Ya ntete na Timote 3:1-16
3 Beto fwana kutula ntima na mambu yayi: Kana muntu zola kuvanda mukengi, yandi me zola kisalu ya mbote.
2 Mukengi me fwana kuvanda muntu yina ba lenda kuzwa ve mambu ya kusemba, muntu yina ke ya kukwelana kaka na kento mosi, muntu yina ke lutisaka ve bandilu na bifu ya yandi, muntu yina ke na makanisi ya mbote, muntu yina ke salaka ve bamambu kidi-kidi, muntu yina ke yambaka banzenza, mpe muntu yina me zaba kulonga.
3 Muntu yina ke kolaka ve malafu, muntu yina ke zolaka ve bamambu ya ngolo,* muntu yina ke kangamaka ve kaka na mambu yina yandi me zonza, muntu yina ke swanaka ve, muntu yina ke vandaka ve na luzolo ya mbongo,
4 muntu yina ke twadisaka na mutindu ya mbote dikanda ya yandi, muntu yina bana ya yandi ke tumamaka na buzitu nyonso,
5 (samu kana muntu me zaba ve kutwadisa dikanda ya yandi, wapi mutindu yandi ke kipe kimvuka ya Nzambi?).
6 Yandi fwana kuvanda ve muntu yina me kuma mundimi ntama mingi ve, samu yandi fuluka ve na lulendo mpe samu yandi kuzwa ve kitumbu yina ba tulaka samu na Dyabulu.
7 Dyaka, yandi me fwana kuvanda na nkumbu ya mbote na bantu ya ngaanda, samu yandi kubwa ve na nsoni mpe na mutambu ya Dyabulu.
8 Mutindu mosi mpe basadisi me fwana kuvanda bantu yina ba lenda zitisa, bantu yina ke ve na banzonzolo zole,* bantu yina ke kunwaka ve vinu mingi, bantu yina ke sosaka ve kuzwa bima na mayuya,
9 kasi bantu yina ke ya kukangama na kinsweki ya santu ya kiminu, na kimuntu ya kati ya bunkete.
10 Ntete-ntete ba me fwana kumeka bawu samu na kuzaba kana ba lenda sala kisalu yina. Na yawu, kana ya ke ve na mambu yina ba lenda funda bawu, ba bika bawu ba sala mutindu basadisi.
11 Mutindu mosi mpe, bakento me fwana kuvanda bantu yina ba lenda zitisa, bantu ya songi-songi ve, bantu yina ke lutisaka ve bandilu na bifu ya bawu, bantu ya kukwikama na mambu nyonso.
12 Basadisi me fwana kuvanda kaka bakala ya kento mosi, ba me fwana kutwadisa bana ya bawu mpe yinzo ya bawu na mutindu ya mbote,
13 samu bantu yina ke salaka kisalu na mutindu ya mbote, ke kuzwaka samu na bawu mosi lukumu ya mbote mpe kundima ya nene samu na kuzonzila kiminu na Kristo Yesu.
14 Mu ke na sonikilaka nge bamambu yayi, ata ti mu ke na kivuvu ya kukwiza tala nge na mwa ntangu fioti.
15 Samu ata ti ya baka mwa ntangu, nge zaba wapi mutindu nge fwana kudyatila na yinzo ya Nzambi, yina kele kimvuka ya Nzambi ya moyo, dikunzi* mpe kima yina ke simbaka matsyeleka.
16 Ya tsyeleka, kinsweki ya santu ya kukangama na Nzambi ke nene: ‘Yandi talanaka na kinsuni, Nzambi zonzaka ti yandi ke muntu ya lunungu na mpeve mpe yandi talanaka na bambazi, ba samunaka nsangu ya yandi na makanda, ba ndimaka yandi na yinza, Nzambi yambaka yandi na mazulu na nkembo.’
