaka disumu na mantwala ya Kristo.
13 Ni na yawu, mu ke kudya dyaka ata fioti ve musuni kana madya yina mu ke na kudyaka ke na kufwaka kiminu ya mpangi ya munu. Mu me manga kusala kima ni kima yina lenda kufwa kiminu ya mpangi ya munu.
