Ya ntete na Timote 1:1-20
1 Munu Polo, ntumwa ya Kristo Yesu, na lutumu ya Nzambi mvuukisi ya beto mpe ya Kristo Yesu, kivuvu ya beto.
2 Na Timote,* mwana ya munu ya tsyeleka na kiminu:
Bika ti ntima ya kulutila mbote, mawa mpe kizunu ya Nzambi Tata mpe ya Kristo Yesu Mfumu ya beto vanda na nge.
3 Kaka mutindu mu kindisaka nge na kubikana na Efeze ntangu mu vanda bongama na kukwenda na Masedwane, ni yawu mpe mu ke na salaka ntangu yayi samu nge zonza na bantu ya nkaka, na kulonga ve malongi ya nkaka.
4 Mpe na kutula ve dikebi na masolo ya luvunu mpe na masolo ya bankumbu ya bankooko. Bamambu ya mutindu yayi ke nataka na ata mambu ya mfunu, kasi ya ke basisaka kaka makanisi ya mpamba na kisika ya kupesa kima mosi yina me katuka na Nzambi na yina me tadila kiminu.
5 Mfunu ya musiku yayi ke ti beto vanda na luzolo yina ke katukaka na ntima ya bunkete, na kimuntu ya kati ya mbote mpe na kiminu ya matsyeleka.
6 Samu ba mangaka bamambu yayi, ba ya nkaka landaka malongi ya mpamba-mpamba yina ke ve mfunu.
7 Ba zola kuvanda milongi ya misiku, kasi ba ke bakulaka ve bamambu yina ba ke zonzaka, to bamambu yina ba ke kangamaka na yawu na ngolo nyonso.
8 Beto me zaba ti Musiku ke mbote kana muntu ke na sadilaka yawu mbote,
9 beto me ndima ti ba pesaka ve musiku samu na bantu ya lunungu, kasi samu na bantu yina ke kufwaka musiku mpe na bantu yina ke tumamaka ve, bantu yina ke vwezaka Nzambi mpe basumuki, bantu ya kukondwa kukwikama mpe bantu yina ke vwezaka mambu ya santu, bantu yina ke kufwaka batata mpe bantu yina ke kufwaka bamama, bantu yina ke kufwaka bantu,
10 bantu yina ke salaka kinsuza,* babakala yina ke vukisaka nzutu bawu na bawu, miyibi ya bantu, bantu ya luvunu, bantu yina ke zengaka ndefi ya luvunu, mpe bima nyonso yina ke salaka yintu ngolo na malongi ya mbote,*
11 yina ke na bumosi na nkembo ya nsangu ya mbote ya Nzambi ya kilengi yina yandi pesaka munu.
12 Mu ke vutulaka matondo na Kristo Yesu Mfumu ya beto, yina pesaka munu ngolo samu yandi talaka munu ya kukwikama mpe soolaka munu na kisalu ya yandi,
13 ata ti mu vandaka ntete muntu yina ke vwezaka Nzambi, muntu yina ke talisaka bantu mpasi, mpe muntu yina vandaka ve na buzitu, kasi yandi tadilaka munu kyadi samu mu vanda zaba ve bamambu yina mu vanda sala mpe mu vandaka ve na kiminu.
14 Kasi ntima ya kulutila mbote ya Mfumu ya beto lutilaka mingi na kiminu mpe luzolo yina kele na Kristo Yesu.
15 Mambu yayi ke landa, beto me fwana kutula ntima na yawu mpe kundima yawu: Kristo Yesu kwizaka na yinza samu na kuvuukisa basumuki. Na kati ya bawu mu ke muntu ya ntete.
16 Ata mutindu yina, yandi tadilaka munu kyadi samu na nzila ya munu, musumuki ya ntete, Kristo Yesu lakisa ntima ya yinda ya yandi nyonso, na kukumisaka munu kifwani samu na bantu yina ke tula kiminu na yandi samu na kuzwa luzingu ya ntangu nyonso.
17 Bika ti ntangu yayi, lukumu mpe nkembo vanda mvula na mvula na Mfumu ya ntangu nyonso, yina ke kufwaka ve, mpe yina ba ke talaka ve, Nzambi kaka mosi. Ameni.
18 Musiku yayi, mu me pesa nge yawu mwana ya munu Timote, mutindu ya ke ya kukwelana na bambikudulu yina ba zonzaka na nkumbu ya nge. Samu na nzila ya yawu nge bika ve na kunwana mvita ya mbote,
19 na kubumbaka kiminu mpe kimuntu ya kati ya mbote, yina ba ya nkaka me losaka, ni yina salaka ti kiminu ya bawu beba mutindu masuwa yina me dyama.
20 Imene mpe Alezandre ke na kati ya bantu yango, mpe mu me pesa bawu na maboko ya Satana samu kitumbu yina ba ke kuzwa longa bawu ti ba ke fingaka ve Nzambi.
Banote
^ Ya zola zonza: “Muntu yina ke pesaka Nzambi lukumu.”
^ Na Greke, por·nei′a. Tala Yina ya zola zonza.
^ To: “Mfunu.”
