Ya ntete na Batesalonika 1:1-10
1 Yayi mukanda me katuka na Polo, na Silvanuse* mpe na Timote, samu na kimvuka ya Tesalonika na bumosi na Nzambi Tata mpe na Mfumu Yesu Kristo.
Bika ti ntima ya kulutila mbote mpe kizunu vanda na beno.
2 Beto ke vutulaka ntangu nyonso matondo na Nzambi ntangu beto ke zonzilaka beno nyonso na balusambu ya beto.
3 Ntangu nyonso beto ke bambukaka moyo na kisalu ya beno ya kukwikama, na kisalu ya ngolo yina beno ke salaka na luzolo, mpe na mutindu beno ke na kangamaka samu na kivuvu ya beno na Mfumu ya beto Yesu Kristo, na mantwala ya Nzambi ya beto mpe Tata.
4 Bampangi yina Nzambi ke zolaka, beto zaba ti yandi me soola beno,
5 samu nsangu ya mbote yina beto ke na samunaka kwizaka ve na sika ya beno kaka na nzonzolo, kasi mpe na ngolo mpe na mpeve ya santu mpe na kiminu ya ngolo, kaka mutindu beno zaba wapi mutindu ya bantu beto kumaka na kati-kati ya beno samu na mbote ya beno.
6 Beno ndimaka nsangu ya mbote na kati ya bankwamusu mingi na kilengi ya mpeve ya santu. Na mutindu yina, beno vanda dyatila mutindu Mfumu mpe mutindu beto.
7 Ni na yawu, beno kumaka kifwani ya bandimi nyonso ya Masedwane mpe ya Akayi.
8 Mambu ya tsyeleka ke ti, nsangu ya Yehova katukaka na beno mpe mwanganaka kaka ve na Masedwane mpe na Akayi, kasi nsangu ya kiminu ya beno na Nzambi me mwangana na bisika nyonso. Na yawu, beto ke ve na nsatu ya kuzonza kima.
9 Samu bantu bawu mosi ke na tatamanaka na kuzonzila kukutana ya beto ya ntete na beno, mpe mutindu beno kwendaka na sika ya Nzambi ntangu beno bikaka lusambu ya biteki samu na kukuma bisadi ya Nzambi ya moyo mpe ya tsyeleka,
10 mpe samu beno vingila Mwana ya yandi katuka na zulu, Mwana yina yandi vumbulaka na lufwa, ya zola zonza, Yesu, yina ke vuukisa beto na nkele yina ke na kwizaka.
Banote
^ Yina ba ke bokilaka mpe Silase
