Ya ntete na Bakorinto 9:1-27
9 Mu ke ve na kimpwanza ya kusala yina mu zola? Mu ke ve ntumwa? Mu talaka ve Mfumu ya beto Yesu? Beno ke ve mbuma ya kisalu ya munu na Mfumu?
2 Ata ti ba ya nkaka ke bakilaka ve munu mutindu ntumwa, samu na beno, ya tsyeleka, mu ke ntumwa. Beno ke kidimbu yina ke lakisaka ti mu ke ntumwa ya Mfumu.
3 Mambu yina mu ke na zonzaka na ba yina ke na sambisaka munu ni yayi:
4 Beto ke ve na muswa* ya kudya mpe kunwa bima yina bampangi ke pesaka beto?
5 Beto ke na muswa ya kukwela kento yina ke mundimi mpe kunata yandi na beto, ni mutindu yina ve? Faso bantumwa ya nkaka, bampangi ya Mfumu mpe Sefase* ke salaka mpe yawu, ni mutindu yina ve?
6 Kaka munu na Barnabasi me lunga kusala samu na kuzinga?
7 Wapi soda ke lungisaka bansatu ya yandi na mbongo ya yandi mosi? Nani ke kundaka bilanga ya vinu, mpe ke kudyaka ve bambuma ya yawu? Wapi muntu yina ke bumbaka mameme, mpe ke kunwaka ve miliki yina ke katukaka na mameme ya yandi?
8 Mu ke na zonzilaka ve mambu yayi na kulandaka makanisi ya bantu. Musiku mpe ke zonzaka bamambu yayi.
9 Samu ya ke ya kusonama na Musiku ya Moyize ti: “Nge fwana kukanga ve yinwa ya ngombe samu yandi kudya ve mbuma ntangu yandi ke na dyataka yawu samu na kukatula yawu bampusu. Nzambi pesaka kwandi musiku yayi kaka samu na bangombe?
10 To ya ke samu na beto yandi zonzaka yawu? Ya tsyeleka, ba sonikaka yawu samu na mbote ya beto. Ya vanda muntu yina ke sabaka* ntoto, mpe yina ke katulaka bampusu ya bambuma, bawu zole fwana kusala yawu na kivuvu ya kuzwa difuta ya bawu.
11 Kana beto me kunda bima ya kimpeve na kati-kati ya beno, ya ke kwandi yimbi kana beto kuzwa lubakusu ya kinsuni na maboko ya beno?
12 Kana bantu ya nkaka ke na muswa ya kuzwa lubakusu na maboko ya beno, beto ke ve na muswa yina kuluta bawu? Ata mutindu yina, beto me sadila ve muswa yayi. Kasi beto me kanga ntima na bampasi ya mutindu na mutindu samu na kukanga ve muntu nzila ya kukwikila na nsangu ya mbote yina me tadila Kristo.
13 Ntembe ve, beno zaba ti babakala yina ke salaka na tempelo ke kudyaka bima yina bantu ke nataka na tempolo. Mpe babakala yina ke salaka na kisika ya kuyoka minkayulu ke kuzwaka ndambu ya bima yina ba ke pesaka na munkayulu.
14 Mutindu mosi mpe, Mfumu zonzaka na ba yina ke samunaka nsangu ya mbote na kuzinga na nzila ya nsangu ya mbote.
15 Mu sadilaka ata fioti ve bamambu yayi. Mpe mu ke na sonikilaka ve beno mambu yayi samu mu ke na nsatu ya kima yina ke katuka na maboko ya beno ntangu yayi. Ya ke vanda mbote mu kufwa na kisika ya kubika ti muntu mosi katula munu mambu yina mu ke na yawu ya kubula ntulu.
16 Kana mu ke na samunaka nsangu ya mbote, mu ke ve na mambu yina ke nata munu na kuvanda na lulendo. Ya ke mambu yina mu me fwana kusala. Kyadi mingi na munu kana mu samuna ve nsangu ya mbote.
17 Kana mu sala yawu na ntima ya munu nyonso, mu ke kuzwa matabisi. Kasi ata mu sala ve yawu na ntima ya munu nyonso, ba me pesaka munu kisalu mosi ya mfunu.
18 Na yawu, wapi yina ke difuta ya munu? Ya ke ni kumwangisa nsangu ya mbote na ntima ya munu nyonso, mpe kusala yawu ya mpamba. Na mutindu yina, mu ke luta ve ndilu na bweso yina mu ke na yawu mutindu muntu yina ke samunaka nsangu ya mbote.
19 Ata ti mu ke muntu yina ke na kimpwanza, mu me kumisa munu mosi kisadi ya bantu nyonso. Mu me sala yawu samu na kubenda bantu mingi.
20 Na Bazwife mu me kuma mutindu Zwife samu na kubenda Bazwife. Mu ke zingaka mutindu mu ke na yisi ya Musiku, samu na kubenda ba yina ke na yisi ya Musiku. Mu ke salaka yawu samu na kubenda ba yina ke na yisi ya Musiku, ata ti mu ke ve na yisi ya Musiku.
21 Mu me kuma mutindu muntu yina ke ve na musiku, samu na kubenda ba yina ke ve na musiku. Mu ke salaka yawu ata ti ntangu yayi mu ke landaka musiku ya Nzambi, mpe musiku ya Kristo ke yalaka na zulu ya munu.
22 Na ba yina ke ya kulemba, mu me kuma ya kulemba samu na kubenda bawu. Mu me kuma kima nyonso samu na bantu ya mutindu nyonso. Samu, na mutindu nyonso mu lenda kuvuukisa ba ya nkaka.
23 Mu me sala mambu nyonso samu na nsangu ya mbote, samu na kuzabisa yawu na bantu ya nkaka.
24 Bantu yina ke kimaka mbangu samu na kuzwa difuta, bawu nyonso ke kimaka, kasi kaka muntu mosi ke kuzwaka difuta. Na yawu, beno kima samu na kununga yawu.
25 Bantu nyonso yina ke bongamaka samu na kusala bansaka na kuzwa difuta na nsuka, me fwana kukutika nzutu na mambu nyonso. Bawu, ba ke salaka yawu samu na kuzwa yimpu* yina ke beba. Kasi beto, beto ke salaka yawu samu na kuzwa yimpu yina ke beba ata fioti ve.
26 Mu ke na kimaka ve kidi-kidi, mu ke na bulaka ve makofi na kisika yina kima kele ve.
27 Kasi mu ke bulaka nzutu ya munu makofi* mpe mu ke nataka yawu mutindu ngaamba, samu ti na manima ya kulonga bantu ya nkaka, mu kuma ve munu mosi na mutindu nyonso, muntu yina Nzambi ke ndimaka ve.
Banote
^ Na Greke: “lutumu.”
^ Yina ba ke bokilaka mpe Piere.
^ To: “Kuyidika ntoto na bilanga samu na kukunda.”
^ To: “Couronne.”
^ To: “Ke sembaka nzutu ya munu.”
