Ya ntete na Timote 5:1-25
5 Kusemba ve na ndinga ya ngolo bakala yina ke ya kukula. kasi bondila yandi mutindu tata, ntwenya ya bakala mutindu mpangi,
2 bakento ya kukula mutindu bamama, bantwenya ya bakento mutindu bampangi, na bunkete nyonso.
3 Tula dikebi* na mifwidi ya bakento yina ke ya tsyeleka mifwidi.*
4 Kasi, kana mufwidi ya kento ke na bana to mitekolo, ba me bonga ntete kulongoka kusadila kukangama ya bawu na Nzambi na kati ya bayinzo ya bawu mpe na kupesa na bibuti ya bawu mpe na bankooko ya bawu yina ba ke na yawu nsatu, samu ya ke mambu yina Nzambi ke ndimaka.
5 Kento yina kele mufwidi ya tsyeleka mpe yina me bikana maboko mpamba ke tulaka kivuvu ya yandi na Nzambi mpe ke tatamanaka na kubondila mpe na kusambila mpimpa na ntangu.
6 Kasi, mufwidi yina ke kukipesaka kaka na kulungisa bansatu ya yandi ke ya kufwa ata ti yandi ke moyo.
7 Yawu yina, tatamana na kupesa malongi* yayi, samu ba vanda bantu yina ba lenda funda na ata kima mosi ve.
8 Ya tsyeleka kana muntu lungisa ve bansatu ya bantu ya yandi, mingi-mingi ya bantu yina ke na yinzo ya yandi, yandi me manga kiminu mpe yandi ke yimbi kulutila muntu yina kele ve na kiminu.
9 Mufwidi ya kento yina ba ke tula nkumbu na mukanda, ke ni yina ke na bamvula na yisi ya 60 mpe yina vandaka ya kukwelana kaka na bakala mosi,
10 yina me zabana na bamambu ya yandi ya mbote, kana yandi kulisaka bana, kana yandi vanda yambaka bantu, kana yandi vanda sukulaka makulu ya basantu, kana yandi sadisaka ba yina vandaka na mpasi, mpe kana yandi kukipesaka na konso kisalu ya mbote.
11 Kasi kusonika ve na mukanda bankumbu ya mifwidi ya bakento ya bantwenya, samu ntangu nsatu ya bawu ya kuvukisa nzutu ke kwiza telama na kati-kati ya bawu na Kristo, ba ke zola kukwela.
12 Ba ke kuzwa kitumbu samu ba me losa kiminu ya ntete yina ba lakisaka.
13 Kaka na ntangu yina ba me longoka mpe kifu ya kukondwa mambu ya kusala, na kukwendaka yinzo na yinzo, ee ba ke kondwaka ve kaka mambu ya kusala, kasi ba ke tongaka mpe ba ke kotaka na mambu ya bantu ya nkaka mpe ba ke zonzaka mambu yina ba me fwana kuzonza ve.
14 Ni na yina mu zola ti, mifwidi ya bakento yina ke bantwenya kwela, buta bana, twadisa bayinzo ya bawu mpe ba kupesa ve nzila na mbeni na kuzonza mambu ya yimbi.
15 Mingi na kati ya bawu me bika matsyeleka mpe me landa Satana.
16 Kana kento yina ke mundimi ke na bantu ya dikanda ya yandi yina ke mifwidi, bika yandi sadisa bawu samu ba kuma ve kilo samu na kimvuka. Na yawu, kimvuka ke lenda kusadisa ba yina kele ya tsyeleka mifwidi.*
17 Bakuluntu yina ke twadisaka kimvuka na mutindu ya mbote me lunga kuzwa buzitu ya kulutila, mingi-mingi ba yina ke salaka bangolo samu na kuzonza mpe na kulonga.
18 Masonoko ke zonzaka: “Nge fwana kukanga ve yinwa ya ngombe samu yandi kudya ve mbuma ntangu yandi ke na dyataka yawu samu na kukatula yawu bampusu,” mpe, “kisadi me lunga kuzwa difuta ya yandi.”
19 Kundima ve mambu ya yimbi yina ba me zonza na yina me tadila kuluntu ya dibuundu, kaka kana ya ke kimbangi ya bantu zole to tatu.
20 Semba na meso ya bantu nyonso bantu yina me mesanaka kusala masumu samu ya kebisa ba ya nkaka.*
21 Mu ke na lombaka nge na mantwala ya Nzambi, na mantwala ya Kristo Yesu mpe ya bambazi yina ba me soola, na kulanda malongi yayi kukondwa kukanisa mambu ya yimbi na bantu to kusoola bizizi.*
22 Kutula ve maboko ya nge na mbangu-mbangu na zulu ya yintu ya muntu, kukota ve na masumu ya bantu ya nkaka, tatamana na kuvanda ya kuvedila.
23 Kunwa dyaka ve maza,* kasi kunwa mwa vinu samu na kivumu* ya nge mpe samu na bamambu ya nkaka yina ke kwamisaka mavimpi ya nge.
24 Masumu ya bantu ya nkaka me zabana na bantu nyonso mpe ke nataka mbala mosi na lusambusu, kasi masumu ya ba ya nkaka ke zabanaka na manima.
25 Mutindu mosi mpe bisalu ya mbote me zabana na bantu nyonso mpe bisalu yina ke ve ya mbote, ba lenda bumba ve yawu.
Banote
^ Na Greke: “Pesa lukumu.”
^ To: “Mifwidi yina ke ve na muntu yina lenda sadisa bawu.”
^ To: “Misiku.”
^ To: “Mifwidi yina ke ve na muntu yina lenda sadisa bawu.”
^ Na Greke: “Ba ya nkaka vanda na boma.”
^ To: “Bandinga to bampusu ya bantu.”
^ To: “Kunwa kaka ve maza.”
^ To: “Estomac.”
