Ya ntete na Batesalonika 3:1-13
3 Na yawu, ntangu beto vanda lenda dyaka ve kukanga ntima, beto talaka ti ya ke mbote beto bikana beto mosi na bwala ya Atene.
2 Beto filisaka Timote mpangi ya beto mpe kisadi ya Nzambi yina ke samunaka nsangu ya mbote ya Kristo samu na kukindisa beno mpe kupesa beno ngolo samu na kiminu ya beno,
3 samu bankwamusu yayi ningisa ata muntu. Beno zaba beno mosi ti beto lenda kima ve bamambu ya mutindu yayi,
4 samu ntangu beto vandaka na beno, beto zonzilaka beno ti na mantwala beto zola kutana na bankwamusu, mpe ni yawu salamaka mutindu beno zaba yawu.
5 Ni yawu yina, ntangu mu lendaka dyaka ve kukanga ntima, mu filisaka beno Timote samu na kuzwa bansangu ya kiminu ya beno. Mu vandaka na boma ti mutantu meka beno mpe kisalu ya beto zola vanda kisalu ya mpamba.
6 Kasi ntangu yayi Timote me vutuka na sika ya beto mpe me pesa beto bansangu ya mbote ya kiminu mpe luzolo ya beno. Yandi me zabisa beto ti beno ke na tatamanaka na kubambukila beto moyo na mbote nyonso, mpe ti beno ke na nsatu ya kulutila ya kutala dyaka beto, mutindu beto mpe ke na nsatu ya kutala dyaka beno.
7 Ni na yawu bampangi, na kati ya mawa mpe bampasi ya beto nyonso, beto kuzwaka bukindi samu na beno mpe samu na lukwikulu yina beno ke lakisaka.
8 Ntangu yayi beto lenda tatamana na kuzinga kana beno vanda ya kutelama ngolo na Mfumu.
9 Wapi mutindu beto lenda vutula Nzambi matondo samu na beno, mpe samu na kilengi ya mingi yina beno ke pesaka beto na mantwala ya Nzambi ya beto?
10 Mpimpa na ntangu beto ke bondilaka na bukindi samu beto lenda kutala beno* mpe kupesa beno yina ke na kondwaka na kiminu ya beno.
11 Bika ti Nzambi ya beto mpe Tata yandi mosi mpe Mfumu ya beto Yesu kuyidikila beto nzila ya kukwiza na sika ya beno.
12 Dyaka, bika ti Mfumu sala ti beno kula, ee beno kula na faso ya kulutila na luzolo samu na bampangi mpe na mambu nyonso, kaka mutindu beto ke salaka yawu samu na beno.
13 Na mutindu yina, beno ke vanda ya kusikama na bantima ya beno, ya kukondwa mambu ya yimbi na kati ya busantu na mantwala ya Nzambi ya beto mpe Tata, na kilumbu yina Mfumu ya beto Yesu ke vanda* na basantu nyonso.
