Ya ntete na Batesalonika 2:1-20
2 Bampangi, ya tsyeleka beno me zaba ti, ntangu beto kwizaka tala beno, beno kondwaka ve kubuta bambuma.
2 Ata ti ba talisaka ntete beto mpasi, mpe ba fwisaka beto nsoni na bwala ya Filipi, mutindu beno zaba, beto kuzwaka bukindi na Nzambi ya beto samu na kuzonzila beno nsangu ya mbote ya Nzambi na kati ya bankwamusu mingi.
3 Mambu yina beto zonzilaka beno ke ve ya luvunu mpe beto zonzilaka ve beno yawu na makanisi ya yimbi to samu na kuvuna beno.
4 Kasi samu Nzambi ndimaka beto, mpe pesaka beto kisalu ya kuzonzila nsangu ya mbote, beto ke zonzaka ve yawu samu na kusepelisa bantu, kasi samu na kusepelisa Nzambi yina ke talaka mbote-mbote bantima ya beto.
5 Beno zaba ti ata mbala mosi ve beto basisaka mambu ya kitoko samu na kuzwa beno, ata mbala mosi ve beto sosaka kuvanda bantu ya mbote samu na kuzwa bima. Nzambi me zaba mambu yayi mbote-mbote.
6 Beto sosaka mpe ve nkembo na bantu, ya vanda na beno to na bantu ya nkaka, ata ti beto zola vanda kilo ya nene samu beto ke bantumwa ya Kristo.
7 Kasi, beto kumaka bantu ya lembami na kati-kati ya beno, mutindu mama yina ke pesaka bana ya yandi mabene mpe ke kipeke bawu na luzolo nyonso.
8 Na yawu, samu beto ke na luzolo mingi samu na beno, beto bakaka mukanu* kaka ve ya kuzonzila beno nsangu ya mbote ya Nzambi, kasi mpe ya kupesa beno luzingu* ya beto, samu beno kumaka bantu yina beto ke zolaka mingi.
9 Bampangi, beno ke na bambukilaka moyo kisalu ya beto ya ngolo mpe mpasi yina beto talaka. Beto vanda salaka mpimpa na ntangu samu na kuvanda ve kilo ya nene samu na ata muntu mosi ve na kati ya beno, ntangu beto vanda zonzila beno nsangu ya mbote ya Nzambi.
10 Beno ke bambangi, Nzambi mpe ke mbangi ti beto vandaka bantu ya kukwikama, ya lunungu mpe yina vandaka ve na mambu ya kusemba na meso ya beno bandimi.
11 Beno zaba mbote-mbote ti beto bikaka ve na kukindisa beno, na kubomba beno mpe na kukebisa beno mutindu tata ke salaka yawu samu na bana ya yandi.
12 Beto salaka yawu samu beno tatamana na kutambula na mutindu ya kulunga na meso ya Nzambi, yina ke na bokilaka beno na Kimfumu ya yandi mpe na nkembo ya yandi.
13 Ni na yawu beto mpe ke vutulaka ntangu nyonso matondo na Nzambi samu ntangu beno kuwaka mambu ya Nzambi yina beto zonzilaka beno, beno ndimaka ve yawu mutindu mambu ya bantu, kasi mutindu ya kele ya tsyeleka, mambu ya Nzambi, yina ke salaka mpe na kati ya beno bantu ya kukwikama.
14 Bampangi, beno kumaka kifwani ya kimvuka ya Nzambi yina ke na Zude, na bumosi na Kristo Yesu, samu bantu ya bwala ya beno talisaka beno mpasi ya mutindu mosi na yina Bazwife ke talisaka bawu.
15 Ni bawu mpe kufwaka Mfumu Yesu, mimbikudi, mpe ni bawu talisaka beto mpasi. Dyaka, ba ke sepelisaka ve Nzambi, kasi ba kele bambeni ya bantu nyonso.
16 Ba ke sosaka kukanga beto nzila ya kuzabisa bantu ya makanda nsangu yina lenda sadisa bawu na kuvuuka. Ni na mutindu yina ba ke kumisaka ntangu nyonso masumu ya bawu mingi. Kasi nsuka-nsuka, Nzambi ke lakisa bawu nkele ya yandi.
17 Bampangi, ntangu beto vandaka ya kukabwana na beno kaka samu na mwa ntangu fioti (na meso, kasi na bantima ya beto ve), beto salaka nyonso samu na kutalana na beno,* samu beto vandaka na nsatu ya ngolo ya kutala beno.
18 Ni na yawu beto zola kwiza na sika ya beno, ee munu Polo, mu mekaka ve kaka mbala mosi, kasi bambala zole, kasi Satana kangaka beto nzila.
19 Na ntangu Mfumu Yesu ke kwiza, wapi yina ke vanda kivuvu ya beto, kilengi ya beto mpe yimpu* ya beto ya nsayi na mantwala ya yandi? Ya ke ve ni beno?
20 Beno ke ya tsyeleka nkembo mpe kilengi ya beto.
Banote
^ Na Greke: “Vandaka na kilengi.”
^ To: “Mwela.”
^ Na Greke: “Kutala bizizi ya beno.”
^ To: “Couronne.”
