Ya ntete na Batesalonika 5:1-28
5 Bampangi, samu na bilumbu to bantangu yina Nzambi me soola, beno ke ve na nsatu beto sonikila beno,
2 samu beno mosi me zaba mbote-mbote ti, kilumbu ya Yehova ke kwiza na mpimpa mutindu muyibi.
3 Ntangu ba ke zonza: “Kizunu mpe lukengolo!”, kaka na ntangu yina lufwa ke kumina bawu na mbala mosi, mutindu misongo ke kangaka kento ya kivumu, mpe ba ke lenda kukima ata fioti ve.
4 Kasi beno bampangi, beno ke ve na mpimpa, samu ntangu basikila beno na ntangu yina beno vanda vingila ve, mutindu ya ke basikilaka miyibi,
5 samu beno nyonso ke bana ya nsemo mpe bana ya kilumbu. Beto kele ve bantu ya mpimpa to ya kitombi.
6 Na yawu, beto kulala ve mutindu bantu ya nkaka, kasi beto vanda ekenge mpe beto bumba makanisi ya beto.
7 Samu ba yina ke lalaka, ke lalaka na mpimpa, mpe ba yina ke kolaka malafu, ke kolaka malafu na mpimpa.
8 Kasi beto ba yina ke bantu ya kilumbu, beto bumba makanisi ya beto mpe beto lwata binwanunu yina ke bumbaka ntima ya kiminu mpe ya luzolo. Beto lwata mpe kivuvu ya luvuukusu mutindu yimpu ya kisengo,*
9 samu Nzambi soolaka ve beto samu na nkele, kasi yandi soolaka beto samu na kuzwa luvuukusu na nzila ya Mfumu ya beto Yesu Kristo.
10 Yandi kufwaka samu na beto. Ya vanda ti beto ke ekenge to ya kufwa, beto me fwana kuzinga kintwadi na yandi.
11 Na yawu, beno tatamana na kupesa bampangi ngolo mpe na kukindisa bampangi kaka mutindu beno ke salaka yawu.
12 Bampangi, ntangu yayi beto ke na lombaka na beno na kuzitisa bantu yina ke salaka kisalu ya ngolo na kati ya beno, ba yina ke twadisaka beno na kati ya Mfumu, mpe ba yina ke kebisaka beno.
13 Beno pesa bawu lukumu mingi na kati ya luzolo samu na kisalu ya bawu. Beno vanda na kizunu beno na beno.
14 Dyaka, beto ke na lombaka na beno bampangi, na kukebisa bantu ya yintu ngolo. Beno zonza na bantu yina ke na mawa* na mutindu yina ke pesa bawu ngolo. Beno sadisa ba yina ke ya kulemba. Beno lakisa ntima ya yinda na bantu nyonso.
15 Beno sala keba, ata muntu mosi ve kuvutula yimbi na yimbi, kasi ntangu nyonso beno tatamana na kusala mambu ya mbote na kati ya beno, mpe na bantu nyonso ya nkaka.
16 Beno vanda ntangu nyonso na kilengi.
17 Beno sambila ntangu nyonso.
18 Beno vutula Nzambi matondo na mambu nyonso, ni yina ke luzolo ya Nzambi samu na beno na bumosi na Kristo Yesu.
19 Beno kufwa ve tiya ya mpeve.
20 Beno kuvweza ve bambikudulu.
21 Beno sosa kuzaba mambu nyonso kana ya ke ya tsyeleka. Beno vanda ya kukangama ngolo na yina ke mbote.
22 Beno manga mambu ya yimbi ya mutindu nyonso.
23 Bika ti Nzambi ya kizunu yandi mosi kumisa beno santu. Bika mpe ti mpeve, mwela* mpe nzutu ya beno bampangi, na mambu nyonso, vanda ya kukondwa mambu yina ba lenda semba na ntangu yina Mfumu ya beto Yesu Kristo ke vanda.*
24 Muntu yina ke na bokilaka beno ke ya kukwikama, mpe ntembe ve, yandi ke sala yawu.
25 Bampangi, beno tatamana na kusambila samu na beto.
26 Beno pesa bampangi nyonso mbote na bizu ya santu.
27 Mu ke na bondilaka beno na nkumbu ya Mfumu, na kutanga mukanda yayi na mantwala ya bampangi nyonso.
28 Bika ti ntima ya kulutila mbote ya Mfumu ya beto Yesu Kristo vanda na beno.
Banote
^ To: “Casque.”
^ Na Greke: “Ba yina ke na mwela ya fioti.”
^ To: “Luzingu.” Tala Yina ya zola zonza.
^ Tala Yina ya zola zonza.
