Ya zole na Bakorinto 1:1-24
1 Polo, ntumwa ya Kristo Yesu, na luzolo ya Nzambi, mpe Timote mpangi ya beto ya dibuundu ya Nzambi, yina ke na Korinto, mpe na basantu nyonso yina ke na Akayi:
2 Bika ti ntima ya kulutila mbote mpe kizunu ya Nzambi Tata ya beto mpe ya Mfumu Yesu Kristo vanda na beno.
3 Nkembo na Nzambi mpe Tata ya Mfumu ya beto Yesu Kristo, Tata ya ntima ya kyadi mingi mpe Nzambi yina ke katulaka kyadi ya bantu nyonso.
4 Yandi ke kindisaka beto na bankwamusu* ya beto nyonso, samu na nzila ya bukindi yina yandi ke pesaka beto, beto vanda na makoki ya kukindisa bantu ya nkaka na bankwamusu ya mutindu na mutindu yina ba ke na kutanaka na yawu.
5 Kaka mutindu beto ke kutanaka na bampasi mingi samu na Kristo, mutindu mosi mpe, bukindi yina beto ke kuzwaka na nzila ya Kristo ke mingi.
6 Kana beto ke na kutanaka na bankwamusu, ya ke samu na kukindisa beno mpe samu beno vuuka. Kana beto kuzwa bukindi, ya ke samu beno kuzwa bukindi, mpe ya sadisa beno na kukanga ntima na mantwala ya bankwamusu ya mutindu mosi na yina beto ke na kutanaka na yawu.
7 Kivuvu ya beto samu na beno ke na ninganaka ve, samu beto zaba ti beno ke na talaka mpasi mutindu beto. Na yawu, ba ke kindisa mpe beno mutindu beto.
8 Bampangi, beto ke zolaka ve kubumbila beno bankwamusu yina beto kutanaka na yawu na kizunga ya Aziya. Beto kutanaka na mpasi ya ngolo, mpe ya lutilaka ngolo ya beto. Ya salaka ti beto vanda na boma samu na luzingu ya beto.
9 Ya tsyeleka, beto vanda tala mutindu ba zengilaka beto ndefi ya lufwa. Ya vandaka samu beto tula ntima na beto mosi ve, kasi na Nzambi yina ke vumbulaka bantu na lufwa.
10 Yandi vuukisaka beto na mambu ya nene yayi yina zola nata beto na lufwa, mpe yandi ke vuukisa beto. Beto ke na kivuvu na yandi ti yandi ke bika ve kuvuukisa beto.
11 Beno mpe lenda sadisa beto na kubondilaka Nzambi samu na beto. Na yawu, na nzila ya bweso yina beto ke kuzwa na bamvutu ya balusambu ya bantu mingi, bantu mingi ke vutula matondo na Nzambi samu na beto.
12 Mambu yina beto ke na budilaka ntulu ni yayi: Ndinga yina ke zonzaka na kati ya ntima ke na pesaka kimbangi ti beto ke twadisaka beto mosi na mantwala ya yinza, mpe mingi-mingi na mantwala ya beno, na busantu mpe na matsyeleka yina ke katukaka na Nzambi. Mutindu ya beto ya kuzinga vandaka ve ya ndwenga ya bantu. Kasi ya ntima ya kulutila mbote ya Nzambi.
13 Beto ke na sonikilaka beno kaka mambu yina beno lenda tanga* mpe kubakula. Mpe mu ke na kivuvu ti beno ke bika ve kubakula bamambu yayi mbote-mbote.*
14 Kaka mutindu beno bakulaka yawu mwa ndambu ti ni beto ke salaka ti beno bula ntulu, mutindu mosi mpe beto ke bula ntula samu na beno na kilumbu ya Mfumu ya beto Yesu.
15 Na yawu, samu mu vandaka na kundima na mambu yayi, mu kanisaka kukwiza na beno mbala ya zole samu beno vanda dyaka na kilengi.*
16 Ya tsyeleka, mu vandaka na dikanisi ya kukwiza tala beno ntangu mu vanda kwenda na Masedwane, mpe ntangu mu zola katuka na Masedwane mu zola lutila dyaka na beno. Mpe na manima beno zola kwenda filisa munu na nzila samu mu kwenda na Zude.
17 Ntangu mu vandaka na dikanisi yayi, mu bakilaka kwandi bamambu na kusakana? To mu kanisa kwandi mutindu bantu ke kanisaka, samu mu zonza “Ee, ee” mpe na manima “Ve, ve”?
18 Kasi beto lenda tula ntima na Nzambi ti mambu yina beto zonzaka na beno ke ve “ee” mpe na manima “ve.”
19 Samu Mwana ya Nzambi, Yesu Kristo, yina beto longaka beno, ya zola zonza munu, Silvanuse,* mpe Timote, kumaka ve “ee” mpe na manima “ve,” kasi samu na yandi, “ee” kumaka “ee.”
20 Samu, ata ti bansilulu ya Nzambi ke mingi, ya ke kumaka “ee” na nzila ya yandi. Ni na nzila ya yandi beto ke zonzaka mpe “Ameni” na Nzambi, samu beto pesa Nzambi nkembo.
21 Kasi Nzambi muntu ke pesaka beto kundima ti, beno na beto ke bantu ya Kristo, mpe muntu yina tulaka beto mafuta ni Nzambi.
22 Yandi me tula beto kinyemo ya yandi. Yandi me tula mpe mpeve na bantima ya beto mutindu kidimbu ya mambu yina ke kwiza.
23 Mu ke na zonzaka matsyelaka, mpe Nzambi ke mbangi ya munu ti ya ke samu na kubumba beno mu me kwiza ntete ve na Korinto.
24 Beto ke ve na salaka yawu samu na kuvanda bamfumu ya kiminu ya beno. Kasi beto ke bandiku ya kisalu samu na nsayi ya beno, samu beno ke ya kutelama samu na kiminu ya beno mosi.
Banote
^ To: “Bampasi.”
^ To ya lenda vanda: “Mambu yina beno zaba mbote-mbote.”
^ Na Greke: “tii na nsuka.”
^ To ya lenda vanda: “Samu beno kuzwa bambote mbala ya zole.”
^ Yina ba vanda bokilaka mpe Silase.
