Ya ntete na Batesalonika 4:1-18
4 Na kumanisa, bampangi, mutindu beno kuzwaka malongi na sika ya beto na yina me tadila mutindu ya kudyatila samu na kusepelisa Nzambi, kaka mutindu beno ke salaka yawu, beto ke na lombaka na beno mpe ke na bondilaka beno na nkumbu ya Mfumu Yesu na kutatamana na kusala yawu na mutindu ya kulutila.
2 Beno zaba mambu yina beto longaka beno na nkumbu ya Mfumu Yesu.
3 Luzolo ya Nzambi kele ti beno fwana kuvanda santu, mpe beno kusala ve kinsuza.*
4 Muntu nyonso na kati ya beno fwana kuzaba mutindu ya kukutika nzutu ya yandi na busantu mpe na lukumu,
5 na lukoso ve, na nsatu ya ngolo ve ya kuvukisa nzutu mutindu bantu ya makanda yina zaba ve Nzambi ke vandaka na yawu.
6 Na mambu yayi, ata muntu me fwana kutalisa mpangi ya yandi mpasi to kukanga yandi nzila na mambu yina yandi ke na luve ya kusala, samu Yehova ke semba ba yina ke salaka bamambu ya muntindu yayi, mutindu beto zonzilaka beno yawu na ntama mpe beto lakisaka beno yawu pwelele.
7 Nzambi bokilaka ve beto samu na mambu ya mvindu, kasi samu na busantu.
8 Ni na yawu, muntu yina ke vweza malongi yayi, yandi ke vweza ve muntu, kasi yandi ke vweza Nzambi yina ke pesaka beno mpeve ya santu ya yandi.
9 Kasi na yina me tadila kuzola bampangi, beno ke ve na nsatu beto sonikila beno. Samu beno mosi mpe ni Nzambi ke longaka beno na kuzolasana.
10 Ya tsyeleka, beno ke na salaka mutindu yina na bampangi ya Masedwane nyonso. Kasi beto ke na lombaka na beno bampangi na kutatamana na kusala yawu mbote-mbote na mutindu ya kulutila.
11 Beno sala ngolo na kuzinga na kizunu, beno kukota ve na bamambu ya bangana, mpe beno sala na maboko ya beno mosi mutindu beto longaka beno,
12 samu beno tambula na mutindu ya mbote na meso ya bantu ya makanda, mpe samu beno kondwa ata kima mosi ve.
13 Dyaka bampangi, beto zola beno zaba mambu yina me tadila ba yina ke ya kulala na lufwa, samu beno vanda ve na mawa mutindu bantu ya nkaka yina ke ve na kivuvu.
14 Samu kana beto ke na kiminu ti Yesu kufwaka mpe vumbukaka na lufwa, mutindu mosi mpe beto ke na kiminu ti bantu yina kufwaka na bumosi na Yesu, Nzambi ke vutula bawu na luzingu samu ba vanda na Yesu.
15 Yayi ni mambu beto ke na zonzaka na beno na nzila ya mambu ya Yehova: Beto ba yina ke na luzingu mpe yina ke vanda moyo tii na ntangu yina Mfumu ke vanda,* beto ke ya kulutila ata fioti ve na mfunu ba yina ke ya kulala na lufwa.
16 Samu Mfumu yandi mosi ke katuka na zulu na ndinga ya kupesa misiku, na ndinga ya mfumu ya bambazi, mpe na mpungi* ya Nzambi, mpe ba yina kufwaka na bumosi na Kristo ke vanda bantu ya ntete na kuvumbuka.
17 Beto ba yina ke na luzingu mpe ke vuuka ke vanda kintwadi na bawu. Ba ke nata beto na kati ya matuti samu na kubwabana Mfumu na mazulu. Ni na mutindu yina beto ke vanda ntangu nyonso na Mfumu.
18 Na yawu, beno tatamana na kukindisa bampangi beno na beno na bamambu yina.
