Ya ntete na Timote 2:1-15
2 Ntete-ntete, mu ke na lombaka na beno na kusambila samu na bantu ya mutindu nyonso. Beno lomba na ntima mosi lubakusu ya Nzambi mpe beno vutula yandi matondo.
2 Beno sambila mpe samu na bamfumu mpe samu na bantu nyonso yina ke na lutumu ya kulutila, samu beto lenda kuzinga na kizunu, kukondwa mambu ya kuvanda na boma, na kati ya kukangama na mutindu ya kulunga na Nzambi mpe na buzitu.
3 Mambu yayi ke mbote mpe ya me ndimama na meso ya Mvuukisi ya beto, Nzambi,
4 yina zola ti bantu ya mutindu nyonso vuuka mpe zaba mbote-mbote matsyeleka.
5 Samu ya ke kaka na Nzambi mosi, mpe muntu kaka mosi yina ke vutulaka kindiku na kati ya Nzambi na bantu,* muntu mosi, Kristo Yesu,
6 yina kukipesaka yandi mosi ntalu ya kufuta yina me fwanana samu na bantu nyonso. Yayi ni mambu yina bantu ke zonzila na ntangu yina me fwanana.
7 Ni samu na kimbangi yayi ba tulaka munu mutindu musamuni mpe ntumwa. Mu ke na zonzaka matsyeleka, mu ke na vunaka ve, mulongi ya makanda na mambu ya kiminu mpe ya matsyeleka.
8 Mu zola ti na bisika nyonso, bantu tatamana na kusambila, na kunangunaka maboko ya kukwikama, kukondwa nkele mpe bantembe.
9 Mutindu mosi, bakento me fwana kulwata bilele yina me fwanana, kukondwa kulutisa ndilu mpe kuvanda na makanisi ya mbote, kasi ve na mutindu ya kukanga bansuki mpe wolo to misanga,* to bilele ya ntalu mingi,
10 kasi na mutindu yina me lunga samu na bakento yina ke zonzaka ti ba ke ya kukangama na Nzambi, ya zola zonza na nzila ya bisalu ya mbote.
11 Na ntangu ya kulongoka, kento fwana kuvanda swi mpe kuwa na buzitu nyonso.
12 Mu me pesa ve kento nzila ya kulonga to ya kuyala bakala. Kasi yandi fwana kuvanda kaka swi.
13 Samu ba yidikaka ntete Adami, na manima, Eva.
14 Dyaka, ba vunaka ve Adami, kasi ba vunaka ya tsyeleka kento mpe yandi vwezaka musiku.
15 Na yawu, ba ke bika yandi na luzingu kana yandi kuma mama, kana yandi* tatamana na kiminu, luzolo, mpe busantu na makanisi ya mbote.
